2 Kokoano 5 - Ma Jou ai Demo-demo o Totobelohoka

O Naamana iwipado de Ma Jou wipake o Elisa la wihitogumu

¹ Ma oraha Ma Jou o Yawe wapake o Arama ma nyawa la wahohowono o Isiraele ma nyawa de wipake womatengo ai romanga o Naamana abe una o Arama ma nyawa manga tentara wahihira. Ho o Naamana duru wihisanangi o Arama ma nyawa manga koano angamoi ka ihikaika wolaku ma oraha waparangi o Isiraele ma nyawaika. Masara ai lolaku gea ihititi Ma Jou o Yaweino. De abe o Naamana una duru wososawaro woparangi masara una duru wokangela de o panyake o pado.

² De o Naamana ai tauoka naga momatengo o ngofeka o moholehe abe o Isiraele ma nyawa. De hokonaa to muna ami ade-ade. Ma dihira naga o Arama ma tentara o doomu moi yowohama o Isiraele ma tonakika de yomagora manga kiahonanga de naga manga nyawa yamuruono naga abe yataoko de yao o Arama ma tonakika. De o moholehe naa abe ma dihira yataokino de imihidoaka o Naamana ngoi fekatika la momihidadi ami gilaongo.

³ De ipaha o wange moiuku de ami gilaongo gea motemo o Naamana ngoi fekatika, mato, “Ngohi tato duru irahai la ani rokata woiki witutumu Ma Jou ai uru ma dodofanga ahi tonakoka abe una gea ka idadi wihitogumu ai panyake o padoino.” Hokogea ami hingahu o Naamana ngoi fekatika de ahao muna ami hingahu gea madofanga ami rokatika.

⁴ De ahao o Naamana woiki witutumu ai koanoika de wihingahu unangikali abe ma titi o moholehe gea o Isiraele ma nyawa abe ami higaro unangika la ka idadi wamake o duduhunu.

⁵ De ai koano unangoo o moholehe ami demo wohimoteke de wihibehehongo o Naamanika, wato, “Naamana, ngohi duru toigo la ani pado gea itogumu ho noiki nilingiri Ma Jou ai uru ma dodofangika gea. De ihira kiani noiki nitutumu o Isiraele ma koanoika ho ngohi tosanangi tonihidiai o hurata abe ka idadi nihidoaka o koanoika gea.” Ho o Naamana wohidiai ai hidoaka la ahao o duduhunu ka idadi wahibalaha. De ai hidoaka gea ko ihutulua, masara duru kohaamoko abe naga o haaka ma dutu o kilo o ratuhu hange de moruata, de o gurasi ma dutu o kilo moributaanga de tufange, de o pakeanga o pasanga ngimoi. De gea mata-mata wohidiai ibooto de una wosobo.

⁶ De abe o hurata o koanoika itemo hokonaa, “Ngohi o Aramoka manga koano, de ahi hurata nenanga tinihikamake de ahi duduhunu o Naamana. De ngohi tigahoko ngona niduhunu ka hiadono ai panyake o pado itogumoka.” Hokogea ma hurata ma demo abe wihidoaka o Naamanika abe ai demo o Isiraele ma nyawa manga koanoika.

⁷ Masara ka de o Isiraele ma nyawa manga koano ma hurata gea wabasa ibooto de duru wohuha ka hiadono ai pakeanga wakakihi, de wotemo onangika abe naga genangoka, wato, “Abeika o Arama ma nyawa manga koano ai gogahoko ngohino naa! De done sarakia abe una naa iwipado ahi himangoka de ngohino ai koano womagahoko la ngohi tihitogumu ai panyake o padoino? Nako to ngohi ahi kuaha ko imakadaenua abe hoka to Ma Jou ai kuaha. Ka Una dika abe ka idadi o nyawa wahohonenge de ahao wahiwangokali! O koano gea wohihioriki abe ngohi ko takunua todiai abe hoka womagahokoka ho marai ai gogahokino naa ma titi womalingiri ai ngekomo la ka idadi una de ai tentara ka idadi imiparangioli!” Hokogea o Isiraele ma nyawa manga koano wotemo de ai huha.

⁸ Masara ahao o Elisa, Ma Jou ai uru ma dodofanga, woihene abe o koano ai huha ilamoko gea, de wohidingoto ai hingahu unangika, wato, “O koano, adodoa ngona ho hiadono ani hininga duru ihuha? O Naamana gea nihidingoto ngohino la una ahao wohioriki naga Ma Jou ai uru ma dodofanga ma gou-goungu o Isiraele ma tonakoka.” Hokogea o koano woihene de ahao wihingahu o Naamanika abe o Elisa o kiaka wogogere la ka idadi woiki unangika.

⁹ Ho o Naamana woiki una de ai dodiawo mata-mata abe iwiniiki de naga manga kuda de manga goroba ma ngoe. De ahao yoboa o Elisa ai tauino de o Naamana widodamaa ai tau ma ngoranoka abe doka ai hiningaka womatemo, wato, “Marai una gea bootino Ma Jou ai uru ma dodofanga wohupu wohiduhunu.”

