Gogao 18 - Ma Jou ai Demo-demo o Totobelohoka

Ma Jou wodohata o nyawa yomakitigi ihowono

¹ Ma Jou o Yawe wihibehehongo o Musaika wato,

² “Musa, hokonaa kiani nahingahu o Isiraele ma nyawaika nato, ‘Ngohi naa Ma Jou o Yawe ti ngini nia Jou.

³ De naa ahi pareta ma hiaturu tinihidoaka nginika la ufa nimakitigi ihowono. Ko idadiua ngini nianiiki o Mesiiri ma nyawa manga biaha abe niamake ma oraha ka nigogerohi to ona manga hidogoronaka. De nagaoo o Kanani ma nyawa manga biaha abe duru ko idadiua nianiiki ma oraha Ngohi ahao tinihigogere genangoka o Kanani ma tonakoka. Ufa ngini niawohanga ahi demo naa abe duru toluku ngini nianiiki to ona manga wowango ma datoro ma dorou.

⁴ Ngini kiani nihidodiai nianiiki itiai ahi hiaturu ma ngekomika de nihingounu ahi pareta mata-mataika. Ngohi Ma Jou o Yawe ti ngini nia Jou.

⁵ Ho ahi pareta de ahi hiaturu kiani ngini mata-mataika nimahitingini. O nyawa mata-mata abe ihingounu ahi hiaturu ma ngekomo de ahi paretaika, to ona manga wowango yomahiaturu itiai angamoi yaniiki to Ngohi ahi demo gea. Ngohi totemo naa Ma Jou o Yawe.’

⁶ ‘Ngini ko idadiua nimakitigi de onagona dika abe ti ngini nia dutu adaene hatoli itigino. Naa Ngohi Ma Jou o Yawe totemo.’

⁷ ‘Ko idadiua ngini o nauru niahowono nia babaika de o himaleke ilamoko nodiai unangika abe nimakitigi de nia meme. Muna gea nia meme ho duru ko idadiua nimakitigi de muna.’

⁸ ‘De imaketero hokogea ko idadiua ngini o nauru niahowono nia babaika abe nimakitigi de ngoi fekata abe muna nia meme bao.’

⁹ ‘Ko idadiua ngini o nauru homoi-homoiika niahowono nia birangika abe ngaro nia meme ka moi masara nia baba nimaketemomomoi. De ngaro ngini de nia biranga nia baba ka moi masara nia meme nimaketemomomoi ho munangika duru ko idadiua nimakitigi. De ngaro nia biranga o dofo abe momaboa o nyawa utuino eko nia biranga abe momaboa nia tauoka de ahao o nyawa utu imipaliara masara ko idadiua nimakitigi de muna.’

¹⁰ ‘Ko idadiua ngini o nauru niahowono nia danongika abe nimakitigi de nia ngofaka o nauru ngoi ora eko nia ora to munangoli ngomi ora angamoi ka de hokogea ngona nodiai de nomahidadidorou.’

¹¹ ‘De ko idadiua ngini o nauru niahowono nia birangika ngaro ngomi meme o homoaino ma nyawa masara nia baba ka moi ho muna nomietongo ngoni firanga idodutu de ko idadiua nimakitigi.’

¹² ‘De ngini o nauru ko idadiua nimakitigi de nia baba ngoi firanga abe muna duru o wariki moi de ani baba ho muna gea to ngona ngoni owa idodutu.’

¹³ ‘De ngini o nauru ko idadiua nimakitigi de nia ayo abe ngoni meme ngomi riaka eko ngomi dodoto. Ona o wariki moi de ngoni meme ho to ngona ngoni ayo idodutu.’

¹⁴ ‘De ngini o nauru ko idadiua nimakitigi de o ngofeka abe muna modadioka ngoni owa abe ani ama o dodoto eko ani ama o riaka manga fekata. To ona manga feka-fekata onangoo yodadi to ngona ngoni ayo ho ko idadiua nimakitigi de ona angamoi ka de hokogea nodiai de ani ama nihidadidorou.’

¹⁵ ‘De ngini o nauru ko idadiua nimakitigi de nia hunungu. Muna to ngona ani ngofaka ngoi fekata ho ufa nimakitigi de muna.’

¹⁶ ‘De ngini o nauru ko idadiua nimakitigi de nia riaka eko nia dodoto manga fekata. Abe ngini o ria-dodoto o wariki moi ho manga fekata to ngona ngoni hafuru idodutu. Ho nako nimakitigi de ngoni hafuru de gea ani riaka eko ani dodoto nihidadidorou.’

¹⁷ ‘De ngini o nauru abe o ngofeka nomihidadi ngoni fekata de to muna ami ngofaka nagau kiani onangika nomahidodiai. Abe ko idadiua nimakitigi de ngoni ora bao eko to munanginoli ngomi ora abe to ngona ani danongo. De hokogenangoli de ani ngofaka bao to unangoo ngoi ora modadi ani danongo ho ko idadiua nimakitigi de ona angamoi gea o howono abe duru taemono enangika.’

