Dodadi 36 - Ma Jou ai Demo-demo o Totobelohoka

O Esau ai totoforauku manga ade-ade

¹ Naa o Esau ai ade-ade abe ai ngofa-ngofakuku hokokia yolape-lapeuku. O Esau ai romanga hinooto abe iwihiromangoli, “o Doka-dokara” abe to ona manga demo, “o Edomo.”

² Una womale ngoi fekata yahinooto o Kanani ma nyawaino, abe momatengo o ngo Ada, ami baba o Elono, o Hete ma nyawa. De ngoi fekata momatengoli o ngo Oholibama abe ami baba o Ana de ami ete o Sibeono, ona o Hewi ma nyawa.

³ De ahao o Esau womileoli ngoi firanga o ngo Basemata la munangoo womihidadi ngoi fekata. Muna gea o Isimaele ngoi ora abe ami iranga idodutu o Nebayoto.

^4-5 O Esau de ngoi fekata o ngo Ada manga ngofaka o nauru womatengo dika ai romanga o Elifasa. De ai ngofa-ngofaka o nauru abe wamake ngoi fekata o ngo Oholibamino, manga romanga o Yeusi, de o Yaelama de o Kora. De ai ngofaka womatengoli wamake o ngo Basematino ai romanga o Rehuele. Ho to Esau ai ngofaka o nauru yamotoa de ona mata-mata yomaboa o Kanani ma tonakoka.

⁶ De ahao o Esau wato womaturuuru o tonaka moiikali. Ho ngoi feka-fekata de ai ngofa-ngofaka o nauru de o ngofeka de ai nyawa mata-mata abe yaduhu-duhunu manga tauoka, ona wakokiao. De ai aewani o duduono de to una ai kiahonanga abe womahitouna ma oraha wogogere o Kanani ma tonakoka gea mata-mata wakokitoomuino la ka ma moi wakokiao wato yomakitingaka de ai dodoto o Yakubu.

⁷ De gea womatingaka ai dodotino angamoi manga tonaka genangoka ma ruruubu ko yawedonua ho manga aewani ko imakegetongua ma inomo.

⁸ Ho o Esau gea, abe ai romanga hinooto ho ai romanga moioli o Edomo, una womaturuuru o Seiri ma tonakika abe imakadateke de o Kanani ma tonaka. Genangoka una de ai nyawa mata-mata yogogere o Seiri ma loku-lokuoka.

⁹ Ho o Esau ai totoforauku yahiromanga o Edomo ma nyawa de hokonaa to una ai totoforauku yolape-lapeuku o Seiri ma loku-lokuoka. De hokonaa manga roma-romanga.

¹⁰ O Esau ai ngofaka o riaka ngoi fekata o ngo Adaino de iwihiromanga o Elifasa. De ai ngofaka womatengoli ai romanga o Rehuele de to una ngoi meme o Esau ngoi fekata o ngo Basemata.

¹¹ De o Elifasa ai ngofaka yamotoa manga roma-romanga o Temana, o Omara, o Sefo, o Gaetama de o Kenasa.

¹² De naga ai ngofaka womatengoli ai romanga o Amaleke abe womaboa ngoi gilaongo o ngo Timanino. Ho o ngofaka yabutaanga gea to ngo Ada ami danongo mata-mata.

¹³ De o Rehuele ai ngofaka yaiata de manga roma-romanga o Nahata, o Sera, o Siama de o Misa. Ho o ngofaka yaiata gea to ngo Basemata ami danongo mata-mata.

¹⁴ De naga o Esau ai ngofa-ngofaka yahange ngoi fekata o ngo Oholibamino abe manga roma-romanga o Yeusi, o Yaelama de o Kora. O ngo Oholibama ami baba o Ana de ami ete o Sibeono.

¹⁵ Ho o Esau ai totoforauku abe ai ngofaka o Elifasino ona ahao yomahitoomu ma titi manga totofora o Elifasa ai ngofa-ngofaka. Ho naga o Esau ai totoforauku yomahiromanga o Temana ma nyawa, de utu yomahiromanga o Omara ma nyawa, de utu yomahiromanga o Sefo ma nyawa, de utu yomahiromanga o Kenasa ma nyawa,

¹⁶ de utu yomahiromanga o Kora ma nyawa, de utu yomahiromanga o Gaetama ma nyawa, de utu yomahiromanga o Amaleke ma nyawa. Ho o nyawa mata-mata gea o Esau de ngoi fekata o ngo Ada manga totoforauku.

¹⁷ De o Esau ai totoforauku abe ai ngofaka o Rehuelino ona ahao yomahitoomu ma titi manga totofora o Rehuele ai ngofa-ngofaka. Ho naga o Esau ai totoforauku yomahiromanga o Nahata ma nyawa, de utu yomahiromanga o Sera ma nyawa, de utu yomahiromanga o Siama ma nyawa, de utu yomahiromanga o Misa ma nyawa. Ho o nyawa mata-mata gea o Esau de ngoi fekata o ngo Basemata manga totoforauku.

¹⁸ De o Esau ai totoforauku abe ngoi fekata o ngo Oholibamino, onangoo ahao yomahitoomu ma titi manga totofora manga roma-romanga. Ho naga o Esau ai totoforauku yomahiromanga o Yeusi ma nyawa, de utu yomahiromanga o Yaelama ma nyawa, de utu yomahiromanga o Kora ma nyawa. Ho o nyawa mata-mata gea o Esau de ngoi fekata o ngo Oholibama manga totoforauku. Abe o ngo Oholibama gea to muna ami baba o Ana.