¹⁰ Masara o Elisa wihidingoto ai gilaongo dika la witemo o Naamanika. De o Elisa ai hingahu wadofanga unangika hokonaa, wato, “Naamana, kiani noiki doka o Yorodani ma akerika de nomaohiki ma tumidi o akeroka gea. Ka de ma tumidi nomaohiki ibooto de ahao ani kai ilio hoka ma dihirali abe ani pado itogumoka ho ani kai duru iofioka.”

¹¹ Masara o Elisa ai behehongo gea o Naamana woihene de duru wongamo de duru womakode wolio ai poretoko de wato, “De ngohi tato bote Ma Jou ai uru ma dodofanga gea ahao wohupu wohitutumu! De iti una de ai giama wohikelu-kelu la daku ahi pado ma nabo-nabo ma lokuino de womagahoko de Ma Jou o Yawe ai romanga la to una ai Jou gea wohihitogumu!

¹² De abeika nako to ngone o Arama ma nyawa nanga akere hohikohowono de o akere o Isiraele ma tonakoka de duru to ngoneohi nanga akere irahai. Abe ngaro o Isiraele ma akere mata-mata hohidotoomuino hiadono idadi o akere moi masara ko imakadaenua ma rahai hoka o Abana ma akere de o Para-para ma akere abe ihahuru o Damasiki ma kotaino. Ho utuohi itiai ngohi tomaohiki to ngone dika nanga akeroka!” Hokogea o Naamana ai hininga kuranga o Elisaika ho wosoboka dika la wolio de ai ngamo iwilufungu.

¹³ Masara naga o Naamana ai tentara ma hidimono yamuruono ihitaili iwihiriidi ai ngamoino de yotemo unangika ato, “Mia baluhu, nako Ma Jou ai uru ma dodofanga abe gea wonihuloko kiani nodiai abe ihuha o nyawa yodiai de sarakia ngona ko nodiaiua? Marai ngona nodiai gea ena abe wonihulokoka ngaro o karajaanga ma dubuho! Ho to una ai huhuloko ma demo nenanga kiani enangoo nohingounu. Una wato ka de ai hingahu naniiki gea, abe noiki nomaohiki, de ahao ngona notogumokau!”

¹⁴ Hokogea ona iwihigaro de ahao o Naamana ai hininga waturuuru ho woiki o Yorodani ma akerika de wouti de wotumunu ma akeruku ma tumidi abe hoka Ma Jou ai uru ma dodofanga wihingahu kiani wodiai. De ka de wotumunu ma tumidi de wopudali de ai roehe duru irahaioka abe imaketero hoka o ngofaka ma etetekoli manga roehe ma rahai angamoi ai pado duru iaikoka.

¹⁵ De ahao o Naamana duru woigo la una de Ma Jou ai uru ma dodofanga gea yomakamake ho una de ona abe iwidodiawo mata-mata yomakiniiki yolio o Elisaika. De ahao yotoomuino duru o Elisa ai himangoka de o Naamana wihingahu, wato, “Ahi dimono, de ahi horomati ngonaika tonihingahu abe ma oraha naa ngohi duru tohioriki abe ngaro o dunia ma amokika masara Ma Jou ka womatengo dika de Una wogogere o Isiraele ma tonakoka. De ngohi duru togahoko la naa ahi hidoaka ma hadia ngonaika nodafongo.”

¹⁶ Masara o Elisa wopaluhu, wato, “Duru igoungu, Ma Jou o Yawe wowango-wango de gea Una abe tileleani, de ngohioo naa duru tagoungu abe ngaro ani hadia ma, ngohi ko idadiua moioo de todafongo.” Hokogea o Elisa womahilooa ho o Naamana duru wiribuutu la wodafongo, masara ai hadia ma hidoaka una mata-mata ka woluku dika.

¹⁷ De ma bahaika o Naamana wotemo wato, “Nako hokogea ngona naniiki, gea ko adodoaua. Masara ngohi togahoko ngona nohihigunoa la ngohi tomagahoko o tonaka nenangoka, iti ahi keledai hinooto tohibarene de ani tonaka de ahao tomagao ma oraha tolio. De angamoi ngohi duru taetongo abe o wange naa de imahikaika ngohi ko tomahubakaua o pangaoika. Ngaro abe ahi huhuba iharo-harongo, eko ahi huhuba utu, masara gea mata-mata tomahihuba duru ka Ma Jou o Yaweika dika.

¹⁸ Masara ma oraha tolio ahi tonakika de ahao naga moi abe kiani ngohi totobadiai la tihingounu ahi koanoika. De gea abe kiani todiai duru tonganono ka idadi wohiapongo Ma Jou o Yawe. Abe ma oraha ahi koano wowohama o pangao o Rimono ma huhuba ma tauika de ngohioo kiani naga ai datekoka angamoi wohihuloko ngohino la titobaniiki. De ma oraha womahuba-huba o Rimonika de womaponuku o Rimono ma rupa ma himangoka de una womahidudukuku ahi giamuku hiadono ngohioo tomaponuku. Masara ahi hiningaka ko tomahubaua enangika.” Hokogea o Naamana womahingahu o Elisaika.

