2 Timotiusu 2 - Ma Jou ai Demo-demo o Totobelohoka

Kiani o Timotiusu wahitagongo o Abari ma Rorahai ai gogianongoru utuikali

¹ Ho naa ahi ngofaka, ngohi duru toigo la ngona ufa nomaaduru abe hoka onangoli yorehe-rehenoka gea, masara kiani nomaaduru abe hoka ngomioli abe ko mirehe-rehenua ma gou-goungino. De gea kiani ani hininga ma buturungu namake ka nanga Baluhino dika la wonihiputurungu hiadono inimagawe nileleani Unangika. De gea ai buturungu ka wonahidoaka dika ngoneino ma titi nanga gogere o Yesusu Kristusoka.

² Ho ma abari ma demo abe nengokadau ngona noihenoka ngohino de abe nanga gogianongoru manga ngoe to onangoo manga demo ma ka imaketero dika de to ngohi ahi demo gea, ho ma abari ma demo gea kiani nahitagongo nanga gogianongoru utuika genangoka. Abe ona gea kiani nanga gogianongoru abe iwileleani de manga tobagou-goungoka Unangika. De gea kiani ngona nairiki o nyawa abe ahao onangoli ka idadi yakunu yadotoko o abari ma demo gea o nyawa utuikali.

Ngaro ahao inahikangela, ma kiani homatongohono de ka hileleaniohi o Yesusu Kristusika

³ De naa ngonaoo kiani nomatongohono dika abe ma oraha inihikangela ngonaika, abe gea imaketero hoka ngohioli naa abe ngohi tomatongohono dika. De gea kiani nomatongohono abe imaketero hoka o tentara ma nyawa womatengo abe unangoo ngaro iwihikangela ma una ka womatongohono dika. De igoungu womatengo gea kiani womatongohono nako ai hiningaka watobagou-goungu ai dimonika. De nako to ngone nanga dimono, gea o Yesusu Kristusu.

⁴ Abe nako o tentara ma nyawa ma oraha ma tentara waniiki, gea ai hiningaka wato wihisanangi ai dimonika, ho duru ko wolegaikaua o wowango biaha ma pereluika done worehene ai tagongino de ai dimonika ko wihisanangiua. De ngonaoo kiani ani hiningaka imakiniiki hoka o tentara ma nyawali ai hininga done norehene ani tagongino de ko nileleaniokaua o Yesusu Kristusu nanga Dimonika.

⁵ De naa o hiketero moioli ka idadi todiai abe ma titi womatengo abe womapopaata ho yomaketeroreebe la ihioriki onagonahi ahao yopalesa. Masara ma oraha yomapopaata o roreebe ma goronaka de kiani yaniiki o roreebe ma hiaturu. Angamoi nako hiadono womatengo gea womapopaata de ma roreebe ma hiaturu watilakuru, gea ahao ma roreebeino ko wamakeua ai hadia. Ho ngonaoo kiani nanii-niiki nanga Baluhu idodutu ai pareta ma hiaturu ngoneino la ahao ka idadi namake ani utumu Unangino, angamoi nako ai pareta natilakuru done ahao ko namakeua Unangino ani utumu.

⁶ Eko hoka womatengoli abe una wotobaredi-redi de gea una duru wokarajaanga de ai buturungu ma gahumu ai redioka. Ho gea una kiani wamake ai redioka ma hasili ma amoko abe imakiniiki de ai karajaanga ma amoko genangoka. Ho naa ngonaoo kiani nokarajaanga de ani buturungu ma gahumu abe nileleani o Yesusu Kristusika, de gea ahao ngonaoo namake ani karajaangino ma hasili abe imakiniiki de ani karajaanga.

⁷ Ho naa ahi hiketero ma demo gea mata-mata kiani nohohininga de hiadono nomalingiri ahi demoino ma titi. Angamoi nako gea duru nomalingiri, ahao nanga Baluhu wonihiakunu de wonihisawaro la ahi demo gea mata-mata ka idadi nakunu nataoko itiai ma titi genangino.

⁸ De kiani ka ihikaika nomahihohininga ma titi o Yesusu nanga Koano abe Ma Jou wonahibehehongoka. Abe o Yesusu Una gea womaboa nanga tofora de nanga koano o Dautu ai totoforaukuino. De o Yesusu Una gea Ma Jou wihimomikoka ai honengino. Ho ahi demo gea kiani nomahohininga angamoi ena gea ma titi o Abari ma Rorahaiino.

