2 Kokoano 1 - Ma Jou ai Demo-demo o Totobelohoka

O Elia witaere ma koano o Ahasiaika

¹ De o Ahaba una wohonengoka de ahao o Moaba ma nyawa manga hininga la yomahihupu o Isiraele ma nyawa manga giamino, ho ona duru yalawana o Isiraele ma nyawaika.

² De o wange moiuku o Samaria ma kotaka de o Isiraele ma nyawa manga koano o Ahasia naga daku ai tau ma poretiye. De una womahitigi o jendelaika abe naga de ma gota ma hohumuduru ihisosalioaino masara ka idadiohi yomalega doka ma hoanika. Masara ka itodokanino de una o Ahasia iwiotaka ma jendelaka de wauku ho duru iwilabo ai badangoka. De mangale ma titi ai kangela gea ho ai nyawa yamuruono naga wahidingoto o Ekono ma kotaika. Abe wahuloko ai nyawaika wato, “Ngini niloikohi daku o Ekono ma kotaika la nileha to ona gea manga jou o Baala-Sebubika ma titi ahi badanga ma kangela naa. Nileha nako ka idadiohi ngohi naa towango eko adonoka ahi gahe ma titi ahi nabo ihidotadaene naa.”

³ Masara gea ahao Ma Jou o Yawe ai malaekata woiki o Eliaika abe una o Tisebe ma nyawa de wihuloko moi o Eliaika. Abe ma malaekata gea wato, “Ngona nomasikaa de noiki nabuhuku ma koano gea ai nyawaika. De kiani nadofanga ma demo naa onangika, nato, ‘Mode ngini niato bote ko iwa nanga Jou o Isiraeloka naa! De gea ma titi hiadono ngini naa nia dumutu o Baala-Sebubika, o Ekono ma nyawa manga jou gea, de niolingiri to ena ma demo nia koanoika!

⁴ Ho naa Ma Jou o Yawe ai demo abe ka idadi niwidofanga nia koanoika. Una wato, “Naa tonihingahu abe ngona duru ko nomomikokaua ani ngingiduino angamoi naa kiani ngona nohonengoka!”’” Ho gea de ahao o Elia wosoboka la woiki wabuhuku ma koano ai nyawa de wadofanga Ma Jou ai demo onangika.

⁵ De ma koano ai nyawa yoihene ma demo abe o Elia wadofanga onangika de ahao ona ko yogila-gilauali o Ekonika masara ka iwigilio manga koanoika. De iwiadono ma koanoika de una waleha wato, “Ngini naa duru ko initedekanuahi, ho marai ma titi o kia naga hiadono nimataiti nilioino?”

⁶ De ona iwipaluhu ato, “Mia koano, marai naga o nauru womatengo abe mimakamake de una mia dodagi ma gogiriaka, de una gea womihuloko la ka milio naangino de minidofanga ngona mia koanoika Ma Jou o Yawe ai demo moi. Abe Ma Jou wonitemo wato, ‘Done ma titi o kia hiadono ngona nahidingoto ani nyawa o Ekonika la nolingiri o demo ma titi ngona abe to ona gea manga jou o Baala-Sebuboka de aino? Bote ngona nafikiri nato o Isiraeloka naa de ko iwa Ma Jou la ka Ngohino dika nohileha gea? Ho mangale ma titi ani datoro gea hiadono ngona ko idadiokaua toniduhunu ho o hitogumu ani badanga ma kangelaino ko namakeua. De ngona marai ani ngingiduino ko nomomikokaua angamoi itigioka ani gahe nohonenge!’ Hokogea to una ai demo abe ngomi minidofanga ngonaika mia koano.”

⁷ De ma koano woihene manga demo gea de ahao waleha wato, “Abeika nihihingahu ma nauru gea ai rupa sarakia abe winihuloko nginika la nihidofanga ma demo gea.”

⁸ De ona ato, “Una gea duru wogoo-gogo de naga ai goronaino una womahidubuluino de gea o aewani ma kaiino.” De manga demo woihene de ma koano wato, “Ou, una o Tisebe ma nyawa gea abe ai romanga o Elia!”

⁹ De ahao ma koano o Ahasia wahidingoto ai tentara ma nyawa yamoritoa de manga hidimono womatengo la ona yoiki o Eliaika de iwile la ka idadi yomarihimanga o Elia de ma koano. De iwiadono de ma hidimono woboa o Elia ai himangino ma oraha wogogeruku o loku moi ma tubuoka. De witemo o Eliaika wato, “Ngona naa abe nodadi Ma Jou ai uru ma dodofanga, nanga koano wonihuloko la noutiuku de homakiniiki hoiki unangika.”

