Dodadi 45 - Ma Jou ai Demo-demo o Totobelohoka

O Yusupu womahingahu ai ria-dodotika

¹ De o Yusupu duru ko wapoakaua womatongohono ai duduhunu o Mesiiri ma nyawa manga himangoka ho wahuloko onangika wato, “Ona dika abe naga ahi himangoka naa yomagoo-gogere naangoka, ho ngini utu nikokihupuokahi!” Ho gea ka ai ria-riakokahi de ai dodoto o Benyamini naga genangoka de ahao womahingahu onangika abe una manga ria-dodoto.

² De o Yusupu woari. De hiadono woari kohaamokiye ho o Mesiiri ma nyawa onangoo yoihene, de gea yoade-ade hiadono o Firaunu de ona mata-mata ai tauoka ihikokioriki abe o Yusupu woari.

³ De o Yusupu womafetongo ai ria-dodotika wato, “Naa ngohi o Yusupu, de gea niagoungu ahi baba, ka wowangohi?” Masara ai ria-dodoto duru yatodokana ka hiadono yatomomonoka ho ko idadiua yopaluhu de angamoi manga hawanoo ipuda ma titi manga dodoto naa iwihimanga.

⁴ De o Yusupu wotemo wato, “Niaino, nimahitigi-tigino ngohino naa.” Ho ka de yomatoomu unangoka de o Yusupu wato, “Ngohi naa nia ria-dodoto idodutu o Yusupu abe ma dihira nihifukunu o Mesiirino naa.

⁵ Masara ngaro nihifukunoka ma ufa nihawana eko nimangamo angamoi Ma Jou wohiaoino o Mesiiroka la ngohi tonahihiraino nenangoka la ngone o nyawa nanga ngoe ka howangohi.

⁶ Naa adonoka o taongo hinooto ma dekana o datomino ma hasili ko iwa masara ma hou o taongo motoahi ma dekanohi abe ko hodatomuahi de ko hotoomuinouahi nanga redino ma hasili.

⁷ De gea Ma Jou wohihidingoto la ngohi tohiraino nenangoka la todadi ma titi la ngini ahao nimatoomuino la nigogere ngohioka naa. De Una wohiaturu hokogea la tinihihupu o kangelaino la ka idadi ngini ka niwangohi de to ngone nanga totoforauku ahao yodadi o dutu ma amoko o duniaka.

⁸ Igoungu, ko nginiua nihihidingoto ngohi nenangino masara Ma Jou wohihidingotino. De Una wohihidadi la ngohi naa o Firaunu duru wohingaku imaketero hoka o ngofaka wingaku ai babaika. Hokogea Ma Jou wohihidadi o hihira o Mesiiri ma tonakoka naa hiadono manga popareta mata-mataika ahi kuahaka ka hiadono o Firaunu ai tauikaoo igogere to ngohi ahi hiaturoka.”

⁹ De ahao o Yusupu wahuloko ai roria-dodotika wato, “Ngini naa nimataiti nilio de niwihingahu ahi babaika niato, ‘Hokonaa ani ngofaka o Yusupu ai hingahu ngonaika mia baba: una wato, ngohi ani ngofaka o Yusupu, de Ma Jou wohihidadi o Mesiiroka ma amokika manga popareta ma hidimono. Ho Baba, naa tonibehehongo la nomataitino noboa ngohino de ufa notulu-tulu.

¹⁰ De ahao ngohi tonihigogere o Gosene ma tonakoka la ngone homakadatekuku, ngona de ani ngofa-ngofaka de ani dano-danongo. De kiani ti ngini nia duduono de mata-mata nia kiahonanga enangoo niakokiaoino.

¹¹ De dokenangoka ngini nigogere la nia perelu mata-mata ka idadi ngohi tinihidailako. Hokogea ahi behehongo ngonaika done ani tau de ani kiahonanga ikokihihanga angamoi ma tonaka naa ko iwahi ma hasili naa ma dekana o taongo motoahi.’ Hokogea ahi demo nanga babaika abe kiani ngini niwidofanga unangika.”

¹² De ahao o Yusupu wahibehehongo onangika wato, “De ngini ahi ria-riaka naa abeika nihitailako ngohi, de ngonaoo, ahi dodoto o Benyamini, ngonaoo nohitailako nako ngohi nihihioriki eko koua. Marai ahi demo dika de ngini nihihiorikoka ngohi igoungu o Yusupu.

¹³ Ho kiani nanga baba niwiade-ade unangika abe hokokia ngohi todadioka o baluhu moi o Mesiiroka abe manga nyawa duru de manga horomati ngohino. O kia dika abe niamakeoka o Mesiiroka naa niaika de niwiade-ade nanga babaika de ahao nimataiti niwiao nenangino.”

¹⁴ O Yusupu ai behehongo hokogea de ai garago iwilufungokaholi hiadono ko womatongohonokaua de ai koongo itifa de ai dodoto o Benyamini duru wikooino de gea o Benyaminoo ai koongo imulaenge itifa.

