Hihira 9 - Ma Jou ai Demo-demo o Totobelohoka

O Pasala 9 ko atailakouahi O Abimeleke iwigoraka la wahikoano o Sikeme ma kotaka

¹ De o Gideono wopahaka de ahao o wange moiuku ai ngofaka o Abimeleke, una woiki o Sikeme ma kotaika la watutumu ai pepe de ai gogianongoru utuoli abe ngoi memeoka adaene. Ho una womahiadono manga ngiika de wotemo wato,

² “Abeika ngini nialeha-leha o Sikeme manga balu-baluhika la manga hininga sarakia ma titi manga koano. Abe nako manga hininga la yagoraka o Gideono ai ngofaka yamoritumidi gea la yahipareta onangika, eko koaho o nauru womatengo dika wahipareta, de gea ma titi ngohi naa ka idadi tahipareta. De ufa ona yawohanga abe ngohi naa duru o wariki moi de de ona.”

³ Hokogea o Abimeleke ai demo, ho ai gogianongoru gea yadofanga ai demo o Sikeme manga balu-baluhika. De ona gea yoihene ipahaino de yomafikiri ato, “Nako o Abimeleke gea una duru nanga dutu adaene, ho irahai higoraka una dika la wonahipareta.”

⁴ De ahao ma balu-baluhu gea iwihidoaka ma tiwi o haaka ise-senge moritumidi unangika. Abe manga kotaka gea yomahijou o Baala-Beritika ho naga to ena ma tau abe genangoka yomahuba-huba enangika. De ma tiwi gea yagoraka to ena ma tauino, abe o nyawa ihidoa-doaka manga tiwi ma oraha yomahuba enangika. Ho o Abimeleke wao ma tiwi gea de wahewa o nyawa yamuruono naga abe manga hiningaka de ko yopusingua o dorou yotobadiai. De wahewa ipaha de ona iwitobanii-niiki to una ai demoika.

⁵ De ahao una de ai nyawa gea yomakutuono yoiki ai baba ai kapongika abe ma romanga o Ofara. De genangoka ona yatoma ai baba o Gideono ai ngofaka yamoritumidi, abe ona gea manga baba womatengo masara manga ayo yomaleko. De gea ona mata-mata yatoma o hakaru ma amoko moi ma lokuoka. Masara nako ma ngofaka duru ma baha o Yotama, una dika ko iwidaenua angamoi una wakunu woara de womagogonika.

⁶ De gea yatoma ipaha de o Sikeme manga balu-baluhu de manga dodiawo abe o Bete-Milo manga balu-baluhu, ona mata-mata yomatoomuino o gota ma amoko moi ma timiuku o Sikemoka. Abe genangoka naga ma ngi yomahuba-huba manga jou ma homoaika. Ho ma wange gea de ona iwigoraka o Abimeleke genangoka la womulaenge wahikoano onangika.

O Yotama ai hiketero ma ade-ade

⁷ De ipahaino de o Gideono ai ngofaka ma baha o Yotama una woihenino abe o Abimeleke iwigoraka la wahikoano o Sikeme ma nyawaika. Ho una wodoa o Girisimi ma loku ma tubuiye la ka idadi o nyawa dau ai timiuku yoihene ma oraha wabobanarata onanguku. De gea una waamo-amokiye wato, “Ngini o Sikeme ma kota manga balu-baluhu, abeika nitotoihene ahi demoino! Angamoi nako ngini nihigihene, marai Ma Jou Unangoo ka idadi winigihene nginika!”

⁸ De ahao o Yotama wahidoaka o hiketero ma ade-ade onangika, wato, “Ma moiuku naga o gota ma ngoe imakoketemo ma titi to ena ma hininga la yaiiriki ma koano. De ihira-hira ena itemo o saitunu ma gotaika ato, ‘Irahai la ngona dika nodadi mia koano!’

⁹ Masara ma saitunu gea ipaluhu ato, ‘Ngohi naa duru toluku todadi o koano! Angamoi ko toigoua tamalaika dika ahi tagongo abe tohitobahofoko o saitunu ma minya. Abe ngaro o nyawaoo de o jou-jouoo masara gea mata-mata yamake manga utumu ma titi ahi saitunu ma minyaino. Ho koaho ufa todadi ti ngini nia koano!’ Hokogea ma saitunu ma demo.”

¹⁰ “Ho ipahaino de ma gota ma ngoe gea itemoli o gogilioro ma gotaika abe ihigaro ato, ‘Irahai la ngona dika nodadi mia koano!’

