2 Peturusu 1 - Ma Jou ai Demo-demo o Totobelohoka

O Peturusu ai demo ihira-hira ai gogianongoruika

¹ Ahi gogianongoru abe ngone o ngongaku moioka. Ngohi naa o Simono Peturusu to Yesusu Kristusu ai huhuloko de ai hidingoto ma nyawa, abe Una wohihidingoto ngohi la to Una ai abari tahingahu-ngahu o nyawaika. De naa ngohi tinihurata nginika abe ti ngini nia gogere nanga ngongakuoka, gea ka imaketero dika de to ngomioli naa mia gogere abe ngomi to Una ai hidingoto ma nyawa. De mangale ma titi o Yesusu Kristusu Una duru wototiai ai hiningaka ho ko wonairikua abe ngone homoi-homoi hiboringakuoka Unangika, de gea ngone mata-mata haborimakeoka nanga ngongaku ma wowango Unangino. De abe o Yesusu Kristusu, Una gea to ngone nanga Jou de nanga Duduhunu.

² De naa ngohi tinigahoko Unangiye la ahao to Una ai hininga ma owa de ai hininga ma miriidi gea duru ma amoko winihidoaka nginika ma titi abe ngini duru niwihioriki Ma Jouika de to ngone nanga Baluhu idodutu o Yesusikaoo ngini niwihioriki.

Abe hokokia hoaguru nanga ngongakuika

³ Ahi gogianongoru, abeika hokokia ma amoko Ma Jou ai hidoaka ma owa ngoneuku. Abe Una wonahidoakoka ngoneino mata-mataika abe hoperelu la howango ka hiado-adonika, de ngaro abe nanga hiakunu hokokia la howango itiai to Una ai himangoka, ma enangoo gea mata-mataika wonahidoakoka. De gea mata-mata wonahidoaka ma titi to Una ma hirete ai kuahaino, angamoi ka Una dika Ma Jou, ho Ma Jou ai kuaha gea imanoa ka Unangoka dika. De abe nanga wowango ka hiado-adonika de nanga hiakunu la howango itiai, gea mata-mata hamakeoka mangale ma titi abe ngone hihioriki Unangika. Abe Una gea wonaahoko Unangino ma titi to Una ma hirete ai medebini ma dararono de ai hiningaoo duru irorahai dika.

⁴ De ma titi ai medebini ma dararono de ai hininga ma rorahaiino gea ho hiadono Una wonahibehehongoka ai hininga ma owa ngoneino, abe ai owa gea duru ka ihailoaholi de duru ma rorahai. De gea wonahidoaka ma owa ngoneino la wato genangino ka idadi homaaduru abe hoka to Unangoli ai hininga hiadono homaketehiningamoi ngone de Una. Angamoi igoungu ngone wonaduhunoka nanga hininga ma gimono ma dorou ma kuahaino abe ka ihibinaaha o duniaika naa, ho ngone nanga hiningaka ka idadi homaaduru abe hoka Ma Jouoli ai hininga. De hokogea to Una ai hininga ma owa ngoneuku abe wonahiakunu la ka idadi howango itiai Unangoka.

⁵ De mangale ma titi abe to Una ai duduhunu hokogea ma amoko abe ti ngini nia ngongaku ma wowangoka, ho ngini kiani nimaribuutu la duru nimahiputurungu nia boringongakuika. Abe ma titi ufa ka niwingaku dika Unangika, masara nia ngongakuika kiani nihidogo la naga nia wowango ma datoro abe itotiai. De ngaro naga nia wowango ma datoro itotiai, ma iti ufa hokogea dika nigila-gila de ko nimahidogokaua. Masara kiani ka nimahidogohi nia hininga abe ka niakunu ma rorahai dika nimangiriki de gea ma titi nia tobahiorikino.

⁶ De ngaro ngini nia tobahiorikino ka niakunoka nimangiriki ma rorahai, ma kiani ka nimahidogohi abe niakunu nimatongohono ma titi nia badanga ma hafini la ufa genangino de niahowono. De gea ngaro niakunoka nimatongohono ma titi nia badanga ma hafini, masara ka nimahidogohi nia dongohono abe ngaro o kangela o kia dika ahao niaohana ma iti ufa nia ngongakuino de nirehene ma titi genangino. De ngaro nia dongohono o kangelaika nagau nia ngongaku ma wowangoka, ma iti ufa ka hokogea dika. Masara nimahidogoli nia hininga abe duru imakiniiki de Ma Jouoli ai hininga.

