Higiriiri 8 - Ma Jou ai Demo-demo o Totobelohoka

8:1-9 ko atailakouahi Ngaro ngone o nyawa ko kia-kiaua masara Ma Jou wonahidoaka nanga gogere ikokurutiye ai dulaadoka

^1-2 Mia Jou o Yawe, abeika hokokia ma gurutiye to Ngona ani romanga o dunia ma amokika naa! Abe to Ngona ani medebini ma dararono ka atilakuru ma dihanga ma gurutiye.

³ De ngaro o ngofa-ngofaka ma gogilauohi masara inihioriki ani gogurutiye gea hiadono duru inihigiriiri Ngonaiye de o nyanyianga! De mangale ma titi o ngofaka manga higiriiri ma demoino gea de Ngona ka idadi ani musu mata-mata nahibobaha de nahikokihibinaaha onangika.

⁴ De abe ma oraha ngohi tomamatagaiye la tomalega ma dihangika, de to Ngona ani hagaraara ma hasili tamake, abe tapulono o mede de o muru-murumiye abe Ngona nohigogere daku o dihangoka. Ho ka de tamake ani dulaada ma hohailoa gea de kiani tomaleha,

⁵ Jou, done ma titi o kia naga ngomi o nyawaka hiadono Ngona nomingano-nganono? De ngomi naa ko kia-kiaua imidaene, ho ma titi o kia hiadono nomalega ngomiuku de ani dora?

⁶ De ngaro hokogea ngomi, masara Ngona ani hiningaka nohiaturu la to ngomi mia gogere ngade-ngade hoka o malaekatoli manga gogere ma gurutiye, masara ka to onangohi hatoli ikurutiye ma hohutulu. De gea ngomi duru nomigorakiye hiadono ngomi o nyawa naga de mia horomatioka, de nagali mia medebini ma dararonoka,

⁷ angamoi ani dulaada mata-mataika de gea nomihidoaka la idadi to ngomi dika mia kuahaka mata-mataika, de nomihitagongo la gea mata-mata to ngomi mia giamoka.

⁸ Abe ngaro o dofo ma duduono mata-mata, de ngaro o fuhuku ma aewani mata-mata,

⁹ de ngaro ma totaleo daku ma hoanino, de ngaro o nawoko de mata-mata utuoli abe itagi-tagi dau o akeroka de o gahiokaoo, masara gea ani dulaada mata-mata Ngona nohiaturu la idadi ngomi dika mia kuahaka!

¹⁰ Mia Jou o Yawe, abeika hokokia ma gurutiye to Ngona ani romanga o dunia ma amokika naa!