Higalioli 2 - Ma Jou ai Demo-demo o Totobelohoka

O Pasala 2:1-8, 10-37 ko atailakouahi Yomahihohininga ma titi manga dodagi aika aino

¹ De ahao o Musa wohigila-gilahi ai demo onangika la wahihohininga ma titi manga dodagi ma dodihiraino. De una wato, “De ipahaino de ngone homaleloro nanga poretino de hosobo hotagi-tagi de hatilakuru o tonaka ma kakaahaino abe nanga dumutu o Bongo-bongo ma gahika, angamoi hokogea Ma Jou o Yawe wohihuloko la hoiki genangika. De gea ngone hotagi-tagi aika aino nanga dekana abe o Edomo ma loku-lokuoka.

² De ma oraha gea de Ma Jou wohitemoli ngohino wato,

³ “Ngini iniwedonoka nia dekana abe ka nitagi-tagi dika aika aino ma loku-lokuoka naa. Ho naa ka idadi ngini nimaleloroli la nia dumutu dakuiye.

⁴ De ngona kiani nahuloko de nahitiari ani kokawaahaika nato, ‘Ko itedekanokaua de ngini niatilakuru o tonaka ma batingi moi, de ma batingi gea ti ngini nia gogianongoru abe o Esau ai totoforauku to ona gea manga tonaka ma batingi. Abe ona gea yogogere o Edomo ma tonakoka. De ngaro o Edomo ma nyawa gea inimodongo nginika masara kiani nimahitiari de nimahidodiai to ona manga tonakoka.

⁵ Ho ufa ngini niaruwae ona gea, angamoi Ngohi tahidoakoka manga tonaka gea o Edomo ma loku-lokuoka la idadi manga oara ma tonaka. De manga tonaka gea, ngaro ma hohutuloo masara ko tinihidoaka nginika.

⁶ Ho ma oraha ngini niatilakuru to ona manga tonaka, nako naga nia perelu o inomo de o akere, gea ka idadi nimale masara kiani niahidoaka nia bobangu onangika.

⁷ Angamoi Ngohi nia Jou duru ka ihikaika tinihiowa abe ngaro nia datoro hokokia dika nidiai masara tinihiowa nginika. De abe nia dodagi naa ma goronaka, ngaro nia dekana o taongo moruatino nitagi-tagi o tonaka ma kakaaha ma amoko naa masara Ngohi ka ihikaika tinigoana de tininii-niiki de tinihidailako nia wowango ma perelu, ho moioo de ko iwa ti ngini nia perelu.’ Hokogea Ma Jou ai hitiari ma demo abe Ngohi tinidofanga nginika ma dodihiraka gea.”

⁸ “Ho ipahaino de ngone hogila-gila de hatilakuru dika nanga gogianongoru o Esau ai totoforauku manga tonaka. De ahao naga ma ngekomo moi hodokaowara, de gea ma ngekomo abe imahitigino de o Elata ma kota de o Esiono Gebere ma kota abe ma dumutu o Hone-honenge ma gahika.” “Ho ma ngekomo gea hodokaowara ipahaino de ahao ngone haniiki ma ngekomo moioli la hatilakuru o Moaba ma tonaka ma kakaahaino.

⁹ De genangoka Ma Jou wotemoli ngohino wato, ‘Ufa ngini niaruwae o Moaba ma nyawa abe ona gea o Loti ai totoforauku. De ufa hiadono ngini de ona nimaketeparangi, angamoi ngaro hoka ngini niahikala masara ko tinihidoakua manga tonaka nginika. Angamoi ma dihiraino de tahidoakoka o Ara ma kota la idadi to ona manga oara ma tonaka.”

¹⁰ Ma dihiraino de ma tonaka abe imahitigino de o Ara ma kota gea, genangoka o Emimi ma nyawa manga tonaka. De o Emimi ma nyawa gea ngade-ngade yomaketero de o Enaka ma nyawa angamoi onangoo duru ko manga ngoe de manga badanga duru ma ago-agomo de duru yokokurutiye.

¹¹ Ho o Emimi ma nyawa de o Enaka ma nyawa, ona mata-mata o nyawa yahiromanga ato o Refaimi ma nyawa, masara nako o Moaba ma nyawa yahiromanga ato o Emimi ma nyawa dika.

¹² De ma dihiraino de naga o Hori ma nyawa abe yogogere o Edomo ma tonakoka masara ipahaino de o Esau ai totoforauku yakiniiki de yahibinaaha o Hori ma nyawa gea. De ipahaino de o Esau ai totoforauku gea onangoli yomanoa o Edomo ma tonakoka. De gea tanu imaketero dika hoka o Isiraele ma nyawa ahao yodiai o Kanani ma tonakoka, abe yakiniiki ma nyawa abe yogogere genangoka de ahao onangoli yomanoa genangoka angamoi gea ma tonaka abe Ma Jou o Yawe wahidoaka onangika.

