Hihira 2 - Ma Jou ai Demo-demo o Totobelohoka

O Isiraele ma nyawa manga behehongo Ma Jouika ko yaniikokaua

¹ De naa duru ma dekanoka o Yosua ko wahihirakaua o Isiraele ma nyawaika de Ma Jou o Yawe ai behehongo onangika ko yakokiniikokaua. Ho o wange moiuku Ma Jou ai malaekata womatengo wihidingoto onangika. De Ma Jou o Yawe ai malaekata naga o Gigaloka de woiki o ngi moiika abe ahao ihiromanga o Kahumutaigarika. De genangoka o malaekata gea wadofanga Ma Jou ai hingahu o Isiraele ma nyawaika, wato, “Ngohi Ma Jou tinihihupu o Mesiiri ma tonakino de tiniao o tonakino naa abe ma dihiraino tahibehehongo nia totoforaika tato ahao ma tonaka nenanga tinihidoaka nginika. De Ngohi Ma Jou totemokau tato duru ko iwa ma oraha abe ahi behehongo nginika gea tahihanga.

² De Ngohi tato ko idadiua ngini nimahiketehibehehongo de o Kanani ma nyawa done ko nihihingounua Ngohino. De ahi tonaka ma behehongo gea imakiniiki de ti nginioo nia behehongo Ngohino abe ngini niato ahi behehongo nianiiki hiadono nginioli nihihibehehongo Ngohino niato ko nimahiketehibehehongua de ona abe ma dihiraino yogogere o tonakoka naa. De nako nianiiki nia behehongo gea kiani niahibinaaha to ona manga huhuba ma ngi mata-mataika. Masara naa ngini ko nianiikokauali to Ngohi ahi behehongo gea. Adodoa ho ngini ko nihihingounua Ngohino?

³ Abeika ngini ngaro ma dihira niato ko nidiaiua, abe nihihibehehongoka Ngohino, masara naa ngini nihilawana hiadono nidiaioka abe tato ko idadiua nidiai. Ho mangale gea Ngohi ko tiniduhunokaua hiadono ona abe ka yogogerohi o tonakoka naa Ngohi ko tahihupua masara ka tanoaika dika yogogere nia hidogoronaka. De ona tohiketero tato yodadi hoka o hihika nia roehoka abe ko idadiua nimagiwuku ho ka ihikaika inihikangela. De ka idadi ona tohiketero hoka yodadi o modoi nginika abe inihikangela angamoi ahao ti ngini nia hininga ka itagi to ona manga jou-jouika ka hiadono inihidiliko manga popangaoika.” Hokogea Ma Jou ai malaekata Ma Jou ai demo wadofanga o Isiraele ma nyawaika.

⁴ Ka de Ma Jou o Yawe ai demo gea wahingahu ibooto de o Isiraele ma nyawa manga kokihiningaka duru ikokihuha de ka ma moiika duru yoari-ari.

⁵ De ahao ona yomahihuba Ma Jou o Yaweika de manga huhuba ma ngoe abe manga aewani ma duduonino. De manga huhuba ihitoomuika de manga hininga ma huha ma gari ho ma ngi abe genangoka yomatoomuino ona ihiromanga o Kahumutaigarika. Hokogea o Isiraele ma nyawa ihitunguu manga toduba.

⁶ De hokonaa ma hitararono ma ade-ade abe idadi o Isiraele ma nyawa manga wowangoka hiadono yomulaenge ko iwihingounokaua Ma Jou o Yaweika de yorehene o popangaoika. Abe ma oraha ma dihira o Yosua wahuloko ona o doomu homoi-homoiika wato kiani yoiki to ona manga tonaka manga hidokuika de ena gea yomahitoona. De ona mata-mata iwihingounu ho yoiki de manga doomu homoi-homoiika yomale manga tonaka. De manga tonaka gea yomahitoona yaniiki itiai abe ma dihira o Musa wahikodokuoka la hiadono o Isiraele ma nyawa manga doomu homoi-homoiika yakokimake manga tonaka. Ho abe yomahidutu manga totofora o Yakubu ai ngofaka homoi-homoiika ona mata-mataika ahao yamake manga oara ma tonaka o behehongo ma tonakino.

