2 Kokoano 24 - Ma Jou ai Demo-demo o Totobelohoka

O Hitararono ma hidogo Ona o Yehuda ma tonakoka yogilio manga hininga ma dorouika

¹ De ma oraha o Yoyakimi wohikoano o Yerusaleeme ma kotaka de o Nebukanesara abe una o Babele ma nyawa wahikoano, una de ai tentara yangohama o Yehuda ma tonakika de o Yoyakimi womahidoaka o Nebukanesarika. De angamoi wokalaka ho kiani unangoo wofangu o tiwi ma amoko o tao-taongiye o koanoika gea o Babele ma kotaka. Masara o taongo hange ipahaino de ahao o Yoyakimi womaputuhu wato o bobangu gea abe kiani o tao-taongiye wofangu o Nebukanesarika ko wofanguokaua.

² De ahao Ma Jou o Yawe wahidingoto o Yehuda ma nyawa manga musu la yoiki o Yehuda ma tonakika de duru yahikala onangika la ihibinaaha ma tonakika gea. De manga musu abe wahidingoto naga manga dodoomu manga ngoe abe yoiki o Yehuda ma tonakika la o Isiraele ma nyawa manga kiahonanga yaora. Abe ona naga yoboa o Babele ma tonakino, de o Arama ma tonakino, de o Moaba ma tonakino, de o Amono ma nyawa manga tonakino. De ona mata-mata gea manga dumutu moi dika de gea la o Yehuda ma nyawa manga tonaka gea duru yahikala de yahibinaaha imaketero abe hoka ma dihiraino Ma Jou o Yawe ai uru ma dodofanga yahingahuokau o Isiraele ma nyawaika abe wahingahu ahao naga ma oraha abe ahao idadi hokogea onangika.

³ Ho o hibinaaha gea iboa o Yehuda ma nyawaika de igoungu manga musu duru yahikala onangika abe imaketero hoka Ma Jou o Yawe wohibehehongoka angamoi duru manga datoro itorouholi. Una womaputuhokau la wato o Yehuda ma nyawa wahiofi ai himangoka mangale ma titi abe ma dihira manga koano o Manase wodiai abe duru wahowono iwoeholi.

⁴ O Manase gea wodiai itorou hiadono o nyawa manga ngoe abe ngaro ona ko yahowonua masara manga awunu wakopoa o Yerusaleeme ma kota ma goronaka de Ma Jou o Yawe wato gea ko idadiua ai howono waofi.

⁵ De o Yoyakimi ai ade-ade utuohi naga abe idadi ma oraha wohikoano o Yehuda ma tonakoka de ai ade-ade mata-mata gea ihitulihukuoka o bukuoka abe ma romanga, “O Kokoano abe Ihikoano o Yehuda ma Tonakoka manga Ade-ade.”

⁶ De ma oraha o Yoyakimi wohonenge de ahao to unangoli ai ngofaka o Yoyakini wituruuru ho o Yoyakinoli wohikoano o Yehuda ma tonakoka.

⁷ De abe ma oraha o Babele manga koano una wapareta o Yehuda ma tonaka mata-mataika de o Mesiiroka manga koano ko woboakaua wahikangela. De gea mangale ma oraha naa o Babele ma nyawali yapareta o tonaka mata-mataika gea abe ma dihiraino o Mesiiri ma nyawa yomahitoona abe ena o tonaka o Mesiiri ma akeroka de imahikaika ka hiadono o Efaraata ma akerika.

O Yoyakini wohikoano o Yehuda ma tonakoka

⁸ O Yosia ai danongo o Yoyakini ai ngumuru adonoka ai taongo ngimoi de tufange ma oraha wodadi o koano o Yerusaleeme ma kotaka de wohikoano o mede hangeino dika. O Yoyakini ngoi meme o ngo Nehusata abe muna o Elenatana ngoi ora.

⁹ De o Yoyakini ma oraha wohikoano de unangoo duru wodiai abe itorou Ma Jou ai himangoka imaketero hoka ai baba o Yoyakimoli wodiai.

¹⁰ De ma oraha o Yoyakini wohikoano de o Babeloka manga koano o Nebukanesara wato waparangi o Yerusaleeme ma kota ma nyawaika. Ho wahuloko ai tentara ma dimo-dimonika la o Babele manga tentara yao yahihira o Yerusaleeme ma kotaika. De genangoka kiani o Yerusaleeme ma kota yahigilolitino de yaparangi onangika ka hiadono yahikala. De manga tentara manga dimo-dimono yahuloko manga tentaraika abe ngaro duru manga dekana masara kiani o Babele ma tentara ko yotogu-togumua yaparangi ka hiadono duru yolakuoka.

¹¹ De ahao o Nebukanesara unangoo woboa abe ma oraha ka yaparangiohi o Yerusaleeme ma kotaika.

¹² De ma oraha o Nebukanesara woboa o Yerusaleeme ma kotaino de o Yoyakini de ai duduhunu ma nyawa, de ai popareta ma hihira mata-mata, de o koano ngoi meme, ona mata-mata ka ma moi yomahidoaka o Babele ma koanoika angamoi gea yomangaku yokalaka. De o Yoyakini iwipakiti ho iwiaoka. De mata-mata gea idadi abe ma oraha o Nebukanesara wohikoano o Babeloka ai dekana ngade-ngade ai taongo tufangeino.