¹³ De ahao o Musa wohigila-gila ai demo wato, “De gea Ma Jou wonahuloko wato, ‘Ngini kiani nimasikaa niloiki o Serede ma akerika de nimahihora doka ma honongaika.’ De ma akere gea idadi o Kanani ma tonaka ma batingi, ho ngone homataiti hosobo de homahihora ma akere gea ma honongaika la ka idadi o Kanani ma tonakika howohamika.

¹⁴ De abeika, nako haetongo ma oraha abe ma dihiraino o Kadese-Baraneaka hosobo de ino ino ino hiadono o Serede ma akere homahihora doka ma honongaika, gea aolomo nanga taongo moruange de tufange nanga dekana! De hokogea ma dekana ipahaikahi la ka idadi ngone o Isiraele ma nyawa nanga nau-nauru mata-mata yokokihonengohi. Abe ma dodihiraka de Ma Jou womahibehehongo wato ona abe yobaluhoka de ka idadi yoparangi, ona mata-mata kiani yohonenge ipaha de ahao ngone utu ka idadi howohama ma tonakika gea.

¹⁵ De gea igoungu abe idadi duru imaketero hoka Una wotemoka, de Una ma hirete abe wahohonenge hiadono ko yaiwaka nanga hidogoronaka.

¹⁶ De ona mata-mata yopahaka de ahao

¹⁷ Ma Jou wotemoli ngohino wato,

¹⁸ ‘Bootino o wange naa dika de ngini niatilakuru o Moaba ma tonaka ma batingika abe o Ara ma kota ma digi-digino.

¹⁹ Masara ahao ma oraha nimahitigi o Amono ma nyawaika de ko idadiua ngini niaruwae onangika. Abe ona gea o Loti ai totoforauku de ma dihira Ngohi tahidoakoka manga tonaka gea onangika la idadi manga oara ma tonaka. Ho ufa hiadono nimaketeparangi de ona angamoi ngaro hoka niahikala masara duru ko tinihidoakua manga tonaka nginika.’ Hokogea Ma Jou ai demo ngohino ma oraha gea.”

²⁰ De o Amono ma nyawa manga tonaka gea ma dodihiraka o Refaimi ma nyawa yogogere genangoka. Masara nako o Amono ma nyawa ko yahiromangua onangika o Refaimi ma nyawa masara ona yotemo ato o Samasumimi ma nyawa.

²¹ Ho o Refaimi ma nyawa gea ngade-ngade yomaketero de o Enaka ma nyawa angamoi onangoo duru ko manga ngoe de naga de manga bobuturungoka. De nako manga badanga onangoo duru yokokurutiye. Masara ipahaino de Ma Jou wahikokibinaaha onangika la ka idadi o Amono ma nyawali yomanoa ma tonakoka gea.

²² De ai datoro gea duru imaketero dika de abe hokokia waduhunu o Edomo ma nyawa. Abe Una wahibinaaha o Hori ma nyawa la o Esau ai totoforaukuoli yomanoa manga tonakoka. De hiadono ma oraha naa o Esau ai totoforauku ona nagahi ma tonakoka gea.

²³ De marai hokogenangoli idadi o Awi ma nyawaika ma dihiraino abe yogogere manga kapo-kapongoka abe o Gogoronaka ma gahi ma ngigorino hiadono daku o Gasa ma tonakiye. Angamoi ipahaino de o Filistina ma nyawa yoboa o Kereta ma nuuhoka de yaino de yahibinaaha o Awi ma nyawaika de ahao yaturuuru de yomanoa to ona manga tonakoka gea.

²⁴ De ahao o Musa wohigila-gila ai demo wato, “De ngone hatilakuroka o Moaba ma tonaka gea de ahao Ma Jou wonatemo wato, ‘Ngini niloikohi o Arono ma akerika la nimahihora doka ma honongaika. De abe nimahiadono doka ma tonakika gea de abeika, Ngohi ahao tinihidoaka la ngini ka idadi niahikala o Amori ma nyawa de manga koano o Sihono, abe to una ai kadera imanoa o Hesebono ma kotaka. Abe ona de manga tonaka ka ma moi tinihidoaka ti ngini nia giama ma hoatika, ho ngini kiani nimasikaa la niloiki de nimaketeparangi de ona la ka idadi manga tonaka nimahitingini dika!

²⁵ Angamoi duru o wange naa dika de ahao tokarajaanga o nyawa mata-mata manga hiningaka la naga manga modongo ma amoko nginika. Ho ma oraha ona yoihenino ma ade-ade ma titi ngini naga niboa manga tonakino de ahao duru yofafara mangale manga hawana de manga modongo nginika.’”

