1 Peturusu 5 - Ma Jou ai Demo-demo o Totobelohoka

O Peturusu ai behehongo o gareja ma hihiraika

¹ De naa ahi higaro ma demo naga abe ma dumutu ngini o gareja ma hihiraika. De nako ngohi naa, ngohioo o gareja ma hihira abe imaketero hoka nginioli. De ngohi naa ma hirete ma dodihiraino de tamake de ahi lako hinooto abe ma titi o Kristusu ai kangela ma ngoe iwidaene, ho ngohioo ai kangela gea tahingahu-ngahu o nyawaika abe hoka nginioli niahingahu-ngahu o nyawaika. De ngohioo ahao wohihidoaka ngohino to Una ai medebini ma dararono abe ma oraha womahimatokoli, de gea ko itedekanokaua abe Una womahimatokoli. Ho ngini de ngohi imaketero nanga tagongo de nanga gogere abe Ma Jou wonahidoaka ngoneino.

² Ho naa ngohi tinihigaro ngini o gareja ma hihiraika la ngini niagoana de niapaliara Ma Jou ai nyawa abe naga nia doomuoka. Abe onangika niao imaketero abe hoka ngini o domba ma gogoana de ona gea yodadi nia domba ma duduono. De abe niatobahiaturu onangika, gea nia tagongo ufa niaetongo niato o hiribuutuino hiadono gea ngini nidiai, masara koaho ngini nia hiningaka de duru niomagawe nia tagongika gea. Angamoi nako naga nia hininga ma magawe enangika, gea nianiiki Ma Jou ai mau nginika. De ufa nia tagongo nidiai ma titi nia gaji ma tiwi niohafini genangino, masara koaho gea nidiai angamoi doka nia hiningaka de nimatemo niato, “Ngohi naa duru toigo la tileleani dika Ma Jouika.”

³ De abe niahitobahihira-hira nia gogianongoruika abe ona Ma Jou winihitagongoka nginika, de gea ufa nimagorakiye ngini ma hirete la niahidadi ona nia lou ma dodoko. Masara koaho nia tagongo gea niao itiai Ma Jou ai himangoka abe de nia hininga ma dodipokouku. La gea ahao o nyawa utuoli nia doomuino ka idadi yoigo yomaaduru abe hoka nginioli ma titi nia tagongo niao duru irahai.

⁴ De nako nia tagongo gea niao itiai, ahao ngini niamake ma hiowa moi duru kohaamoko o Kristusino. De Una ka idadi tihiromanga Unangika tato Una gea to ngone nanga domba ma gogoana abe ngaro ma gogoana mata-mataika masara ka Unangohi abe duru wokurutiye. De dokengika abe ma oraha Una womahimatokokali de ahao wonahikokodoku to Una ai medebini ma dararono ngone homoi-homoiino abe hagoana itiai to Una ai domba, abe ma titi to Una ai nyawa ngone hagoana. Abe ai dararono gea ena idadi nanga karajaangino ma hofoko. De ai medebini ma dararono gea ngoneoka duru ko ihihangua masara itobatongohono ka hiado-adonika ngoneoka. De gea ma titi hiadono ngohi tinihigaro nginika la niagoana de niapaliara itiai Ma Jou ai nyawa nia doomu homoi-homoioka.

O Peturusu ai behehongo o gareja ma nyawa mata-mataika

⁵ De ahi higaro moiohi naga, de naa ahi demo tohidumutu nginika abe hatoli ka o goohi. Ho naa tinihibehehongo nginika la niahigihene o gareja ma hihiraika. De ufa ka o goo-goo dika, masara ngini mata-mata kiani nimahinoauku de o hininga ma dodipokouku de hokogea nimaketeleleani nia gogianongoruoka. Angamoi o nyawa yomahitipokouku, ona gea Ma Jou wasanangi onangika. De gea kiani nimahitipokouku angamoi imakiniiki de Ma Jou ai Demo-demoka naa abe ma dodihiraino de ihitulihukuoka ato, “Ma Jou walawana o nyawaika abe yomasadeoka, masara nako o nyawa yomahitipokouku manga hiningaka, onangika gea wahidoaka ai hininga ma owa.” Hokogea itemo ma dodihiraino.

⁶ Ho gea ngini kiani nimahitipokouku Ma Jou ai himangoka abe to Una ai kuaha duru kohaamoko. De nako nimahitipokouku hokogea, ahao Una winigorakiye la hiadono inihoromati abe nako ma oraha adonoka.

