Hihira 6 - Ma Jou ai Demo-demo o Totobelohoka

O Gideono Ma Jou wihidadi manga hihira o Isiraeloka

¹ O taongo moruata iriidi manga tonakoka de ahao o Isiraele ma nyawa yodiaioli abe duru itotorou Ma Jou o Yawe ai himangoka. Ho Ma Jou o Yawe wahohowono o taongo tumidi ma dekana de naa wapake o Midiana ma nyawa.

² De o Midiana ma nyawa duru de manga buturungu de manga dohata yahikangela o Isiraele ma nyawa. De angamoi o Midiana ma nyawa duru ka ihikaika yahikangela hiadono o Isiraele ma nyawa yomadiai manga gogogono ma ngi o loku-lokuoka de yapake o bilatu de o aruku ma ngoe. De manga gogogono ma ngi gea utu yakurunga de ma dadaduhu la ka idadi yoara genangika ma oraha o Midiana ma nyawa yoboa.

³ Abe ma oraha o Isiraele ma nyawa manga redi yodatomo de ahao naga o Midiana ma nyawa de o Amaleke ma nyawa yoboa yahikangela, de nagaoo o nyawa utu abe o wange ma hiwariha yoboa la ka idadi manga datomo ihirusaka.

⁴ De ona gea yoboa o Isiraele ma nyawa manga redi-redino la ihirusaka manga datomo abe dau manga tonaka ma dobikuku ka hiadono daku ma dobikiye abe ihiromanga o Gasa ma tonaka. De manga redi ma hasili abe naga yomale hiadono o Isiraele ma nyawa manga inomo ko iwaka. De yadohiki manga domba, de manga hapi, de manga keledai hiadono manga aewanioo yamataka.

⁵ Ho o Isiraele ma nyawa duru yokangela angamoi manga musu gea yangohama manga tonakino duru imaketero hoka o kabotara duru kohangoe abe ena gea ka idadi iboaino hiadono o tonaka atamunoka. De o kabotara enangoo imagogogere ka hiadono ma inomo ko iwaka. De duru imaketero hokogenangoli o Midiana ma nyawa de o nyawa utu abe yokokiboaino o Isiraele ma tonaka ma amokika de hidutu to ona manga tau o ngoerino ihigoko. De ona utu yoboa yao manga duduono o hapi, de o domba, de o kabingi. De yoboa yapake manga unta abe yofarene ma poretoka de ona duru ko manga ngoe hiadono ngaro o nyawa eko ngaro manga unta ma, ko moiua yapoa yaetongo manga ngoe. De mata-mata abe o tonakino iwangoiye kiani yamatakahi de ahao yolio to ona manga tonakika.

⁶ Hokogea o Midiana ma nyawa yahikangela o Isiraele ma nyawaika o taongo tumidino hiadono duru yohuha. De hokogea hidutu manga huha duru kohadubuho de ahao yomagahokoli o duduhunu Ma Jou o Yaweiye.

⁷ De Ma Jou o Yawe wagihene manga gogahoko ma gari ma titi o Midiana ma nyawa yahikangela hiadono duru yomagahoko o duduhunu.

⁸ De wihidingoto ai uru ma dodofanga womatengo abe una Ma Jou wihiakunu de o hohininga ma demo la wahitararono o Isiraele ma nyawaika manga kangela ma titi. Abe manga kangela ma titi ona ko yomahijouokaua Unangika. Ho una Ma Jou ai uru ma dodofanga wahingahu onangika wato, “Hokonaa Ma Jou o Yawe, o Isiraele ma nyawa nanga Jou, ai demo nginika: ‘Ngohi naa nia Jou abe ma dihira tinihihupu ngini, o Isiraele ma nyawa, o Mesiiri ma tonakino abe genangoka ona inihidadi manga huhuloko.

