Higalioli 11 - Ma Jou ai Demo-demo o Totobelohoka

Abe ma titi kiani o Isiraele ma nyawa ka ihikaika ihingounu Ma Jou ai Paretaika

¹³ De ahao o Musa wahingahu ai gogianongoru o Isiraele ma nyawaika wato, “Ho nako ngini duru nihidodiai niahingounu Ma Jou ai pareta mata-mata abe tinidofanga nginika o wange naa, Una ahao duru winihiowa nginika. Abe nengokadauino de Una winihuloko la ngini niwidora Unangika abe ti ngini nia Jou o Yawe, de gea niwidora de ti ngini nia hininga ma gahumu de ti ngini nia wowango ma gahumu.

¹⁴ De gea Una winihibehehongoka wato nako naga nia hingounu ai pareta ma demoika de ahao abe ma oraha adonoka de winihidingoto o awana ma akere ti ngini nia tonakuku. Abe ma oraha niodatomo nia tonaka de ipaha ma oraha itigioka o gugutuku de gea nia tonaka yopehakoka la naga nia gugutuku ma hasili ma rorahai. De ngini ahao niamake ma hasili abe hoka o pine de o angguru ma hofoko de o saitunu ma minya.

¹⁵ De gea winihidailako la ti ngini nia duduono ma ruruubu yawedono, de nginioo ti ngini nia inomo inikokiwedonoka la ka idadi nia bunuhu naga.”

¹⁶ “Masara ngini kiani nimahidodiai done nirehene de nimahuba-huba o jou utuika de nia horomati itagi enangika.

¹⁷ Angamoi nako hokogea nia wowango ma datoro de ahao nia rerehene ihifae Ma Jou o Yawe ai ngamo nginika hiadono Una watatoko ma dihanga la ibootohi iawana. De gea nia tonaka ko ihofokokaua to ena ma hasili de ahao o hafini ma amoko inikiniiki ngini nia tonakoka de aino ma homoaika. Abe ngaro ma tonaka gea duru irahai abe ma oraha naa Una itigioka winihidoaka nginika, masara nako hiadono ngini nirehenoka de ahao ngini ko iniwaka nia tonakoka gea.”

¹⁸ “Ho ngini kiani nimahijo-joika to Una ai pareta ma demoika de ufa hiadono ka niawohangika. Kiani ka ihikaika nimahihohininga ma demo gea. Nimahideho-dehorino de ma demo gea abe ihitulihukuoka o bukuoka la idadi o hohininga ma dodunguu abe niamake o wange-wangeiye. Ho ma demo gea irahai nimahidehorino nia giamino de nia peaino.

¹⁹ De kiani nia ngofa-ngofakika ka ihikaika niadotoko ma pareta ma demo gea. Abe ngaro nigogeruku nia tau ma goronaka de ngaro nitagi-tagi ma ngekomika, de ngaro ma oraha nimaidu de abe ma oraha nimamaoino, masara gea mata-mata ma oraha ka idadi niapake la niatobadotoko onangika.

²⁰ De irahai ngini niahitulihuku ma demo gea abe nia tau ma ngoranika de nia kota ma ngoranika la gea ka ihikaika niohohininga.

²¹ De nako naga nia hingounu to Una ai demoika ahao ngini duru ko nia dekana abe nigogere ma tonakoka gea abe Una winihibehehongoka wato winihidoaka nginika. De ngaro nia totoforauku masara onangoo ahao ka idadi yogogere ma tonakoka gea ka hiado-adonika, abe ka hiadono ma dihanga ko iwaka o duniaka naa.” Hokogea o Musa wahingahu Ma Jou o Yawe ai hininga o Isiraele ma nyawaika.