¹³ De ahao idadi duru imaketero abe hoka ma dihira Ma Jou o Yawe wahingahuoka abe o Nebukanesara una wakokile manga kiahonanga mata-mata abe yodiai o gurasino ho duru ma hali-hali. De ena ma kiahonanga mata-mata abe ma dihira o Saloomo wodiai o gurasino de wohingohama Ma Jou o Yawe ai Tau ma goronaika, de ai kiahonanga utu abe una wapake o koano ai tau ma goronaka, enangoo mata-mata yakokile. De ena gea o Babele ma nyawa yatobi-tobikuku la ona ka idadi yakokiao o Babele ma kotaika.

¹⁴ De o Nebukanesara wakokitaokoka o Yerusaleeme ma nyawa duru ko manga ngoe. Ho wairiki manga nau-nauru o goo-goduuru abe ka onangohi duru yososawaro de yokokurutiye o Isiraele ma nyawaka de ona wale. De manga tentara abe ka onangohi yososawaro yoparangi, onangoo gea wakokile. De ona abe yososawaro yodiai o kiahonanga o gotaino, eko o behino, de o gurasino, de o haakaino, de o tabaagaino, onangoo wakokile. Ho ona mata-mata wairiki gea naga yasana ngimoi abe yatoomuino de yao o Babele ma kotaika. Ho ona abe wanoaika o Yehuda ma tonakoka gea ona o Isiraele ma nyawa abe duru yohu-huha dika.

¹⁵ De o Yoyakini abe ma oraha iwipakitoka de iwiao o Babele ma kotaika, ma, ko unangua dika iwile masara ngoi memeoo, de ngoi feka-fekatoo, de ai popareta ma dimo-dimono de ona mata-mata abe yokokurutiye o Yehuda ma tonakoka, ona yatoomuino o Yerusaleeme ma kotaka de ahao ka ma moi yaoka.

¹⁶ De abe ma titi o tentara abe ka onangohi yososawaro yoparangi ona gea yasana tumidi abe yao. De ona yasana moi abe duru yososawaro yodiai o kiahonanga o gotaino, de o gurasino de o haakaino, de o tabaagaino, de o behino, iti onangoo mata-mata abe de manga buturungoka la ato ona ka idadi yoparangi. De ona yososawaro gea ahao yahidotoomuino de o Yehuda ma nyawa manga tentara de ona yakokiaoka.

¹⁷ De o Nebukanesara ngaro ka to unangohi ai kuaha ikurutiye o Yehuda ma tonakoka mata-mataika masara una woigo la nagahi o koano o Yerusaleeme ma kotaka. Ho una wiiriki o Yoyakini ai ama o Matania, abe ai baba o Yosia, de una gea wihidadi o Yehuda ma nyawa manga koano ma hungi. De o Matania ai romanga waturuuru o Nebukanesara ho wihiromangoli o Sedekia.

O Sedekia wohikoano o Yerusaleeme ma kotaka

¹⁸ De o Sedekia ai ngumuru adonoka ai taongo monaoko de moi ma oraha wodadi o koano o Yerusaleemoka de wohikoano genangoka ai taongo ngimoi de moi ma dekanino. De una gea ngoi meme o ngo Hamutala de to muna ami baba o Yeremia abe una o Libana ma nyawa.

¹⁹ Masara o Sedekia unangoo duru ai wowango ma datoro itorou Ma Jou o Yawe ai himangoka angamoi wodiai duru itorou abe imaketero hoka o koano ma dihira o Yoyakimi.

²⁰ Ho mangale ma titi Ma Jou o Yawe ai ngamo ma dihiraino ifae manga kokoano manga datorika ho hiadono womaputuhokau la ai nyawa abe yogogere o Yehuda ma tonakoka kiani manga hohowono yamake. Ho abe ma oraha o Sedekia wahikoano de Ma Jou wahihupuoka o Yehuda ma nyawa gea o Yerusaleeme ma kotaino de o Yehuda ma tonakino de wahidingoto o homoa ma nyawa manga tonakika. De hokonaa ma ade-ade abe hokokia idadi ma oraha Ma Jou ai nyawa wahihupu o Yehuda ma tonakoka de aino. Abe ma dihiraino de o Babele manga koano o Nebukanesara waparangi o Yehuda ma tonakika hiadono wahikala onangika. Masara ngaro wahikalaka ma ka idadi wahigunoa la to ona ma hirete manga koano wogila-gila wahikoano onangika abe yogogere o Yerusaleeme ma kotaka. Ho ipahaino de o Babele manga koano wiiriki o Sedekia gea o Isiraele ma nyawaino de wihidadi o Yehuda manga koano. Masara o Sedekia wahikoano ai kokawaahaika ai taongo muruonino ipaha de ahao una womaputuhu la wilawana o Babele manga koanoika abe wato ko wihingounokaua.