⁹ Ma oraha gea ngini nigogere o Mesiiri ma nyawa manga kuahaka de manga hiaturu nginika duru kohadubuhoholi. De ahao Ngohi, ti ngini nia Jou, tinihihupu to ona manga giamino mata-mata abe inihikokangela. De gea Ngohi tinihihupuoka de ahao o tonaka mata-mataika abe genangika tinihiboa de ngaro ngini ko nimahiadonuahi genangika de Ngohi todiai la ona inilawana yokokiloara de ma bahaika manga tonaka nenanga tinihidoaka nginika.

¹⁰ De ma oraha gea Ngohi tinihingahu nginika tato, “Ngohi Ma Jou o Yawe, ti ngini o Isiraele ma nyawa nia Jou de duru ko idadiua ngini nimahijou o Amori ma nyawa manga jou-jouika abe to ona manga tonakoka ngini nigogere ma oraha naa.” Hokogea tinihitiari masara ngini ko nihihigihenua Ngohi Ma Jou o Yawe.’” Hokogea manga Jou ai hingahu o Isiraele ma nyawaika abe ai uru ma dodofanga wadofanga onangika.

¹¹ De ahao Ma Jou o Yawe ai malaekata naa woboa o Ofara ma kapongino abe o Yoasa ai redi itigioka de naga to una ai gota o tarabatini iwango imatengoka genangoka. O Yoasa de ai ngofaka o Gideono yomahidutu o Abiesere ai doomuika. De naa Ma Jou o Yawe ai malaekata woboa manga gotaino gea de wogogeruku o tarabatini gea ma timiuku. De o Gideono kanganoinohi wokarajaanga o gota ma datekoka gea abe ai gandumu abe wautukinoka ho naa warero. De ai rorero ma ngi gea wapake dika manga angguru ma ngengedere ma ngi ma goronaka la ufa o Midiana ma nyawa yamake ai gandumu ma hofoko.

¹² De Ma Jou ai malaekata gea womahimatoko o Gideonika de wotemo unangika, wato, “Ngona tonihiromanga notobamoroini noparangi, de Ma Jou o Yawe naga ngonaka!”

¹³ De o Gideono wopaluhu, wato, “Ahi baluhu, nako igoungu Ma Jou o Yawe naga ngomioka, adodoa ho o kokangela hokonaa imidaene ngomi o Isiraele ma nyawaino? Adodoa ho ko iwa Ma Jou o Yawe ai dodunguu ma oraha naa abe hoka ma dihira wotobadiai o heheranga? Abe mia ete-ete imitobaade-ade, ato bari, ‘Igoungu, Ma Jou o Yawe de ai heheranga womihihupu o Mesiiri ma tonakino de womiao nenangino naa.’ Hokogea ma dihira Ma Jou ai duduhunu masara abeika mia kangela ma oraha naa abe Una wominoaika de womihidoaka o Midiana ma nyawa manga giamika.” Hokogea o Gideono ko wohiorikokaua ho hiadono woleha hokogea Ma Jou ai malaekatika.

¹⁴ De ahao Ma Jou o Yawe wihiree-reeika o Gideonika de wihuloko unangika wato, “Ngona de ani buturungoka ho naa noiki de o Isiraele ma nyawa nahihupu o Midiana ma nyawa manga kuahaino. Ngohi Ma Jou o Yawe tonihidingoto.”

¹⁵ De o Gideono wopaluhu wato, “Masara ahi Baluhu done sarakia ngohi naa tapoa o Isiraele ma nyawa mata-mataika tahihupu manga kangelaino? Ngohi naa o Manase ma dutuino de nako o Manase ma nyawa manga dutu ma doomuino o fam mata-mataika gea ka to ngohiohi ahi fam ko yoputurungua. De ngaro ahi baba ai tauoka ma ka ngohiohi ko toputurungua.” Hokogea o Gideono womaademo.

