2 Tawari 5 - Ma Jou ai Demo-demo o Totobelohoka

Ma Jou ai Tau yodiai ibooto de ai Behehongo ma Peti ihingohama ma goronaika

¹ Ho de ika-ika abe ma oraha adonoka o Saloomo ai karajaanga wabootoka abe Ma Jou o Yawe ai Tau gea ingodumoka mata-mataika. Ho ai tau gea idadiokau de ahao o hidoaka mata-mata abe ma dihira ai baba o Dautu widingakoka Ma Jou o Yaweika de naa o Saloomo wale de wagogono o dogogono ma ngi-ngioka abe naga Ma Jou o Yawe ai Tau ma goronaka. Ho o gurasi ma dutu, de o haaka ma dutu, de ma tau ma kiahonanga, abe mata-mata ona iwileleani Ma Jou yapake manga leleani ma goronaka, gea ena ihikokingohama homoi-homoi Ma Jou ai Tau ma dogogono ma ngi-ngiika.

² De ahao o Saloomo wahokino o Isiraele ma nyawa manga hidimono mata-mata ho naga yoboaino abe ona yahibaluhu o Isiraele ma nyawa manga dutu homoi-homoiino. De abe ona yahibaluhu manga fam-fam ma doomu, onangoo mata-mata yomatoomuino o Yerusaleeme ma kotaka. De o Saloomo wahuloko onangika la Ma Jou o Yawe ai Behehongo ma Peti ona yale manga kota ma dobikoka abe ma dihira ihiromanga o Dautu ai kota de naa ihiromangoli o Siono. Abe genangoka o Behehongo ma Peti imanoa ma dekana o tau o ngoerino ma goronaka. De gea ena kiani yale la ona yao Ma Jou ai Tau ma hungika de ihingohama to ena ma ngiika abe Ma Jou o Yawe womadingakoka angamoi naa ihidiaioka.

³ De naa o Isiraele ma nyawa manga hidimono gea yokokiboa yomatoomuino manga koano ai himangoka de duru yadaene ma oraha manga Hijai-jai ma Tau ma rame-rame abe o tao-taongiye ihirame-rame o mede tumidoka.

⁴ De ma oraha o Isiraele ma nyawa manga hidimono yoboa Ma Jou ai Tau ma hungino de naga o Lewi ma nyawa yomakiniiki de ona utu Ma Jou o Yawe ai Behehongo ma Peti ihidomoku.

⁵ De utu naga abe yaoino to ena ma tau o ngoerino, de abe ma kiahonanga enangoo yodingakoka o leleani ma karajaangika. Ho mata-mata abe yao Ma Jou ai Tauino gea o Lewi ma nyawa dika yaso, abe to ona manga leleani yahidemo o Isiraele ma nyawa Ma Jouika.

⁶ De ahao o Saloomo de o Isiraele ma nyawa mata-mata abe duru ko manga ngoe yomatoomuino genangoka, ahao yahihuba o huhuba iharo-harongo o domba de o hapi o Behehongo ma Peti ma himangoka. De o domba de o hapi abe yahihuba hokogea kohangoe hiadono duru ko moiua abe genangoka yakunu yaetongo!

⁷ De ahao ona manga hohidemo Ma Jouika Ma Jou o Yawe ai Behehongo ma Peti yagorakoli de ihidomoku de yao la ihingohama Ma Jou ai Tau ma goronaika. Ho yowohama de yogila-gila to ena ma ngi ma goronaika abe ihiromanga o Ngi Duru Kohamedebini abe o dadatoko o ngoere ma biri-birini doka ma honongaka, de genangoka yakelengauku. De daku o peti ma lokuino naga ma rupa abe hoka o malaekata hinooto abe ma romanga o kerubu de ma hapa gea de ma gafuufuoka.

