Hihira 7 - Ma Jou ai Demo-demo o Totobelohoka

O Gideono wahikala o Isiraele ma nyawa manga musu

¹ De ma dawangeino duru o ngoru-ngorumino o Gideono de ai tentara mata-mata yokokimomikiye de yokokiloiki manga dumutu manga musu ma doomuika masara yomahiadono o Harodo ma jobuubu ma ngi de genangoka yomahiainohi. De manga musu o Midiana ma nyawa manga tentara mata-mata yomahitoomuino ka moi, ho ona gea naga doka o loku ma honongaka o Yisereele ma dolaka abe o More ma loku ma timiuku.

² De naa o Gideono de ai tentara ka yomahiainohi de Ma Jou o Yawe wihingahu o Gideonika wato, “Gideono, to ngona ani tentara yowoeholi abe nako tinihigunoa ngini mata-mata niaparangi onangika de ahao o Isiraele ma nyawa yomahigiriiri ato ona de manga buturungu yomahihupu o Midiana ma nyawa manga kuahaino.

³ Ho naa kiani nahingahu ani tentara mata-mataika abe ngaro onaguna dika ko yamoroinua yaparangi onangika ka idadi yolio dika manga tauika de adodoaua.” Hokogea Ma Jou o Yawe ai demo abe o Gideono wadofanga ai tentaraika de yasana monaoko de hinooto manga ngoe yomahilooa dika de yosobo yokokilio de manga dodiawo ko iwa manga hininga kuranga onangika. Ho abe nagahi o Gideonoka o tentara yasana ngimoiokahi abe yoigo yomaketeparangi de manga musu.

⁴ Ma ngaro hokogea yomakuranga manga ngoe masara Ma Jou o Yawe wihingahuoli o Gideonika, wato, “Ngaro ho ma dihiraua manga ngoe masara ani tentara naa ka yowoeholi ho naa Ngohi ka tahikurangoli. Ho naa kiani ona mata-mata ngona nao dau o akeruku de ngohi tahikatingaka ona abe yolio de ona abe ininiiki ngona. Ho nako Ngohi totemo tato naa una woniniiki gea kiani una ahao woniniiki, de nako Ngohi totemo tato naa una ko woniniikua, gea kiani una wolio dika angamoi ko tihigunoaua woniniiki.” Hokogea Ma Jou o Yawe wohiaturu.

⁵ Ho o Gideono ai tentara yasana ngimoi gea wao o akeruku de genangoka Ma Jou o Yawe wihingahuoli o Gideonika wato, “Hokonaa, ngona nahuloko la ona yokere o akerino gea de ona mata-mata abe yaale-aleme yokere de manga akiri imaketero hoka o kaho gea ona natingaka manga dodiawoino la yodadi o doomu moi ani honongaka. De ona utu abe yatilabukuku de yahururutu yokere o akeruku gea onangoo nahidadi o doomu moi ho hiadono ngona nomaokoiye manga hidogoronaka de naga ani tentara ma doomu ani arihonongaka.” Hokogea Ma Jou wihibehehongo o Gideonika.

⁶ De ahao ona abe yodadi o doomu moi manga ngoe yaratuhu hange dika angamoi hokogea manga ngoe abe o akere yaale-aleme yokere de manga akiri. Masara o tentara utu mata-mata yatilabukuku de yahururutu yokere o akeruku.

⁷ De ahao Ma Jou o Yawe wihingahu o Gideonika wato, “Ngohi naa tapake ona yaratuhu hange dika nenanga abe yaale-aleme yokere de manga akiri la ngini o Isiraele ma nyawa tinihihupu nia kangelaino de o Midiana ma nyawa tahidoaka ti ngini nia giamino. Ho ona o doomu ma amoko naa nahigunoa la ona yokokilio nia dodogumika manga tauika.”

⁸ Ho o Gideono wahingahu o doomu ma amokika abe Ma Jou wato ka idadi yolio dika masara ko yoliouahi de una waleohi to ona manga bilaono de wahuloko la ona abe naga o guguli o domba ma tataduku kiani manga guguli yanoaika. Ho o Gideono waleino manga bilaono de manga guguli o domba ma tataduku ibooto de ona yosobo yokokilio manga dodogumu ma tauika abe o ngoerino yodiai. De naa o Gideono de ai tentara yogila-gila hiadono manga timiuku naga manga musu manga tentara abe o Midiana ma hidimono yatoomuino dau manga dodogumoka ma dolaka.

⁹ De ma futuku gea Ma Jou o Yawe o Gideono witumomiki de wihuloko wato, “Ngini naa ka idadi niuti manga dodogumuku niaparangi angamoi tinihidoakoka o lolaku.

