2 Samuele 9 - Ma Jou ai Demo-demo o Totobelohoka

O Dautu ai dora ma hiokoo ilamoko o Yonatana ai ngofaka o Mefibosetika

¹ De o wange moiuku duru o Dautu womahohininga abe ai behehongo ma dihira wihibehehongo o Saulu ai ngofaka o Yonatanika abe duru widodiawo. Ho waleha ai duduhunika, wato, “Sarakia, naga o nyawa o Saulu ai tauoka abe nagahi la ka idadi ahi dora ma hiokoo tahimatoko onangika? Ma dihira ngohi de ai ngofaka o Yonatana duru mimaketedodiawo irahai de ma titi gea ho duru toigo la ona taduhunu nako nagahi.”

² De ona iwihingahu o Dautika ma titi abe naga womatengo o Saulu ai duduhunu ai romanga o Siba. Ka de woihene ai duduhunu manga hingahu gea de o Dautu wahuloko onangika, wato, “Ngohi o Siba tibehehongo la una woboa ngohino ho niloiki niwihingahu unangika.” De ona yoiki o Sibaika de iwihingahu abe o koano wibehehongo. Ka de o Siba woihene abe ai koano wibehehongo de una woboa la yomarihimanga. De o Dautu wileha unangika wato, “Ho ngona naa o Siba abe ma dihiraino ma koano o Saulu nileleani?” De o Siba wopaluhu wato, “Iya, ngohi naa ai gilaongo gea.”

³ Ho o Dautu wilehali o Sibaika wato, “Ho sarakia nagahi o nyawa abe o Saulu ai tauino ma nyawa abe ka idadi ngohi tahimatoko onangika Ma Jou ai dora ma hiokoo?” De o Siba wato, “Ahi koano, naga womatengo o Yonatana ai ngofaka o Mefibosete. De una gea wosuga arihononga.”

⁴ De o Dautu wilehali wato, “Ho o Yonatana ai ngofaka una gea ma oraha naa o kiaka wogogere?” De o Siba wopaluhu, wato, “Una gea wogogere o Lodebara ma kapongo abe o Amiele ai ngofaka o Makiri ai tauoka.”

⁵ De gea o Dautu woihene de wahuloko ai duduhunika wato, “Ngini niloiki o Lodebarika de niwile o Yonatana ai ngofaka o Mefibosete. Una wogogere o Makiri ai tauoka de o Makiri gea una abe ai baba o Amiele.”

⁶ Ho ona yoiki o Mefibosetika de gea iwiaoino de una duru womaponuku o Dautu ai himangoka hiadono ai himanga itikiuku ka hiadono o meheluku. De o Dautu wato, “Mefibosete!” De o Mefibosete wopaluhu, wato, “Iya, ngohi naa ani gilaongo.”

⁷ De o Dautu witemo unangika wato, “Ngona ngaro ufa nohawana abe ngohi toniahokino ma titi ani baba o Yonatana. Una de ngohi duru mimaketedodiawo de mia dora ma gou-goungu de ngohi naa ahi dora ma hiokoo itagi ngonaika. De ngohi naa ahao ani ete o Saulu ai tonaka mata-mata tohigilioli ngonaika la idadi to ngonali ani tonaka. De ngona ahao ka ihikaika nolomo to ngohi ahi mejaka abe ahi tauoka naa.”

⁸ Ka de hokogea o Dautu wihingahu de o Mefibosete ma moioli duru de ai hininga ma dodipokouku womaponukokali o Dautu ai himangoka de wotemo, wato, “Ngohi naa ani gilaongo imaketero hoka o kaho ma honenge dika ho done sarakia ahi koano nohilega ngohino de ani hininga hokogea angamoi ngohi naa duru ko kia-kiaua ihidaene.”

⁹ De ahao ma koano ma moioli wibehehongo o Siba, ho una woboali o Dautu ai himangino. De o Dautu wihingahu o Sibaika, wato, “Ngona ma dihira abe nileleani ani baluhu o Saulika, ho naa to una ai danongo o Mefibosete unangikali nileleani la ahi duduhunu unangika ngona naso. Abe ngohi naa tiduhunu hokonaa, ngohi mata-mata tihidoaka unangika abe ma dihira to una ai ete ai kiahonanga.

¹⁰ De ngona de ani ngofa-ngofaka de ani gogilaongo o Mefibosetikali niwileleani. Abe ngohi tinihikarajaanga la ai oara ma tonaka de ma redi-redi ngini kiani niapaliara irahai. De o joro niodatomo de ahao ma hasili genangino idadi o Mefibosete ai utumu de idadi manga inomo abe yogogere to una ai tauoka. Masara nako o Mefibosete una ka idadi wogogere to ngohi ahi tauoka.” Hokogea o Dautu ai hiaturu de ai dora ma hiokoo itagi o Mefibosetika. De o Siba to una ai ngofaka o nau-nauru yangimoi de yamotoa de ai gogilaongo ona yamonaoko de naa una wipaluhu o Dautika, wato,

¹¹ “Ahi baluhu, ngohi duru tosanangi dika taniiki mata-mata abe nohihulokoka.” De ma oraha gea o Mefibosete womaturuuru ma koano ai tauika de unangoo wodadi imaketero hoka o Dautu ai ngofaka abe ai biaha una de o Dautu yomakutuono yolomo o Dautu ai mejaka.

¹² De o Mefibosete to una ai ngofaka naga o nauru abe ai etetekohi de ai romanga o Mika. De o Siba de ona mata-mata abe yogogere ai tauoka yodadi o Mefibosete ai gogilaongo de iwileleani ka ihikaika.

¹³ Hokogea o Mefibosete ai ade-ade abe una duru wosuga ai lou arihononga de wogogere o Yerusaleeme ma kotaka abe duru o koano ai tau ma goronaka.