1 Yohanese 1 - Ma Jou ai Demo-demo o Totobelohoka

O Yohanese ai demo ihira-hira abe ai gogianongoruika

¹ De ngohi tinihurata nginika ma titi o Yesusu Kristusu, abe Una gea iwihiromanga Unangika o Hingahu ma Demo ma dutu, de abe Unangoka o wowango ma ngango ma titi. De Una gea ngaro ai dulaada naa ko idadiuahi masara Una nagau. De ipahaino de ahao ngomi naa abe wiwinii-niiki, ngomi ma hirete miihene de miamake ma Hingahu ma Demo gea. Abe ma titi ngomi mitotoihene to Una ai ilingi ma demoino, de ngomi wiwilega-lega Unangika de to ngomi ma hirete mia lako hinooto, de nagali wiwiso to Una ai badangika de to ngomi mia giama.

² De igoungu abe Una gea o wowango ma ngango ma titi, de Una ka ma dodihirainohi de Una naga de de o Baba, masara ipahaino de ahao Una iwihimatoko ngomino ho ngomi naa wiwimake. Ho gea mangale ma titi ngomi wiwimakeoka hiadono naa ngomi ka idadi miagou-goungu minihingahu nginika abe Una gea o wowango ka hiado-adonika ma titi.

³ De gea abe ngomi ma hirete miamakeoka de miihenoka Unangino, ena gea minihingahu nginikali. De gea ngomi minihingahu nginika angamoi ngomi duru mioigo miato nginioo ka idadi nimanoa to Una ai wowango ma ngango ma goronaka. Abe gea imaketero hoka ngomioli ai wowangoka mimanoa. De gea ngomi mimanoa Ma Jou o Babaka de to Una ai Ngofaka o Yesusu Kristusoka, ho irahai ngini de ngomi homakokutuono homanoa to Una ai wowango ma goronaka.

⁴ De mia demo gea mitulihi nginika la nako ngini nianiiki mia demoika, gea ahao to ngone mata-mata nanga garago duru ingodu-ngodumoka.

Abe ma titi nako ngone hingakuoka Unangika masara ahao ngone hahowono

⁵ De naa ngomi minihingahu nginika ma hingahu ma demo abe ma dihiraino Ma Jou ai Ngofaka womihingahuoka ngomino, abe Una wato, “Ma Jou Una gea o dararono, de Unangoka ma hohutuloo de ko iwa o fufutu.” Hokogea ma hingahu ma demo nginika.

⁶ Ho nako ngone homahingahu hato haniiki Ma Jou ai datoro itiai de naga nanga gogao itiai Unangika, masara nanga hiningaka tanu o fufutuoka homanoa, gea ngone hoeluku dika de to Una ai demo ma gou-goungu ko haniikua.

⁷ Masara nako ngone homanoa o dararonoka abe imaketero hoka Unangoli womanoa o dararonoka, gea de ahao ka idadi naga nanga gogao itiai ngone de Una nanga hiningaka. De nako ai dararonoka homanoa, de gea to Una ai Ngofaka o Yesusu ai awunu ngaro ma moi dika iuihi masara genangino ka ihikaika inahitebini to ngone nanga howono mata-mataino. Angamoi ai bobangu ka ihikaika itagi, iti ngone homanoa to Una ai dararonoka.

⁸ De nako ngone homahingahu hato ko iwa o howono ngoneoka, gea homabudioka dika de inahitaana abe to Una ai demo ma gou-goungu ko imanoaua ngoneoka.

⁹ Masara nako to ngone nanga howono homangaku Unangika, gea ahao Una wonaapongo nanga howonino gea de wonahitebinoo ma titi nanga dorou mata-mataika nanga wowangoka. De abe wonaapongo de wonahitebini, gea hohioriki Una ahao wodiai angamoi Una wonahibehehongoka wato hokogea wodiai. De Una gea watobagou-goungu ai behehongo ma demoika de ka ihikaika ma totiai dika wanii-niiki.

¹⁰ De nako ngone homahingahu hato ngone ko hahowonua, gea imaketero abe hoka hihiromanga Ma Jouika hato Una woelu-eluku, angamoi ma dihiraino de Una wonahingahuoka abe ngone hahowonoka Unangika. Ho nako nanga hiningaka hokogea itagi, gea inahitaanoka abe to Una ai Demo-demo duru ko imanoaua to ngone nanga hiningaka.