2 Tawari 17 - Ma Jou ai Demo-demo o Totobelohoka

O Yosafata iwigoraka la wodadi o Yehuda ma nyawa manga koano O Hitararono ma hidogo

¹ De ma oraha o Asa wohonenge de ai ngofaka o Yosafata wituruuru ho unangoli wodadi o Yehuda ma nyawa manga koano. De o Yosafata ai tentara wahiputurungu ka hiadono nako o Yehuda ma nyawa de o Isiraele ma nyawa de ka o Yehuda ma nyawahi manga tentara de ma buturungoka.

² Ho ai tentara wahitagongo la yogoa-goana o Yehuda ma nyawa manga kota mata-mataika abe yakurungaka de o dadaduhu. De o tentara ma dodoomu utu o Yosafata wahiaturu la o kota homoi-homoiika o Efaraimi ma tonakoka naga o tentara ma doomu genangoka la ka ihikaika yogoa-goana. Abe o Efaraimi ma nyawa manga kota mata-mata gea abe ma dihira o Yosafata ai baba o Asa wahikalaka hiadono o kota-kota gea idadi o Yehuda ma nyawa manga koano to unangoli ai kuahaka.

³ De Ma Jou o Yawe ka ihikaika wihiowa o Yosafata angamoi ai wowango ma datoro hoka ai tofora o Dautoli. De una duru ko womahuba-hubaua o pangao o Baalika.

⁴ De una duru wolingiri Ma Jou ai hininga hoka ai babali de waniiki Ma Jou ai behehongo de woluku waniiki o Isiraele ma nyawa manga biaha ma oraha gea.

⁵ De Ma Jou o Yawe duru o Yosafata wihiputurungu hiadono ai koano ma kuaha idogo ilamoko. De o Yehuda ma nyawa manga horomati ilamoko unangika ka hiadono ka ihikaika naga manga hadia ma hidoaka unangika ho hiadono manga koano gea duru wokaya.

⁶ De o Yosafata duru de ai hininga ma gahumu waniiki Ma Jou o Yawe ai hininga ho hiadono abe o popangao ma huhuba ma ngi-ngi o Yehuda ma tonakoka gea mata-mataika una wohihihanga. De ngaro ma pangao o ngo Asitorete ma liate mata-mata ma enangoo wohihihanga.

⁷ De wohikoano ngade-ngade ai taongo hange ma dekanino de womaputuhu wato kiani ai kokawaaha yadotoko Ma Jou ai Behehongo ma bukuino. Ho wahidingoto ai duduhunu yokokurutiye abe manga romanga o Bene-Haili, de o Obaaja, de o Sakaria, de o Netanele, de o Mika la Ma Jou ai Demo-demo yao ai kokawaahaika de yadotoko o kota-kotaika o Yehuda ma tonakoka.

⁸ De naga o Lewi ma nyawaoo abe yaniiki yaduhunu yadotoko abe manga romanga o Semaya, de o Netanya, de o Sebaja, de o Asaele, de o Semiramoto, de o Yonatana, de o Adonia, de o Tobia, de o Tobo-Adonia. De nagali manga hidemo Ma Jou o Yaweika o Elisama de o Yorama onangoo yaniiki o kokawaaha yadotoko.

⁹ Ho ona gea mata-mata abe yoiki yadotoko, ona manga karajaanga la o Yehuda ma nyawa yadotoko Ma Jou ai Behehongo ma Buku ma luluino. Ho ona yotagi-tagi manga kota mata-mataika de yatobadoto-dotoko manga gogianongoruika o Yehuda ma tonaka ma amokika.

¹⁰ De o nyawa abe yogogere o Yehuda ma nyawa manga tonaka ma datekoka ahao duru de manga modongo ma horomati ma amoko Ma Jou o Yaweika ka hiadono ko yamoroinokaua iwiparangi o Yosafatika.

¹¹ De naga o Filistina ma nyawa yamuruono naga abe yoboa o Yosafatino de iwihidoaka o haaka ma dutu unangika de nagali utu manga hadia, ho manga hidoaka gea ihitunguu manga horomati ai kuahaika. De naga o Arabino ma nyawa yoboa de manga duduono ma amoko abe iwihidoaka o Yosafatika. De gea naga o domba ma nauru o sana tumidi de o ratuhu tumidi de manga kabingi enangoo o sana tumidi de o ratuhu tumidi iwigao manga horomati ma hidoaka unangika.

¹² Ho o Yosafata ai kuaha ka ihikaika idogo de una wohigoko o tentara manga doomu ma ngi muruono naga abe akurunga de ma dadaduhu abe duru iputurungu. De wohigokoli o kota ma hungi muruono naga abe ma titi o Yehuda ma nyawa ka idadi manga inomo ma boloi yagogono o kota-kota gea ma goronaka.

¹³ Ho de ahao naga manga inomo kohangoe abe yagogono o kota-kotaka o Yehuda ma tonaka ma amokika. De o Yosafata ai tentara abe duru yososawaro yoparangi ona wahiaturu la manga doomu moi ka ihikaika naga o Yerusaleeme ma kota ma goronaka.