¹⁵ De gea o Yusupu ka woariohi de ai ria-riakoo homoi-homoiika wakokikooino de wakokibounu. Gea de ahao yomulaenge yogogarago yomaketeade-ade una de ai roria-dodoto.

O Firaunu wibehehongo o Yakubu woboa o Mesiirino

¹⁶ Ka de hokogea idadi de o Firaunikaoo o nyawa iwiade-ade ato, “Naga to Yusupu ai roria-dodoto yoboaka!” Ka de woihene hokogea de unangoo o Firaunu duru wosanangi de onangoo abe yokokarajaanga unangoka onangoo yosanangi.

¹⁷ De o Firaunu wiahoko o Yusupu de wihingahu unangika wato, “Safanata Panea, ngohioo naa duru tosanangi tonihingahu kiani ani ria-dodoto yomataiti manga inomo ihibarene manga keledaiuku de yokokilio manga nyawaika o Kanani ma tonakoka.

¹⁸ De naa ahi behehongo ani babaika abe kiani nahingahu ani ria-dodotika la onangoli ahao iwihingahu unangika hokonaa: ‘O Firaunu woigo la nia baba niwiaoino o tonakino naa la una de ai nyawa mata-mata yogogere nenangoka. De ngohi, o Firaunu, ahao tinihidailako ti ngini nia tonaka nenangoka abe ka enangohi duru irahai o Mesiiroka ho nia datomo duru de ma gutufuroka la ngini nigogere nisosanangi ahi tonakoka naa.’ Hokogea ahi behehongo abe kiani ani roria-dodoto yadofanga ani babaika.

¹⁹ De ma oraha ani roria-dodoto yolio kiani o Mesiiroka ma goroba ma ngoe yomagao la ma oraha yoboali nenangino de ka idadi manga ngofa-ngofaka manga etetekohi de manga feka-fekata yahibarene ma gogorobauku. De ani babaoo ka idadi wofarene o gorabauku la gea ko yokangelaua abe ma oraha manga dodagi ma goronaka.

²⁰ De nahingahuoo ngaro ufa dika de ona yopusingi ma titi manga kiahonanga utu yanoaika angamoi ahao yamake o Mesiiroka ma kiahonanga abe duru ma rorahai. Hokogea Safanata Panea ahi behehongo ani babaika de ani gogianongoruika.”

²¹ De o Firaunu ai behehongo gea o Isiraele ai ngofa-ngofaka yaniiki abe yodiai duru imaketero hoka o Yusupu wahuloko onangika. De o Yusupu wahidoaka onangika o goroba ma ngoe hoka o Firaunu wihibehehongoka de wahibilaono la yawedono manga dodagi ma goronaka.

²² De o pakeangoo wahikokidoaka ai ria-riakika masara o Benyaminohi woutumu angamoi o Yusupu ai hidoaka unangika hiadono ai pakeanga dika de ka idadi womaduruuru ma motoaino o wange moi. De wihidoakoli o Benyaminika o tiwi o haaka ise-senge o ratuhu hange.

²³ De naga o Yusupu ai hidingoto ai babaika o keledai ngimoi abe ihibarenuku de o kiahonanga irupa-rupa duru ma rorahai abe o Mesiiroka ma kiahonanga, de gea yao o Kanani ma tonakika. De nagaoo o keledai ma beka ngimoioli abe ihibarenuku de o Yusupu ai baba ai inomo abe iwitotaka unangika la ena gea iwihibilaono ma oraha ai dodagika ma inomo.

²⁴ Hokogea o Yusupu ai ria-dodoto wahidailako manga perelu de ahao wahigunoa la yolio, de wahibehehongo onangika wato, “De gea o ngekomika ufa nimakokangamo!” Hokogea wahitiari o Yusupu.

²⁵ De ahao ona o Mesiiroka yosobo yoiki manga babaika o Kanani ma tonakoka.

²⁶ Ka de yomahiadonoka de iwihitodokanika manga babaika ato, “O Yusupu ka wowangohi! De unangoo iwigoraka la wodadi manga popareta ma hidimono hiadono wapareta o Mesiiri ma tonaka mata-mataika.” Gea woihene de duru o Yakubu iwitodokana de marai ko wangakua manga ade-ade.

²⁷ Masara ona ahao o Yusupu ai behehongo mata-mata iwihingahu manga babaika. Ho ka de o Yakubu woihene o Yusupu ai demo de wamakeoo o goroba ma ngoe gea abe o Yusupu wohidingoto la ai baba ka idadi wofarene la iwihiao, de ahao wangaku manga ade-adeika.

²⁸ De wotemo wato, “Ihiwedono tiningaku nginika! Ho igoungu ahi ngofaka o Yusupu ka wowangohi! De ngohi toigo toiki la timakeohi ahi ngofaka o Yusupu ho ngaro ahao ngohi tohonenge ma iti timakeokahi.” Hokogea o Yakubu ai garago ma demo.