Dodadi 29 - Ma Jou ai Demo-demo o Totobelohoka

O Yakubu womahiadono o Labana ai tauika

¹ De naa o Yakubu wogila-gilali hiadono woboa to ona manga tonakino abe yogogere o wange ma botokaiha.

² De wadonoka o tonaka abe ko iwa ma gota de arihononga womalega ma gurutika de naga o humu moi wamake. De nagaoo genangoka o humu ma datekoka imahiaini o domba o duduono hange. O domba ma gogoana manga duduono yatoomuino genangoka la ihiokere masara o humu ma biono yatamunoka de o hakaru kohaamoko.

³ De to ona manga biaha kiani manga dodiawo yadamaa hiadono ona mata-mata yokokiboaka de ahao yomakuduhunu o humu ma dadamunu gea yahoorika. Ho o hakaru ma amoko gea yahooroka de ahao ka idadi ihionoko la ihiokere manga aewani. Ka de ihiokere ibooto de ahao o hakaru ma amoko gea ihigilioli la yatamunoli o humu ma biono.

⁴ De o Yakubu waika watutumu o domba ma gogoana de wahoko wato, “Ahi gogianongoru, ngini naa o kiaino ma nyawa?” De ona iwipaluhu ato, “Ngomi naa migogere o Haranoka.”

⁵ De walehali onangika wato, “Ho sarakia, ngini niwihioriki womatengo ai romanga o Labana abe o Nahoro ai danongo?” De ona yopaluhu ato, “Iya, ngomi wiwihioriki.”

⁶ De o Yakubu walehali wato, “Ho sarakia, una wogogere wososanangi dika eko naga ai huha?” De yopaluhu ato, “Koua, una ga doka wososanangi dika. De abeika naa muna moboaino. Muna gea to una ngoi ora o ngo Rahele abe ami baba ai domba ma duduono mao.”

⁷ De o Yakubu walehali onangika wato, “Adodoa ho ngini nimahiaini dika nenangoka? Naa o wange ko itumunuahi ho ngarouahi niatoomuino la imaidu, irahai nia duduono nihiokere de nihiolomoli doka o dolaika.”

⁸ Masara ona yopaluhu unangika ato, “Nagoungu ani demo hokogea masara kiani miadamaa hiadono ona de manga duduono mata-mata yokokiboa abe manga biaha ihiokere nenangoka. Kiani ngomi mingoduminohi de ahao mia domba mihikokihiokere. De angamoi o humu ma dadamunu naa kohadubuho ho kiani mimakuduhunu miahoorika ma hakaru gea de ahao ka idadi mia domba mihiborihiokere.”

⁹ Ka yomakoketemohi de o ngo Rahele moboainoka ami baba ai duduono gea mato mohiokere angamoi munangoo ami karajaanga o domba mogoa-goana.

¹⁰ De o Yakubu duru wogarago womimake o ngo Rahele, abe ngoi meme ami iranga o Labana ngoi ora, hiadono ka de moboaino de una waika de o humu ma dadamunu waso de ngaro una ka womatengo dika ma ka wakunu wahooro! Gea wahooro ibooto de ahao una ma hirete wohionoko de wohiokere ai pepe ai domba mata-mataika.

^11-12 De womibounu o ngo Rahelika de womihingahu wato, “Ngohi naa ani dutu adaene abe ngohi meme o ngo Ribeka, ani baba ngoi firanga.” Gea womihingahu ibooto de ahao duru woari de ai ilingi ma amokiye. Woari ibooto de o ngo Rahele momataiti moiki momapopaata ami babaika la mihingahu womatengo manga dutu naga o humuoka.

¹³ De o Labana ka de woihene abe ai daho woboa watutumu de unangoo duru womataiti woiki dokaika la o Yakubu wibuhuku. Gea yomakamake de o Labana ai daho wikooino de wibounu. Gea yomakobounu ibooto de ahao o Labana wiao ai tauika. Genangoka de ahao o Yakubu wiade-ade ai pepeika hokokia mata-mata ho hiadono naa woboa.

¹⁴ De gea wiade-ade ai pepeika ibooto de o Labana wato, “Igoungu ngona naa ahi daho ma dutu.” Ho o Yakubu womahidodogumu ai pepeoka ai dekana ai mede moi adonoka.

¹⁵ De ahao o Labana gea wotemo unangika wato, “Ahi daho, ko itiaiua hokonaa ma dekana nokarajaanga nohiduhunu ngohi de ma balaha ko iwa. Ngohi toigo tonigaji iti nomahingahuohi to ngona ani mau.”

O Yakubu woilaka de o Labana ngoi ora yahinooto

^16-18 De o Yakubu woigo o Labana ngoi ora womagahoko la modadi ngoi fekata. De o Labana ngoi ora yahinooto, ma riaka ami romanga o ngo Lea de ma dodoto o ngo Rahele. De o ngo Lea ami lako ko itararonua masara nako ngomi dodoto ami badanga irahai de duru mohailoa. De utuohi munangika o Yakubu ai hininga adaene ho womagahoko o Labanika wato, “Ahi baluhu, ngohi tosanangi tokarajaanga ngonaka de ngaro ufa e, nohihigaji iti ngohi fekata tamake. Hokonaa ahi hininga tomahingahu, nako o ngo Rahele, ngoni ora o dodoto, nohihidoaka la modadi ngohi fekata de ngohi tokarajaanga ngonaka o taongo tumidi ma dekana.”

