Higiriiri 104 - Ma Jou ai Demo-demo o Totobelohoka

Ma Jou ai dulaada kiani mata-mataika iwihigiriiri Unangika

¹ Doka ahi hiningaka tomatemo tato, “Iti ngohi tihigiriiri Ma Jou o Yaweika; Ngona to ngohi ahi Jou, Ma Jou o Yawe abe duru nokokurutiye! To Ngona ani horomati de ani medebini ma dararono idadi ani pakeanga,

² De o dararonino abe duru kohamodararono nohidadi ani baju ma guru-gurutuku. De o dihanga de ma muru-murumu nohiwoata imaketero abe hoka o tau o ngoerino hohiwoatika, Hokogenangoli nomahidiai to Ngona ani gogere daku duru kohagurutiye.

³ Abe Ngona Ma Jou ani tau ma dukurino natukurino o awana ma lobi-lobioka, Ho imaketero de ani tau nakelenga daku o awana ma lobi-lobi ma lokuino, De o lobi-lobi gea enangoo imadadi hoka to Ngona ani goroba. De ani goroba o lobi-lobi gea to Ngona ani hidaloko ihidagi-dagi.

⁴ Abe o hidaloko mata-mataika enangoo idadi to Ngona ani hidingoto. De o leletongo enangoo idadi to Ngona ani gogilaongo.

⁵ Ngona ma oraha notulaada o dunia naa la to ena ma gogere naga, De ko idadiua ikelu-kelu ho ka hiado-adonika ko aturuurua ma ngi.

⁶ De o dunia Ngona nahawo mata-mataika de o ngoo-ngooto, Ka hiadono o loku-loku ihidulufungoka de ma ngooto gea.

⁷ Masara ka de Ngona nohuloko o ngoo-ngootika gea de imahikabarihi, Abe Ngona nohiboa o kuruuhu de ma koroongo kohaamokiye, De imaketero hoka o ngoo-ngooto yomodongo enangika ho iloara.

⁸ De hiadono o loku-loku ikokipuda o ngootiye, De o dola-dolaoo enangoo imaketero de inihingounu abe ikokiuti, Itagi to ena ma ngi-ngiika abe to Ngona ani hininga aniikoka.

⁹ De Ngona Ma Jou naputuhu o ngoo-ngooto ma batingi, Ho ko idadiokaua o dunia mata-mataika yalufungoli de o akere.

¹⁰ De Ngona nodiai la o akere ipootekika ho dai ihahuru o dolaoko. Ho o loku-loku ma hohidogoronaka ka ihikaika o akere naga,

¹¹ La genangino o dunia ma aewani mata-mataika ka idadi ikokiokere, Ka hiadono o fuhuku ma keledai enangoo ma ngomaha ko yodudungua.

¹² De o akere gea ma datekoka naga o totaleo imadiai ma igutu, De o totaleo gea yaika yaino itangi-tangi o gota ma jaga-jagaika. De duru isanangi itemo-temo imaketero hoka o nyanyianga ma ilingi.

¹³ De Ngona nohiboa o awana o loku-loku nohiguti mata-matauku, Imaketero hoka ani gogere abe o Horogaka de nohidingoto ani awana, La o dunia ma lokuino nohiomanga de ani karajaanga ma hasili.

¹⁴ De Ngona Ma Jou o ruruubu nohiwango la o hapi ka idadi yaolomo. De naga nohiwangoiye o tonakino abe o nyawa ka idadi yopaliara, De manga datomino gea manga inomo yamake o dunia ma tonakino.

¹⁵ Abe manga datomino ona yamake o angguru ma teongo, De ena gea ka idadi o nyawa manga hiningaka ihihisanangi. De manga datomino yamake manga minya abe ka idadi yapake, Abe o inomoka eko manga kaioka hiadono manga himanga ijaa-jaanga, De manga datomino yamake manga badanga ma hiputurungu.

¹⁶ De naga Ma Jou o Yawe ai gota abe wogopoa o akere ilamoko, De gea o gota o semara abe wodatomo o Libanono ma tonakoka.

¹⁷ De o totaleo duru isanangi ma igutu imadiai o semara ma gotaka, De naga o gota-gota abe duru ma roehe irikotiye, Abe o totaleo o tumara duru isanangi igogere o gota-gotaka gea.

