1 Peturusu 2 - Ma Jou ai Demo-demo o Totobelohoka

¹ Ho mangale ma titi abe ti ngini nia wowango nagau ma hungi ho kiani niatingakika nia datoro ma dorou abe nia wowango ma dodihiraka de aino iboa. De ngini ufa nimakao itorou, de ufa nimakokubudi, de ufa nimadokangelukino, de ufa nimaketetaleana, de ufa nimahiketehikangela abe nia gogianongoru manga roma-romanga niawea-weara. De gea mata-mata niatingakika nginioka de aino la ka niakunu nioaguru nia wowango ma hungika.

² De abeika hafikirohi hoka o ngofaka ma gilau abe ona ka ihikaika yoigo yohuhu. Ho ngohi tato irahai nako ngini nimaketero hoka o ngofaka gea. Angamoi ngini naga nia wowango ma hungi ho nginioo niperelu la nibaluhiye. De gea imaketero hoka o ngofaka ma gilau ona yoohafini yohuhu la yobaluhiye, hokogenangoo de ngini tanu kiani ka ihikaika duru niohafini Ma Jou ai Demo-demoika la nginioo nibaluhiye. De angamoi ai Demo-demo, gea ena nanga inomo idodutu abe gea ena ma gou-goungu ireeika, de genangino de ngone ka idadi hobaluhu nanga ngongakuika la hiadono ngone duru hobaluhoka Unangoka. De hobaluhoka de ahao nanga utumu mata-mata ingodu-ngodumu ngoneoka.

³ Ho mangale ngini niamaoka ma hohutulu Ma Jou ai Demo-demoino de genangino de nihioriki abe nanga Baluhu idodutu ai hininga duru ma rorahai, ho koaho duru niohafini ai Demo-demoika la utuohi idogo nia tobahioriki Unangika de utuohi nibaluhu Unangika.

O Peturusu wonahiketero ngone hoka Ma Jou ai Tau ma kiahonanga

^4-5 De naa ngohi tinihigaro nginika la nimahitigi o Kristusika ka hiadono nimahidutuku Unangika. De gea tonahiketero abe ngone hingaku-ngakuoka ngone naa hodadi hoka o tau ma kiahonanga abe Ma Jou wonapake ma oraha womaatau abe to Una ma hirete ai Tau. De gea ma titi to Una ai hininga la ngone de Una hodadioka hoka o tau ma debi-debini moi la nanga borigogao Unangika duru ikekete abe imaketero hoka o tau ma dadaduhu duru ikekete ma dudukurika. Ho nako Ma Jou ai Tauoka de gea tato o Kristusu Una gea hoka ma tau ma lifunu abe duru ihira yakelengauku dau ma tonakuku. De igoungu o nyawa utu iwiolukoka Unangika masara nako Ma Jou, Una gea duru wisanangi de widora o Kristusika ho hiadono wiiriki la wihidadi Una ai tau ma lifunu abe ka Unangohi de ma titioka. De abe ngohi tihiromanga o Kristusika tato Una o tau ma lifunu, gea ko ma titiua abe Una ko wowangoua hoka o hakaru enangoo ko iwangoua, masara Una gea duru wotobawango. De ngini naa abe nimahitigi Unangika, nginioli tinihiketero abe hoka o tau ma kiahonanga nitobawango. De gea Ma Jou woigo winipake ai Tauoka. De hokogea tinihiketero abe ma oraha Ma Jou womaatau de winihikodofanga ngini la ngone mata-mata homahikeketoka nanga gogao Una de ngone to Una ai Tauoka. De gea ngini nidadioka ai Tau ma kiahonanga ho Una ma hirete womanoa ti ngini nia hidogoronaka. De tanu o hiketero moioli ka idadi todiai, abe ngini tinihiketero hoka o hidemo ma nyawali abe duru nitebi-tebini Ma Jouika. Angamoi ngini imaketero hoka o hidemo abe ona ka ihikaika yomahihuba Ma Jouiye abe ai Tauoka, ho nginioo ka ihikaika nimahihuba Unangiye. Masara nako ti ngini nia huhuba gea ko imakadaenua de hoka o hidemo utuoli to ona manga huhuba, angamoi ti ngini nia huhuba gea nia higiriiri de nia hingounu Ma Jouika. De nia huhuba gea mata-mata ihititi o Yesusu Kristusino, ho nia huhuba duru iwihisanangi Ma Jouika. De hokogea ngini ka idadi niwileleani Unangika. Ho igoungu abe ngini niwingaku Unangika, ngini nidadioka hoka to Una ai Tau ma kiahonanga, de nagali nidadioka hoka ai hidemo ma nyawa abe ka ihikaika nimahuba-huba Unangika.

