Higalioli 3 - Ma Jou ai Demo-demo o Totobelohoka

O Pasala 3 ko atailakouahi Yomahihohininga abe yomaketeparangi de o Basana manga koano o Ogo de ai tentara

¹ De ahao o Musa ka wohigila-gilahi ai hohininga ma ade-ade onangika, wato, “De gea ipahaino de ahao ngone horehene de nanga dumutu dau o Basana ma tonakuku. De homahiadonika genangika de manga koano o Ogo de to una ai tentara mata-mata inabaata o Ederioka.

² Masara gea Ma Jou o Yawe wohihingahu ngohino wato, ‘Ngaro ufa dika de ngini niwimodongo manga koanoika gea, angamoi Ngohi naa tinihidoaka la niahikala o Ogo gea de ai tentara mata-mataika. De ahao Ngohi tinihidoaka to ona manga tonaka mata-mata nginika. Ho kiani ngini niwidiai ma koanoika abe imaketero dika hoka ma dihiraino de niwidiai o Sihonika abe una gea o Amori ma nyawa manga koano de abe wogogere de wahipareta o Hesebono ma kotaka.’ Hokogea nanga Jou ai demo ngohino ma dihiraino gea.”

³ “Ho nanga Jou wonahidoaka o Ogo de ai kokawaaha mata-mata nanga giama ma hoatino, de ngone hakokihohonenge ona mata-mata. Abe o nyawa moioo de ko yaiwaka, ho ona yohotumoka.

⁴ De o Basana ma tonakoka gea naga ma tonaka moi ihiromanga o Agobo, de genangoka naga ma koano ai kota moributaanga. De gea ngone hahikala manga kota mata-mataika hiadono moioo de ko iwa abe ko hahikalaua.

⁵ De ma kota homoi-homoi gea duru ipoputurungu angamoi naga to ena ma dadaduhu ma gogurutiye, de ma dadaduhu ma ngorana atatoko de ma dadatoko abe o behino yodiai. Masara ngaro hokogea ma bobuturungu masara ka idadi hahikala mata-mataika. De nagali manga kapongo muruono naga abe ko iwa ma dadaduhu, de enangoo hahikala ka ma moi de manga kota-kota.

⁶ Ho gea o Basana ma tonaka duru hahibinaaha enangika abe imakadaene dika de ma dihiraino abe o Hesebono manga koano o Sihono duru hihikala. Abe o Basanokaoo de duru hahibinaaha la imakiniiki de nanga Jou ai huhuloko ngoneino wato ufa naga o nyawa gea manga hou. Ho ngaro o nau-nauru de o ngo-ngofeka de o ngofa-ngofaka masara ona mata-mata hahohonenge dika.

⁷ Masara nako to ona manga aewani ma duduono de manga kiahonanga manga kota-kotaka de manga kapo-kapongoka, gea mata-mata ka idadi homahitongone la idadi to ngoneoli nanga kiahonanga de nanga aewani.”

⁸ “Ho ma oraha gea de ngone homahitongone o Amori ma nyawa manga koano yahinooto manga tonaka. Abe manga tonaka gea imanoa o Yorodani ma akere ma honongaka abe o wange ma hiwariha idateke. De gea ma tonaka abe o Arono ma akeroka ka hiadono dau o Heromono ma lokuku.”

⁹ De o Heromono ma loku gea naga ma romanga hangeika. Abe nako o Sidono ma nyawa ona ihiromanga enangika ato o Siriono ma loku, de nako o Amori ma nyawa ona ihiromangoli o Seniri ma loku. Masara gea moi dika ma loku.

¹⁰ De o Musa wogila-gila wato, “Ho ma oraha gea de ngone hahikala ma kota mata-mataika abe imanoa ma tonaka ma amoko itotiaiika gea de o Gileada ma tonakoka de o Basana ma tonakokaoo. Ho ngaro hiadono o Salaka ma kapongo de o Ederi ma kapongo dau o Basana ma tonakoka, abe manga koano o Ogo wahipareta genangoka, masara enangoo mata-mata hahikala.