⁷ De ma dihiraino abe ma oraha o Yosua ka wowangohi de ona o Isiraele ma nyawa mata-mataika yomahuba Ma Jou o Yaweika. De ngaro o Yosua wohonengoka ma ka iwiniikohi Ma Jou o Yawe ma oraha nagahi manga hihira utu abe yomakokutuono de o Yosua. De ona abe yohira iwituruuru o Yosua gea, onangoo yamake de manga lako o heheranga de o dodunguu ma ngoe abe ihitunguu Ma Jou o Yawe ai duduhunu o Isiraele ma nyawaika ma oraha manga dodagi ma goronaino. Masara ka de onangoo gea yokokihonengoka de o Isiraele ma nyawa yomulaenge yorehene Ma Jouino.

⁸ De igoungu, o Nuunu ai ngofaka o Yosua gea una ai wowangoka duru witobaleleani Ma Jou o Yaweika ka hiadono ai ngumuru adonoka ai taongo o ratuhu moi de ngimoi de ahao una wohonenge.

⁹ De ai honenge iwilungunu to una ai oara ma tonakoka abe o Isiraele ma nyawa yomahidutu o Efaraimika to ona manga hidokuino ma tonaka. De o Yosua ai lungunu naga o Timata-Sera ma loku-lokuoka abe gea dau ma honongauku abe o Gaasa ma lokuoka.

¹⁰ Ho ona abe yowango yomakutuono ma oraha yokokiwohama o Kanani ma tonakika naa ihidotoomuinoka manga totoforaka abe ma titi ona yokokihonengoka. Ho ona gea yokokihonengoka de to ona manga ngofa-ngofaka de manga dano-danonguku yobaluhiye masara ko yomahijouokaua Ma Jou o Yaweika. De ona ko yomahihohiningakaua Ma Jou o Yawe ai buturungu abe ma dodihiraino waduhunu o Isiraele ma nyawa manga dodagi ma kangela ma goronaino.

¹¹ Hokogea iwiwohanga hiadono o Isiraele ma nyawa yodiai abe duru itotorou Ma Jou o Yawe ai himangoka. De Una wamake ona iwiporetika de yomahuba o pangaoika abe ihiromanga o Baala de waetongo manga datoro yodiai itorou.

¹² Abe ona iwiporete Ma Jou o Yaweika, Una to ona manga totofora manga Jou abe wahihupu manga kangelaino o Mesiiri ma tonakoka. Masara naa yanii-niiki o jou-jou abe o Kanani ma nyawa manga date-datekoka yomahuba-huba enangika. Ho naa o Isiraele ma nyawa yatilabukuku o popangao ma himangoka de yomahuba de ihigiriiri enangika. De hokogea iwihihuha Ma Jou o Yawe hiadono ai ngamo duru ifae onangika.

¹³ De gea iwiporete Ma Jou o Yawe la ka idadi yaleleani o popangao ma ngoe abe ihiromanga o Baala, de naga o popangao utuoli abe ma hapa irupa-rupa de ena gea ihiromanga o Hiowa ma ngofeka ma pangao. De ngaro manga popangao gea imakohowono ma rupa masara mata-mataika nako to ona manga demo ihiromanga o ngo Asitorete ma popangao.

¹⁴ De angamoi yomahuba o popangaoika gea Ma Jou o Yawe ai ngamo duru ihauku o Isiraele ma nyawaika ka hiadono wahidoaka o nyawa utu manga giamika abe ka ihikaika wahidogunoaika la yahikangela o Isiraele ma nyawaika abe yotobaboaino de yomagora-gora manga kiahonanga. De mangale ma titi Ma Jou o Yawe ma hirete wafukunu manga musu arihonongaika ho ko itedekanua de o Isiraele ma nyawa manga buturungu ko iwaka. Ho ngaro o Isiraele ma nyawa yomaduhunu ma oraha manga musu yoboa yahikangela masara ko yolakuokaua.

