1 Peturusu 1 - Ma Jou ai Demo-demo o Totobelohoka

O Peturusu ai demo ihira-hira ai gogianongoruika

¹ Ahi gogianongoru abe ngini nidadioka Ma Jou ai nyawa. Ngohi naa o Peturusu to Yesusu Kristusu ai hidingoto ma nyawa, abe Una wohihidingoto ngohi la to Una ai abari tahingahu-ngahu o nyawaika. De naa ngohi tinihurata nginika abe ngini o dionikino ma nyawa abe nimahikokabarihika o tonaka utuika. Abe ngini naga utu nimanoa o Pontusu ma tonakoka, de naga utuoli o Galatia ma tonakoka nimanoa, de utuoli o Kapadokia ma tonakoka nimanoa, de utuoli o Asia ma tonakoka nimanoa, de abe ngini utuoli o Bitinia ma tonakoka nimanoa. De ngohi tinihioriki abe ngini homoi-homoi nimanoa, gea imaketero hoka o dionikino ma nyawa dika nimanoa nia ngi homoi-homoiika.

² De ngini naa duru ma dodihiraka de Ma Jou o Baba winihiorikokau abe ngini ahao nidadi to Una ai nyawa duru ma hohailoa. De ipahaino de idadi hokogea, abe Ma Jou o Womaha winitingaka ngini o nyawa manga hidogoronaka de aino. De abe Una winitingaka ngini, gea to Una ai hininga ma dumutu la ngini duru niwihingounu Unangika. De ufa ngini niawohanga abe o Yesusu Kristusu womahidoaka la ai awunino de ngini ka idadi niwiniiki de niwihingounu Unangika. De hokogea Ma Jou winiao nginika ma titi ma dodihirakahi de ngini winihiorikokau abe ahao nidadi to Una ai nyawa duru ma hohailoa. De ngini naa to Una ai nyawa abe tinihurata nginika. De naa ngohi tinigahoko Unangiye la ahao to Una ai hininga ma owa de ai hininga ma miriidi gea duru ma amoko winihidoaka nginika.

O Peturusu wonahigaro la hihigiriiri de hitarimakase Ma Jouika ma titi ai hininga ma owa mata-mata ngoneuku abe o Yesusu Kristusu ai datorino

³ De ngone kiani hihigiriiri nanga Jouika, abe Una gea to nanga Baluhu idodutu o Yesusu Kristusu ai Jou de ai Babaoo, ho duru itiai abe ngone hihigiriiri Unangika. De gea kiani hihigiriiri ma titi to Una ai hininga ma dora kohaamoko ngoneuku. De mangale ma titi ai hininga ma dora gea hiadono ngone homaboali la nanga wowango ma hungi naga Unangoka de aino. De genangoo ma titi hiadono ngone kiani hihigiriiri nanga Jouika. De mangale ma titi o Yesusu Kristusu womomikoka ai honengino, ho hiadono to ngoneoo nanga nganganono duru ko ihihangua ka hiado-adonika, abe ma titi ngone duru hohioriki abe ahao ma oraha adonoka de ngone hamake nanga utumu Unangino. Abe ma oraha naa nanga utumu gea ko hamakeuahi ho ka hongano-nganonohi.

⁴ De nanga utumu ma hohailoa gea tohiromanga tato nanga oara, abe to ngone nanga oara gea duru itongohono ka hiado-adonika. Abe duru ko idadiua o kia dika naga de ihirusaka enangika, de duru ko idadiua ikorofu, de duru ko idadiua imaai. De nanga oara gea nagau o Horogaka de inadodamaa ho ma oraha ngone homahiadoniyeoka de ahao hodafongo Unangino. De gea ma titi moioli hiadono ngone kiani hihigiriiri Unangika!

⁵ De mangale ma titi naga nanga ngongaku Unangika ho ngone naa Ma Jou ka ihikaika wonagoana de wonadatoko ka hiadono ma oraha abe ngone hamakeoka nanga oara gea mata-mata abe imakiniiki de nanga wowango ka hiado-adonika. Ho gea wonagoana ma titi to Una ai kuaha kohaamokino ka hiadono dokengika abe ma oraha ma baha adonoka de ahao nanga utumu wonahimatoko de wonahidoaka ngoneino la ka idadi hamake Unangoka de aino. Ho kiani hihigiriiri Unangika!

⁶ De gea koaho ngini nigogarago ma titi nia utumu abe ahao niamake Unangino. De igoungu ma oraha naa de ngini ka niohimangohi o kangela ma ngoe abe inihikangela ti ngini nia hiningaka, masara tanu ka idadiohi ngini nigarago ma titi nia utumu dokengika.

⁷ De nia kangela gea naga de ma dumutu la ahao ma oraha nia baha adonoka de itararono abe nia ngongaku duru ireeika. Abe ma titi ngaro ma oraha naa de o kokangela nioborihimanga nia wowangoka, masara ko inihikalaua genangino. De nia dongohono gea inihitaana abe nia ngongaku duru ilaku nia hiningaka. De abe o kokangela yataili nia ngongakuika, gea ngade-ngade imaketero hoka o nyawa yataili o gurasi o ukuika. Angamoi ma bahauku abe ataili ipaha de duru itararono ma gurasi gea o gurasi dika ireeika. De hokogenangoo de ti ngini nia ngongaku abe o kangela ataili ipaha de itararono abe nia boringongaku ka ireeika dika de ko ikalaua. Masara nako o gurasi de ti ngini nia ngongaku, gea ka nia ngongakuohi abe duru ikurutiye Ma Jou ai himangoka. Abe nako o gurasi gea ika-ika de ahao ko iwaka ho ko itongohonua masara nako nia ngongaku hokogenangua, angamoi nia boringongaku gea itongohono ka hiado-adonika. De mangale ma titi nia ngongaku ireeika, gea ka idadi nihioriki abe nia utumu genangino ahao niamake ma oraha o Yesusu Kristusu womahimatokoli o dunia mata-mataika. De nia utumu gea naga o fara muruono ahao niamake. Abe naga moi, ahao inihigiriiri nginika, de nagaoo abe niamake ti ngini nia medebini ma dararono de nagali nia horomati abe niamake ma wangeoka gea. De nia utumu gea ma titi moioli hiadono koaho hihigiriiri Unangika.

