2 Yohanese 1 - Ma Jou ai Demo-demo o Totobelohoka

O Yohanese ai demo ihira-hira abe ai gogianongoruika

¹ Ahi gogianongoru o Yesusu Kristusoka. Ngohi naa ti ngini nia dimono nanga ngongakuoka. De naa ahi hurata tohidingoto abe ngona ahi dodiawoika de to ngona ani ngofa-ngofakikaoo. De igoungu abe ngona Ma Jou woniirikoka la wonihidadi to Una ai ngofaka. De ngini mata-mata duru tagoungu tinidora nginika, masara ka ngohiua dika tinidora, ma naga utu nanga gogianongoru manga ngoe abe onangoo ihiorikoka ma dodotoko ma gou-goungu, de onangoo mata-mata duru inidora nginika.

² De gea ngomi mata-mata minidora nginika mangale ma titi ma dodotoko ma gou-goungu naga imanoa to ngone nanga hiningaka, de gea ka ihikaika imanoa ngoneoka naa de ka hiado-adonika.

³ De naa ngohi tonaniata Unangiye de duru tohioriki de tonganono abe ahao Ma Jou o Baba de o Yesusu Kristusu, abe Ma Jou o Baba ai Ngofaka, Una ahao wopaluhu ahi niniata ma demo hiadono wonahiowa ngoneino, de Una wonaao de ai hininga ma dora ngoneino, de wonahidoakoo to Una ai hininga ma miriidi. De tonganono abe ma owa gea mata-mata ahao wonahidoaka ngoneino, de gea ma titi abe ma dodotoko ma gou-goungu haniikoka de abe homakodora ngone de nanga gogianongoru.

O Yohanese wahihohininga abe ma titi kiani yomakodora

⁴ De naa ma duruika ngohi duru togaragoholi angamoi naga ihihingahu ngohino ma titi to ngona ani ngofa-ngofaka, abe ona gea ma dodotoko ma gou-goungu yatobaniiki to ona manga wowangoka. De gea ngohi duru tosanangi toihene, angamoi gea imaketero dika de hoka Ma Jou o Baba wonahibehehongoka wato hatobaniiki ma dodotoko ma gou-goungu. Ho ngohi duru tosanangi toihene abe ngini niatobanii-niiki ai hininga gea.

⁵ De ahi dodiawo, naa moi ngohi tinihibehehongo nginika, la tato ngone mata-mata homakodora. De igoungu ahi behehongo abe naa tohitulihuku, gea tanu ko ma hungiua, masara gea duru ma dodihirainohi de inahibehehongoka ngoneino ato kiani ngone homakodora.

⁶ De nako nanga dora itagi gea ma titi o kia? De gea ma titi abe ngone ka ihikaika hatobaniiki to Una ai bobehehongo to ngone nanga wowangoka. De nako ai behehongo moi ngoneino abe ka ma dodihirainohi hoihene, de gea ena wohigali-gali wonahibehehongo wato nanga wowangoka de kiani ka ihikaika homakodora.

O Yohanese wahitiari onangika ma titi o rerehenino ma dodotoko

⁷ De naa tinihitiari nginika angamoi o dunia naa ma amokika naga o nyawa manga ngoe yotobabudi. Angamoi ona yotobabudi gea ko yongakua ma titi abe ma dihiraino o Yesusu Kristusu womahihawo de ngone o nyawa nanga roehe de womaboa o duniauku naa. De onagona dika abe manga hininga hokogea, ona gea yatobabudi o nyawa de iwitobalawana abe o Kristusika.

⁸ De gea ngini kiani nimahidodiai la ufa to ona gea manga rerehene ma dodotoko nianiiki done ti ngini nia hadia, abe ma titi ma dihiraino nanga karajaanga nginioka, de gea ena done ahao ihihanga ho ko niamakeokauali. Masara nako nimahidodiai de ko nirehenua, gea ti ngini nia hadia Unangoka ahao niamake de gea niamake duru ingodu-ngodumoka.

⁹ De abe onagona dika ko yomanoaua o Kristusu ai dodotoko ma goronaka, de gea ona ko yomanoaua Ma Jouoka. De abe ngaro ona gea yomahingahu yato yoaguru manga dodotokino, ma tanu ona gea yorehenoka ma gurutika abe nako ko o Kristusua ai dodotoko yaniiki. Masara nako onagona dika yomatobanoa ai dodotoko ma goronaka, de gea ona yomanoa Ma Jou o Baba de ai Ngofakokaoo.

¹⁰ Ho nako onagona dika yoboa ngini nia doomuino de masara ma dodotoko ma gou-goungu ona ko yaniikua hiadono ena gea ko yodotokua, ona gea ngaro ufa de niadafongo nia tauino, de ngaro nihobata onangika ma enangoo ufa.

¹¹ Angamoi onagona dika yadodiawo onangika abe o rerehene ma dodotoko yotobadotoko, onangoo gea yaniikoka de to ona gea manga datoro ma dorou.

O Yohanese ai tabea ma demo

¹² De naa tanu ma titi ma ngoeohi naga abe toigo tinihingahu nginika, masara ahi hiningaka tato koaho ufa o hurata ma goronaka dika de ahi hininga gea tohitulihuku. Masara ngohi tonganono la ahao ka idadi toboa nginika la ngone homarihimanga de homakoketemo, la ufa ahi demo o huratino dika de tinitemo. Angamoi nako homarihimangino, gea to ngone nanga garago duru ingodu-ngodumoka.

¹³ De naa ani gianongoru nenangoka ami ngofa-ngofaka, abe onangoo Ma Jou wairikoka de wahidadioka to Una ai ngofa-ngofaka, ona gea ihidingoto manga tabea nginika.