¹⁵ Abe ka de o Isiraele ma nyawa yomatoomuino de yoiki yaparangi manga musuika de ko yolakuokaua angamoi naa Ma Jou o Yawe ko waduhunokaua ho naa imakawalimi idadi angamoi Una ma hirete waparangi onangika. De duru idadi imaketero hoka ma dihira wahibehehongo onangika abe Una wahingahuokau wato nako iwiporete ahao Una wohiaturu la yokala dika. Ho naa o Isiraele ma nyawa duru yohuhaholi angamoi manga kangela ma ngoe yadaene manga musuino.

Ma Jou wagihene o Isiraele ma nyawa manga gari ma ilingi de wahihupu manga musu ma kangelaino masara ko itedekanua de yogiliokali o popangaoika

¹⁶ Ngaro Ma Jou o Yawe hokogea wangamo o Isiraele ma nyawaika masara ahao wahidailako manga hihira abe wahiakunu ona yomakoketemomoi abe ka idadi manga kokawaaha yahihupu manga musu ma kuahaino abe yatobaora de yatobadohiki.

¹⁷ Masara ngaro manga hihira yaduhunu hokogea la manga musu ko yahikangelakaua masara ko itedekanokaua de yogimonoli o jou-jou ma homoaika de yomahubali enangika. Abe ngaro yosanangi yaniiki manga hihira hoka manga totofora ma dihira yahingounu Ma Jou o Yawe ai behehongika masara hoka jai-jai dika de yogiliokali o popangaoika.

¹⁸ De nako adonokali Ma Jou o Yawe wahidailakokali manga hihira de duru wahiakunu la yolaku manga musuika. Abe o Isiraele ma nyawa manga hihira gea Ma Jou iwiniiki ka hiadono manga hihira gea manga wowango ma bahaika. De Ma Jou ai dora ma hiokoo itagi ai nyawaika hiadono ona abe wahiakunu yahihira ka idadi wapake la o Isiraele ma nyawa wahihupu manga musu manga giamino.

¹⁹ Masara ka de manga hihira gea yohonengoka de o Isiraele ma nyawa yodiaioli hoka ma dodihiraino masara naa manga dimono yatilakuroka de ka onangohi yofoloiika yodiai itorou manga wowangoka. Abe utuohi yomagawe yaniiki o jou-jouika gea, abe yaleleani enangika de yomahuba-huba enangika. De ona duru yoluku yanoaika manga datoro ma dorou gea ho idadioka tanu manga pea kohadogowini de yoluku yotoba.

^20-21 Ho Ma Jou o Yawe duru wangamo o Isiraele ma nyawaika de wotemo wato, “Ona ko taduhunokaua ka hiadono manga musu taduhu manga tonakino angamoi ona o nyawa nenanga ko ihihigihenua de yatilakuru o behehongo gea abe ma dihira to ona manga totofora de Ngohi mimahiketehibehehongoka. Ho ngaro ma oraha gea o Yosua wohonenge de naga o nyawa o dutu ma ngoeohi abe una ko waparangiuahi, masara Ngohi ahi nyawa ko taduhunokaua la manga musu gea takiniiki manga tonakino.

²² Ma dihira Ngohi tato, ‘Abeika nako o Isiraele ma nyawa nenanga ahao ka ihikaika ona ihihingounu Ngohi Ma Jou o Yawe imaketero hoka manga totofora ihihingounu, eko ona ko ihihingounokaua.’ Hokogea tataili o Isiraele ma nyawa.” Hokogea Ma Jou o Yawe womatemo.

²³ De gea ma titi hiadono Ma Jou o Yawe o nyawa o dutu ma ngoe waduhu o Kanani ma tonakino masara utu wanoaikahi. Hokogea o Isiraele ma nyawa wataili ho hiadono ma dihira o Yosua ko wihigunoaua la wahibinaaha ona mata-mata ka ma moi. Hokogea Ma Jou o Yawe wataili manga hingounu Unangika.