⁷ De gea ngaro nia hiningaka imakiniikoka de to Ma Jouoli ai hininga, ma gea ka nimahidogohi abe nimakodora nia gogianongoru o Yesusoka abe imaketero hoka o ria-dodoto o tau moioka yomakodora. De ngaro nia dora itagioka nia gogianongoruika, masara kiani ka nimahidogohi la o nyawa mata-mataika niadora.

⁸ De hokogea ngini kiani nimahidogo-dogo nia ngongakuika. Angamoi nako gea mata-mata naga idogo-dogo nia wowangoka, gea itararonoka abe duru niwihioriki nanga Baluhu idodutu o Yesusu Kristusika. De mangale ma titi ngini niwihioriki Unangika ho duru iniduhunu hiadono nia boriwowangoka ko parahajaua masara duru itohofoko de ma hofoko ka ma rorahai dika.

⁹ Masara naga o nyawa abe ona manga hiningaka ato ngaro ufa dika yoaguru manga ngongakuika. De mangale ma titi ona gea ko yoagurua manga ngongakuoka ho ko iwa manga hininga ma hofoko ma rorahai abe ahao naa tafetongoka. De o nyawa gea yomaketero hoka yorafioka manga hiningaka ho ko yomahiorikokaua. De gea ona yawohangoka abe ma titi ma dihiraino de Ma Jou waofioka to onangoo manga howo-howono abe ma dodihiraino yodiaioka, de gea ma titi hiadono ona gea yomaketero hoka manga hiningaka yokokirafioka.

¹⁰ Ho ahi gogianongoru, ufa ngini nimaaduru hoka onangoli gea, masara koaho nimaribuutu la nimahitaana abe ngini niagou-goungu niwiniiki Ma Jouika. De kiani hokogea nidiai angamoi Una gea winiahokoka de winiirikoka la nidadi to Una ai debi-debini ma nyawa, ho kiani ka ihikaika niwiniiki Unangika. De nako ka ihikaika ti ngini nia hininga hokogea, de gea ahao nibitumoka nia ngongakuoka de ko idadiua nirehene genangino.

¹¹ De ahao ma oraha adonoka de Ma Jou duru winidafongo de ai hininga ma sanangi de ma dora. De gea winidafongo to Una ai ngiino, abe genangoka winihigogere to Yesusu Kristusu ai kuahaka, la ma oraha gea de imahikaika nanga Baluhu idodutu de nanga Duduhunu Una wonahikoano ka hiado-adonika. Ho ngini koaho nimaribuutu la nimahitaana abe ngini niagou-goungu niwiniiki Ma Jouika.

O Peturusu wahihohininga onangika la ka ihikaika yoaguru manga ngongakuika

¹² Ho naa to ngohi ahi hininga tato ka ihikaika tinihihohininga nginika abe ma titi ahi demo kangano la tato ngini ka utuohi nioaguru nia ngongakuika. De ngaro ma dihiraino de ahi demo gea tanu nihiorikokau, de ngaro nimahigagaooka ma dodotoko ma gou-goungika, masara ka toigohi tinihihohiningali ma titi ena gea la ufa niawohanga.

¹³ De gea ngohi tato nako hokokia ma dekanohi abe ngohi ka tomanoahi ahi hijai-jai ma badangoka naa de gea ngohi tato itiai ka ihikaika tinitumomiki de tinihigaro ma titi ahi hohininga ma demoino la ngini niongano-nganono nia ngongaku Unangika.

¹⁴ Angamoi ngohi tohiorikoka abe ko itedekanokaua de ahi hijai-jai ma badanga naa kiani tanoaka, abe nanga Baluhu idodutu o Yesusu Kristusu wohihimatokoka gea ngohino la duru tohioriki abe itigioka tohonenge.

¹⁵ Ho igoungu ngohi duru toigo la ka ihikaika tinihihohininga ma titi ahi demo gea abe ma oraha ngohi nagahi o dunia ma lokuokahi. Masara nagali ahi hininga tato duru tomaribuutu la o dodotoko moi tinihidailakohi ma oraha naa, ho ngaro ahao ma oraha tininoaka ma ka idadiohi ahi demoino naa abe tohitulihukuoka de ena gea tinihihohininga la ngini utuohi nioaguru nia ngongakuika.