¹⁹ Hokogea o Edomo ma nyawa yodadi o dutu-dutu de ona mata-mata yotofora o Esauika abe ai romanga moioli o Edomo.

O nyawa abe yohira yogogere o Edomo ma tonakoka

^20-21 De ma dihira o Esau de ai nyawa ko yogogeruahi o tonakoka gea de nagau o Hori ma nyawa womatengo ai romanga o Seiri abe una wohira wogogere genangoka. De hokonaa o Seiri ma nyawa abe yodadi o dutu-dutu ma titi yomahitoomu de yomahiromangika o Seiri ai totofora manga roma-romangika. Ho manga dutu amomoi yomahiromanga o Lotana ma nyawa, o Siobala ma nyawa, o Sibeono ma nyawa, o Ana ma nyawa, o Disiono ma nyawa, o Esere ma nyawa de o Disiana ma nyawa. Ho o Hori ma nyawa mata-mata gea yotofora o Seirika de onangoo yogogere o Edomo ma tonakoka.

²² De o Lotana ai ngofaka yahinooto manga romanga o Hori de o Hemana. De o ngo Timana muna o Lotana ngoi firanga.

²³ De o Siobala ai ngofa-ngofaka o Aliwana, o Manahata, o Ebala, o Siefo de o Onama.

²⁴ De o Sibeono ai ngofaka yahinooto de manga romanga o Aya de o Ana. De o Ana gea abe wamake o akere ma hauku ibubungiye o tonakino ma oraha ai baba ai keledai ma duduono wao o tonaka ma kakaahaika wolingiri o ruruubu abe ka idadi wohiolomo.

²⁵ De o Ana gea ai ngofaka womatengo o Diosono de ngoi firanga momatengo o ngo Oholibama.

²⁶ De o Diosono gea ai ngofa-ngofakuku abe yodadi manga nyawa manga dimo-dimono manga romanga o Hemadana, o Esibana, o Yitana de o Kerana.

²⁷ De o Seiri ai ngofaka o Esere to una ai ngofa-ngofakuku abe yodadi manga nyawa manga dimo-dimono manga romanga o Bilihana, o Sawana, de o Akana.

²⁸ De o Seiri ai ngofaka o Disiana to una ai ngofa-ngofakuku abe yodadi manga nyawa manga dimo-dimono manga romanga o Usu de o Arana.

^29-30 Ho gea ona o Seiri ai totofora abe yolape-lapeuku o Edomo ma tonakoka abe yodadi o Hori ma nyawa manga dutu-dutu. Ho ona mata-mata manga roma-romanga o Lotana, o Siobala, o Sibeono, o Ana, o Disiono, o Esere de o Disiana. Hokogea o Hori ma nyawa o Seiri ma tonakoka yomahitoomu-toomuika de manga dutu ai romangika.

O Kokoano abe ma dihira yahikoano o Edomo ma nyawa

³¹ De ma dihira ngaro o Isiraele ma nyawa ko iwahi manga koano masara o Edomo ma nyawa to ona nagau manga koano abe yahipareta o nyawa abe yogogere o Edomo ma tonakoka.

³² O Bela, abe ai baba o Beoro, una wohira wodadi o koano o Edomo ma tonakoka de wogogere o Dinaba ma kotaka.

³³ Ka de o koano o Bela wohonenge de ahao womatengoli ai romanga o Yobaba wituruuru wodadi o koano de una wogogere o Bosara ma kotaka. De ma koano o Yobaba gea, to una ai baba o Sera.

³⁴ Ka de o koano o Yobaba wohonenge de ahao o Husiama wituruuru wodadi o koano de una wogogere o Edomo ma tonaka ma honongaka abe ihiromanga o Temana ma tonaka.

³⁵ Ka de o koano o Husiama wohonenge de ahao o Hadada wituruuru wodadi o koano de una wogogere o Awiti ma kotaka. O koano o Hadada to una ai baba o Bedada. Una gea manga koano abe wahihira yaparangi o Midiani ma nyawa o Moaba ma tonakoka hiadono o Midiana manga tentara wahibinaahaka.

³⁶ Ka de o koano o Hadada wohonenge de ahao o Samala wituruuru wodadi o koano de una wogogere o Masareka ma kotaka.

³⁷ Ka de o koano o Samala wohonenge de ahao o Saulu wituruuru wodadi o koano de to una ai kota o Rehoboto abe naga o akere o Efaraata ma datekoka.

³⁸ Ka de o koano o Saulu wohonenge de ahao o Baala-Hanana unangoli wituruuru wodadi manga koano. De o koano o Baala-Hanana gea to una ai baba o Aboro.

³⁹ Ka de o koano o Baala-Hanana wohonenge de ahao naga wituruuru womatengoli ai romanga o Hadada de una wogogere o Pahu ma kotaka. O koano o Hadada gea ngoi fekata o ngo Mehetabeele, abe ami baba o Matede de ami ete o Mesahaba.

^40-43 O Esau ai totoforauku ika-ika yodadi o dutu yangimoi de yamoi. De yomahitoomu-toomuika de manga dutu ai romangika hiadono manga ngi-ngi o Seiri ma tonakoka gea abe onangoo yogogere ihiromanga de manga dutu ai romangika. De manga dutu yangimoi de yamoi gea manga romanga o Timana, o Alawa, o Yetete, o Oholibama, o Ela, o Pinono, o Kenasa, o Temana, o Mibasara, o Magiele, de o Irama. Hokogea manga romanga o Edomo ma nyawa manga dutu de homoi-homoiika manga tonakoo abati-batingi de ihiromanga de manga dutu ai romangika. De ona mata-mata yotofora o Esauika.