¹⁰ Ma nako nohawana naparangi ngona naa de ani duduhunu o Pura ngini inihinooto ka idadi niuti nigogataheke hiadono nimahitigi-tigika onangika.

¹¹ De ahao ngini ka idadi niogihene manga demo la gea nia domoroini ka idogo-dogo ho ma oraha naa de ko nihawanokaua niaparangi.” Hokogea Ma Jou wihingahu. Ho o Gideono de ai duduhunu o Pura youti manga musu manga dodogumuku de yomahitigi manga musuika abe ona yotobagoa-goana manga dodogumu ma ngi. Abe manga gogoana ma ngi muruono naga manga tentara ma dodogumu ma batingoka.

¹² De o dola ma tonaka gea duru aomangoka de manga musu ma tentara abe naga o Midiana manga tentara, de o Amaleke manga tentara, de o nyawa utuoli o wange ma hiwariha ma tonaka ma kakaahaino ho ko manga ngoe manga tentara abe naa yomakokitoomuinoka ma dolaka naa. Abe manga ngoe ka idadi hahiketero ona de o kabotara abe ma oraha ituono iboaino hiadono o tonaka ahengoka angamoi atamunoka de o kabotara. De duru hokogenangoli o Isiraele manga musu manga ngoe. De nagali manga unta kohangoe manga dodogumu ma goronaka hiadono ko idadiua o nyawa yaetongo manga unta gea.

¹³ De naa o Gideono womabole-bole yotobagoa-goana manga ngi moiika duru ma oraha o gogoana womatengo woade-ade ai dodiawoika wato, “Olo, ngohi tomabuluhara de ahi buluhara ma goronaka naga o roti ma bobululunu o gandumino ma lokuoka de auku ilulu o Midiana manga tentara ma doomuku. De ka de adaene manga tau o ngoerino moi de abitikangoka manga tau gea ho bowahu ibakauku!” Hokogea ai buluhara woade-ade.

¹⁴ Ka de ai buluhara ma ade-ade gea woihene de ai dodiawo wato, “Abeika, ani buluhara ma titi moi dika de gea Ma Jou widuhunu o Gideono, o Isiraele ma nyawa gea abe o Yoasa ai ngofaka, la una de ai tentara ahao inahikala. Ho ngaro o Midiana manga tentara eko ngomi o tentara utu abe ona gea inatoomuinoka masara inadaene ngone o tentara mata-mata naa! Ei! Ani buluhara ma titi ngone naa hoboditoka!”

¹⁵ Ho naa o Gideono woihenoka manga buluhara de ma titi gea de una womaponuku de wihigiriiri Ma Jou o Yawe! Hokogea womahuba ibooto de ahao wolio ai tentara manga doomuika de watumomiki wato, “Ngini nikokimomikoka angamoi naa idadioka Ma Jou o Yawe winihidoakoka ti ngini nia giamino o Midiana manga tentara mata-mata naa!”

¹⁶ De ahao o Gideono ai tentara yaratuhu hange dika gea waregu la yodadi o doomu hange ho o doomu amomoi naga o nauru yaratuhu moi. De ahao wahidoaka o nau-nauru homoi-homoiika o guguli o domba ma tatadukino moi de o boto ma amoko moi abe o nyawa yodiai o tonaka ma tau-taulino de o oboro moi abe ka idadi yagogono o boto ma goronaka la o nyawa ko yamakeua manga oboro ma dararono.

¹⁷ De o Gideono wahingahu onangika wato, “Naa ngini nidadioka o regu hange de o regu moi ihiniiki ngohi de ngomi miloiki manga dodogumu ma batingika. De ngini o regu hinooto manga dodogumu niahigororomo arihononga la manga dodogumu ma ngi naa hahigororomoka. De ahao kiani ngini mata-mataika duru nihilega-lega ngohino la o kia dika ngohi ahao todiai nginioo homoi-homoiika nidiai imaketero hoka ngohioli.

¹⁸ Ho ka de ngohi de ahi doomu mata-mata miawuwu mia guguli de nginioo nia guguli homoi-homoiika niawuwu de ngini mata-mata nipoaka hokonaa nikokipoaka niato, ‘De Ma Jou o Yawe ai romanga de o Gideono ai romanga haparangi!’” Hokogea o Gideono ai tentara yaratuhu hange gea wadotoko.