⁶ De abeika nanga utumu duru ma hohailoa gea abe hodadioka to Una ma hirete ai nyawa ho hodadioka hoka to Una ma hirete ai Tau ma kiahonanga. De gea duru imakiniiki de Ma Jou ai Demo-demo moi abe genangino de Ma Jou wonahingahu hokokia ai Tau wodiai. Angamoi ma dodihiraino ihitulihukuoka abe to Ma Jou ai demo ihidumutu o Kristusika. De gea wotemo wato, “Abeika nimafikirohi ahi demo naa. Naga womatengo Ngohi tiirikoka abe Una duru wokurutiye de iwihoromati. De Una gea tihigogere o Yerusaleeme ma kotaka la Una wodadi hoka ahi tau ma lifunu abe duru ihira yakelengauku dau ma tonakuku. De onagona dika abe iwingaku Unangika, ona gea ahao duru ko yahimalekua ma titi Una.” Hokogea itemo ma dodihiraino, de gea igoungu abe onagona dika iwingaku Unangika de manga hininga duru ko ietekua angamoi ahao Ma Jou wahidoaka onangika ma utumu mata-mata abe ma dihirainohi de wahibehehongoka ai nyawaika.

⁷ Ho duru igoungu abe ngini ahao niamake ma utumu duru ma hohailoa gea Unangoka de aino. Masara naga moioli Ma Jou ai Demo-demoka abe inahingahu ngoneino ma titi to ona manga hininga abe ona gea ko iwingakua o Kristusika. De gea itemo ato, “Naga moi o hakaru aolukoka abe ona o tau yotobadodiai, de ngaro ma hakaru gea ena aolukoka masara ahao idadioka o tau ma lifunu abe duru ihira yakelengauku dau ma tonakuku.”

⁸ De naga moiohi ai Demo-demoino abe imakiniiki de itemo ato, “Una gea hoka o hakaru abe idadioka o bebeleke o nyawaika de genangino de ahao ona yorubauku.” Hokogea ma dodihiraino ihitulihukuoka. De genangino inahitararono abe ma titi o nyawa manga hohowono nako ona ko yangakua Ma Jou ai Demo-demoika abe ma titi o Kristusu. Angamoi naga ma hitararono Ma Jou ai Demo-demoka abe inahitararono ma titi o Yesusu Kristusu Una gea Ma Jouoka de waino woboa. Ho onagona dika abe yoluku yangaku ai Demoika gea abe ma titi o Yesusu Kristusu, ona gea imaketero hoka Unangika iwipeleke de yorubauku hiadono manga hingounu ko iwa Ma Jouika. De ona gea ahao kiani manga hohowono yamake abe imaketero hoka ma dodihirainohi Ma Jou wahideeoka onangika. Angamoi gea Una wato nako onagona dika ko yangakua ai Demoika, ona gea ma bahauku de ahao manga hohowono kiani yakokimake.

⁹ Masara nako ngini hokogenangua. Angamoi ngini naa nidadioka to Una ma hirete ai nyawa duru ma hohailoa. De nidadioo o hidemo ma nyawa abe niwitobaleleani nanga Koano Ma Jouika. De ngini o doomu moi abe nitebi-tebini angamoi Una womadingakino ngini la nidadi to Una ai nyawa. De gea ngini nidadioka to Una ai nyawa la Ma Jou ai hininga ma datoro ma hohailoa ngini niahingahu-ngahu o nyawaika. De ngini duru nihiorikoka ai datoro ma hohailoa gea, angamoi Una nengokadauino de winihihupuoka o fufutu ma kuahaka de aino de winihigogeroli to Una ai dararonoka abe duru ihohailoaholi. Ho to Una ai datoro gea abe ngini kiani niahingahu-ngahu o nyawa-nyawaika.

