1 Samuele 21 - Ma Jou ai Demo-demo o Totobelohoka

O Pasala 21 ko atailakouahi O Dautu woara o Sauloka de waino

¹ De ahao o Dautu woara o Nobo ma kapongika la ka idadi witutumu o Ahimeleke, abe una gea manga hidemo ma nyawa Ma Jouika. Masara ka de una wimake o Dautu de duru iwitodokana hiadono wofafara. De una wileha o Dautika wato, “Ho done ma titi o kia ngona nomatengo dika noboaino?”

² De o Dautu wipaluhu wato, “Marai nanga koano wohihitagongo o karajaanga moi abe duru ko tadadiua tahingahu o nyawa utuika. Ho ngaro ahi nyawa abe ihitobaniiki masara tahuloko la yomanoahi o ngi moiokali de ihidamaa, ho de ahao ngomi mimakamakeoli genangoka.

³ Ho naa marai tonileha ngonaika, naga ani inomo ngonaka? Abe tomagahoko nohihidoaka iti o roti motoa, eko o inomo utu o kia dika abe naga naangoka.”

⁴ De o Ahimeleke wipaluhu wato, “Tomahilooa masara nako o roti biaha ko iwa ngomioka. Masara naga o roti abe iwihidingakoka Ma Jouika, ho tanu ngomi dika o hidemo ma nyawa ka idadi miaolomo. Ho kiani tonilehahi, ani nyawa abe initobanii-niiki ngonaika, naa ma duru ona yomaidu de o ngofeka? Abe nako hokogea de ahao ko idadiua ma roti naa yaolomo. Masara nako hokogenangua de ahao ka idadi tonihidoaka la niaolomo.”

⁵ De ai demo gea o Dautu woihene de ahao wipaluhu wato, “Nako gea ngaro ufa nohawana. Angamoi nako ahi nyawa gea ma oraha mimakiniiki mia dodagioka de duru ko tahigunoaua yomaidu de o ngo-ngofeka. De hongoli mia dodagioka naa abe hatoli ikurutiye de duru mimahidodiai done miatilakuru ma hiaturu.”

⁶ Ho mangale ma titi o roti biaha ko iwa unangoka ho o hidemo ma nyawa gea wihidoaka ma roti abe iwihidingakoka Ma Jouika. Ma roti gea ma dihiraino de yakelenga o mejaka doka Ma Jou ai Tau o Ngoerino ma goronaka, de ahao kanganoino de yaturuuru de o roti ma hungi. Ho ma roti abe yagoraka ma mejaka de aino, ena gea iwihidoaka o Dautika.

⁷ De ma wange gea naga womatengo genangoka abe wamake hokokia o Ahimeleke wihidoaka o Dautika. De una gea o Edomo ma nyawa abe ai romanga o Doege, de unangoo wodadi o Saulu ai duduhunu womatengo. Abe ma titi naga o Saulu ai nyawa manga ngoe yatobagoa-goana ma koano ai domba ma duduono, de o Doege naa to ona mata-mata manga hihira. De una naga ma kapongoka ma wange gea la manga agama ma pareta moi waniikohi. Ho una wamake o Ahimeleke ai hidoaka o Dautika.

⁸ De o Dautu wadafongoka ma roti de ahao wilehali o Ahimelekika wato, “De sarakia, naga ngonaka ani kuama eko ani humaranga? Abe marai ma oraha nanga koano wohihitagongo ngohino de duru tomataiti tosobo ho ko tadaenua tagoraka o parangi ma dae!”

⁹ De wipaluhu o Dautika wato, “Abe naga naangoka ka o humaranga moi dika, de gea to Goliata, abe una gea o Filistina ma nyawa de ma dihiraino ngona nitomaka o Ela ma tonaka ma dolaka. De ma humaranga gea yahawo de o ngoere de yakelenga ahi baju o efodo gea ma poretoka. Ho nako ngona nosanangi gea ena napake, ka idadi nomale dika, masara ko iwa utu naangoka.” De ma demo gea o Dautu woihene de duru wosanangi ho wato, “Gea duru irahaiholi! Abe o humaranga utu moioo de ko iwa imakadaene de gea ena! Ho abeika nohihidoaka ngohino!” De gea o Ahimeleke wihidoaka unangika.

O Dautu woara o Gaata ma kotaika

¹⁰ De o wange gea o Dautu ka idadi woara o Sauloka de waino ho woiki o Gaata manga koanoika. De manga koano gea ai romanga o Akisi.

¹¹ Masara o Akisi ai nyawa abe manga gogere hatoli ikokurutiye ona iwigurubungu manga koanoika ma titi o Dautu. Abe ona yotemo ato, “Boteua una naa o Dautu abe wodadi ai tonaka ma koano! Abe to una ai nyawa duru iwihigiriiri unangika manga dakoro ma demoka, de gea yonyanyi ato, ‘Nako o Saulu una wahohonenge nanga musu yasana, Masara o Dautu wahohonenge nanga musu yasana ngimoi yofoloi.’ Hokogea ai nyawa iwihigiriiri unangika ho koaho ufa hihigunoa womanoa ngoneoka!”

¹² De o Dautu woihene de wongano-nganono to ona manga demo gea ho duru wohawanoka. Abe una wato bote manga koano o Akisi wiao itorou unangika.

¹³ Ho o Dautu womaputuhu la woduru / wohiaka dika hoka iwitogohanga la ufa ona gea iwimodongo. Abe una ka ihikaika wakaragoho o ngorana ma dadatokika de womahigunoa la ai kibiri itobauihi ai uruoka de auku ai gumiuku.

¹⁴ De o Dautu wohiaka hokogea hatoli ai dekana ho ma bahauku de ma koano wataere ai nyawaika wato, “Duru itararonoka abe una naa iwitogohanga dika! Ho done ma titi o kia hiadono ngini niwimodongo de niwiao to ngohi ahi himangino?

¹⁵ Abe ngone nanga hidogoronaka naa de o nyawa abe yatogohangoka bote inawedonoka, eko sarakia? Ho ibootohi ngini niwiao una naa ahi himangino!”