2 Tawari 2 - Ma Jou ai Demo-demo o Totobelohoka

O Saloomo ai hidiai ma ade-ade ma oraha womulaenge wodiai Ma Jou ai Tau

¹ De naa o Saloomo womaputuhu adonoka ma oraha womahidiai wohigoko Ma Jou ai Tau abe genangoka o nyawa Ma Jou o Yawe ai romanga yagorakiye ma oraha yomahuba-huba Unangika. De wato o tau duru ma rorahai moioli wohigoko abe yodingakoka o kokoanoika abe ahao yahikoano o Isiraele ma nyawa. Ho naa ka de yodiai ibooto de idadi o Saloomo to una ma hirete ai tau.

² De ona abe yokarajaanga ihigoko Ma Jou ai Tau de o koano ma tau kiani o Saloomo wohiaturu manga karajaanga. De ona abe yokokarajaanga o kia dika naga manga hidimono abe yahiaturu manga karajaanga. De manga ngoe yasana moritumidi, de ona abe yososawaro o hakaru yopawa ihidiai, ona yasana moritufange abe wahikarajaanga o loku-lokuoka. De ona abe yahiatu-aturu ona yotobakarajaangika, ona manga ngoe yasana hange de yaratuhu butaanga.

³ De ahao o Saloomo wihurata o koano o Huramika abe wogogere o Tirusu ma kotaka de hokonaa ai hingahu ma demo o hurata ma goronaka. “De ahi horomati ngona o koanoika tohurata tomagahoko la ngona de ngohi nanga gogao irahai imaketero hoka ma dihira ahi baba o Dautu de ngona o koano nia gogao irahai. De hokogea nia gogao ka hiadono o gota o semara ma ngoe nihidailako ahi babaika abe wapake wohigoko o koano ma tau abe genangoka una wogogere. De ma oraha naa ngohioo toperelu o gota o semara ma ngoe ho tonganono ngona, o koano, ka idadi ngohioli nohiduhunu de ani gota o semara gea imaketero hoka ahi baba ma dihira niduhunu.

⁴ De hokogea tomagahoko angamoi ma oraha naa ngohi tomahidiai todiai o tau moi abe iwidingakoka ahi Jou, Ma Jou o Yaweika, la genangoka ai romanga o nyawa yagorakiye de manga horomati ma amoko. De Ma Jou ai Tau ma goronaka ona naga abe ka ihikaika iwileleani de yotufuku ai himangoka o manyanyi abe ma bounu duru irahai. De onangoo yahiaturu o Dodunguu ma Roti to ena ma meja ma lokuoka, de yahihuba o huhuba iharo-harongo o wange moi ma hinooto abe o ngoru-ngorumiye de o bobimaowaiye. De hokogenangoli ka ihikaika yahihuba to ngomi mia huhuba Unangika o Hiaini ma wangeoka, de abe o mede ma hungi ma rame-rameoka. De naga o rame-rame utu mata-mata abe Ma Jou o Yawe wahidoaka o Isiraele ma nyawaika naga abe kiani mia huhuba naga abe wiwihihuba genangoka. Una wato kiani ka hiado-adonika ngomi mianiiki ai behehongo ma hiaturu hokogea.”

⁵ De o Saloomo ai hurata o koano o Huramika wohigila-gila wato, “De Ma Jou ai Tau nenanga ahao kiani duru irahai de ihohailoa angamoi to ngomi mia Jou duru ngone o nyawa mata-mataika wonahiheranga de ai kuaha abe nako hohikohowono Una de o popangao abe o nyawa utu yomahijou enangika, de duru ka Unangohi woputurungu.

⁶ Masara done onagona yakunu yodiai o tau abe to ena ma rorahai yadonika abe hoka to Unangoli ai rahai? Ngaro o Horoga abe ka enangohi ikokurutiye ma ko idadiua Ma Jou iwihidokurunga angamoi ko iwiwedonua. Ho ngohi naa onaguna hiadono totomoroini tato ka idadi tohigoko ai Tau? Duga-duga idadi ma ngi dika abe genangoka ka idadi o nyawa yahihuba o huhuba iharo-harongo Unangika.”

⁷ De o Saloomo ai hurata ka igila-gilahi o Huramika ato, “Ho naa abe ngohi duru toperelu gea o nauru womatengo abe duru wososawaro wotobadiai o kiahonanga duru ma rorahai o gurasino, de o haakaino, de o tabaagaino, de o behino. De ma kiahonanga gea o kia dika, abe wodiai ibooto ena gea, de kiani duru una wososawaro wodimo-dimo de worogi-rogi. De kiani una duru wososawaro de ai tobahioriki o ngoere watono o solo ma wuu-wuuku, de ma doka-dokaruku, de ma bihi-bihi ma dutuku. Marai naga ani nyawa womatengo de ai sosawaro hokogea e? Ho nako ka idadi, ngohi tomagahoko la una gea nihidingoto ngohino la ka idadi una waduhunu ona ahi tonakoka naa abe onangoo yososawaro o karajaanga gea. Angamoi naga manga ngoe nenangoka abe ma dihira ahi baba o Dautu wairikoka o Yehuda ma tonakoka de ona utu yogogere nenangoka o Yerusaleeme ma kota ma goronaka.”

