Gegetongo 33 - Ma Jou ai Demo-demo o Totobelohoka

O Pasala 33 ko atailakouahi O Isiraele manga dodagi homahihohininga

¹ De ma dodihiraino ma oraha o Musa de o Harunu yahihira-hira manga gogianongoru o Isiraele ma nyawa o Mesiiroka de yaino de hokonaa manga dodagi. Abe ma oraha yohupu o Mesiiri ma tonakino de yomahiaturu la manga dutu ngimoi de hinooto gea ona homoi-homoi naga manga hihira manga himangoka la onagona dika yomahidutu onangika ka idadi yahidoduruino manga hihiraika. De gea yohupu yotagi-tagi de manga midirihi.

² De ma oraha gea Ma Jou o Yawe wihuloko o Musaika wato kiani o Musa wohitulihuku manga dodagi ma ade-ade de ma ngi ma roma-romanga o kiaka yomahidodogumu. Ho o Musa wohitulihuku gea mata-mata, de hokonaa ma ngi-ngi abe ma dodihiraino de ona yotulu-tulu genangoka.

³ Abe ma oraha gea de naga ma futu abe o Totilakuru duru ihira idadioka, de ma dawangeino de o Isiraele ma nyawa yosobo yohupu o Mesiiroka de yaino. De gea yosobo duru de manga domoroinoka, de o Mesiiri ma nyawa mata-mata ka idadi yalega-lega onangika ma oraha yohupu. De ma wange gea adaene ma mede ihira de ma wange ngimoi de motoa.

⁴ Ho ma wange gea abe o Isiraele ma nyawa yosobo, gea o Mesiiri ma nyawa ka yalungunohi manga domoro o nau-nauru abe Ma Jou o Yawe wahohonengoka. Angamoi ma futu gea de Ma Jou duru wahikala de wahihohowono o Mesiiri ma nyawa manga jou-jou.

⁵ De manga dodagi ma wange ihira gea de o Isiraele ma nyawa o Ramese ma kota yanoaika de yomahidodogumu o Sukotoka.

⁶ De ipahaino de o Sukotoka de yosobo de ahao yomahidodogumu o Etamoka abe imanoa o tonaka ma kakaahaka ma datekoka.

⁷ De ahao o Etamoka yosobo de ipahaino yorehene la manga dumutu yolio o Pihahiro ma ngiino, abe gea o Baala Sefono ma daanoka. De ma futu gea yomahidodogumu o Migidolo ma himangoka.

⁸ De o Pihahiroka de yosoboli de ahao yomahiadono o Bongo-bongo ma gahika, ho ma gahi ma hidogoronaika yaniiki hiadono yomahihora doka ma honongaika. De abe ma honongaka gea naga o tonaka ma kakaaha abe ihiromanga o Etama, ho ona yotagi-tagi manga futu hangeino o Etama ma tonaka ma kakaahaka de ahao yomahidodogumu o Mara ma ngioka.

⁹ De ipahaino o Mara yosobo de yotagi-tagioli ka hiadono yomahiadono o Elimi ma ngioka. De o Elimoka naga ma jobuubu ngimoi de hinooto de o gota o utu moritumidi abe ma rupa hoka o okiri eko o femu, de gea ma titi hiadono ona yomahidodogumu genangoka.

¹⁰ De ipahaino o Elimoka de yosobo de ahao yomahidodogumu o Bongo-bongo ma gahi ma datekoka.

¹¹ De ipahaino ma gahioka de yosobo de yotagi-tagi hiadono o Sini ma tonaka ma kakaahaika yomahiadono de genangoka yomahidodogumoli.

¹² De ipahaino o tonaka ma kakaahaka yosobo de yotagi-tagi de yomahiadono o Dofaka de yomahidodogumu genangoka.

¹³ De ipaha genangoka yosoboli de yotagi-tagi ka hiadono yomahiadono o Alusika de genangoka yomahidodogumoli.

¹⁴ De o Alusu gea yanoaika de ipahaino yomahidodogumu o Rafidimoka, abe genangoka ma dihiraino de ko iwa o akere la yokere.

¹⁵ De o Rafidimoka yosobo de ipahaino yomahidodogumoli o Sinai ma tonaka ma kakaahaka.

^16-36 De ipahaino ona ihigila-gila manga dodagi ho o Sinai ma tonaka ma kakaahaka yosobo de yakiloliti ma tonaka gea de yotulu-tulu moduku de yomahidodogumu ma ngi-ngi naa homoi-homoiika. Abe yomahidodogumu o Kiboto-Taawa ma ngioka de o Haserotoka de o Ritamoka de o Rimono Peresoka. De ipahaino de yomahidodogumoli o Libanoka de o Risa ma ngioka de o Kehelatoka de ahao o Siafere ma lokuoka. De yogila-gilali de yomahidodogumu o Haradoka de o Makelotoka de o Tahatoka de o Tara ma ngioka. De ipahainoli yogila-gila de yomahidodogumoli o Mitakoka de ahao o Hasamonaka de o Moserotoka de o Bene-Yakanoka de o Horo-Gidigadokali. De yogila-gilali de ipahaino yomahidodogumoli o Yotabatoka de o Aboronaka de o Esiono Geberoka de ahao o Sini ma tonaka ma kakaahakali abe o Kadesoka.

³⁷ De ipahainoli de o Kadesoka yosobo yogila-gila de yomahidodogumu o Hooro ma lokuoka abe gea o Edomo ma tonaka ma batingoka.