¹¹ Masara ma gogilioro enangoo yoluku ma demo gea de itemo ato, ‘Ngohi duru toluku tanoaika ahi tagongo ma rorahai, abe ngohi tohitobahofoko ahi hofoko abe duru kohamutiti. Ho done ma titi o kia hiadono ahi tagongo gea taturuuru la tinihikoano dika nginika?’”

¹² “Ho ipahaino de ma gota ma ngoe gea itemoli o angguru ma roehika ato, ‘Irahai la ngona dika nodadi mia koano!’

¹³ Masara ma angguru enangoo yoluku ho itemo ato, ‘Ngohi ka toluku dika toporetika ahi tagongo ma rorahai, abe ngohi tohitobahofoko o angguru de gea ma teongo ahao duru yahisanangi o nyawa-nyawaika de o jou-jouikaoo. Ho ufa hiadono gea ko todiaiokaua la todadi nia koano!’”

¹⁴ De ahao ma bahauku de ma gota ma ngoe gea imagahoko o gota moiika abe naga de ma hihika mata-mataika. De gea itemo ato, ‘Irahai la ngona dika nodadi mia koano!’

¹⁵ De ma gota gea ipaluhu ato, “Nako ngini niagou-goungu nihiiriki ngohi la niato tinihikoano nginika, gea ngini kiani nikokiboa ngohino de nimahitatoko ahi jaga-jaga ma timiuku. De ahao ngohi duru tinigoa-goana irahai. Masara nako hokogenangua nia hininga de ahao ngohi tinihibinaaha. De gea ahao imaketero hoka o uku ka idadi iharabaka / ihupu ahi jaga-jagaka de aino la o semara ma gota o Libanonoka youkuoka hiadono ihibinaahaka!’ Hokogea ahi hiketero ma ade-ade.”

¹⁶ De ahao o Yotama wahitararono ma hiketero ma titi onangika wato, “Ho naa ngohi tinihigaro la niongano-nganono de nimatailako ti ngini nia hininga abe ma titi naa ma duru niwigoraka o Abimeleke de niwihidadi nia koano. Sarakia, ma oraha nimaputuhu gea de o totiai ma hininga nianiiki? De gea maraioka niafikirika ma titi o Gideono ai baliara ma rahai nginika ho ti ngini nia putuhu bote o hibalaha duru irahai to una ai tauika la imakataana de ai hininga ma rorahai nginika, eko sarakia? Koua, marai duru hokogenangua, e?

¹⁷ Abeika tinihihohininga ma titi ahi baba ai datoro. Angamoi ma dihiraino de una womahidoaka ai wowango la ka idadi winiduhunu de winihihupu nia musu o Midiana ma nyawa manga giamino.

¹⁸ Masara abeika nia hibalaha sarakia o wange naa? Ngini ka niwiporete unangika de ai tauikaoo, de hongoli niabaata onangika! Abe to una ai ngofa-ngofaka yamoritumidi niatomaka o hakaru ma amoko moi ma lokuoka. De gea ipahaino de niwigoraka womatengo abe womaboa ahi baba ngoi fekata o gilaongino dika la winihikoano ngini o Sikeme ma balu-baluhu. De niwigoraka una gea ma titi moi dika, abe una de ngini o wariki moi.

¹⁹ Ho abe nia hininga de nia datoro gea nimaetongo sarakia? Gea niato bote imakiniiki de ahi baba ai hininga ma rorahai nginika? Eko bote nia datoro to una ai tauika ko imakataanua? Abeika gea ena nimafikirohi! Ho nako hoka nia hininga itotiai dika de niao irahai ahi baba de ai tauika, gea tonganono la ngini de nia koano ma hungi o Abimeleke nimahiketehisanangi dika!

²⁰ Masara nako ti ngini nia hininga ko itiaiua, gea de ahao tonganono la o Abimeleke gea ka winihibinaaha nginika, abe imaketero hoka ai badangoka de aino o uku iharabaka de inidaene ngini mata-mataika. La gea duru imakadaene de nia datoro naa ma duruika. Abe ngaro ngini o Sikeme ma balu-baluhu de o Bete-Milo ma balu-baluhoo masara tonganono la inihidotadaene ka ma moi! De hongoli tonganono la ngini o balu-baluhoka de aino o uku moioli ihupu la iwidaene de iwihibinaaha nia koano o Abimelekika! La gea ka nimahiketehibobinaaha dika!” Hokogea o Yotama ai doana / lolae ma demo onangika.

