1 Tesalonika 3 - Ma Jou ai Demo-demo o Totobelohoka

O Timotiusu iwihidingoto o Tesalonika ma nyawaika

¹ De igoungu ma oraha gea abe homakitingakoka de ngomi duru miningano-nganono de gea ngomi ko mihiorikuahi hokokia idadi nginika. De gea ngomi hodongoo de mihigogururihi ho hiadono ko miapoakaua. Ho gea mimaputuhu miato ngaro ngohi o Paulusu de o Silasa kiani imihinooto dika mimagoo-gogerohi nenangoka o Atena ma kotaka,

² masara iti ka idadi wiwihidingoto nanga gianongoru o Timotiusu nginika abe o Tesalonika ma kotaika la ka idadi una winitutumu. Abe o Timotiusu una gea wileleani Ma Jouika ma titi ai karajaangino, abe Ma Jou ai karajaanga gea la o Kristusu ai Abari ma Rorahai ihiabari o nyawa-nyawaika. De gea wiwihidingoto o Timotiusu nginika la miato una ka idadi winihigaro de hiadono winihiputurungu ngini ma titi nia ngongakuoka,

³ done nginioka naga abe nirehene nia ngongakuoka de aino ma titi abe ma oraha naa naga idadioka o nyawa inihikangela nginika. De gea igoungu ngini ma hirete nihiorikoka abe ngone hingaku-ngakuoka gea o kangela kiani ngone hohimanga.

⁴ Angamoi nengokadau ma oraha ngomi nagahi nginioka de gea ma muruono ibooto minihingahu miato ahao kiani idadi abe o nyawa inahikangela ngoneino. De gea mia demo nginika itaanoka, angamoi idadioka nanga kangela, de gea ena ngini duru nihioriki.

⁵ Ho gea mangale ma titi tinigihenoka abe igoungu naga o nyawa inihikangela nginika, ho ngohi ahi hiningaka duru tiningano-nganono de tomaleha-leha ma titi nia ngongaku gea nirehenoka eko nagahi. De hokogea itagi ahi hiningaka hiadono ngohi ko tapoakaua ho hiadono o Timotiusu tihidingoto nginika la ka idadi winitutumu de ahao ma oraha una wolioli genangoka de waino de ahao ka idadi tinihioriki hokokia ngini nia ngongaku. Angamoi ma oraha gea tomatemo ahi hiningaka tato, done o Ibilihi ma haeke inihirehene, abe ena gea duru yahitobaata-atara o nyawaika la ato yahirehene enangino. De gea nako hiadono igoungu ena gea inihirehenoka, de gea ahao to ngomi mia karajaanga de mia gahauku nginioka gea mata-mata ka parahaja dika.

O Timotiusu wolioino de wao o abari o Tesalonikaka de aino abe duru yahigarago o Paulusu de o Silasa

⁶ Masara ahao naa ma duruika o Timotiusu wolioka nginioka de waino de gea una waoino o abari abe duru imihisanangi ngomi nenangoka. De gea una womihingahu ngomino abe ma titi ngini nia ngongaku ka iputurungohi de abe ngini ka nimakodorahi. De gea womihingahuoo abe ngini ka ihikaika nimihininga de gea nia hininga ka ma rorahai dika ngomino. De gea womihingahuoo abe nginioo duru nioigo la ngomi miboa minitutumu nginika, de gea duru imakadaenoo hoka to ngomioo mia hininga, la gea ngomioo duru mioigo minitutumu genangika la ngone ka idadi homakamakeoli.

⁷ Ho gea ma titi to una ai hingahu ma demo gea ngomino ho hiadono ngomi naa mia hiningaka duru imilaruoka ma titi ngini. De ngaro igoungu ma oraha naa naga de o nyawa duru imihikangela ngomino, masara ngomi duru ka migaragohi angamoi miihenoka ma titi ngini ka ihikaika niwingaku Ma Jouika.

⁸ De gea ngomi duru mimamao hoka mia wowango naa iwangorokali, de gea ma titi ngini nimatongohono nia ngongakuoka de ufa nirehene genangino. Ho naa minihibehehongo la ngini nigila-gila dika nimatongohono la ngomi naa ka ihikaika miamao abe mia hiningaka iwangoro ma titi mia garago nginioka.

⁹ De gea igoungu duru ma titi nginioka hiadono ngomi duru ka ihikaika mitarimakase Ma Jouiye, abe gea mia tarimakase ngade-ngade ko miaboaikaua genangika. De gea ho ma oraha mimaniata nanga Jouiye de duru migogarago Unangoka ma titi ngini.

¹⁰ De ngomi naa duru ka ihikaika mimagahoko o futu de o wange Ma Jouiye la ahao ka idadi ngone homarihimangoli ngomi de ngini, angamoi ngomi mia hiningaka miato miniduhunu la nako nagahi nia kuranga ma titi nia ngongakuoka, ena gea ka idadi ngomi minihidogo nginika la nia ngongaku gea utuohi iputurungu Ma Jouika.

O Paulusu ona yagahoko manga gogianongoru o Tesalonikaka

¹¹ De hokonaa mimaniata ma titi ngini. Ngomi duru mimagahoko de mionganono abe ahao nanga Baba Ma Jou ma hirete de nanga Baluhu idodutu o Yesusu ahao mia ngekomo womihidoaka la ngomi ka idadi miboa minitutumu nginika.

¹² De gea minigahokoo la ahao nanga Baluhu winiduhunu nginika la nia dora ka idogo-dogo hiadono duru ilamoko de gea hiadono ngini duru nimakodora de o nyawa utuikaoo ma niadora. De gea ahao nia dora ka imakadaene dika de to ngomioo mia dora nginika, abe gea mia dora enangoo duru ilamoko nginika.

¹³ De nako hiadono nia dora gea idadi ilamoko, de gea Una ahao ka idadi winihiputurungu nia hiningaka la ngini ka idadi niakunu nianiiki to Una ai totiai. De ahao ma titi nia datoro itotiai gea ho hiadono ahao Una winifetongo wato nia wowangoka nitebini. Abe ma oraha gea nanga Baluhu idodutu o Yesusu woboali, de naga ai kokawaaha mata-mata iwikokiniiki, de gea Una winifetongo wato nia wowangoka nitebini nanga Baba Ma Jou ai himangoka de gea duru ko iwaka nia howono. Hokogea ngomi minigahoko Ma Jouiye ma titi ngini.