⁷ De naa moioli ahi behehongo nginika. Abe nako naga nia hininga ma huha, gea mata-mata niwihidoaka Ma Jouika de nia niniatino la ibootohi nia huha niongano-nganono. Abe ngini ka idadi nimaniata la ahao Una winipaluhu wato, “Ngaro ufa nia hininga ma huha angamoi Ngohi ka ihikaika tolega-lega nia wowangoika.” De hokogea Una ka idadi winihigaro nginika.

⁸ De nagali ahi huhuloko abe kiani nihidodiai nimatongohono o dorouino de nimagoana. Angamoi ti ngini nia musu o Ibilihi ma haeke, ena gea itobatagi-tagi aika aino de yalingiri o nyawa la ato yahirehene ona Ma Jouoka de aino. De gea yahirehene la ahao ona yoruba o howonuku. De gea tohiketero tato ena hoka o fuhuku ma boki ma romanga o singa, abe ena gea itobalingiri o aewani la imadoma de to ena ma roehe akakihi de yaolomo. Ho ngini kiani nimagoana done ena gea inihiruba de ihirusaka ti ngini nia ngongakuino.

⁹ De ngini kiani nibitumoka nia boringongakuoka angamoi genangino de ngini kiani nialawana o Ibilihi ma haekika gea. De ufa niafikiri niato ka ngini dika abe ena gea inihikangela, angamoi hohiorikoka abe nia gogianongoru mata-mataika o dunia ma amokika, onangoo o kangela yaohana abe imaketero hoka nginioli naa niaohana.

¹⁰ De moiohi ahi huhuloko nginika, la ngini naa ufa niafikiri abe inihikangela ma dekana, angamoi nia kangela gea tanu ka jai-jai dika de ipahaka. De gea ipahaka de ahao Ma Jou Una ma hirete winihitogumu nia kangelaino de winihiputurungu nia ngongakuoka. De gea Unangoo winihitongohono la ka nimatongohono ma dorouino de winihibitumu la duru ko nihelorua nia ngongakuoka de aino. Ho ahi gogianongoru, naa tinihigaro abe nia kangela gea tanu ka jai-jai dika de ipahaka. De ufa ngini niawohanga abe Ma Jou ai hininga duru aomanga de ma owa de ma rorahai. Abe Una gea o hiowa mata-mataika ma titi imanoa ka Unangoka dika. De Unangoka naga ai hidee duru ma hohailoa abe winihideeoka nginika. Abe igoungu ngini nidadioka moi de o Yesusu Kristusu, masara hongoli naga ai hidee la ika-ika de o Kristusu winihikodoku de winihidoaka to Una ai medebini ma dararono nginika. De ai medebini ma dararono gea abe ngini ahao niamake Unangoka de aino, ena gea duru itongohono ka hiado-adonika. Ho Una winiahoko ngini la ka idadi niamake ma utumu mata-mata ai hideeoka de aino, abe Una winiahoko ngini wato, “Niaino la nimamake ahi hiowa ma utumu abe Ngohi toigo tinihikodoku nginika!”

¹¹ Ho ngone naa duru itiai abe hihigiriiri Unangika naa de ka hiado-adonika. De hokogea duru igoungu. Amin.

O Peturusu wohibobaha ai hurata naa

¹² De ahi hurata ma dodipoko naa tohitulihuku de naga o Silasa ahi datekoka wohiduhunu. De nako o Silasa una gea tifetongo unangika tato ahi gianongoru abe duru watobagou-goungu ai ngongakuino. Ho ahi hurata naa tohidingoto nginika la tato tinihigaro la utuohi nia ngongaku iputurungu nia hiningaka Unangika. De naa duru tagou-goungu tinihingahu abe ahi hurata ma demo mata-mataino de duru inihimatoko igou-goungu nginika ma titi Ma Jou ai hininga ma owa ngoneuku. Ho ngini ka idadi nimahingutukuku to Una ai hininga ma owaka la ufa nikelu-kelu genangoka de aino. De gea ma titi hiadono ahi demo naa tinihurata nginika.

¹³ De naa nanga gogianongoru o ngongakuoka abe ona yomatoo-toomuino o Roma ma kotaka naa, ona gea mata-mata manga tabea ihidingoto nginika. De ngaro ngone nenangoka eko ngaro ngini, masara ngone mata-mata hodadi to Una ai nyawa duru ma hohailoa, ho onangoo ihidingoto manga tabea nginika. De naa ahi ngofaka o ngongakuoka o Maruku, unangoo ai tabea wohidingoto nginika.

¹⁴ De ma oraha nimatoomuino de ka idadi ngini nimakobounu abe hoka nia biaha la gea nimahikamatoko de nihitunguu abe ti ngini nia dora o Kristusoka. De naa ngohi tinigahoko Unangiye la ahao to Una ai hininga ma miriidi winihidoaka ngini mata-mataika angamoi ngini nimanoa o Kristusoka.