⁸ De o kerubu gea ma rupa imarihimangino de imaboriponuku la ma gafuufu ihiboridoakika hiadono ngade-ngade imakadono ma gafuufu ma dekara. Ho ma peti de to ena ma momoku ka ma moi ihidatamunu de o malaekata o kerubu ma gafuufu gea.

⁹ De o Behehongo ma Peti ma momoku ma gurutu ka hiadono ma barene ka idadi o nyawa yamakeohi, abe nako ona naga o Debi-debini ma Ngi ma goronaka, ngaro o Behehongo ma Peti naga doka o dadatoko o ngoerino ma honongaka. Masara abe o nyawa ko yowohamuahi o Debi-debini ma Ngiika, gea ona ko idadiua yamake ma momoku gea angamoi ihidongohamika. De o Behehongo ma Peti ma momoku ena gea nagahi genangoka ma oraha o ade-ade naa ihitulihuku.

¹⁰ De ma oraha gea abe o Behehongo ma Peti ma goronaka gea ma dola ma hou ka o hakaruokahi ma baka-baka hinooto abe ma dihira o Musa wohingohama o peti ma goronauku. De ma kiahonanga utu abe ma dihira ihingohama ma goronauku ma oraha naa ko iwaka. De o hakaru ma baka-baka hinooto gea o Musa wodiai ma oraha o Isiraele ma nyawa o Mesiiri ma tonaka yanoaka de yomahidodogumu o Sinai ma loku ma timiuku. Abe genangoka Ma Jou o Yawe wahibehehongo onangika abe wahidoaka ai pareta ngimoi abe yomahiketehibehehongo ai pareta gea kiani yaniiki.

¹¹ Ho gea Ma Jou ai Behehongo ma Peti yakelenga to ena ma ngioka ibooto de ahao manga hohidemo Ma Jouika yohupu o Debi-debini ma Ngiino. De ngaro manga hidemo Ma Jouika abe yoleleani o wange gea, de ngaro manga hohidemo abe ko yoleleaniua, masara ona mata-mataika kanganoinohi yaniikoka ma hiaturu la yomahitebini Ma Jouika.

¹² De o Lewi ma nyawa abe ka onangohi duru yososawaro o musik, ona gea manga romanga o Asafa, o Hemana, de o Yedutunu. De to ona manga ngofa-ngofaka de manga ria-dodoto mata-mata yoleleani o higiriiri ihiniiki de o musik. Ona yosawaro o musik gea yomahinoauku de o baju duru ma rorahai ma guru-gurutuku de yomaokoino o huhuba ma ngi ma datekoka abe o wange ma hiwaroko ma honongaka. De naga manga gogereenge ihiboha-boha, de naga manga totabua yaragoho de manga totabua ma amoko abe ma tali ma ngoe yarago-ragoho. De ihidogo de manga dodiawo abe onangoo manga hohidemo Ma Jouika yaratuhu moi de yamonaoko abe manga guguli homoi-homoi yawuwu.

¹³ De ona abe manga guguli yawuu-wuwu de ona utu abe yonyanyi, ona mata-mata duru yomakiniiki itiai ma ilingi abe manga higiriiri ma nyanyiangoka la manga tarimakase ihiboa ma higiriiri Ma Jou o Yaweiye. De nagali onangoo abe yarago-ragoho o totabua de yotobakuti o hitar, de abe o gogereenge ihikokaboha, de ona yomakutuono mata-mata de manga higiriiri ma demo Ma Jouiye hokonaa ma demo: “Mata-mata Ma Jouoka duru ma owa! To Una ai dora abe o nyawaika ko iwa ma baha, Masara ka itagi o nyawaika ka hiado-adonika.” Ka de hokogea yonyanyi de o lobi iwohama Ma Jou o Yawe ai Tau ma goronaika ka hiadono aomangoka de ma lobi gea.

¹⁴ De manga hohidemo Ma Jouika ko idadiua manga leleani ka yahikarajaangohi angamoi ma lobi de to Una ai medebini ma dararono duru aomangoka ai tau ma goronaka.