²¹ De gea o Yotama wabobanarata ipahaino de ahao womataiti woara o Bere ma kapongika de womanoa genangoka. Angamoi duru wimodongo ai riaka o Abimelekika.

Ma Jou wohingodumu o Yotama ai doana / lolae ma demo

²² De o Abimeleke wahikoano o Isiraeloka ai taongo hangeino,

²³ de ahao Ma Jou wokarajaanga o Sikeme ma balu-baluhu de o Abimeleke manga hininga homoi-homoioka la hiadono ona yomaketeribuutu ho iwilawana unangika.

²⁴ Abe genangino de Ma Jou wihohowono o Abimelekika ma titi watoma o Gideono ai ngofaka yamoritumidi gea, de wahohowonoli o Sikeme ma balu-baluhu ma titi ona yomaketehiningamoi dika de o Abimeleke ma oraha watoma ai ria-dodotika.

²⁵ Ho o Sikeme manga balu-baluhu yahuloko manga nyawa iwihagogono o loku-lokuoka la nako o Abimeleke wotagi-tagi watilakuru de ka idadi ona iwitaokino. De nako o nyawa utu yatilakuru de ahao ona yabaata de yaora onangino. Masara naga o nyawa abe ihioriki ma titi manga hidee gea de iwihingahu o Abimelekika ho ko iwitaokuali.

²⁶ De ma oraha gea naga womatengo ai romanga o Gaala woboa o Sikeme ma kotaino de ai ria-dodoto yomakiniiki de una. De o Gaala una o Ebede ai ngofaka. De ko itedekanuahi de o Sikeme manga balu-baluhu gea duru iwihoromati ho yomahinganono unangika la unangoli wahipareta.

²⁷ De ona o Sikemoka ato irahai ihirame-rame ma titi manga hihira ma hungi gea, ho yoiki manga redi-redika de yatoomuino manga angguru ma hofoko ma ngoe. Ma hofoko gea yateo la ka idadi naga manga ngokere, de ahao yomakutuono ihirame-rame manga hihira. De gea yomatoomuino manga jou ma tauoka de manga ngolo-ngolomo yodiai genangoka, de manga rame-rame ma gogiriaka de ona iwidoa-doana o Abimeleke ai romangika.

²⁸ De o Gaala una wotemo waamo-amokiye wato, “O Abimeleke una gea onaguna? Bote ko kia-kiaua iwidaene! Ho done ma titi o kia hiadono ngone naa homahikoano unangika? Angamoi una gea ka o Gideono dika ai ngofaka, de nako ai hehebanga o Sebulu unangoo tanu ko kia-kiaua iwidaene! Ho koaho to ngone nanga horomati itagi o Sikeme ma nyawa manga tofora wohira-hiraika o Hamoro. Ho tanu irahai to una gea ai toforauku womatengo wonahipareta, masara ibootohi o Abimeleke wonahipareta ngone.

²⁹ La nako ngohi naa tinihipareta naangoka, ahao ngohi ka tidanauru dika o Abimelekika tato, ‘Ngona natoomuino ani tentara de nikokiboaino la homarihimangino, de ka idadi homaketeparangi!’ Hokogea ngohi ahao tidanauru unangika!”

³⁰ De naga womatengo genangoka manga kimalaa o Sebulu abe woihene o Gaala ai demo gea de duru wongamo.

³¹ Ho una wahuloko ai nyawa yamuruono naga la yoiki o Abimelekika de iwikalaki unangika ma titi o Gaala ai demo. De ipaha ona yoiki o Aruma ma kotaika la yoboa ma koano gea ai himangino. Iwiadono unangika de yadofanga ma demo ato, “Doka o Sikemoka naga womatengo o Ebede ai ngofaka o Gaala, ho naa ma duru una de ai ria-dodoto yoboa ma kotaino. De ona duru yahigaro o kota ma nyawa mata-mataika la inilawana ngonaika.

³² Ho irahai la o futu-futu ngona de ani tentara ma nyawa niakaika ma kotaika de nimagogono o kota ma hoanoka o redi-redioka.

³³ De ahao ma dawangeino ka de ma wange ipotokaiye de ngini ka idadi niabaata ma kotaika. De ma oraha gea o Gaala de ai nyawa ahao yohupu ma kotaino la inilawana nginika, de gea ahao ka idadi ngini nidiai onangika abe hokokia dika nia hininga adaene.” Hokogea ma demo abe ona iwidofanga unangika.