¹⁰ De igoungu ma dihiraino de ngini ko nidadiuahi to Ma Jou ai nyawa, masara nako ma oraha naa de to Una ai nyawa nidadioka. De ma dihiraino de ngini ko niamakeua Ma Jou ai hininga ma dora, masara ma oraha naa naga de ngini duru niamaoka. Ho mangale ma titi ngini nidadioka to Una ai nyawa ho hiadono ka idadi tinihigaro tato ngini koaho niahimatoko o nyawa utuika to Una ai datoro ma hohailoa gea abe wodiaioka.

O Peturusu wahitiari la ona yowango itiai angamoi ma oraha naa yomanoa hoka o homoa ma nyawa dika o duniaka naa

¹¹ Ahi gogianongoru abe duru tinidora nginika, ngini tanu nimaketero hoka o homoa ma nyawa de gea ngini o dionikino ma nyawa o duniaka naa angamoi nia gogere ma gou-goungu gea nagau o Horogaka. Ho gea ngohi tinihigaro nginika la ka ihikaika nimatongohono de ufa nianiiki nia badanga ma horoodo ma dorouika. Abe nia horoodo gea imakalawana de ti ngini nia hininga abe Ma Jouoka de aino iboa.

¹² De kiani nihidodiai la ti ngini nia wowango niao itiai o nyawa manga hima-himangoka abe ona ko iwihiorikuahi Ma Jouika. Angamoi nako niwango nitotiai de o nyawa utu ka initaeohi nginika ato niahowono, de gea ahao o nyawa ka idadi inimake nia datoro ma totiai, de genangino inihioriki ma titi nia hininga ma rorahai. De gea ma bahauku de marai ona utu ahao iwihigiriiri Ma Jouika abe ma titi yomafikiroka ti ngini nia wowango ma datoro de genangino ma titi hiadono ona iwingaku Unangika. Ho mangale ma titi ngini niwango nitotiai de marai ngone hingaku-ngaku utuohi howoe abe ma oraha Ma Jou woboali la wonatailako ngone homoi-homoiino.

O Peturusu wonahitiari wato ngone kiani naga nanga hingounu o popareta ma nyawaika

¹³ De naa moioli tinihibehehongo nginika la nia datoro imakiniiki de Ma Jou ai mau nginika. De gea tinihibehehongo la ngini niahigihene o popareta ma nyawa mata-mataika. Abe ngaro ma koanoika abe ka unangohi ai kuaha ikurutiye o poparetaka,

¹⁴ eko abe naga utuoli o popareta ma nyawa abe ma koano wahigogere to ona manga kuaha ma gogeroka, masara ona mata-mata kiani ngini niahigihene onangika. Angamoi to ona manga tagongo naga la o nyawaika yahohowono abe ona yotobadiai ma dorou manga wowangoka. Masara nako o nyawa utuoli abe ma rorahai dika yotobadiai, ona gea ahao yamake o higiriiri o poparetaka de aino. De hokogea ma titi hiadono Ma Jou wahigogere o nyawa la yodadi o popareta ma nyawa, ho ngini kiani niahigihene onangika.

¹⁵ De duru hokogea to Ma Jou ai mau nginika, la ma rorahai dika nitobadiai nia wowangoka, la genangino de o nyawa ko idadiua initae de inihitaana manga demoino. De igoungu naga utu o nyawa initae-tae nginika, masara ona gea manga tobahioriki tanu ko kia-kiaua. Angamoi nako ngini ma rorahai dika nitobadiai, gea done sarakia de o nyawa ka idadi initae de inihitaana nginika?

¹⁶ De abe ahi demo kangano nginika tato kiani niahigihene o poparetaika, gea ufa niataoko ihowono ahi demoino. Angamoi ko ahi hiningaua la ngini nidadi o gogilaongo o popareta ma nyawaika. Hokogenangua ahi hininga ma dumutu, masara tanu tinihigaro nginika la ufa nimahidadi o nyawa utu manga gogilaongo, ma koaho nidadi to Ma Jou dika ai gogilaongo. Abe ma titi ngini ka idadi nimangiriki la ma rorahai dika nitobadiai nia boriwowangoka, ho ngaro ufa dika de ma dorou nimangiriki la nianiiki enangika.

¹⁷ Ho nako ngini niwango hoka Ma Jou dika ai gogilaongo, gea kiani nia wowango hokonaa. Abe ngini kiani naga nia horomati o nyawa mata-mataika, De kiani nimakodora nia gogianongoru o ngongakuoka, De kiani nia horomati naga duru kohaamoko Ma Jouika, De ngaro ma kokoano o duniaka masara kiani onangikaoo niahoromati.