¹⁹ De o Labana wopaluhu wato, “Irahai ani gogahoko angamoi nako de o nauru utu, ka ngonahi duru toigo tonihidoaka ngohi ora naa. Ho ngona nogogere ngohioka dika.”

²⁰ Duru o Yakubu wosanangi woihene ai demo gea. Ho ngaro o Labana wileleani ai taongo tumidi ibooto masara ko wamaouahi iwibole hokogea ma dekanino angamoi duru womidora o ngo Rahelika. Ho ma oraha ai karajaanga gea wabooto de womatemo wato, “Ngohi ahi garago naa hiadono tamao abe hoka ahi wange muruono naga dika tokarajaanga.”

²¹ De ahao wilega o Labanika de wato, “Ahi baluhu, abe ma dihira homahiketehibehehongoka ho naa tabootoka ahi karajaanga o taongo tumidi ho naa, tomahilooa ma, togahoko la ngohi fekata nohihidoaka la ka idadi o ngi moioka mimatoomuino.”

²² Hokogea o Yakubu wogahoko ho o Labana womahidiai o gogilaka ma rame-rame de manga dodiawo manga ngoe watoomuino la yaniiki manga rame-rame.

^23-24 Masara o rame-rame ma wange ihira ma futuku o Labana ko waniikua abe ma dihira yomahiketehibehehongoka. Abe ngoi ora womingotaka o Yakubika gea ko o ngo Rahelua masara o ngo Lea womingotaka. De munangika ami baba womihidoaka ai gilaongo momatengo ami romanga o ngo Sipa la muna o ngo Leali momileleani. De o futu gea o Yakubu de o ngo Lea yomakitigi ma una wahiketelihowono abe wato bote o ngo Rahele.

²⁵ De o ngorumino de duru iwitodokana abe gea o ngo Lea ai datekoka! Ho ka wihiree-reeika o Labanika wato, “Adodoa ho hokonaa nodiai ngohino? Abeika ahi leleani ngonaika, ngohi ma titi duru tokarajaanga la gea tomimake o ngo Rahele! De gea ngona nohioriki! Ngona nohibudi! Adodoa ho nohibudi hokonaa?”

²⁶ De o Labana wipaluhu wato, “Masara nako ngomi nenangoka, ko mia biahaua ihira o dodoto mimihigogilaka, kiani o riaka ihira mimihigogilaka.

²⁷ Ho naa kiani noilaka de ngomi riaka naa, abe kiani nimaidu o minggu moi ma dekana ibooto, ka hiadono mia rame-rameoo ibooto. De ahao o ngo Raheloli minihidoaka ngonaika la munangoo modadi ngoni fekata. Hokogea ngomi misanangi midiai iti ngona nohihibehehongo ngohino nokarajaangoli ngohioka o taongo tumidoli ma dekana la gea to munangoo ami bobangu nabootohi.”

²⁸ De o Labana ai mau gea o Yakubu waniiki ho manga gogilaka ma rame-rame gea ibooto de ahao o ngo Raheloli ami baba womihidoaka o Yakubika la munangoo modadi ngoi fekata.

²⁹ De o ngo Rahelikaoo ami baba womihidoaka ai gilaongo momatengoli ami romanga o ngo Bilaha la muna o ngo Raheloli momileleani.

³⁰ De o Yakubu de o ngo Raheloo yomakitigi abe onangoo yodadioka o giarokata masara de o ngo Lea de o ngo Rahele gea, ka o ngo Rahelohi womidora o Yakubu. De una wokarajaanga ai toroaka ai taongo tumidoli ma dekana.

O Yakubu ai ngofa-ngofaka yomakokiboa

³¹ De Ma Jou o Yawe womihioriki abe o ngo Lea ami huha ma titi ami rokata ko womidoraua ho gea womihiakunu la ka idadi muna momamake o ngofaka masara o ngo Rahele o ngofaka ko momamakeuahi.

³² Ho o ngo Lea ahao de ami badangoka de ahao momagerewoto de ami ngofaka mamake o nauru de mihiromanga, “Abeika, o nauru!” abe to ona manga demo, “o Rubene.” Angamoi motemo mato, “Hokonaa Ma Jou o Yawe wohihidoaka angamoi wamakeoka ahi huha. Naa de kiani ngohioo mia rokata wohidora.”

³³ De ahao muna de ami badangokali de ma moioli momagerewoto de ami ngofaka momamakeoli o nauru de motemo mato, “Angamoi Ma Jou o Yawe ahi huha woihene abe ko yaiwa abe ihidora ngohi ho hiadono wohihidoakoli o ngofaka womatengoli.” Ho ami ngofaka gea mihiromanga, “o Wohigihenoka,” abe to ona manga demo, “o Simeono.”

³⁴ De ahao o ngo Lea de ami badangokali de naa ma hange momagerewoto ami ngofaka momamake ka o nauroli de motemo mato, “Naa de ahao marai ahi rokata ai hininga ngohino duru womahitataulika angamoi naa ai ngofaka yahange ibooto wamake ngohino.” Ho ami ngofaka gea mihiromanga, “o Hitataulu,” abe to ona manga demo, “o Lewi.”

³⁵ De ahao ma moioli muna de ami badangokali de momagerewotoli ami ngofaka momamake o nauroli de motemo mato, “Naa duru tihigiriiri Ma Jou o Yawe de gea ma titi hiadono ahi ngofaka naa tihiromanga, ‘o Higiriiri.’” De nako to ona manga demo ai romanga, “o Yehuda.” De genangoka de o ngo Lea ko mamakeokauahi o ngofaka.