¹¹ De o Basanoka manga koano o Ogo gea una o Refaimi ma nyawa manga totofora duru ma baha angamoi ona utu mata-mata yohiraka yokokihonengoka. De abe hoka ai gogianongoru ma dodihiraino, to ma koano gea ai badanga duru ma amoko. Angamoi abeika hafikiri dika to una ai hohonenge ma ngi ma amoko. Abe ma ngi gea yodiai o hakaruino de to ena ma gurutu o metere iata ifoloi de ma ngoata ngade-ngade o metere hinooto. De ai hohonenge ma ngi gea ka nagahi hiadono ma oraha naa naga abe ma ade-ade tohitulihuku. De nako o nyawa yoiki o Raba ma kotaika abe o Amono ma nyawa manga tonakoka de ka idadiohi yamake ai hohonenge ma ngi duru ma amoko gea.”

Manga tonaka ma hungi gea ihikeregu

¹² De ahao o Musa ka woade-adeohi wato, “De ma oraha ma tonaka naa idadi to ngoneoli de hohikeregu ngini utuika. Abe nako ma tonaka imanoa doka o Aroere ma honongaka de o Arono ma akere ma ngigorino, ma tonaka gea tahikodoku o Rubene de o Gaada ma nyawaika. De o Gileada ma loku-loku de to ena ma kapo-kapongo, gea taregu hinooto de ma regu moi enangoo tahidoaka o Rubene de o Gaada ma nyawika.

¹³ De ahao o Gileada ma regu moioli de o Basana ma tonaka mata-mataika, abe ma dihiraino de o Ogo wahikoano genangoka, ma tonaka gea tahidoaka o Manase ma nyawaika.” De o Basana ma tonaka ma dobiki abe ihiromanga o Agobo, ma dihiraino de gea mata-mata o nyawa ihiromanga dika o Refaimi ma nyawa manga tonaka.

¹⁴ De nanga gianongoru o Yairi abe una o Manase manga dutuino, una gea wahihira ai nyawa la yahikala o Agobo ma tonaka mata-mata o Basanoka. De gea yahikala ka hiadono o Gesuru ma nyawa de o Maka ma nyawa manga hiribatingika. De gea wahikala ipaha de ahao wohiromangoli ma tonaka gea wato o Yairi ai kapo-kapongo. De ngaro hiadono ma oraha naa naga masara ka hokogenangohi ma tonaka gea ma romanga.

¹⁵ De o Musa wato, “Ho abe ma titi o Gileada ma tonaka gea ma hononga tahidoaka o Makiri ai nyawaika abe ona o Manase ma dutuino.

¹⁶ De gea ma hononga moioli tahidoaka o Rubene de o Gaada ma nyawaika. De ma hononga gea ma tonaka abe daku o Arono ma akeroka ka hiadono o Yaboko ma akere abe imahitigino de o Amono ma nyawa manga tonaka.

¹⁷ De nagali o Yorodani ma akere ma dola mata-mataika abe dau o Galilea ma akere ma ngootoka ka hiadono daku o Hone-honenge ma gahiye. De ma tonaka gea ma batingi abe o wange ma dumunoko idateke gea o Yorodani ma akere. De ma batingi abe o wange ma hiwariha idateke, gea o Pisaga ma loku ma timiuku. Ho ma tonaka genangoo tahidoaka nanga gogianongoruika abe yomahidutu o Rubene de o Gaadika.”

¹⁸ “De ma oraha gea tahikodoku ma tonaka de naga o huhuloko ma demo tinihingahu nginika abe dina o Yorodani ma akere ma honongaoko nimanoa. Abe ma huhuloko ma demo itemo hokonaa, ato, ‘Ti ngini nia Jou o Yawe winihidoakoka nia tonaka naa la idadi ti ngini. De ngaro hokogea masara kiani ti ngini nia nau-nauru abe ka idadi yoparangi, ona gea mata-mata kiani yagorakohi manga parangi ma dae de yomahidiaioka la yomaketeparangi de nanga musu. Abe kiani yahihira-hira manga gogianongoru la ona ka ma moi yomahihora doka o Yorodani ma akere ma honongaika de yomaketeparangi nanga musuika.