¹⁶ De Ma Jou o Yawe wihingahu wato, “Ngohi naga ngonaka de naa tonihidingoto ho Ngohi toniniiki. De ngona ahao o Midiana ma nyawa nahikokihibinaaha imaketero hoka o nauru womatengo dika nihibinaaha angamoi Ngohi naga ngonaka.” Hokogea Ma Jou o Yawe wihibehehongo o Gideonika.

¹⁷ De o Gideono wopaluhu wato, “Nako igoungu tonihisanangi hiadono ngona noigo nohiduhunu, ngohi tomagahoko o dodunguu la de ena gea ngona nomahitaana abe Ngona nagoungu Ma Jou o Yawe abe naa notemo ngohino.

¹⁸ De naa ngohi tale ahi huhuba abe tomahihuba Ngonaika. Ho togahoko la ufa noikoka ma nohidamaa dika nenangoka hiadono toboali de takelenga ani himangoka ahi huhuba gea.” Hokogea o Gideono wogahoko de Ma Jou o Yawe wopaluhu wato, “Ngohi duru nenangokahi tonidamaa ka hiadono noboali.”

¹⁹ De o Gideono womataiti wolio ai tauika. De genangoka waleino ai kabingi moi ka ma goohi de watoma la wahakai. De o gandumu ma ngedere waleino abe o litere monaoko de wodiai o roti ko iwa ma ragi. Gea mata-mata ibooto de ahao o roehe ma teongo woguhe o manyilauku de ahao ma roehe wohingohama o karaanjauku de ma inomo gea mata-mata wao wigilio Ma Jou o Yaweika abe naa nagahi o tarabatini ma timiuku. De ai huhuba ma inomo gea wihidoaka Ma Jou o Yawe ai malaekatika.

²⁰ De Una wihuloko o Gideonika wato, “Ma roehe nenanga de ma roti mata-mata nakelenga doka o hakaru gea ma lokuoka de ahao o roehe ma teongo noguheuku ani huhuba ma inomuku.” Hokogea ai huhuloko o Gideonika de una wodiai hoka wihulokoka.

²¹ De Ma Jou o Yawe ai malaekata naga moi o tutukunu ai giamoka de gea wapake watopokika ma inomika. Ka de ai tutukunu adaene enangika de itodokanino de o hakaruino naga o uku ka itodokaniye itokara de o Gideono ai huhuba ngaro duru ma beha-behaka masara yatufuku ka hiadono itinoka. Ka de youku ibooto de Ma Jou o Yawe ai malaekata unangoo ka aiaho ho ko wimakeokaua genangoka.

²² Hokogea idadi de o Gideono duru wihioriki abe una gea igoungu Ma Jou o Yawe ai malaekata de wotemo duru wohidodokana wato, “Ahi Baluhu abe mata-mataika naga ani kuahaka, kiani nohiduhunu ngohi naa angamoi naa mimarihimangoka ngohi de to Ngona Ma Jou o Yawe ani malaekata!” Hokogea o Gideono ai hawana ma demo Ma Jou o Yaweika.

²³ De Ma Jou o Yawe witemo unangika wato, “Ngaro ka nogaragoka de o dame namakeoka ho ufa nohawana angamoi ngaro hokogea nohimakeoka masara ngona ko nohonengua.” Hokogea Ma Jou o Gideono wihiriidi ai hiningaka.

²⁴ De o Gideono wodiai o huhuba ma ngi genangoka de widingakika Ma Jou o Yaweika. De o huhuba ma ngi gea wohiromanga “O Dame Ma Jou o Yaweoka de Aino.” De ma oraha o ade-ade naa yatulihi o huhuba ma ngi gea nagahi o Ofara ma kapongoka abe ona yomahidutu o Abiesere ai doomuika.