¹⁸ De o fuhuku ma kabingi duru isanangi iwango o loku-lokuoka, De o kiaka naga o hakaru duru ilape-lapeiye, De naga o aewani o katuri abe duru isanangi igogere genangoka. Hokogea Ngona Ma Jou ani dulaada nohiaturu itiai, Hiadono ani dulaada homoi-homoiika ma ngi imaborikokadaene.

¹⁹ De o mede notulaada la ena ihitunguu ma oraha ma dekana, De o wange notulaada la ma hiaturu yaniiki itumunu.

²⁰ De Ngona nohiaturu la o wange itumunu de aturuuru yofutu, La ka de yofutuoka de o fongana ma aewani ka idadi itagi-tagi.

²¹ De o boki o singa ma goo yogogataheke ma inomika o futu-futuoka, Masara ko to enangua ma buturungino hiadono ma inomo amake, Masara Ngona Ma Jou ani hiaturu hiadono o aewani imamake ma inomo.

²² Ka de o wange ipotokaiha de ma aewani gea ibooto imaino-inomo, Ena gea ilio to ena ma gogogono ma ngiika la imaidu genangoka.

²³ De imakawalimi de o nyawa abe ka de o wange ipotokaiha, De ona yomomiki de yohupu manga tauino yoiki manga karajaangika, De o wange itumunu de yolio manga tauino la yomaidu.

²⁴ Ma Jou o Yawe duru nomihiheranga de ani dulaada mata-mataika, Abeika to Ngona ani sosawaro abe nomihimatoko ani dulaadaino. Abe o dunia naa duru aomanga de o aewani irupa-rupa abe Ngona notulaada,

²⁵ De hiadono o gahi ma goronaka naga duru kohangoe ani dulaada iwango, Abe naga ma ago-agomo de ka hiadono naga abe duru ma hohumuduru, De o gahi duru ma ngoatika de aomanga de ani dulaada ma ngango.

²⁶ De o gahi ma lokuino naga o nyawa de manga kapa yaika yaino. De naga o gahi ma aewani o hoore abe duru kohaamoko, Abe Ngona notulaada la enangoo o gahino imapuda de imagogule ani himangoka.

²⁷ De ani dulaada o aewani homoi-homoiika ma wowango Ngonaka de aino, De to ena ma inomo yamake gea imahinganono ka Ngonaino dika.

²⁸ De ma oraha to ena ma inomo nohidoaka de ena atoomuino, De utu to ena ma inomo ani giamoka, de ka de Ngona napidili, De ma aewani gea yaolomo de duru yawedono to ena ma inomo.

²⁹ Masara nako Ngona o aewani gea noporetika de ena duru ihawana, De nako to ena ma womaha natoaka de ka ihonenge, De ma badanga iliokali o tonakika abe genangino idadi.

³⁰ De ahao ka de to Ngona ani Womaha nohidingoto ani dulaadaika, De ani dulaada abe ihonengoka naga ma duruuru nohiwangoli, Hokogea ka ihikaika o dulaada irupa-rupa Ngona nohiwango, La ka ihikaika ena abe ihonenge naga ma duruuruoli o dunia ma lokuoka.

³¹ Ngaro Ma Jou o Yawe ai medebini ma dararono duru ilaku ka hiado-adonika! Ma Jou o Yawe duru womahidogarago de mata-mata abe Una wotulaadoka.

³² De ma titi to Una ai buturungu ka hiadono womalega o duniaika, De ngaro hokogea dika de ka idadi o dunia ifafara. De o loku-loku ka de watigi enangika de ka idadi ipotoka de o uku!

³³ Ho ngohi duru ka ihikaika tonyanyi ahi higiriiri Ma Jou o Yaweiye, Ma oraha naa de ka hiadono ahi wowango ma bahaika! Ngohi ka ihikaika ahi Jou tihigiriiri ka hiadono ahi ngomaha wagoraka.

³⁴ De tonganono Una wosanangi de ahi hininga mata-mata, Abe naa ngohi tomahingahuoka de toade-ade ma titi ai dulaada Angamoi ahi hininga gea ihititi ahi garagoka abe tamake Unangino, De naa ahi garago tohigilio Ma Jou o Yaweika de ahi higiriiri.

³⁵ De nenangoo ngohi tonganono la abe ona yatobahowono, Ona duru ihiofioka o dunia ma lokuoka; De ngaro abe ona yotobadiai itotorou dika, Onangoo toigo la yahihanga ka hiado-adonika. Masara nako ngohi de ahi hininga ma gahumu, Ka ihikaika ahi mau la tihigiriiri Ma Jou o Yawe! Hihigiriiri Ma Jou o Yaweika!”