1 Samuele 19 - Ma Jou ai Demo-demo o Totobelohoka

O Saulu ai hidee moioli la o Dautu witoma

¹ De o Saulu wahigaro ai nyawaika, abe duru ai datekoka iwileleani, la kiani yolingiri ma ngekomo la ka idadi o Dautu iwitoma. De ka hiadono ai ngofaka o Yonatanika unangoo wihigaro hokogea masara o Yonatana duru woigo la o Dautu widuhunu dika angamoi duru yomaketedodiawo ma gou-goungu.

² Ho naa o Yonatana wihingahu o Dautika abe ai baba wihidee itorou de wihitiari wato, “Itebini duru o ngorumino de kiani ngona nomagogono o ngioka gea abe o nyawa utu ko ihiorikua nanga kota ma hoanoka.

³ De ngohi ahao tibehehongo o babaika la wohiniiki la ngomioo mitagi-tagi o tonaka ma hoanoka abe ngona nomagogono genangoka. De ma oraha o baba de ngohi mimakiniiki mitagi-tagi ma hoanoka gea de ngohi ahao tonidemo unangika la ka idadi ai demo mata-mataino tamake ai hininga ma gou-goungu ngonaika. De ai demo ma titi abe tamakeoka ahao tonihingahu mata-mata.” Hokogea o Yonatana ai duduhunu ma hidee wihingahu o Dautika.

⁴ Ho ma dawangeino o Saulu de o Yonatana yaika de o Dautu duru o Yonatana widemo ai babaika hiadono wihingahu ai babaika ma owa ma ngoe abe wamakeoka o Dautu ai wowango ma datorino. Una woigo wihitaana ko iwa to Dautu ai wowangoka abe o nyawa ka idadi yapake la iwihidee itorou, wato, “Baba, duru togahoko la ufa nahowono o Dautika. Una ko ma moiuahi wodiai ngonaika abe ka idadi inihihuha. De igoungu ma kawalimi dika wodiai abe ngaro o kia dika ani perelu naga de woigo la woniduhunu.

⁵ Ma sarakia marai ko nawohangua abe ma oraha ai wowango womahidoaka la witoma o Filistina manga tentara o Goliata abe una duru wolamo-amoko de duru woputurungu gea? Abe ma oraha gea Ma Jou o Yawe duru wipake la wonahidoaka ngone o Isiraele ma nyawaika o lolaku kohaamoko. Ngona duru nososanangi ma oraha namake ai duduhunu ngonaika gea. Baba, kiani tonileha de ma titi unangoka o kia hiadono ka idadi ngona nato nitoma o nauru hoka o Dautu abe ko ma moiuahi wahowono ngonaika? Duru ko iwa ma titi unangoka ka hiadono itiai naga ani hidee itorou unangika!” Hokogea o Yonatana widemo ai geri.

⁶ De o Saulu wihigihene o Yonatanika de wihibehehongo wato, “Ngohi naa tonihibehehongo de ahi behehongo ma demo duru igoungu angamoi tomahikoboto de tapake Ma Jou o Yawe ai romanga, ho duru imaketero hoka Ma Jou igoungu wowango, to ngohi ahi behehongo ma demo nenanga enangoo duru ma gou-goungu. De ngohi naa tonihibehehongo abe o Dautu ahao ko iwitomauali.” Hokogea yomakoketemo ibooto de o Saulu wolio.

⁷ De ahao o Yonatana wiahoko o Dautika de manga demo gea wihingahu unangika. De ahao o Dautu wingotaka ai baba ai himangino ho mata-mata idadiokali imaketero hoka ma dodihirali ho o Dautu wileleanioli ai koano o Saulu ai tauoka.

⁸ De ipaha de ahao ona de o Filistina ma nyawa ka yomaketeparangiokali de o Dautu ai tentara wahihira-hira la yaparangioli o Filistina ma tentaraika. De una wohiaturu la yangika duru de manga bobuturungu hiadono manga musu manga houohi yokokiloara.

⁹ Masara o futu moiuku o Saulu wogogeruku ai tau ma goronaka de ai kuama naga ai giamoka de o tokata ma dorou Ma Jou o Yaweino iwibarenoli de duru iwihikangela ma oraha o Dautu wilaru ai koano abe ai totabua waragoho.

¹⁰ De itodokanino de o Saulu wohitailoli wituduku o Dautika abe ai hiningaka la wato witoma. Masara o Dautu woditokoli ma kuama gea de woara wohupu ma fufutuika. Ho o Saulu ka wingofuoli de ai kuama ka yodubuku ka ma dadaduhika dika o koano ai tau ma goronaka.

O Dautu iwihidee iwitoma masara o ngo Mikala miduhunu la woara

¹¹ De ahao o Saulu ai tentara yamuruono naga wahidingoto o Dautu ai tauika la iwigoana de wahuloko onangika la o ngorumino ka de o Dautu wohupu ai tauino de kiani iwitoma. Masara o ngo Mikala, o Dautu ngoi fekata, mihitiari mato, “Ahi rokata kiani duru o futu naa dika de noara abe nako hiadono itebinoka de ngona nohonengokau.” Hokogea mihingahu.