¹⁹ De o futu gorona manga musu manga gogoana yomaketeturuuru ibooto de duru ma oraha gea o Gideono de ai doomu yaratuhu moi yomahiadono doka manga musu manga dodogumu ma honongaika de genangoka yomatatorika to una ai doomu. De ma doomu ma hinooto de ma hange onangoo yomatatorika hiadono ona mata-mataika yahigororomoka manga musu dau manga timiuku ma dolaka gea. Ho ka de o Gideono ai guguli o domba ma tatadukino wawuwu de ai dodiawo yaratuhu hange gea onangoo yodiai imaketero hoka o Gideonoli wodiai de homoi-homoi onangoo yomulaenge manga guguli yawuwu. De ahao hokogenangoli yodiai ma oraha o Gideono ai boto wawedere de ai oboro itodokanino itokara.

²⁰ Ho to una ai doomu de manga dodiawo ma doomu hinooto onangoo yodiai imaketero hoka o Gideonoli wodiai ho to onangoo manga boto akokiwedere. Ho itodokanino o Gideono de to una ai tentara yaratuhu hange mata-mata manga boto yakokiwedere de ka ma moiika itararono angamoi manga oboro yakokigorakiye. De manga oboro yasoino manga gubadioka de manga guguli yasoino manga nirakoka de ona mata-mata duru yawuwu yogirangika manga guguli. De ahao ka ma moiiye yokokipoaka ato, “De Ma Jou o Yawe ai romanga de o Gideono ai romanga haparangi!”

²¹ Masara o Gideono de ai tentara ko youtiua dau manga musuku. Ona yoriidi dika manga dingiioka. De dau yamake manga musu yomahohaangara yopoa-poaka de yoara yokapusakino hiadono yomapopaata aika aino dika.

²² De hokogea manga musu manga hawana angamoi ka de ma oraha ihira yoihene o guguli o ratuhu hange ma ilingi gea imulaenge de ona Ma Jou o Yawe wahikapusaka ka hiadono yomahikokoona yomaketeparangi de manga humaranga. De ona abe ko yohonengua yokokiloara ma gurutika ka hiadono utu yomahiadono o Beete-Sita abe itigi o Serera ma kota de utu yomahiadono o Abele-Mehola ma tonaka ma batingi abe imakitigi o Tabata.

²³ De o Gideono ai tentara utu, abe yowoe-woe gea, abe ma dihiraino o Isiraele ma nau-nauru gea wahokino o Nafatali manga dutuino, de o Asere ma dutuino, de o Manase ma dutuino, ahao naa adono onangika o Gideono ai huhuloko abe wato ona kiani yoiki yaniiki yaparangi o Midiana manga tentara abe naa yokokiloara. De o Gideono ai huhuloko yahingounu ho yakiniiki o Midiana manga tentara de yaparangi.

²⁴ De o Gideono ai tentara yamuruono naga wahidingoto o loku-loku mata-mataika abe genangoka o Efaraimi ma nyawa yogogere la yadofanga o Gideono ai gogahoko onangika la onangoo yaduhunu. De ai demo yadofanga onangika hokonaa wato, “Ahi gogianongoru o Efaraimoka, ma oraha naa togahoko o duduhunu nginika. Kiani ngini nimiduhunu la haparangi o Midiana manga tentaraika abe ngini ka idadi niagoana angamoi ona utu yoara o Yorodani ma akerika de o akere ma jaga-jagaika ka hiadono o Beete-Baraika. Ho ngini niagoana la ufa yotobongo de yoara yogila-gila ti ngini nia loku-lokuika o Midiana manga tentara gea.” Hokogea o Gideono ai gogahoko onangika. De hokogea o Efaraimi ma nyawa yodiai ho yogoana o Yorodani ma akeroka de imahikaiha ka hiadono ma jaga-jagaika o Beete-Baraka yokokigoanoka. De manga musu ma tentara yataoko manga ngoe de yakokitoma.

²⁵ De naga o Midiana ma nyawa manga hidimono yahinooto onangoo yataoko abe womatengo ai romanga o Koyo-koyo de nako to ona manga demo, “o Orebe,” abe ai romanga ma titi o koyo-koyo. De womatengoli ai romanga o Dualono ma Kaho de nako to ona manga demo, “o Seebe,” abe ai romanga ma titi o dualono ma kaho. De nako o Koyo-koyo gea una iwihohonenge o lokuhakaruoka abe ahao ihiromanga o Koyo-koyo ai Hakaru. De o Dualono ma Kaho una iwihohonenge o angguru ma ngengedere ma ngioka abe ahao ena gea ihiromanga o Dualono ma Kaho ai Angguru ma Ngengedere ma Ngi. De ahao to ona manga pea yakokitobiki de yakokiao o Gideonika abe una naga doka o Yorodani ma akere ma honongaka.