⁹ De mangale ma titi o Abari ma Rorahai gea tohingahu-ngahu ho gea hiadono ahi kangela naga o bui ma tau ma goronaka naa, ka hiadono ihihidapakitoka de o rante abe hoka o nyawa ma dorou yodiai. Masara ngaro ngohi naa ihipakitino nenangoka masara Ma Jou ai Demo-demo gea duru ko ihihidotapakitua masara ka itagi-tagiohi o nyawa manga ngoe-ngoeika.

¹⁰ Ho mangale ma titi gea ai Demo-demo ka ihikaika itagi de imahora o nyawa manga ngoe-ngoeika hiadono ngohi naa ngaro ihihikangela nenangoka ma gea ka idadi takunu tomatongohono dika. Abe ngaro ahi kangela o kia dika taohana masara tomatongohono de ahi hininga ma miriidi angamoi gea tohioriki abe ahao o nyawa manga ngoe yamake manga utumu ahi kangelaino. Abe naga Ma Jou ai nyawa manga ngoe abe Una woigo wato ahao ona yamake manga hiowa mata-mata Unangino ma titi manga gogao o Yesusu Kristusika. De gea hiadono ona ahao yogogere hoimoi Unangoka ai medebini ma dararono ma ngioka. De ai nyawa gea ka idadi Ma Jou wahiowa ma titi abe naa ihihikangela, ho ngohi duru ka tosanangi dika tomatongohono nenangoka.

¹¹ De naa moi ahi higaro ma demo ngonaika abe ka idadi nomahohininga la nako hiadono naga idadi abe inihikangela de gea ma demo naa ka idadi iniduhunu la hiadono nomatongohono ani kangela ma goronaka. Abe ma demo naa duru igoungu de ka idadi hangaku genangika. Abe ma demo itemo ato, “Mangale ma titi nengokadau nanga wowango ma dihira wohidohonengoka ka ma moi de o Yesusu Kristusu abe ma oraha Una wohonenge, ho gea ngone hohioriki abe ahao ngoneoo homomiki nanga honengino abe imaketero hoka Unangoli womomikoka ai honengino, la gea ngone mata-mata howangoli de de Una.

¹² De mangale ma titi nako ngone abe ma oraha inahikangela de homatongohono de nanga hininga ma dongohono, ho gea hohioriki abe ahao ngoneoo hahikoano de de Una. Abe ma titi ahao naga ma oraha Una woboali de wahikoano o dunia ma nyawa mata-mataika. De ma oraha gea ngone mata-mata abe ma dihiraino nanga kangela ma goronaka de homatongohono ho ko horehenua Unangino, gea ngoneoo ahao o nyawaika hahikoano de de Una. Masara nako ahao idadi abe ngone hotemo hato ko hihiorikua de ko iwa nanga gogao Unangika, gea Unangoo ahao wonatemo ngoneino wato ko wonahiorikua de to Una ai gogao ngoneino ko iwa.

¹³ De ngaro ngone ko hatobagou-goungua hiniiki, masara Una gea ka ihikaika watobagou-goungu de duru ai hininga ko watoturuurua. Angamoi Una gea duru watobagou-goungu abe ma titi ai behehongo o kia dika wotemoka de gea kiani wodiai, ho duru ko moiua de woeluku.” Hokogea ma demo abe inahigaro la ngone duru hatobagou-goungu o Abari ma Rorahai hahingahu-ngahu ngaro o kangela o kia dika naga ahao haohana.

O Paulusu wahibehehongo o Timotiusika de ona utu abe yodoto-dotokika

¹⁴ De abe ona nairiki de nahitagongo onangika la ahao ona yatobadotoko o nyawaika o Abari ma Rorahai, ona yodoto-dotokika gea kiani ka ihikaika nahihohininga onangika abe ma titi ahi hurata ma demo ngonaika abe naa namakeoka. De onangika nahitiarioo nato, “De naa Ma Jou ai himangoka de tinihitiari nginika la ufa nimaketeribuutu ma titi o nyawa manga dodotoko ma demo-demoino, abe ma demo gea utu naga abe o nyawa yomaketeloliliara manga demo ma titi ma mangaratiioka. Masara koaho niolingiri ma dodotoko ma titi hokokia abe ahao Ma Jou ka idadi winihidumutu nginika.” Hokogea nahitiari yodoto-dotokika angamoi o ribuutuino duru ko iwa ma utumu o nyawaika abe yotoihene, masara ma ribuutu gea ka yapusingi dika manga hiningaka hiadono ona yototoihene gea ko yamagaweokaua yoihene de yaniiki Ma Jou ai abari hiadono yorehenoka genangino.