¹² De ahao muna o futu ma goronaka de o Dautu mihidihiara manga tau ma jendelaino la wouti dau o tau ma poretuku ho hiadono una womadaene woara.

¹³ O Dautu woaroka de ahao o ngo Mikala maleino o pangao ma rupa hoka o nyawa abe o nyawa yohapa o gotaino de gea makelenga manga koioka de naga o babangini o kabingi ma kaiino abe ma gogo ka ingodumohi ma poretoka de gea mohiaturu o pangao ma peaka la nako o nyawa yamake de yofikiri o Dautu ai tadauru. De ahao mata-mata motamunu de o ngoere muruono naga ma biri-birini.

¹⁴ De ma oraha o tentara manga tauino yowohama la o Dautu iwitaoko de muna mahingahu onangika abe ami rokata iwigogama de ko idadiua womomiki.

¹⁵ Hokogea ahao o tentara iwihingahu manga koanoika de una wahuloko onangika, wato, “Nako gea niwihidataoino ka ma moi de ai koi la ka idadi ngohi titoma ai giooko ma goronaka ai koioka.” Hokogea wahuloko ho yomataiti o Dautu ai tauika yogilio.

¹⁶ Masara ma oraha ato iwigoraka de yamake ma rupa gea ko o nyawaua masara ma pangao dika de ma tadauru gea o kabingi ma gogo dika.

¹⁷ De ahao o Saulu womibehehongo ngoi oraika o ngo Mikala ho moboa ai himangino de womileha de ai ngamo, wato, “Adodoa ho nohibudi de nihigunoa la hiadono ahi musu gea woara?” De muna mopaluhu mato, “Una wato kiani hokogea done ngohioo tohonenge.” Hokogea de ka wominoaika dika muna molio.

Ma Jou wohikawalimi o Saulu ai hidee de wihidadiokali to Una ai uru ma dodofanga

¹⁸ Ho o Dautu woara de woiki o Rama ma kotaika la witutumu o Samuele de wiade-ade unangika mata-mata abe o Saulu wodiaioka unangika. Hokogea o Dautu womahingahu ibooto de ahao o Samuele o Dautu wiao ai kota ma honongaika abe ihiromanga o Naioto de genangoka ona yahinooto yogogere.

¹⁹ De ma oraha ahao adono o hingahu iboa o Saulino abe o Dautu naga o Naiotoka abe o Rama ma kota ma dobikoka.

²⁰ Ho o Saulu ai tentara o doomu moi wahidingoto genangika la iwitaoko o Dautu. Masara yomahiadono de ko yomadaenuahi o Dautu iwitaoko de yamake Ma Jou ai uru ma dodofanga o doomu moi de ona o Samuele wahihira abe Ma Jou ai Demo-demo ma hitararono ihidemo. De ahao Ma Jou o Womaha o tentara ma nau-naurikaoo wahawo hiadono onangoo Ma Jou ai Demo-demo ma hitararono ihidemo.

²¹ De o Saulu ai nyawa utu naga genangoka yamake abe idadioka gea de yomataiti yoiki iwihingahu o abari gea o Saulika. Ho ahao ai tentara ma doomu moioli wahidingoto de idadi onangika imaketero hoka ai tentara ihira-hirali abe Ma Jou ai Demo-demo ma hitararono ka ihidemo onangoo. Ho ai tentara yamuruono naga wahidingotoli masara imaketero dika idadiokali ho naa ma hangeou ai tentaraoo Ma Jou ai Demo-demo ma hitararono ihidemo hoka Ma Jou ai uru ma dodofanga onangoo ihidemo.

²² Ho ma bahaika o Saulu una ma hirete wosoboka woiki o Ramaika de womahiadonika de naga o humu moi ma amoko genangoka ma romanga o Seku. De genangoka wahuloko o nyawaika, wato, “Nohihingahuohi o kiaka ka idadi tamake o Samuele de o Dautu.” De ona yopaluhu ato, “Ona naga o Naiotoka o Rama ma kota ma goronaka doka.” Hokogea woihene de wosobokali.

²³ Masara o Saulu una ai dodagi ma goronaka de Ma Jou o Womaha de ai kuaha unangoo wihawo hiadono unangoo womulaenge wohidemo Ma Jou ai Demo-demo ma hitararono ka hiadono wowohama o Naioto ma goronaika.

²⁴ De genangoka o Saulu womahuputu ai baju mata-mata de wogila-gilahi wohidemo Ma Jou ai Demo-demo ma hitararono o Samuele ai himangoka ka hiadono iwihidufutuoka. De o Saulu womaiduiha o tonakoka de ko womatogu-togumua wohidemo Ma Jou ai Demo-demo ka hiadono iwihidetebiniye. De ahao mangale ma titi o Saulu ai datoro gea hiadono o demo ma dulu moioli o nyawa yodiai abe yomakokeleha ato, “Done o Saulu unangoo wodadioka Ma Jou ai uru ma dodofanga womatengo?”