2 Korintusu 6 - Ma Jou ai Demo-demo o Totobelohoka

¹ De mangale Ma Jou womihitagongo ngomi la mimahikarajaanga moi de de Una, ho ngomioo duru miahigaro o nyawaika imaketero hoka Una ma hirete wahigaro onangika. De gea miahigaro o nyawaika miato, “Ufa hiadono ngini niihene dika Ma Jou ai hininga ma owa ma hingahuika de ipaha ahao niaoluku enangika. Angamoi gea ahao imaketero hoka Ma Jou ai hininga ma owa parahaja dika nginika.”

² De mia demo gea imakiniiki de Ma Jou ai demo abe ihitulihukuoka ai Demo-demoka. De Una wotemo wato, “Ma dodihiraino de Ngohi tairikoka ma wange abe muruonoka de ahao duru itiai ma oraha la gea tiniduhunu nginika. De nako adonoka ma oraha gea de ahao tinipaluhu nia gogahoko ma demo de tiniduhunu.” Hokogea itemo Ma Jou ai Demo-demoka. De naa abeika ngini nitotoihene mia hingahu ma demoino. Angamoi naa naga ma oraha adonoka abe Ma Jou winiduhunu nginika. De ma oraha naa ka idadi hohiromanga o duduhunu ma oraha. Ho ufa ngini nimahiaka-aka masara koaho nimataiti niodafongo Ma Jou ai hininga ma owa abe wato winihidoaka nginika.

O Paulusu womahingahu ma titi ai kangela abe womatongohono ai wowangoka la womahitaana abe una wagou-goungu wodadi Ma Jou ai duduhunu

³ De ngomi naa mia wowango ma goronaka de duru ko mioigoua la mia datorino de naga moi idadi o bebeleke o nyawaika, done ona ahao yongelo mia tagongika ato ngomi wiwileleani ko itiaiua Unangika.

⁴ Masara ngomi mia wowango ma datoro mata-mataika de duru wiwinii-niiki Unangika abe imaketero hoka Una woigo wato kiani ai duduhunu ona yowango yototiai. Abe ngaro o hininga ma dodubuho eko o hu-huha eko o kokangela o kia dika naga imidaene, masara genangino de mimatongohono dika ho duru itararono abe ngomi miagou-goungu midadioka to Una ai duduhunu.

⁵ De igoungu ngomi naa ma dihiraino de imipoha-poha, de ma muruono ibooto imibuika o bui ma tau ma goronaka, de nagaoo miaohana o nyawa manga ngamo imihidotadaene abe ona yotobadiai o huruhara ngomino. De ngomi duru mitobakarajaanga ma dubuho ka hiadono imiboleoka, de ma ngoe imihidetebiniye abe mia ngidu ko miamakeua, de ma ngoe imihafini masara mia inomo ko iwa.

⁶ De ngaro hokogea to ngomi mia kangela masara mimahitaana abe midadioka Ma Jou ai duduhunu ma gou-goungu ma titi mia wowango ma rorahaiino. Abe to ngomi mia wowango ma datorino de itebi-tebini, de abe nagali mia hininga ma madaoko ma rahai abe Ma Jouoka de aino womihidoaka. De mia dongohono naga o nyawaika abe ngaro ona ko imisanangiua ngomino masara ko miahigurubungua de ko miahidemoua. De nagali abe mimahitaana mia hininga ma titi abe miatobaduhunu o nyawaika, de abe miatobapake Ma Jou o Womaha ai kuahaino, de abe mia hininga ma dora ma gou-goungu ka ihikaika itagi o nyawaika.

⁷ De nagali ngomi miatobahingahu-ngahu o demo ma gou-goungu dika o nyawaika, de abe mitemo gea Ma Jou ai kuahaino abe mia wowangoka. De naga ngomioka mia wowango ma totiai Unangino, de gea idadioka hoka mia humaranga de mia dadatokoo mia giamoka. Abe de mia humaranga gea ka idadi miapake la miaparangi ma dorouika, de ngaro naga abe imilawana ngomino ma mia wowango ma totiai gea idadi mia dadatoko la mimaduhunu genangino.

⁸ De ngaro o nyawa imihoromati ngomino eko ngaro imingelo, masara ngomi ka wiwileleani dika Unangika. Angamoi igoungu o nyawa utu imisanangi masara utuoli imihohedu. De utu hiadono imitae ngomino ato bari mitobaelu-eluku, masara ngomi naa ma gou-goungu dika miahingahu-ngahu o nyawaika.