²⁵ De duru o futu gea Ma Jou o Yawe wihibehehongoli o Gideonika wato, “Ngona naa kiani nomahihuba moi Ngohino. Ho nale ani baba ai hapi ma nauru abe ena gea ma taongo tumidi ma ngumuru adonoka la idadi o huhuba Ngohino. De hokonaa nomahihuba. Ihira ani baba ai huhuba ma ngi abe wapake la womahihuba o pangao o Baalika kiani gea ena nakilianga. De to ena ma datekoka o huhuba ma liate naga abe yodingaka o pangao o ngo Asitoretika. Ho o liate gea kiani ngona natolanga.

²⁶ De ahao ma ngi de ma dadatokoka o lokuoka gea kiani ngona napake la genangoka o huhuba ma ngi ma hungioli nodiai abe napake la nomahihuba ani Jouika, Ngohi Ma Jou o Yaweika. De o huhuba ma ngi gea kiani nohidodiai nafafoiye ma hakaru la ma rupa o huhuba ma ngi abe hoka Ngohi toigo. De ahao o hapi ma nauru gea abe kanganoinohi naleinoka gea notoma de nomahihuba Ngohiye o huhuba ma ngi ma hungioka daku ma lokuoka. De ani huhuba gea natufuku de kiani ani hidaulu ma gota gea napake o ngo Asitorete ma liate abe notobi-tobikukuoka.” Hokogea Ma Jou ai behehongo ma demo o Gideonika.

²⁷ Ho o Gideono ahao duru waniiki itiai Ma Jou ai behehongo gea. Wale ai duduhunu o nauru yangimoi de ai dodiawo gea iwiduhunu de mata-mata gea yodiai o futu-futu angamoi o Gideono wohawana done ona ai tauoka iwihikangela. De wohawanoo ma kapongo ma nyawa genangoka onangoo ahao iwingamo nako iwimake manga popangao ma huhuba ma ngi wakilianga ho ko wodiaiua o wangeoka.

²⁸ De ma ngorumino ona yogogere o kapongoka gea yomomiki de duru yoheranga angamoi yamake o Baala ma huhuba ma ngi ihikabarihoka de ngaro o ngo Asitorete ma liate abe imakadatekuku ma, genangoo ko iwa angamoi atolangoka. De yamakeoo o huhuba ma ngi ma hungi de o hapi ma nauru ma roehe abe atufukokau ma lokuoka.

²⁹ Ho ona duru yomakokeleha ato, “Onagona yodiai hokonaa?” De duru yalingiri ona abe yodiai ho yaleha-leha o nyawaika hiadono naga abe yahingahu ato, “Gea o Yoasa ai ngofaka o Gideono, gea una abe wodiai.”

³⁰ Ho ona yoiki o Yoasa ai tauika de iwihuloko o Yoasika ato, “Ani ngofaka gea nihihupu ngomino naa angamoi kiani una wohonenge mangale gea una abe wakilianga nanga huhuba ma ngi abe hapake homahihuba nanga pangaoika o Baala. De nanga huhuba ma liate ma datekoka enangoo watolangoka, ho kiani una hihohowono ka hiadono wohonenge.” Hokogea yotemo angamoi manga dohata duru ifae o Gideonika.

³¹ Masara o Yoasa wapaluhu abe ona yongamo-ngamoika, wato, “Ho ngini niato kiani nioduhunu o pangao o Baala? Sarakia o Baala gea iperelu la ngini niodemo? Ngohi naa tato onagona dika abe o Baala yoodemo ahao ko itebinuahi de ona gea hahohonengoka. Angamoi nako igoungu o Baala enangoo ma jou de enangoo ingamo abe to ena ma huhuba ma ngi ihikabarihoka de ka idadi imaademo de imaaduhunu o Baala gea. Hokogea o Baala imahitaana nako igoungu ena de ma buturungoka hoka Ma Jouoli.” Hokogea o Gideono ai baba ai demo.

³² De ona iwigihene ho o wange gea de o Gideono iwihiromangoli, “O Gideono de o Baala yokadatoro o huhuba ma ngi.” De ai romanga yaturuuru hokogea angamoi o Baala ma huhuba ma ngi abe o Gideono wakiliangoka.