⁸ “De o koano, nako nosanangi de ahi gogahoko ma duduhunu de o semara ma gota abe iwango to ngona ani tonakoka o Libanono de igoungu ngohi toperelu o gota utuohi iwoe abe o semara, o gofiri, de o sendana ma gota. Ngohi tahioriki abe naga to ngona ani nyawa abe ka onangohi yososawaro o gota yotolanga de ihihupu o loku-lokuino. De to ngohi ahi nyawa, abe onangoo yotobatolanga o gota, ona tahidingoto ngonaika la ka idadi yomakuduhunu de to ngona ani nyawa to ngona ani tonakoka.

⁹ De ngohi toperelu o gota o fara hange gea duru kohangoe angamoi Ma Jou ai Tau abe ahao mihigoko duru ma amoko de ma rorahai.

¹⁰ De ngohi tahidailako manga inomo, ani nyawa abe o gota gea yotobakarajaanga hokonaa, o gandumu abe idadioka o tarigu abe nako o duduga o litere moi gea miapake de gea ena miatuga o tarigu ma duduga o juta iata ma ngoe. De o gandumu o jelai imakadaene ma duduga ho enangoo ma duduga o juta iata ma ngoe. De tahidailako manga ngokere o angguru o litere o sana o ratuhu iata de monaoko, de manga minya o saitunu ma hofokino enangoo o litere o sana o ratuhu iata de monaoko.” Hokogea o Saloomo ai hurata o koano o Huramika abe wahikoano o Libanono ma nyawa.

¹¹ De ahao o Hurama, abe ai gogere o Tirusu ma kotaka, ai hurata ma balaha o Saloomoika itemo hokonaa, wato, “De naa ngohi duru tohioriki abe Ma Jou o Yawe duru wadora ai nyawaika hiadono ngona wonihidadi to ona manga koano!

¹² Ngohi duru tihiowa Ma Jou o Yawe, o Isiraele ma nyawa manga Jou, Una abe o dunia de ka hiadono mata-mata o dihangoka wotulaada! Una wihidoaka ahi dodiawo o Dautika o ngofaka abe una duru wososawaro, abe ngona o Saloomo wonihiakunu de o tobahioriki hiadono nososawaro nohikohowono abe itiai de ko itiaiua de naga ma titi utuohi abe nomangaratii. Ngona ahao duru nohasili nohigoko Ma Jou o Yawe ai Tau de o koano ma tau ma rorahai abe idadi to ngona ani tau.”

¹³ “De naa tihidingoto ngonaika womatengo abe duru wososawaro de o karajaanga mata-mata abe nomagahokoka ngohino. Unangoo ai hininga duru isosawaro ifikiri de ai romanga o Hurama-Abi.

¹⁴ De o Hurama-Abi ngoi meme o Isiraele ma nyawa abe ami tofora o dutu o Daanino, de ai baba o Tirusu ma nyawa. Una duru iwidotoko de iwihilati o karajaanga wodiai o kiahonanga duru ma rorahai o gurasino, de o haakaino, de o tabaagaino, de o behino. De ngaro wokarajaanga de ona abe yotobadiai o tau o hakaruino eko ngaro yotobadiai o gotaino ma, una wososawaro mata-mataika. De unangoo wososawaro wodumo o ngoere irupa-rupa, de una duru ma dutu wotobasolo-solo o ngoere abe ma wuu-wuu, de ma doka-dokara, de ma bihi-bihi ma dutu. De ngaro o ngoere duru ma hali abe ma lawe duru ialu-aluhu enangoo wososawaro wapake wodiai abe noperelu genangino. De ngaro ma kiahonanga utu abe ma hohailoa mata-mata unangoo duru wososawaro wodiai de ma bunga-bunga de ma dimo-dimo de hiadono ka idadi o bunga-bunga ma gambara o kia dika ma rupa una waniiki itiai wodimo-dimo. Ho o Hurama-Abi wokarajaanga yomaketerimoi de to ngona ani nyawa abe ma dihiraino wairikoka ahi baluhu o Dautu, to ngona ani baba.”

¹⁵ De o Hurama ai hurata o Saloomoika wohigila-gila wato, “De abe ma titi ani hidailako ani gogilaongo manga inomo o gandumu o tarigu, de o gandumu o jelai, de o saitunu ma minya de manga ngokere o angguru ngaro nohidingoto dika de naniiki ani mau ma duduga.

¹⁶ De ngomi misanangi ani gota minidolanga o Libanono ma loku-lokuoka de iti naga abe ma ngoe noperelu de ngomi misanangi miniduhunu. De ahao o gota gea mihihupu o gahioko de ahao mihigetefata de mitotaka ani kota o Yopaika. De genangoka ngonali natagongo nao o gota ma utu isana gea ka hiadono o Yerusaleeme ma kotaika.” Hokogea o Hurama ai balaha ma hurata o Saloomoika.

¹⁷ De ma oraha gea o Saloomo wahiaturu o homoaino ma nyawa abe yogogere o Isiraele ma tonakoka la wahikarajaanga Ma Jou ai Tau ihigoko. De ma karajaanga gea ma amoko ho ona mata-mata waetongo de manga romanga ngaro ma dihira ai baba o Dautu waetongokau. Masara naa o Saloomo waetongoli de manga ngoe mata-mataika yasana o ratuhu moi de moritoa de hange de yaratuhu butaanga.

¹⁸ De ona o nau-nauru yasana moritumidi abe wahikarajaanga ma kiahonanga ma dodubuho yotobatoraka. De ona yasana moritufange abe wahikarajaanga o loku-lokuoka abe genangoka o hakaru yopawa ihidiai ma popahagi. De naga yasana hange de yaratuhu butaanga wahidadi o hidimono abe yahiaturu ona mata-mataika abe yotobakarajaanga.