²⁶ De ahao o Musa wogila-gila woade-ade wato, “De ipahaino ma oraha ngone o Kedemoto ma tonaka ma kakaahaka de o hidingoto ma nyawa yamuruono naga ngohi tahidingoto manga koano o Sihonika o Hesebono ma kotaka. De ona gea yao ahi hidee ma demo de iwidofanga manga koanoika la ufa homaketeparangi de to una ai nyawa gea.

²⁷ Abe ahi demo hokonaa, itemo ato, ‘Abeika mia gogahoko ngona ma koanoika. Mimagahoko la ngona nomihigunoa miatilakuru ti ngini nia tonakino. Abe mia dodagi ma goronaka de ngomi ka mianii-niiki dika ma ngekomo ma amoko de duru ko mirehenua ma homoaika. Ho ti ngini nia redi ma ngoe gea abe naga ma ngekomo ma datekoka duru ko miaruwaeua.

²⁸ De ma oraha ngomi miatilakuru nia tonaka de nako naga mia perelu o inomo de o akere, gea misanangi dika mifangu ma titi ma inomo de ma akere, abe ka idadi miaturuuru de ma bobangu nginika. Ho iti ngini nimihigunoa la ka idadi miatilakuru ti ngini nia tonaka.

²⁹ De naa ma duru o Esau ai totoforauku abe yogogere o Edomo ma tonakoka de ona imihigunoa la miatilakuru manga tonaka, de hokogenangoli o Moaba ma nyawa abe yogogere o Ara ma tonakoka imihigunoa. Ho naa mimagahoko la nginioo nimihigunoa la miatilakuru hiadono o Yorodani ma akere gea mimahihora de ka idadi miwohama ma tonakika abe mia Jou o Yawe wonahidoaka ngomino.’ Hokogea ahi demo abe ahi hidingoto iwidofanga manga koano o Sihonika.”

³⁰ “Masara gea manga koano ka woluku dika wonahigunoa la hatilakuru manga tonaka, de idadi hokogea angamoi nia Jou Una wokarajaanga manga koano ai hiningaka la idadi itogowini hiadono woluku nanga gogahoko gea. De hokogea Una wodiai la ngini de ona ka idadi nimaketeparangi de Una ka winiduhunu hiadono niahikala onangika. De gea duru igoungu abe ma oraha gea ngini niahikala ona gea.

³¹ De hokonaa idadi ma dihira gea. Abe Ma Jou wotemo ngohino wato, ‘Abeika, ma oraha naa de tohiaturoka la manga koano de manga tonaka tinihidoaka ti ngini nia giamika. Ho ngini kiani niloikohi la ka idadi niahikala onangika de manga tonaka nimahitingini.’”

³² “De ma oraha gea manga koano de ai tentara mata-mata yohupuino la homaketeparangi o Yahasa ma kota ma himangoka.

³³ Masara nanga Jou o Yawe wahidoaka ona gea ngoneino ho duru hahikala onangika. De gea ngaro manga koano de ai ngofa-ngofaka de ai kokawaaha masara hahikala ona mata-mataika.

³⁴ De to ona manga kapo-kapongo de manga kota-kota mata-mata hahikala de homahitongone. De abe manga nyawa gea ona mata-mata hahohowono de o hone-honenge angamoi hokogea Ma Jou ai hohowono onangika. Ho ngaro manga ngo-ngofeka de manga ngofa-ngofaka masara ona mata-mata hahohonenge la duru ko yaiwaka ma nyawa gea.

³⁵ Masara nako o aewani ma duduono de manga kiahonanga, gea dika ka idadi homahitongone.

³⁶ De ipahaino de nanga Jou Una wonaduhunoli abe ma oraha homaketeparangi de o nyawa utuoli hiadono ka hapoa hahikala onangika. Abe ngone ma oraha gea hahikala o Aroere ma kota abe imanoa duru o Arono ma akere ma datekoka. De ahao hogila-gila de hahikala o kapo-kapongo de o kota-kota utuoli ka hiadono ngone homahiadono o Gileada ma tonakika. Abe ma kota gea moioo de ko iwa abe ma dadaduhu ma buturungu ka idadi inahikala, masara ngone dika hahikala ena mata-mataika.

³⁷ De ma oraha gea homaketeparangi de o nyawa yowoe-woeika de ngone homahitiari la hodokaowara o Amono ma nyawa manga tonaka de ona abe yogogere o Yaboko ma akere ma datekoka de onangoli abe yogogere manga kapo-kapongoka daku o loku-lokuoka. Ma tonaka de ma ngi gea mata-mata hodokaowara dika angamoi hokogea nanga Jou o Yawe ma dihiraino de wonahulokoka, ho duru hohidodiai hahingounu to Una ai demoika.” Hokogea o Musa woade-ade.