2 Kokoano 13 - Ma Jou ai Demo-demo o Totobelohoka

O Elisa wohonenge

¹⁴ De ipahaino de o Elisa duru wopanyake ma dubuho abe ngade-ngade wohonenge. De ahao o Isiraele ma nyawa manga koano, o Yoasa, witutumu unangika de wimake abe o Elisa wokangelaholi de duru woari. De o Yoasa wopoaka wato, “Ahi baba! Ahi baba! O gogoroba abe ona yao-ao de o kuda abe ngone o Isiraele ma nyawa inadatoko o boditoino.”

¹⁵ De o Elisa wihibehehongo ai koano o Yoasika, wato, “Ngona naleino o toimi moi de to ena ma hihiipi muruono naga.” Hokogea wihibehehongo de o koano woiki wale o toimi de ma hihiipi.

¹⁶ De ahao o Elisa wihibehehongoli unangika, wato, “Ngona naso enangika de nomahidiai la notoimi.” Hokogea o Elisa wihuloko de ahao o Elisa watamunu ma koano ai giama arihononga de to una ma hirete ai giama.

¹⁷ De ahao wihibehehongoli wato, “Yoasa kiani naa o jendela nafelenga abe yohimangika o wange ma hiwarika.” Ho o koano ma jendela gea wofelenga. Ka de ma jendela wafelengaka de o Elisa wihulokoli, wato, “Naa, ngona notoimi ma hoanika!” Hokogea wihuloko de hokogea ma koano wodiai. De ahao o Elisa duru wotemo de ai kuaha, wato, “Ahi koano, o hihiipi naa abe notoimoka idadioka Ma Jou o Yawe ai dodunguu ma hihiipi. Abe ai hihiipi naa ihitunguu o lolaku duru ihiboa ngonaika abe ma oraha nimaketeparangi de o Arama ma nyawa. Abe nako ma oraha ngini niaparangi o Arama ma nyawaika manga tonakoka abe niangika manga kota o Afekika de gea ngona nolaku ka hiadono to ona manga tentara nahikokibinaahaka.”

¹⁸ “De naa Ma Jou ai dodunguu moioli kiani nodiai de o hihiipi utu gea. Ho ngona ma hihiipi nafokotino ka ma moi de ahao nohiboha-boha o tonakuku.” Hokogea o Elisa wihibehehongo o koanoika de hokogea o Yoasa wodiai abe o hihiipi o pakiti moi una wagorakino de wohiboha o tonakuku ma hangeou.

¹⁹ Masara ka de o Yoasa wohiboha ma hihiipi gea o tonakuku ibooto de o Elisa wingamo unangika, wato, “Ngona nahowonoka! Tanu irahai nako ngona ma hihiipi gea nohiboha ma motoa eko ma butaanga! Abe nako hokogea nohiboha de ahao o Arama ma nyawa manga tentara mata-mata nahikala ka hiadono ngade-ngade namataka, masara naa angamoi ma hange dika nohiboha ho ma hangeino dika nolaku.” Hokogea o Elisa wagou-goungu abe wohioriki abe ahao idadi.

^20-21 De ahao o Elisa wohonenge de o Isiraele ma nyawa iwilungunu de ai lungunu gea hoka o aruku. De ipaha naga o heheranga idadi o Elisa ai lungunoka gea. De hokonaa ma ade-ade. O tao-taongiye abe ma oraha o maata ipaha de ahao imulaengoli ihiwara de gea o Moaba ma nyawa ona yoboa o Isiraele ma nyawa manga tonakino yangohama la manga kiahonanga yaora. De ma moiuku adonoka ma oraha o Moaba ma nyawa yahikangela hokogea de naga o Isiraele ma nyawa ma nauru wohonengoka. De ahao ai dodiawo yamuruono naga iwiao ai honenge ma lungunika abe imakitingaka ko ikurutikaua de o Elisa ai lungunu ma ngi. De ona abe iwiao manga dodiawo ai honenge ihira yoboa o Elisa ai lungunu ma ngiino masara ko yomahiadonuahi manga dodiawo ai lungunu ma ngiika. De abeika! Ona yamake o Moaba ma nyawa yoboaino o doomu moi abe yotobaora-ora. De angamoi duru yamodongo onangika ho hiadono duru yomataiti manga dodiawo ai honenge gea yaumo dika o Elisa ai lungunu ma goronaika de ona yomataiti yoara. Masara ka de o nauru ai honenge adaene o Elisa ai kobo-kobonguku o aruku ma goronaka gea de ka itodokanino o nauru ai honenge gea wowangokali hiadono una womapaatiye de womaokoino! Hokogea o Elisa ai heheranga ma baha ma ade-ade.