Abe ma titi ufa homahibalaha ma koaho homaaduru abe hoka o Kristusoli ai hininga

¹⁸ De naa ngohi tinihioriki abe ngini utu nidadioka o gogilaongo ma nyawa abe nikarajaanga o kia dika abe nia dutu inihuloko nginika. Ho ngohi tinihibehehongo ngini o gogilaongika hokonaa. Abe ngini kiani niahigihene nia dutu o duniaka naa, de abe ma titi ti ngini nia higihene, gea kiani de nia horomati ma gahumu onangika. De gea ufa niahigihene abe ka onangika dika manga hininga ma rorahai de abe iniao de manga hininga ma mobole nginika. Masara ngaro nia dutu abe iniao ko itiaiua, ma kiani onangikaoo niahigihene.

¹⁹ De abeika hafikirohi nako hoka idadi nginioka abe nia dutu inihikangela ngaro ngini ka niahingounu dika onangika de nia hininga ma rorahaiino. De nako hokogea ahao idadi, ngini hokokia? Marai nia hininga ihuha, e? Masara naa ngohi tinihigaro tato nako hokogea idadi nginika de ngini ufa nimahibalaha ma nimatongohono dika nia ngongakuoka ma titi Ma Jou ai mau niongano-nganono, de gea ahao Ma Jou winidosanangi nginika.

²⁰ Masara nako hoka ngini niahowonoka de genangino ma titi hiadono inihikangela de inipoha-poha nginika, gea imakohowono. Angamoi ngaro nia kangela ma goronaka de nimatongohono, masara genangino ma utumu ko niamakeua, angamoi nia kangela gea tanu nia howonoka de aino iboa. Masara nako ngini abe ma rorahai dika nitobadiai de ka inihikangelahi nginika, de genangino de ahao niamake nia utumu Ma Jouino, iti nimatongohono nia kangela ma goronaka.

²¹ De abe ma titi nia kangelaino de nimatongohono, gea duru imakiniiki de Ma Jou ai hininga ma dumutu nginika. Angamoi ma dihiraino de o Kristusoo womatongohono abe ma oraha iwihikangela Unangika, de gea ka hiadono ngini niamake ma utumu genangino. Ho tanu Ma Jou ai mau la ngini nimaaduru abe hoka o Kristusoli ai hininga ma titi o kangelaino.

²² Abe nako o Kristusu, Una gea duru ko wahowonua, de moioo de ko iwa o ngeluku abe ai uruoka de aino ipaata.

²³ De ma oraha iwingelo Unangika masara Una ko womahibalahua de o ngelo ma demo ma dorou onangika. De ma oraha iwihikangela Unangika de Una ko wadoanua de ko wahibehehongua onangika wato, “Ahao Ngohi tomahibalaha nginika.” Hokogenangua ai hininga, masara wanoaika dika de womahidoaka dika Ma Jouika. Angamoi Una womatemo ai hiningaka wato, “Ngohi tihioriki abe ma oraha Una wonatailako nanga datoro homoi-homoi de gea ai putuhu duru itotiai.” Ho o Kristusu Una wohioriki abe ahao Ma Jou dika ma hirete wahohowono onangika abe iwihikangela Unangika, ho Una ko womahibalahua onangika.

²⁴ De o Kristusu Una ma hirete to ngone nanga howo-howono womahimoku ai badangika abe ma oraha iwihidapakuika o gotaka gea. De gea Una wohonenge ma titi nanga howono la wato nanga howonino gea ko inahiparetakauali ngone naa. Masara to Una ai hininga la wato ngone howango ka ma totiaioka dika. Ho gea ka idadi hotemo hato mangale ma titi to Una ai kangela kohaamoko ai badangino hiadono ngini winihitogumoka nia howo-howonino.

²⁵ Angamoi igoungu ngini ma dihiraino de nimakitingakoka Ma Jouoka de aino. De gea ka idadi tinihiketero hoka o domba o duduono moi abe nirehenoka nia dodagioka de aino. Masara naa inihiboakali ti ngini nia Gogoanika, abe o Kristusu Una gea winitobagoana de winitobapaliara ti ngini nia hininga homoi-homoiika. Ho irahai nako nginioo ma oraha inihikangela nginika de nimaaduru hoka o Kristusoli la ko iwa nia hibalaha ma dorou o nyawaika.