³⁴ De o Abimeleke woihene manga demo ipaha de ahao o futu-futu una de ai tentara ma nyawa mata-mata yoiki o Sikemika. Yomahiadono genangika de yomaregu iata de ma regu gea yomakokitingaka o kota ma hoanoka la yahigilolitino ma kota. De gea yomagogono ma hoanoka la ma dawangeino de ka idadi yahagogono o Gaala de ai nyawaika.

³⁵ De ma dawangeino gea de o Gaala wohupu de womaokoino o kota ma ngorana ma himangoka. De duru ma oraha gea de ahao o Abimeleke de ai nyawa yohupu manga gogogono ma ngiino de yomahimatoko.

³⁶ De o Gaala una womalegaika de wotemo wato, “Abeika dakena, naga o nyawa o loku-lokuoka de yaino yoboaino!” Masara o Sebulu wibudi unangika ho wipaluhu wato, “Koua, gea bote o gota ma gurumini dika abe daku o loku-lokuika, ho ma rupa namake imaketero hoka o nyawali.”

³⁷ De ahao o Gaala ka wotemoli wato, “Koua, gea maraioka o nyawa yoboa daku de yaino naangino! De abeika, naga o nyawa o doomu moioli doka o ngekomoka gea, de ma oraha naa ona yatilakuru ma gota ma amoko gea o kiaka homatobahuba-huba nanga jouika. De onangoo youti naanguku!”

³⁸ De ahao o Sebulu wihohedu unangika wato, “Ho naa marai ngona ko nomagorakokaua, e! Masara naa ma duru de ngona nomagorakiye nato, ‘O Abimeleke una gea onaguna? Bote ko kia-kiaua iwidaene! Ho done ma titi o kia hiadono ngone naa homahikoano unangika?’ De ona yoboa-boaino naa, duru ona gea abe nahitipokouku ma dihiraino! Ho koaho ngona noiki dika la nimarihimanga de ona!”

³⁹ De ahao igoungu o Gaala wohupu wahihira-hira o Sikeme manga balu-baluhu la yomarihimanga de o Abimeleke ai nyawa.

⁴⁰ Masara o Abimeleke ona yahikala onangika ho o Gaala de ai nyawa yomadohuku de yoara yolio la yowohamikali o kota ma goronaika. Ho manga dumutu o kota ma ngoranika masara o Sikeme ma nyawa gea manga ngoe ko yomahiadonikaua de yadaene ho ka yoruba dika o ngekomo ma date-datekoka.

⁴¹ De ipaha o Abimeleke wolio o Aruma ma kotaika, masara o Sebulu una wilawana o Gaalika de wolaku, ho wakiniiki o Gaala de ai gogianongoru hiadono o Sikemoka de yaino yokokihupu ma hoanika.

⁴² De ma dawangeino o Sikeme ma kokawaaha ona manga hidee yohupu manga kotaino la yoiki manga redi-redika. De abe ma oraha o Abimeleke woihene ma titi manga hidee gea,

⁴³ una wahuloko ai nyawa la yomareguoli, ho naga manga regu hange. De wahuloko la o regu amomoi yomagogono ma hoanoka la ka idadi yahagogono o Sikeme ma nyawa gea. Ho ma oraha o Sikeme ma kotaka de yaino yohupu de ka itodokanino o Abimeleke de ai nyawa manga regu hange gea yohupu manga gogogono ma ngi-ngiino de yabaata onangika.

⁴⁴ De gea ai nyawa o regu moi ona yomataiti yoiki o kota ma ngoranika de yagoana la ufa o Sikeme ma nyawa yolio de yowohamika ma goronaika la yomahitatoko genangoka. De to una ai regu hinootoli ona gea yomakalawana de o Sikeme ma nyawa ma hoanoka.

⁴⁵ De duru o wange moi gea ma gahumu ona yomakalawana, de ma bahauku o Abimeleke wahikala ma kotaika gea. Abe una wakokitoma ma nyawaika de wahitoropaha ma kota ma tau-tauika. De wahibinaaha ipahaino de ahao ai nyawa ihibarihi o gahi ma tonaka mata-mataika la ato ma kota gea duru ihidadidorouoka.