¹⁵ De ngona o Timotiusu, ngona ani leleani ma goronaka de kiani nokarajaanga de ani magawe ma gahumu la gea ahao ma oraha nomaokoino Ma Jou ai himangoka de duru wonisanangi ngonaika abe ma oraha wonitailako genangoka. Abe gea kiani duru nokarajaanga itiai done hiadono ahao inimaleke ma titi ani karajaangino. Ho ngona kiani duru nohioriki de duru nataoko itiai Ma Jou ai abari gea abe duru igou-goungu, de kianioo nomahidodiai la ma abari gea nadotoko itiai de itaana o nyawaika.

O nyawa manga demo ma homoa gea ufa hohigihene genangika

¹⁶ Masara o nyawa utu manga demo ma homoa abe ka yofeto-feto dika de abe manga demo gea imakalawana de Ma Jou ai abari ma demo, gea borotaua de nohigihene manga demoika gea. Angamoi ma nyawa abe yofeto-feto gea manga demo ma homoa, to ona manga wowango ma datoro ka idogo-dogo abe imakalawana de Ma Jou ai hininga.

¹⁷ De gea manga demo ma homoa gea tohiketero de o panyake moi abe duru itorou de gea ena itaiti imahora-hora o nyawa-nyawaika hiadono ngone nanga ngoe o Yesusu ai badangoka naa de inadaene hiadono inahipanyake. De naga o nyawa yamuruono naga abe yadoto-dotoko o nyawaika manga demo ma homoa gea, abe hoka ona gea yahinooto o Himeneusu de o Filetus.

¹⁸ De ona gea yahinooto yomahirehenoka o abari ma gou-goungino de hiadono o ngeluku ma demo yadoto-dotoko o nyawaika. De gea ona yadotoko o nyawaika ato bari ko iwaka nanga momomiki nanga honengino, angamoi o momomiki gea ipahakau, ho ahao ngone ko homomikuali. Hokogea manga dodotoko o nyawaika. Ho mangale ma titi manga demo ma homoa gea ho hiadono o nyawa manga ngoe duru yopusingi hiadono doka manga hiningaka de ko ihiorikokaua ho done o demo o kia ahao yairiki de yangaku enangika.

¹⁹ Masara nako Ma Jou ai abari ma gou-goungu ena gea duru ko ikelu-kelua. Angamoi ai abari gea tohiketero hoka o hakaru moi duru ma amoko de ena gea o nyawa yakelengauku o tonakoka la gea idadi o tau ma lifunu de duru iputurungu ka hiadono ko idomo-domoua. De gea naga ma hakaruoka ma hingahu ma demo ihitulihika ato, “Nanga Baluhu idodutu Una gea ka idadi wobawilika wonalega nanga hiningaino homoi-homoi, ho Una gea duru wonahioriki ngone onagona dika abe hagou-goungu hodadioka to Una ai nyawa.” De naa moioli ai hingahu ma demo ngoneino itemo ato, “Ngoneoka onagona dika homahingahu hato hiniiki nanga Baluhu, gea kiani nanga datoro ma dorou gea ena hanoaka.” Hokogea Ma Jou wonahigaro ma totiaiika, de gea ena ai demo ko ikelu-kelua masara itongohono ka hiado-adonika abe imaketero hoka ma hakaru ma amo-amokoli gea ho duru itongohono. Ho ngona o Timotiusu ngaro ufa dika de nohigihene o nyawa manga demoika gea abe imakalawana de Ma Jou ai hininga de abe ena gea manga demo ka ma homoa dika.

Nanga hininga de nanga wowango gea kiani itebini Ma Jou ai himangoka

²⁰ De abeika o hiketero moioli naa tonihidoaka ngonaika. De nako naga moi o tau ma rorahai de gea ma goronaka naga manga dodai ma ngoe, de ma huhugara de ma borongko de ma boto o tonakino yodiai, gea mata-mata naga ma ngoe ma tauoka gea. De igoungu naga utu yodiai o gurasino eko o haakaino, masara utuoli naga abe yodiai o gotaino dika eko utu o tonakino yodiai. De igoungu gea abe o gurasino eko o haakaino yodiai, gea ena abe una o tau ma dutu wakelengauku o mejaka abe ma oraha adonoka manga rame-rame moi. Masara nako ma kiahonanga utu abe o gotaino eko o tonakino yodiai, genangoo naga to ena ma karajaanga eko ma dumutu, masara gea to ena ma dumutu ikuranga ihailoa. De genangoka tonahiketero abe ngone nanga biaha homatoomuino nanga Baluhu idodutu ai doomuoka. Abe ngone utu nanga hininga duru itebini Ma Jou ai himangoka abe imaketero hoka ma kiahonanga o gurasino eko o haakaino gea abe duru iletongo de duru ihohailoa ma rupa wamake o tau ma dutu. De ngone utuoli nanga hininga hatoli ikurangohi itebini ai himangoka, de ngone gea hoka o tau ma dutu ai kiahonanga abe igoungu naga ma tau ma goronaka, masara gea ko wapakeua o tau ma dutu.