¹⁰ De o Elia wipaluhu wato, “Ngona nagoungu abe ngohi naa Ma Jou ai uru ma dodofanga. De mangale ma titi naga ahi kuaha Unangoka ho naa togahoko la naga o uku ma dokara yoguti daku ma dihangoka de auku nginiuku de inihibinaaha ngona de ani tentara mata-mataika!” De ka de wotemo ipaha de o uku ma dokara yoguti onanguku de yokokihonengoka.

¹¹ De ipaha ma koano woihene hokokia idadi de ahao wahidingoto ai tentara ma nyawa yamoritoali de to onangoli manga hidimono womatengo. De ma hidimono gea unangoo witemo o Eliaika de ai demo imaketero dika de una wohira-hira abe wato, “Ngona naa abe nodadi Ma Jou ai uru ma dodofanga, nanga koano wonihuloko la noutiuku de homakiniiki hoiki unangika.”

¹² De o Elia ai bobaluhu enangoo imaketero abe hoka ihira-hira abe una wato, “Ngona nagoungu abe ngohi naa Ma Jou ai uru ma dodofanga. De mangale ma titi naga ahi kuaha Unangoka ho naa togahoko la naga o uku ma dokara yoguti daku ma dihangoka de auku nginiuku de inihibinaaha ngona de ani tentara mata-mataika!” De ka de wotemo ipaha de o uku ma dokara ma moioli yoguti onanguku de hiadono yokokihonengoka.

¹³ De ipaha ma koano woihene hokokia idadi de ahao ma moioli wahidingoto ai tentara ma nyawa yamoritoali de to onangoli manga hidimono womatengo. Masara ma hidimono gea ma oraha wiadono o Eliaino de womatilabukuku ai himangoka de womagahoko o Elia ai hininga ma dora ma hiokoo. Abe wotemo wato, “Ngona abe nodadi Ma Jou ai uru ma dodofanga, ngohi naa tomagahoko la napake ani hininga ma dora ngohino de ahi nyawa yamoritoaino naa abe ona hoka to ngona ani duduhunu.

¹⁴ De ngohi tohioriki abe ma dihiraino de ma hinooto ibooto o uku ma dokara yoguti daku de auku de yahohonenge mia dodiawo o tentara ma nyawa yaratuhu moi de manga hidimono yahinooto gea. Masara ngohi duru tomagahoko la ufa ngomi naa mia wowango nohibinaaha abe hoka onangoli.”

¹⁵ De ma hidimono gea wotemo ipaha de ahao Ma Jou o Yawe ai malaekata witemo o Eliaika wato, “Noutiuku dika de nimakiniiki de una, de ngaro ufa dika ngona nimodongo.” Ho o Elia womaokoiye de ona yosobo yomakiniiki abe manga dumutu ma koanoika.

¹⁶ De ona iwiadono ho o Elia woboa ma koano ai himangino de una wotemo wato, “Naa ka idadi tonidofanga ngonaika Ma Jou o Yawe ai demo moi. Abe Ma Jou wonitemo wato, ‘Done ma titi o kia hiadono ngona nahidingoto ani nyawa o Ekonika la nolingiri o demo ma titi ngona abe to ona gea manga jou o Baala-Sebuboka de aino? Bote ngona nafikiri nato o Isiraeloka naa de ko iwa Ma Jou la ka Ngohino dika nohileha gea? Ho mangale ma titi ani datoro gea hiadono ngona ko idadiokaua toniduhunu ho o hitogumu ani badanga ma kangelaino ko namakeua. De ngona marai ani ngingiduino ko nomomikokaua angamoi itigioka ani gahe nohonenge!’ Hokogea to Una ai demo abe ngohi tonidofanga ngonaika ahi koano.”

¹⁷ De igoungu ma koano gea wohonenge duru imaketero abe hoka Ma Jou o Yawe wahingahuoka ai uru ma dodofanga o Eliaino. Ho o Ahasia wohonengoka de ahao ai dodoto o Yorama wituruuru la unangoli wodadi to ona manga koano dau o Isiraele ma tonakoka, angamoi o Ahasia ko iwa ai ngofaka o nauru. De gea idadi ma oraha o Yehorama wohikoano o Yehuda ma tonakoka ai taongo hinootoino. Abe o Yehorama una gea o Yosafata ai ngofaka.

¹⁸ De mata-mata utu abe o Ahasia wodiai ma oraha wohikoano, ma ade-ade gea ihitulihukuoka o buku moioka ma romanga, “O Kokoano abe Ihikoano o Isiraele ma Tonakoka manga Ade-ade.”