¹⁹ De o Elisa wipaluhu, wato, “Marai nolio dika, de Ma Jou ani hininga mata-mata wohioriki ho tonganono la noiki de ani hininga duru de ma riidoka.” Hokogea yomakoketemo ibooto de yomahiketehilooa de ahao o Naamana de ai nyawa ona yosobo yolio o Arama ma tonakika.

O Gehasi ai horoodo

²⁰ De o Naamana de ai nyawa yosoboka masara ko yokurutikauahi de o Elisa ai duduhunu o Gehasi una womatemo ai hiningaka wato, “Kangano ahi baluhu o Elisa koaho wodafongo dika o Arama ma nyawa gea ai hidoaka / hadia. Masara ngohi naa ahi hininga imakohowono. Ho ngohi ahi demoino de duru tagou-goungu tato tihidoduru unangika la ka idadi mimakoketemo. De gea tomahikoboto de tofetongo Ma Jou ai romanga, ho naa bootino tagou-goungu titemo unangika gea la ka idadi tomamake ai hidoaka moi unangoka.”

²¹ Ho o Gehasi womatemo ipahaino de ahao wosobo wihidoduruino o Naamana ai poretino de womapopaata hiadono widaene. De ma oraha o Naamana wimake o Gehasi womapopaatino de wahuloko la ai goroba imatogumukuohi o ngekomo ma goronaka. Imatogumoka de o Naamana woutiohi la ka idadi yomakoketemo. De wileha o Gehasika wato, “Sarakia? Marai naga ani perelu ngohino?”

²² De o Gehasi wipaluhu wato, “Koua. Masara ahi baluhu wohihidingotino la tonihingahu abe naga o goduuru yahinooto ahao kangano yomahiadono o Efaraimi ma loku-lokuoka de yaino. De ona yahinooto gea marai Ma Jou ai uru ma dodofanga. Ho ahi baluhu womagahoko ngonaika la nako ka idadi ngona naduhunu ona yahinootoika. Angamoi ahi baluhu o Elisa ai hininga la wahidoaka onangika manga baju ma doduruuru de o haaka o kilo moruange de motoa. Hokogea ahi baluhu ai gogahoko ma demo ngonaika.”

²³ De o Naamana ai hiningaka de duru woigo waduhunu onangika ho wato, “Ngohi naa tosanangi dika tohingodumu ani baluhu ai gogahoko gea! Masara koaho tohifoloi ma haaka ma amoko abe tahidoaka onangika.” Ho una wotemo ibooto de ahao wale o beta-beta moi de wonoa ma baju ma doduruuru hinooto genanguku. De ahao wohinoa o popoje hinooto de o haaka, de ma popoje amomoi ma dubuho o kilo moruange de motoa. De ahao wahokino ai duduhunu yahinooto de wahidoaka ma kiahonanga gea mata-mata onangika la ka idadi ona yomakiniiki de o Gehasi de yao ma kiahonanga.

²⁴ De ona yaruange yosobo yomakiniiki yotagi-tagi ka hiadono yomahitigika o Elisa ai ngiika, abe o Elisa wogogere o lokuoka. Ho ma lokuoka gea de ahao o Gehasi wale ma hidoaka mata-mata ona yahinootoino de wahuloko la ona iwigilio dika o Naamanika. De ona yosoboka de ahao una wowohama ma tau ma goronaika de womataiti wagogono ma hidoaka gea.

²⁵ De ipahaino abe ma oraha o Gehasi woboa o Elisa ai himangino de o Elisa wileha wato, “Gehasi, kangano ngona o kiaino noboa?” De wipaluhu wato, “Ngohi naa ko kia-kiaikaua toiki.”

²⁶ Masara o Elisa witemo unangika wato, “Ou! Marai ngona naa ko nohiorikua masara kangano ngohi ahi womaha naga dokaika ma oraha o Naamana wouti ai gorobaka de wauku la nimakoketemo! Ho ngona nato bote irahai ma oraha naa de nadafongo o tiwi de o baju? Eko irahai nadafongo o hadia abe o saitunu ma gota-gota de o angguru ma redi de o domba de o hapi, de o duduhunu ma nyawa abe o nau-nauru de o ngo-ngofeka? Done sarakia ani hininga hokogea?

²⁷ Ho mangale ma titi ani datoro gea abe nomagahoko o kiahonanga o Naamanino ho ngona kiani namake ani datoro ma hofoko hokonaa. Abe ngona de ani totoforauku mata-mataika ahao inikokidaene o Naamana gea ai panyake o pado ka hiado-adonika.” De gea igoungu ma oraha gea dika de idadi o Gehasi ai badangika. Abe ma oraha o Elisa ai himangoka de wosobo de o Gehasi ai badanga mata-mataika atamunoka de o pado ho hiadono ai kai duru iarehoka.