Gegetongo 36 - Ma Jou ai Demo-demo o Totobelohoka

O Pasala 36 ko atailakouahi Manga oara ma tonaka ma hiaturu utuoli

¹ De ma moiuku naga o Isiraele ma nyawa manga hohihira yamuruono naga yoboaino la yomarihimanga de o Musa de o hihira utuoli abe duru manga gogere ikokurutiye o Isiraele ma nyawaka. De ona yoboa-boaino, ona o Gileada ma nyawa manga hohihira de o Makiri ai totoforauku. De o Makiri una gea ai baba o Manase, de o Manase ai baba una gea o Yusupu.

² Ho ona yomarihimanga de yotemo o Musa de ai dodiawoika ato, “Mia baluhu, ngomi naa mihioriki abe ma dihiraino de Ma Jou o Yawe winihuloko la nimaketebobataru ho genangino de Ma Jou wohiaturu la ma tonaka ma hidoku homoi-homoi imakataana de o Isiraele ma nyawa nanga dutu. De mihiorikoo abe nanga Jou winihuloko la nanga dutu o Selafehada ai oara ma tonaka niahidoaka to una ngoi ora-oraika.

³ Masara abeika naa moi mihipuda mia kangela. Abe nako to una ngoi ora-ora ahao yoilaka de o nau-nauru abe yomahidutu o dutu moiikali. Nako idadi hokogea de ahao manga oara ma tonaka imaturuuru de imadadi o dutu moioli gea manga tonaka. Ho gea de to ngomi naa mia tonaka idadi ietekoli / ikurangoka.

⁴ De ipaha abe ma oraha o Higilio ma taongo adonoka de manga tonaka gea ko ihigilioua to ngomi mia dutuino masara ka ihikaika idadi to ona gea dika manga dutu manga tonaka. Ho to ngomi mia tonaka gea imaketero hoka ihihanga ka hiado-adonika angamoi ko idadiua ihigilio to ngomi mia dutuino. De ngomi naa miamao abe gea ko itiaiua.”

⁵ De ahao o Musa wapaluhu onangika wato, “Hokonaa Ma Jou o Yawe ai demo nginika. Abe Una waetongo wato to Yusupu ai totoforauku naa manga demo itaana.

⁶ Ho to Una ai huhuloko ma demo abe wohidumutu o Selafehada ngoi ora-oraika hokonaa. Una wato ona gea ka idadi yoilaka de o nauru onagona dika abe adaene de manga hininga, iti ona gea manga baba ai dutu adaene.

⁷ De hokogea ma ngekomo la ufa o Isiraele ma nyawa manga oara ma tonaka imatoturuuru manga dutu utuika. Angamoi ma dutu onagona dika abe yamake manga oara ma tonaka ma oraha abe ahao yahikokodoku, kiani ka ihikaika idadi to ona dika manga tonaka.

⁸ Ho o Isiraele ma nyawa manga ora mata-mata, abe ngaro yomahidutu manga dutu onagonaika dika, masara kiani ona gea yoilaka de o nauru abe manga baba ai dutu adaene. La gea duru ko iwa o Isiraele ma nyawa abe to ona manga oara ma tonaka ihihanga masara ka ihikaika idadi to ona dika manga tonaka.

⁹ Abe duru ko idadiua o Isiraele ma nyawa manga oara ma tonaka imaturuuru ho idadi o dutu moioli manga tonaka, masara kiani ka ona dika ka ihikaika yodadi ma tonaka ma dutu.” Hokogea ma huhuloko ma demo abe o Musa wadofanga onangika.

^10-11 De ahao o Selafehada ngoi ora gea, abe manga roma-romanga o ngo Mala, o ngo Tirisa, o ngo Hogala, o ngo Milika de o ngo Noa, ona duru yaniiki itiai Ma Jou o Yawe ai huhuloko ma demo. Ho ona homoi-homoi yoilaka de o nauru abe manga baba ai dutu adaene.

¹² Abe manga roka-rokata mata-mata yomahidutu o Manaseika, ho ona mata-mata o Yusupu ai totoforauku. De hokogea hiadono to ona manga oara ma tonaka ko imaturuurua o dutu utuikali.

¹³ De hokogea Ma Jou o Yawe ai huhuloko de ai hiaturu ma demo abe wihidoaka o Musaika la una wadofanga o Isiraele ma nyawa mata-mataika. Abe ma oraha gea de ona ka yomahidodogumohi o Moaba ma dolaka de o Yorodani ma akere ma datekoka. De gea manga dodogumu ma ngi duru o Yeriko ma kota ma himangoka.