⁴⁶ De abe ma oraha o Abimeleke de ai nyawa yomaketeparangi o Sikemika, nagali o Sikeme ma nyawa yamuruono naga abe manga gogere hatoli ikokurutiye manga kotaka. Ho ma oraha ona gea yamake abe manga gogianongoru ko akunua yomaduhunu de ka yoara dika manga jou o El-Beriti ma tauika abe biaha yomahuba-huba genangoka. De yomahiadono ma tauika gea de yomagogono gea ma goronaka.

⁴⁷ Masara naga abe iwihingahu o Abimelekika ma titi o nyawa manga ngoe yomagogono doka ma goronaka.

⁴⁸ Ho una wahihira ai nyawa la yomakiniiki o Salamono ma lokuiye. De genangoka una womahitigi o gotaika de wagoraka o bahuku moi la waoto ma jaga muruono naga. Waoto ipaha de ahao womahimoku de wahuloko ai nyawaika gea wato, “Nginioo nimataiti niaoto o jaga ma ngoe de nimahimoku hoka ngohioli!”

⁴⁹ Ho ai nyawa homoi-homoi yaborioto o jaga de yamoku abe iwihidoduru unangika ma oraha wolio o Sikeme ma kotaika. De yomahiadonika de ona mata-mata yakelenga ma jaga ka ma moi ma tau ma timiuku abe o nyawa manga ngoe yomahitatoko ma tau ma goronaka gea. Yakelenga mata-mata de ahao yatufuku ho idadi o uku duru ma amokiye. De o nyawa mata-mata abe naga doka ma goronaka ona yokokihonengoka. Abe ona o nau-nauru de o ngo-ngofeka, de manga ngoe ngade-ngade yasana moi.

⁵⁰ De ipahaino o Abimeleke ona yoiki o Tebese ma kotaika de yabaata hiadono enangoo yahikala.

⁵¹ Masara doka ma kota ma gogoronaka naga moi o tau duru ikurutiye de duru iputurungu. Ho o kota gea ma nyawa mata-mata, abe ngaro o nau-nauru de ngaro o ngo-ngofeka masara ona yokokiloara de yowohama doka ma tau gea ma goronaika. Yowohama ipahaino de yatatoko ma ngorana la ufa manga musu yangohama. De ahao yodoa ma tau ma nguteiye hiadono daku o tau ma lape duru ikurutiye.

⁵² De ahao o Abimeleke una de ai nyawa yoboa ma tauika gea la yabaata enangika. De una woigo watufuku ma tau ma ngoranika ho womahitigika.

⁵³ Masara abe duru ma oraha una womahitigi ma tauika de dakena ma tau ma katuoka naga momatengo o ngofeka, de muna gea duru o Abimeleke ai lokuoka. De to muna ami giamoka naga ami dudutuku ma hakaru moi, ho ka itodokanino de maumo / mapidili ma hakaru gea la iotakuku duru to una ai peauku. De ma oraha iwidaene de ai pea ma kabelanga ihiwedere.

⁵⁴ De gea o Abimeleke wohioriki abe ai baha adonoka ho womataiti wiahoko ai duduhunika abe ma goduuru gea wotobaao-ao ai parangi ma dae. Ai duduhunu woboaino de wihuloko unangika wato, “Nomataiti ani humaranga nagoraka de nohihohonenge! Angamoi done hiadono ahao o nyawa yomaketeade-ade ma titi ngohi ato o ngofeka wohitoma!” Ho ma goduuru gea ka witopoko unangoko hiadono ma humaranga ihapongo ai gorona ma poretoko, de gea o Abimeleke wohonengoka.

⁵⁵ De ahao to una ai nyawa abe o Isiraele ma nyawa gea yomakiniiki de una, ona mata-mata yamake abe una wopahaka ho ka yomahikabarihi dika de yoborilio manga tau homoi-homoiika.

⁵⁶ De hokogea Ma Jou wihibalaha o Abimelekika ma titi ai datoro ma dorou abe ma dihiraino de wodiaioka ai baba o Gideonika. Abe una wakokitoma ai ria-dodoto yamoritumidika.

⁵⁷ De hokogenangoo Ma Jou wahibalaha o Sikeme ma nyawaika ma titi to onangoo manga datoro ma dodorou. De hokogea dika aika ma ade-ade abe hokokia Ma Jou wohiaturu mata-mata la wohingodumu o Gideono ai ngofaka o Yotama ai doana ma demo. Angamoi to una ai demo ma dihiraino gea ma lokuoka de mata-mata idadi duru imaketero hoka wotemoka.