2 Tawari 7 - Ma Jou ai Demo-demo o Totobelohoka

O Saloomo de o Isiraele ma nyawa manga hihira yomahuba-huba Ma Jou ai Tauoka

¹ Ka de o Saloomo ai niniata ma demo gea wabooto de itodokanino naga o uku itoimi o dihangoka de auku manga huhuba iharo-harongo ma goronauku de manga huhuba muruono naga akokitufuku ka hiadono ikokitinoka. De Ma Jou o Yawe ai Tau ka itodokanino de duru aomangoka de Ma Jou o Yawe ai medebini ma dararono.

² De ona manga hohidemo Ma Jouika ko idadiua yowohama Ma Jou o Yawe ai Tau ma goronaika angamoi Ma Jou o Yawe ai medebini ma dararono kohamodararonoholi ai Tau ma goronaka.

³ De ka de o Isiraele ma nyawa gea yamake o uku gea duru itodokanino itoimi iboauku de Ma Jou o Yawe ai dodunguu abe ai tau duru aomanga de ai medebini ma dararono, de ona ka ma moi yomakokimotumuku yomahuba Ma Jou o Yawe de manga higiriirioo ka ma moi hoka kanganoinohi yotemo ato, “Mata-mata Ma Jouoka duru ma owa! To Una ai dora abe o nyawaika ko iwa ma baha, Abe ka itagi o nyawaika ka hiado-adonika.”

⁴ De ahao o koano de o nyawa mata-mata genangoka manga huhuba utuohi yodogo abe yahihuba Ma Jou o Yaweika.

⁵ De o Saloomo wahihuba to una ai hapi ma ngoe hiadono o sana monaoko de hinooto, de to unangoo ai domba wahihuba ma ngoe hiadono o sana o ratuhu moi de monaoko. De ona yahihuba hokogea la Ma Jou ai Tau gea ihitunguu abe ena iwidingakoka Ma Jou o Yaweika.

⁶ De ona manga hohidemo Ma Jouika de o Lewi ma nyawa utu, ona mata-mata yokokilio manga dingiika abe ma dihira ihiaturokau. De o Lewi ma nyawa gea abe kanganoino yonyanyi, ona yonyanyioli manga higiriiri ma nyanyianga, “Ma Jou ai dora itagi o nyawaika ka hiado-adonika.” De nagali ona abe manga musik yatagongo abe ona yapake o totabua de o musik ma kiahonanga utu abe o Dautu wodiai de wodingaka o higiriirika abe Ma Jou o Yaweika. Ho ona mata-mata abe o musik yatagongo ona ihiniiki ma ilingi abe hoka o Lewi ma nyawa manga higiriiri ma nyanyiangoka. De o Lewi ma nyawa manga doomu ma honongaka naga abe ona manga hohidemo Ma Jouika, de ona manga guguli yawuwu la onangoo ihiniiki ma ilingi abe manga higiriiri ma nyanyianga ma gogiriaka. De abe ma oraha iwihigiriiri Ma Jou o Yaweika de o Isiraele ma nyawa mata-mata yomaokoino manga doomuoka gea.

Ma Jou o Yawe womahimatoko o Saloomoika Ma Jou ai Tauoka

¹² De o futu moiuku Ma Jou o Yawe womahimatoko o Saloomoika de wihingahu, wato, “Ngohi tonigihene abe ani gogahoko ma titi o tau nenanga de naa ka idadi tonihingahu abe igoungu tairikoka ma huhuba ma tau naa la tato itiai abe nenangoka ahi nyawa manga huhuba yahihuba Ngohino.

^13-14 Masara done ahao naga ma oraha abe ahi nyawa manga kangela yadaene onangika ma titi o dorou yaniiki. Abe igoungu ona gea yomahiromanga de yafetongo to Ngohi ahi romanga ato, ‘Ngone naa to Ma Jou ai nyawa.’ Ma done adonoka ma oraha abe o lobi tohitatoko hiadono o awana ko ipurarahua ho o hiwara kohagiria ani tonakoka, eko done naga ma oraha abe tohiboaino ani tonakino o kabotara duru kohangoe hiadono nia joro yakokimataka. De done o hohowono o panyake moi ma amoko tohiboaino nia hidogoronaka de ani nyawa duru yopanyake hiadono ko manga ngoe yohonenge. Ho nako ahi nyawa abe yaniiki o datoro ma dorou hiadono o kokangela yadaene onangika de ahao naga manga ngiriki hinooto. Abe gea ka yaniikohi dika o dorou, ekola ka idadi yomahitipokouku de yomaniata la ihilingiri Ngohi. Ka de hokogea yomangiriki de ihitunguu manga hiningaka yotoba de yolingiri ma ngekomo abe ka idadi ihihisanangi de Ngohi ka idadi taduhunu manga kangelaino. De ka de ahi nyawa manga wowango ma datoro itorou yanoaika de yomagahoko Ngohino, de ahao Ngohi o Horogaka de ka tagihene de manga howono takokiofi de manga tonaka tohitogumu ma kangelaino la gea tahiowali onangika.

¹⁵ Ngohi ahao toihene ahi nyawa manga niniata mata-mata abe ma oraha yomaniata o tau ma goronaka naa.

¹⁶ De angamoi Ngohi ahi tau nenanga tomangirikoka de tomadingakoka Ngohino la idadi ahi gogere ma tau ho Ngohi ka ihikaika tagoana ka hiado-adonika.”