O Peturusu wahigaro onangika wato ka idadi duru yangaku Ma Jou ai Demo-demoika

¹⁶ Ahi gogianongoru, abeika nimahihohininga ma titi to ngomi mia hingahu ma demo nginika ma dihiraino. Abe ngohi de ahi dodiawo mia demo gea ma titi nanga Baluhu idodutu o Yesusu Kristusu ai kuaha kohaamoko de abe Una ahao woboali. De ngini ka idadi duru niangaku to ngomi mia demoika angamoi ena gea ihititi ma gou-goungino. Abe ma dihiraino ma oraha ngohi de ahi dodiawo minihingahu nginika abe ma titi nanga Baluhu idodutu o Yesusu Kristusu ai kuaha kohaamoko de abe Una ahao woboali, de gea mia hingahu ko ihititiua o nyawa manga totoadeino abe yomahohiningaiye dika manga sosawaroino. Hokogenangua abe minihingahu nginika, masara ngomi naa ma dihiraino de nanga Baluhu wiwimakeoka de to ngomi ma hirete mia lako hinooto abe hokokia ma amoko to Una ai kuaha kohagurutiye, de genangino ma titi hiadono minihingahu nginika ma titi Una.

¹⁷ Abe gea ngomi wiwimake abe ma oraha nanga Baba Ma Jou wihidoaka Unangika o horomati duru kohaamoko. De genangoka Ma Jou abe duru de ai medebini ma dararonoka Una wotemo wato, “Naa to Ngohi ahi Ngofaka de duru tidora. De Ngohi duru tisanangi Unangika.”

¹⁸ De to Una ai demo ma ilingi gea ngomi ma hirete miihene o Horogaka de auku iboa, angamoi ma wange gea nanga Baluhu womiao ngomi la mimakiniiki de Una midoa daku ma loku ma debi-debiniye. Ho igoungu ngomi naga de de Una daku ma lokuoka de ngomi miihene ai demo, ho gea ngini ka idadi duru niangaku to ngomi mia hingahu ma demoika.

¹⁹ De nagali ma hingahu ma demo ma ngoe abe ma dodihiraino de Ma Jou ka wahingahu to Una ai uru ma dodofanga manga hiningaika abe ona yadofanga ai hingahu ma demo gea manga gogianongoru utuikali. De manga hingahu ma demo gea ngone ka idadi duru hangaku enangika, hongoli angamoi ena gea ka imakiniiki dika de abe ngomi naa ma dihiraino miamakeoka daku ma lokuoka. Ho koaho ngini nitotoihene ma demoino gea, angamoi genangino ka idadi inihimatoko nginika abe ma dodotoko ma gou-goungu de o kiaka abe ko ma gou-goungua. De manga hingahu ma demo gea imaketero hoka o hilo moi ngone hasoino o fufutuoka la ka idadi ma ngekomo haniiki itiai de ufa horehene genangino, de gea ka hapakeohi ka hiadono itawangeoka, abe ka hiadono ma oraha o Koruku ma Beka idoali la inahitararono ngoneuku. Ho ma hingahu ma demo gea abe ma dodihiraino de ihitulihukuoka Ma Jou ai Demo-demoka, de enangika gea ngini niasoika la inihidumutu ma totiaiika ka hiadono nanga Baluhu idodutu o Yesusu Kristusu woboali. Abe ma oraha woboaka de ti ngini nia hiningaka duru itararonoka niwihioriki Unangika.

²⁰ De naa moi abe ngini duru kiani nihioriki itararono, abe nako ma hingahu ma demo mata-mataika abe ihitulihukuoka Ma Jou ai Demo-demoka, de gea duru ko iwa ma demo abe ihititi o nyawa manga hiningaka de aino abe ona gea ihituli-tulihukuoka.

²¹ Angamoi nako Ma Jou ai hingahu ma demo, gea duru ko moiua la o nyawa manga mauoka de aino iboa, masara gea mata-mata Ma Jou o Womaha abe wahilufungu o nyawa manga hiningaka de ai kuaha de wahingahu ai demo onangika, de ahao onangoli yadofanga o nyawaika, de hokogea Ma Jou wotemo manga uruoka de aino. Ho koaho ngini duru nitotoihene ma demoino gea.