³⁸ De abe ma oraha ona nagahi o Hooro ma loku ma timiuku, Ma Jou o Yawe wihuloko o Harunu wato kiani wodoa daku ma lokuiye. Ho wodoaiyeoka de ahao o Harunu wohonenge genangoka. De gea o Isiraele ma nyawa yohupu o Mesiiri ma tonakino de ahao o taongo moruata ipahaino de o Harunu wohonenge. Abe gea ma mede motoa de ma wange duru ihira.

³⁹ De o Harunu ai ngumuru ai taongo o ratuhu moi de monaoko de hange adonoka ma oraha wohonenge ma lokuoka gea.

⁴⁰ De ma oraha gea naga o Kanani ma nyawa manga koano womatengo abe wahikoano o Arada ma kota ma nyawa. De to una ai kota imanoa o Kanani ma tonaka ma honongaka abe dakuiye idateke. De ma koano gea woihenino ma titi abe o Isiraele ma nyawa naga yoboaino ai tonakino.

^41-49 Abe o Harunu wopahaka de ipahaino ona o Hooro ma lokuoka de yosobo la yotagi-tagi hiadono yomahiaini de yomahidodogumu o Salamona ma ngioka. De ahao manga dodagi ihigila-gila de yomahidodogumu o Funonoka. De ipahaino de yotagi-tagioli de yomahidodogumu o Obotoka, de ahao o Iye Abarimokali yomahidodogumu, abe ma ngi gea imanoa o Moaba ma tonaka ma batingoka. De ipahainoli de genangoka yosobo de yotagi-tagi ka hiadono yomahidodogumu o Dibono Gaadoka de ahao o Amono Dibataimoka de ahao yotagi-tagi yodoa o Abarimi ma loku-lokuiye de yomahidodogumoli ma loku-lokuoka gea o Nebo ma daanoko. De ipahaino ma loku-lokuoka gea yosobo de youtioli la yomahidodogumu o Moaba ma dolaka abe o Yorodani ma akere ma datekoka. De o Yeriko ma kota gea imanoa doka o akere gea ma honongaka. De abe ma oraha yomahidodogumu o Yorodani ma akere ma datekoka gea de manga dodogumu ma ngi duru iwoatika, abe yaomanga ma tonaka o Bete Yesimoto ma kapongoka ka hiadono o Sitimi ma dolaka angamoi ona duru ko manga ngoe.

⁵⁰ De abe ma oraha ona yomahidodogumu o Yorodani ma akere ma datekoka gea de o Yeriko ma himangoka, Ma Jou o Yawe wotemo o Musaika wato,

⁵¹ “Ngona kiani nadofanga ahi demo naa ani gogianongoru o Isiraele ma nyawaika nato, ‘Ahao ngini nimahihora doka o Yorodani ma akere ma honongaika la ka idadi niongohama o Kanani ma tonakika.

⁵² De gea niwohama de kiani niakiniiki o Kanani ma nyawa mata-mataika o tonaka ma homoaika. De naga to ona manga popangao abe utu yopakoro o gotaino de utu yapake o gurasi eko o haaka de duru ihihauku la iwaro de hokogea manga popangao ma hapa yomadiai. Ho manga popangao mata-mata gea ngini kiani niabinaaha dika. De nagali ma ngi-ngi o loku-lokuoka o kiaka ona gea yomahuba-huba manga jou-jouika, de enangoo mata-mata ngini kiani niabinaaha hiadono duru ko iwaka.

⁵³ Ho ngini kiani ma tonaka gea nimahitingini la nginioli nimahigogere genangoka angamoi Ngohi naa tinihidoakoka ma tonaka la idadi ti nginioli.

⁵⁴ De ahao ma tonaka gea ngini kiani niahikokodoku la nia dutu ngimoi de hinooto gea homoi-homoi yamake ma tonaka abe duru itaana. Ho ngini kiani nimaketebobataru la genangino de Ma Jou wohiaturu ho ma tonaka ma hidoku homoi-homoi imakataana de nia dutu. De gea o dutu abe ona duru ko manga ngoe, ona ahao yamake o tonaka ma amoko, masara nako o tonaka abe hatoli ma eteteke gea o dutu abe hatoli yokuranga ma nyawa yamake. De nako hiadono Ma Jou wahiaturoka ma oraha nimaketebobataru, hokogea dika to Una ai ngiiriki de duru ko idadiokaua ngini nihikawalimi ai ngiiriki gea. De hokogea ma ngekomo la o tonaka mata-mata ihikeregu la nia dutu homoi-homoi yaborimake manga oara ma tonaka.’”

⁵⁵ De Ma Jou wohigila-gila ai demo o Musaika abe una ahao kiani wadofanga ai gogianongoruika wato, “De kiani nahitiarioo onangika nato, ‘Masara nako hoka ngini ko niakiniikua o Kanani ma nyawa gea abe ma oraha naa ona yomanoa ma tonakoka doka, to ona manga hou ahao duru inihikangela nginika hiadono niaetongo hoka o gota moi abe naga nia lako ma goronaka de hoka o hihika ma amoko abe initopoko nia gumurukoka. Abe ona gea duru ka ihikaika inihikokangela nia tonakoka gea abe ahao nimanoa genangoka.

⁵⁶ De ma dodihiraino naga ahi hidee la tadotoko onangika de o dodotoko ma dubuho. Masara nako ngini ko nihihingounua ho ko niakiniikua ma nyawa gea, ahao ahi dodotoko ka idadi itagi nginikali la ma dubuho gea inidaene nginiuku.’ De hokogea ngona o Musa kiani nahitiari o Isiraele ma nyawaika.”