2 Samuele 4 - Ma Jou ai Demo-demo o Totobelohoka

O Pasala 4 ko atailakouahi O Isibosete iwitoma

¹ De ipahaino de o Saulu ai ngofaka o Isibosete woihene ma abari ma titi o Abanera iwihohonenge o Heboronaka. Ho ka de ma abari gea woihenino de duru wohawanokaholi. De o Isiraele ma nyawa mata-mata onangoo duru yatomomonoka.

^2-4 De ma dihiraino gea o Saulu ai ngofaka o Yonatana, unangoli wamake ai ngofaka womatengo ai romanga o Mefibosete. De abe ma oraha o Saulu de o Yonatana yohonenge de o Mefibosete ai taongo motoa dika waadono. Ho ma abari ma titi ai baba de ai ete yohonenenge o parangi ma gogiriaka, gea iboa o Yisereeloka de aino. De naga o ngofeka momatengo mitobapaliara o Mefibosete gea, ho ka de moihene ma abari gea de ma ngofaka migorakiye de mihiloara done onangoo yobodito. Masara gea momapopaata ami gogiriaka de mipidili ho iwiotakuku, de mangale ma titi gea hiadono una wodadi wolugu-lugu. De ma oraha gea naga o Isibosete ai tentara ma hohidimono yahinooto abe ona o ria-dodoto. De to ona manga romanga o Baana de o Rekaba, de manga baba ai romanga o Rimono. De ona gea yomahidutu o Benyaminika de manga gogere o Beroto ma kapongoka. De ma dihiraino naga o nyawa utu yogogere o Berotoka, masara ipahaino de kiani yoara de yahidogunoaika dika manga kapongo. Ho ona gea yoara de ipahaino yomadioniki o Gitaimi ma kapongika, de ona nagahi o Gitaimoka ka hiadono ma oraha naa abe ma ade-ade tohitulihuku. Ho nako o Beroto ma kapongo gea, ma oraha naa o nyawa yaetongo ato o Benyamini ma nyawa manga kapongo.

⁵ De o wange moiuku o ria-dodoto gea o Baana de o Rekaba, ona yahinooto yoiki manga koano o Isibosete ai tauika. De marai o wange ikorona de ona yomahiadono, de ma oraha gea o Isibosete ai biaha womaiduiha, ho una iwikiookoka.

⁶ De ai tauoka gea naga momatengo motobagoa-goana ma ngorana, de gea muna ami karajaanga ma goronaka abe o gandumu mafido-fidoro masara ipahaino de imiboleoka ho munangoo imikiookoka. De ona yahinooto yomatohiki yoboaino de ka idadi imitilakuru de ko mamaoua.

⁷ Ho yogila-gila yowohama ai tau ma goronaika de iwimake o Isibosete iwikiookoka ai koioka. Ho ona iwitoma manga koano gea de ahao ai tomarino yatobiki la ka idadi ai pea yomagaoika. De ahao ona yosobo yotagi-tagi o Yorodani ma dolaino o futu gea ka hiadono yahidetebiniye.

⁸ De ipaha yomahiadono o Heboronika de yoboa o Dautu ai himangino de iwihimatoko o Isibosete ai pea unangika. De gea ona yotemo ato, “Abeika ani musu o Saulu ai ngofaka ai pea naa! Abe ma dihiraino de ani musu gea wohitaili wonihohonenge ngonaika, masara o wange naa de Ma Jou o Yawe wohiaturoka la ngona ani hibalaha namakeoka. Ho o Saulu de ai tau ona mata-mata yokokihonengoka!”

⁹ De ahao o Dautu wapaluhu ona yahinootoika wato, “Marai Ma Jou o Yawe Una gea dika abe ka ihikaika wohidatoko la ufa ahi musu ihibodito. De naa ngohi ahi demoino de duru tagou-goungu angamoi totemo-temo duru to Una gea ai himangoka.

¹⁰ De naa tiniade-ade abe hokokia idadi ma dihiraino o Sikagoka. Abe naga womatengo woboa ngohino de wohihingahu wato, ‘O Saulu una wohonengoka.’ De una gea wato bote wohihisanangi ma titi ai abari ma demoino gea. Masara ka de toihene ai demo gea de genangoka dika tihohonenge. Abe ahi datoro gea to una ai abari ma balaha!

¹¹ Ho o wange naa de marai ahi datoro imaketero dika abe tinihibalaha nginika! Angamoi ngini naa niwitomaka o nauru womatengo abe ko iwa ai howono, abe una iwikiooko to una ma hirete ai koioka de to una ma hirete ai tau ma goronaka. De ti ngini nia datoro gea duru itorou ho ngohi tato itiai nia howono ma tagongo imanoa nginioka dika. Ho koaho irahai nako o duniaino inihirehenoka!”

¹² De o Dautu wataere ipahaino de ahao wahuloko ai tentara ma nyawa la yahohonenge ona yahinootoika. De yahohonenge ibooto de ahao manga giama de manga lou yakokiafokoka, de ipahaino manga badanga yadideuku o Heborono ma taaga ma digi-digino. Masara nako o Isibosete ai pea gea yaoika de yalungunu o Abanera ai lungunoka.