⁹ De nanga gogianongoru ko manga ngoe imihioriki mia wowango, masara onangino utu de imietongo ato ngomi ko kia-kiakaua imidaene. De ngomi ma ngoe miaohana o bodito masara naa abeika, ngomi ka miwangohi, de ngaro ma ngoe o nyawa imipoha-poha masara ko imitomauahi.

¹⁰ De igoungu to ngomi mia hiningaka naga ma huha masara ka ihikaika nagaoo mia garago. De igoungu ngomi midadi o huha ma nyawa, masara mangale ma titi to ngomi mia wowango de miahidadi o nyawa ko manga ngoe la hiadono ona yokaya Ma Jouika. De ngaro to ngomi mia kiahonanga ko iwa, masara tanu mata-mataika idadioka to ngomi. De abeika mia kangela irupa-rupa gea ma hidogoronaka de ngomi ka mimatongohono dika de mia hiningaka de ka wiwiniikohi Unangika. Ho ngomi miato marai mia dongohonino gea de duru itararono mimahitaana abe ngomi naa miagou-goungu midadi Ma Jou ai duduhunu.

¹¹ Ahi gogianongoru o Korintusoka abe duru minidora nginika, abe kangano niabasaka to ngomi mia hurata ma demoka de genangino duru mimahimatoko nginika mia hininga ma dola ma gou-goungu, de duru ko iwa abe miagogono.

¹² De ngomioka mia hininga ma dora ka itagiohi nginika abe hoka biahali. Ho nako naga moi o liliara, gea ma titi nginioka abe ti ngini nia dora niatumungu la ufa itagi ngomino.

¹³ De naa ngohi duru tinitemo nginika abe imaketero hoka to ngohi ma hirete ahi ngofa-ngofakika totemo. De naa duru togahoko la nginioo nimahigunoa la ti nginioli nia dora itagi ngomino la gea ngone nanga dora hoimoi dika.

O Paulusu wahitiari wato ko idadiua yomahidiliko de ona ko iwingaku-ngakua

¹⁴ Ahi gogianongoru, naa moi tinileha, ka idadi hohidiliko o kuda moi de o hapi moi la imakuduhunu ihidatauru o goroba? Ko idadiua, e? De hokogenangoo abe ngone hingaku-ngaku o Yesusu Kristusika ko idadiua homahidiliko onangika abe ko iwingaku-ngakuahi. Angamoi done sarakia imakiniiki o wowango ma totiai de o wowango ma dorou? Ko imakiniikua! De done sarakia abe o dararono de o fufutu imanoa o ngi moioka?

¹⁵ De done sarakia o Yesusu Kristusu de o Ibilihi ma haeke ka idadi yomaketehiningamoi? Eko nako womatengo wingaku Unangika de naga womatengoli ko wingakua, de done sarakia ona yahinooto yomaketehiningamoi? Duru ko idadiua!

¹⁶ De done sarakia Ma Jou ai Tau de o popangao ma tau imakiniiki? Duru imakohowono! De abeika ma titi ena gea homafikirohi, angamoi ngone naa homaketero abe hoka Ma Jou ai Tau abe Una gea duru wotobawango ka hiado-adonika. Abe Ma Jou Una ma hirete ma dodihiraino de wotemo wato, “Ngohi ahao tomanoa onangoka de totagi-tagi to ona manga hidogoronaka. De Ngohi todadi to ona manga Jou ho ona to Ngohi ahi nyawa.”

¹⁷ De naga moioli abe Ma Jou wotemo ai nyawaika la wato ona yomatingaka o dorou ma nyawaino, wato, “Ngini kiani nihupu o nyawa gea manga hidogoronaino la nimatingaka onangoka de aino. De ufa nimahitigi to ona manga kiahonangika abe ipeseke to Ngohi ahi himangoka. De nako hokogea nimatingaka Ngohino, de gea Ngohi ahao tinidafongo.”

¹⁸ “De ahao Ngohi todadi ti ngini nia Baba ho ngini ahi ngofa-ngofaka o nau-nauru de o ngo-ngofeka.” Hokogea ma dodihiraino ihitulihukuoka to Ma Jou Wokokurutiye ai demo abe wotemoka. Ho to ngohioo ahi demo imakiniiki de to Unangoli, abe duru tinihitiari tato ufa nimahidiliko onangika abe ko iwingaku-ngakua.