³³ De ko itedekanua ipahaika naga o Midiana manga tentara de o Amaleke manga tentara de o nyawa utuoli o wange ma hiwariha ma tonaka ma kakaahaino ko manga ngoe yomakokitoomuino de manga hidee yaparangi o Isiraele ma nyawaika. Ho ahao o Yorodani ma akere yomahihora doka o Isiraele ma nyawa manga tonakika de ahao yoiki yogila-gila o Yisereele ma dolaika de manga parangi ma doomu genangoka yodiai ho ihikokigoko manga tau o ngoerino de duru yosana manga ngoe.

³⁴ Masara ka de o Gideono woihene abe manga musu yoboaka de Ma Jou o Yawe ai Womaha iwilufungu. De o Gideono wale o guguli o domba ma tatadukino de wawuwu la ma ilingi yogirangika de hokogea wahokino ai gogianongoru o nau-nauru abe o Abiesere ma doomuoka.

³⁵ De ahao ai nyawa wahidingoto manga dutuika o Manase ma tonakoka la onangoo yoboa de iwiniiki. De ai hidingoto naga abe wahuloko la yoiki o Isiraele ma nyawa utuikali abe o Asere ma dutuika, o Sebulono ma dutuika, de o Nafatali ma dutuika wahidingoto la yakokiahokino. Ho onangoo o nau-nauru manga ngoe yoboa yomakodogoino de o Gideono ai gogianongoru la yomakuduhunu yaparangi manga musuika.

O Heheranga ma dodunguu Ma Jou wihimatoko o Gideonika

³⁶ De ahao o Gideono witemo Ma Jouika wato, “Naga ahi gogahoko o dodunguu la ka idadi tohioriki nako igoungu ngohi naa abe Ngona noigo nohipake la ngomi o Isiraele ma nyawa nomihihupu mia musu manga giamino hoka nengokadau nohihingahu ngohino.

³⁷ Abe hokonaa todiai la ka idadi Ngona Ma Jou nohitunguu la tohioriki. Naga o domba ma kai de ma gogoka ngohioka naa de ena gea tokelenga o gandumu ma rorero ma ngioka naa. De itebini duru o ngorumino ngohi ka de tomomiki tatailako de tamake abe o rorero ma ngi ma tonaka mata-mata ma dodudungu masara ahi domba ma kai ma gogo ena dika yopehaka de o gagini. Hokogea togahoko nodiai la idadi ma dodunguu abe itaana ngohino abe Ngona ani mau la nohipake ngohi ka hiadono ngomi o Isiraele ma nyawa nomihihupu mia musu manga giamino hoka nohihingahuoka nato hokogea nodiai.” Hokogea o Gideono ai gogahoko Ma Jouika.

³⁸ De o ngorumino womomiki de duru idadioka imaketero abe wogahokoka. De wogoraka o domba ma kai gea de wateo hiadono o bokolo moi aomanga de o gagini ma akere gea.

³⁹ Masara ahao o Gideono womagahokoli wato, “Ma Jou ufa ani ngamo ifae ngohino angamoi ma moioli toigo totemo Ngonaika. Ngohi duru toigo todiaioli la tamake o dodunguu moiokahi dika de ahi domba ma kai nenanga. Ho naa ena gea takelengali o rorero ma ngioka masara naa togahoko la nohikawalimi idadi ho togahoko la nohitunguu la o domba ma kai ma gogo duru yodudungu masara abe yopehaka de o gagini gea o rorero ma ngi ma tonaka mata-mataika.”

⁴⁰ De duru hokogea Ma Jou wodiai abe de ma ngorumino o Gideono womomiki de watailako de o domba ma kai ma gogo yodudungu masara o ngengedere ma ngi ma tonaka duru yopehaka mata-mataika.