²¹ Ho naa tonihigaro ngonaika tato, onagona dika yomahitebini ma dorouino abe yanoa manga hininga ma dorou la yodadi yotebini Ma Jou ai himangoka, ona gea ahao Ma Jou ka idadi wapake de wahitagongo onangika o karajaanga moi abe duru ma rorahai. De ahao ona gea yomaketero abe hoka o dodai moi o gurasino yodiai, abe ma tau ma dutu wodingakika de wagogono ma dodai gea de ahao nako ma oraha ma rame-rameoka de gea ena wohihupu de wosanangi wakelengauku ai mejaka. De nanga Baluhu idodutu, Unangoo ahao wosanangi wonipake ngona de wonihitagongo ngonaika o karajaanga moi duru ma hohailoa, iti nomahidiaioka abe ani hiningaka itebini to Una ai himangoka.

²² De gea ma titi ho hiadono tonihitiari ngonaika tato kiani nomatongohono ma dorouino. Abe ma dorou gea o nyawa utu abe ka o goohi ona gea yotobahafini genangika. Masara ngona kiani natobaniiki ma totiaiika, de kiani natobangaku ma gou-goungika, de kiani nidora Ma Jouika de o nyawa utuikaoo nadora, de kiani ani gogianongoru nao irahai la ani hininga naga de ma riidi. De abe ani gogianongoru genangoka, onagona dika abe manga hininga hatoli ikurangohi itebini ai himangoka, ufa nimaketedodiawo ngona de ona. Masara nako onagona dika abe onangoo manga hininga la iwileleani Ma Jouika de manga hininga ma debi-debini, ona de ngona gea ka idadi nimaketedodiawo niwileleani Unangika.

Abe hokokia hadotoko onangika nako manga tobahioriki ikurangohi

²³ De nako naga o nyawa genangoka abe manga tobahioriki Ma Jou ai Demo-demoika ikurangohi de masara ona gea yomaketeloliliara de yomaketeribuutu ma titi abe ko kia-kiaua, gea ngaro ufa dika de ngona nomahisapuru onangika done ahao ngonaoo ma naniiki nimaketeribuutu. Angamoi ngona nohiorikoka abe nako hiadono ona yomulaengoka yomaketeribuutu de ahao ma bahaika kiani idadi abe yomakangamo.

²⁴ Masara ngone abe hitobaleleani nanga Baluhu idodutuika, ngone borotaua de homaketeroribuutu de o nyawa utuika done homakangamo. Masara ngone abe hitobaleleani Unangika, gea kiani nanga hininga irahai o nyawa mata-mataika, de kiani hakunu hadotoko de hahitararono o nyawaika Ma Jou ai Demo-demoino, de ngaro naga utu abe inahikangela ngoneino ma ngaro ufa dika de hahininga kuranga onangika. Kiani hokogea nanga hininga abe nako hitobaleleani Unangika.

²⁵ Ho gea kiani ngone abe ma oraha hadotoko onangika inatobalawana, de kiani hadotoko de nanga hininga ibole-bole onangika la gea hato marai ahao Ma Jou ka idadi waduhunu manga hiningaka hiadono ka idadi yomadagali ka hiadono manga hininga iwangoro. De gea nako manga hininga iwangoroka, gea de ahao ona ka idadi yataoko itiai ma abari ma gou-goungu hiadono yangaku genangika.

²⁶ De gea ahao manga hininga duru itararono de ihioriki abe nengokadauino o Ibilihi ma haeke duru yabudioka onangika hiadono ka to ena ma mau dika ona yanii-niiki. Masara genangoka de o Ibilihi ma haeke ko yakunokaua yahipareta onangika ka hiado-adonika angamoi ona gea imaketero hoka yohupuoka to ena ma dadaokino. Ho gea nako ngone hitobaleleani, kiani nanga hininga ibole-bole hadotoko de haduhunu o nyawaika la gea ahao ka idadi ona yamake ma gou-goungu Ma Jouino.