¹⁹ Masara nako to ona manga feka-fekata de manga ngofa-ngofaka de manga aewani ma duduono, gea mata-mata ka idadi yomanoa dika to ona manga kapo-kapongoka abe tinihikodokuoka nginika.

²⁰ De ahao ma oraha yomaketeparangi ipaha de Ma Jou wonahidoaka o hilaku nia gogianongoru mata-mataika, gea de ahao ngini ka idadi niogilio nia tonakino naa. Angamoi gea de ahao ngini de nia gogianongoru mata-mata niakokimakeoka nia tonaka abe Ma Jou winihidoaka ngini homoi-homoiika. Abe nia gogianongoru yamake manga tonaka doka o Yorodani ma akere ma honongaka de ti nginioli nia tonaka naangoka.’ Hokogea ma huhuloko ma demo abe ihidumutu nginika.”

²¹ “De ma oraha gea ngohi tihuloko o Yosuaika tato, ‘Ngona ma hirete namakeoka Ma Jou ai datoro mata-mata abe wodiaioka la wahikala ma koano yahinooto naangoka. De hokogenangoo ahao wodiai manga koano mata-mataika abe ngini ahao niahimanga doka o Yorodani ma akere ma honongaka.

²² Ho ngaro ufa dika de ngini niamodongo ma nyawa genangoka, angamoi to ngona ani Jou ahao Una ma hirete wahimanga de waparangi onangika.’ Hokogea ahi huhuloko ma demo o Yosuaika.”

²³ “De ahao ngohi duru tomagahoko Ma Jouika tato,

²⁴ ‘Mia Baluhu idodutu o Yawe, ngohi duru tohioriki abe to Ngona ani datoro duru de ma kuaha kohaamoko de abe ani giama duru kohabuturungu. Abe ani datoro gea utu ngohi ani huhuloko tamakeoka masara duru tonganono abe nagahi ani datoro abe utuohi ikokurutiye de ihohailoa. De boteua ko iwa o jou utuoli o Horogaka ekola naa o duniauku abe yakunu yodiai manga datoro abe hoka to Ngonali ani datoro!

²⁵ De naa tomagahoko Ngona nohihigunoa la ngohioli ka idadi tomahihora o Yorodani ma akere gea de ngohioo ka idadi tamake ma tonaka ma rorahai gea abe doka ma honongaka, de ma tonaka abe naga ma loku-loku ma hohailoa, de o Libanono ma loku-loku gea.’ Hokogea ahi gogahoko Ma Jouika.”

²⁶ “De gea Ma Jou woihene ahi demo masara duru wongamo ngohino mangale ma titi ngini naa, ho Una duru ko wohihigihenua ahi gogahoko ma demoino. De wohitemo ngohino wato, ‘Ibootohi notemo ma titi gea!

²⁷ Masara naa moi dika tonihidoaka. Abe ngona ka idadi nodoa o Pisaga ma tubuiye, de abe nomahiadoniye ka idadi nolega-lega dika ma tonaka gea ma amokika. Genangoka nowuni-wuningi de ani lako dika masara ko idadiua nomahihora doka o Yorodani ma akere ma honongaika.

²⁸ Masara gea kiani o Yosua unangoli ngona nigorakiye la wonituruuru. Ho unangika ngona kiani nihigaro de nihiputurungu ai hiningaika. Angamoi una gea ahao wahihira-hira o Isiraele ma nyawa la yomahihora doka ma akere ma honongaika. De unangoo abe ahao wahidoaka ma tonaka mata-mata gea onangika la idadi to ona manga oara ma tonaka.’ Hokogea Ma Jou ai demo ngohino ma dodihiraka gea.

²⁹ Ho ngone homanoa dika o tonaka ma dolaino abe imahitigino de o Bete-Peoro ma kapongo.”