¹⁸ ‘De ngini o nauru abe ngoni fekata ka mowangohi de ko idadiua ngomi dodoto eko ngomi riaka onangoo nimakitigi ngona de ona abe gea imaketero de ngoni hafuru nahidadi to ngona ngoni fekata. Ma nako ngoni fekata mohonengoka de naga ngomi riaka eko ngomi dodoto abe ko iwa manga rokata de ka idadi momatengo nomihidadi ngoni fekata.’

¹⁹ ‘De ngini o nauru ko idadiua nimakitigi de o ngofeka ma oraha ami mede mamake. Abe ma oraha muna gea ko imidudunguahi de ko idadiua nimakitigi.’

²⁰ ‘Ko idadiua o nauru nimakitigi de o nyawa utu manga fekata. Ka de ngini nimakitigi de ngona o nauru nomahidadidorou.’

²¹ ‘De ngini ko idadiua nia ngofa-ngofaka nimahihuba o popangaoika o Molokika abe gea duru niahowono Ngohino. Abe de gea ngini o pangao o Moloko gea nihidadi nia jou de duru niongelo to Ngohi ahi romangika. Ngohi naa Ma Jou o Yawe.’

²² ‘Ko idadiua ngini o nauru nimahikokanauru abe nimakitigi imaketero de o ngofekali. Gea o howono ma dorou abe Ngohi duru taemono enangika.’

²³ ‘De ko idadiua ngini ngaro o nauru eko o ngofeka nimahitorou abe nimakitigi de o aewani. Gea nisafarune abe duru nialawana ahi mau o nyawaika. Ho naa tinihitiari ngini o nauru de nginioo o ngofeka angamoi ko idadiua o ngofeka momahidoaka o aewani ma naurika.’

²⁴ ‘Nako ngini nimahidadidorou de o howono abe Ngohi Ma Jou naa tafetongoka nginika, gea nianiikoka to ona manga biaha abe yogogere o Kanani ma tonakoka. De mangale ma titi to ona manga howono gea hiadono Ngohi ahao tahihupu ona gea o Kanani ma tonakino. Ho Ngohi naa tinihidoakokau ahi pareta ma hiaturu ma ngekomo la ufa nginioo nimakitigi ihowono hoka onangoli.

²⁵ Ona yogogere o Kanani ma tonakoka yodiai duru itorou hokogea hiadono to ona manga tonakoo Ngohi tato yahipeseke ho Ngohi kiani manga tonaka tahohowono hiadono o Kanani ma tonaka gea yahikokihupu ona imaketero hoka yahikokingunanga ona mata-mataika ma titi manga datoro.

²⁶ Masara ma oraha ngini o Isiraele ai totoforauku ahao Ngohi tinihigogere genangoka o Kanani ma tonakoka de kiani ngini nihidodiai nianiiki itiai ahi hiaturu ma ngekomika de nihingounu ahi pareta mata-mataika. De ngaro naga o homoaino ma nyawa nia hidogoronaka ho nimahidogogere moi, ma, onangoo ko idadiua yahowono hoka kangano Ngohi tinihingahuoka.

²⁷ Angamoi ka ma dodihirainohi o howono mata-mata gea idadioka to ona manga datoro ma biaha abe yogogere o Kanani ma tonakoka hiadono tato manga tonaka gea ihidadidorou.

²⁸ De nako nginioo ahao nihipeseke ma tonaka gea hiadono nihidadidorou imaketero hoka onangoli ma dihira ihipeseke de ahao Ngohi todiai la ma tonaka gea nginioli inihingunanga abe ma titi inihihupu genangino.

²⁹ O nyawa mata-mataika abe yodiai ma dorou nenanga hoka yomakitigi ihowono, eko yomahijou o popangaoika, kiani duru nimahitiari genangika angamoi tinihingahuoka Ngohi duru todohata manga howonika gea. Ho ona abe yodiai itorou hokogea Ngohi manga gogao manga gogianongoruika tatoaka ho ona gea abe yahowonoka genangika kiani ngini niahohowono ka hiadono yohonenge.

³⁰ Ho ma moioli tinihitiari la ufa nimaaduru hoka onangoli, ngini kiani nimahidodiai nianiiki ahi pareta de ufa nianiiki o nyawa abe yogogere o Kanani ma tonakoka manga biaha abe Ngohi taemono enangika abe done ngini nimahipeseke de manga howono gea abe duru todohata. Ngohi Ma Jou o Yawe totemo.’” Hokogea Ma Jou ai hingahu o Isiraele ma nyawaika abe kiani o Musa wadofanga onangika. Duru Ma Jou woigo wonagoana la ufa homahipeseke angamoi duru ko ai medebini ho ngaro wonadora ngone homoi-homoiika masara, ko idadiua wonadafongo nako ngone hodiai ko itiaiua angamoi Una wototiai. Ho ma titi ai dora itagi o Isiraele ma nyawa manga doomu ma amokika hiadono ona abe yahowono yomakitigi, abe duru ko idadiua, de Una wato kiani manga gogao manga gogianongoruika watoaka done manga howono imahora o nyawa utuikali hiadono idadi to ona mata-mataika manga biaha. Ho ona manga hidogoronaka abe hokogea yahowonoka kiani yahohowono hiadono yohonenge la idadi o hitiari ma dodotoko o Isiraele ma nyawa mata-mataika.