⁸ De igoungu abe ma oraha naa de ngini ko niwimakeuahi de nia lako o Yesusu Kristusu angamoi ko womahimatokuahi. De masara abe ngaro ko ma moiuahi niwimake ma ngini niwidora Unangika. De ngini niwingakuoo Unangika ngaro ngini ko niwimakeuahi. De ngini naa ngaro ko niwimakeuahi Unangika masara ngini duru nimorene de nia gogarago kohaamoko, abe ka hiadono ngini ko niakunua nimahingahu abe hokokia ma amoko nia gogarago gea nia hiningaka.

⁹ De nia gogarago ma amoko gea ihititi nia ngongakuoka, angamoi nihioriki abe nia ngongakuino ma hibalaha gea nia utumu ma hohailoa mata-mata abe ahao niaborimake Unangoka de aino. De ngaro ma oraha naa naga masara nia utumu gea nimulaengoka niamake nia wowangoka, ho genangino hiadono ngini duru nigarago.

¹⁰ De abe ma titi ma utumu de ma owa gea abe Una duru wonahiowa ngoneino, Ma Jou ai uru ma dodofanga ma dodihiraino ona ikuranga yataoko itiai, masara ona duru yoigo ihioriki abe ma titi ena gea. De tanu ona gea abe Ma Jou wapake la yahingahuohi o nyawaika ma titi to Una ai hininga ma owa ngone o nyawauku, de manga tagongo gea yao duru itiai. Abe ngaro ko idadiuahi masara ona wadofangokau o nyawaika abe hokokia Ma Jou ai hidee la wonaduhunu nanga howo-howonino de ka hiadono nanga utumu duru ma hohailoa hamake Unangoka. De ai uru ma dodofanga, ona gea duru yomadotoko de yomaleha-leha la ato ka idadi utuohi ihioriki ma titi Ma Jou ai duduhunu ngoneino de abe ma utumu wonahidoaka ngoneuku, masara ma titi gea Ma Jou ko wahimatokuahi onangika.

¹¹ Angamoi ma dodihiraino gea de o Kristusu ai Womaha abe naga Ma Jou ai uru ma dodofangoka, Una gea wahitararonohi onangika abe ma titi ahao o Kristusu kiani iwihikangelahi de ipahaino ahao idadi ma utumu kohaamoko abe ai kokangelaino. Masara gea ko itararonuahi Ma Jou ai uru ma dodofangika abe ahao hokokia idadi eko muruonoka ahao idadi Ma Jou ai hidee gea, ma enangoo ma ko ihiorikua. Ho ona manga hiningaka de duru yomalingi-lingiri la utuohi ihioriki abe Ma Jou ai hininga ma owa ngoneuku.

¹² De ngaro ona tanu duru yoigo yamake ai hidee abe hokokia wonaduhunu nanga howonino masara gea Ma Jou wahitararono onangika abe ona ko yadaenua de yohonengoka. Ho gea ai uru ma dodofanga yohonengoka de ipahaino de ahao ai hidee idadi abe ma oraha ngoneuku naa, ho ngoneoli naa abe hadaene ai hidee. Abe naa ma duruika de ngini niihenoka ai hidee gea o Abari ma Rorahaiino la ka idadi niongaku enangika. De o Abari ma Rorahai gea o nyawa inihitobahingahu-ngahu nginika ma titi Ma Jou o Womaha ai kuahaino, abe Una o Horogaka de wauku woboa. Ho gea kiani niwihigiriiri Unangika! De Ma Jou ai hidee de ai hininga ma owa ngoneuku, ena gea duru ihohailoaholi hiadono ka Ma Jou ai uru ma dodofangua dika abe yoigo ihioriki, masara ngaro Ma Jou ai momalaekatoo, onangoo duru yoigo yamake la ihioriki ai hidee gea abe ngone naa hamakeoka. Abe ona yomakokeleha ato, “Bote hokokia ma ngekomo Ma Jou ahao wapake la waduhunu o nyawa gea manga howo-howonino? Marai ai ngekomo gea kiani duru ihohailoa!” Hokogea ona duru yoigo ihioriki, de abeika, ngone naa abe ka idadi hamake ai ngekomo gea. Ho ngoneoo abe hamake hokokia ma amoko Ma Jou ai hiowa ngoneuku abe wonaduhunu nanga howonino. Ho ngone naa kiani duru hihigiriiri nanga Jouika ma titi ai duduhunu ngoneino de abe nanga utumu wonahidoaka ai hininga ma owaka de aino.

O Peturusu wonahigaro la howango hotebi-tebini mangale ma titi hodadioka Ma Jou ai ngofa-ngofaka

¹³ Ho mangale ma titi Ma Jou ai hininga ma owa mata-mata gea ngoneuku, ho naa koaho ngini nimahidiaioka nia borihiningaka la nianii-niiki to Una ai mauika. Abe nia wowangoka o kia dika naga abe niohimanga masara gea ngini kiani nimatongohono dika la ufa nirehene Unangoka de aino. De ahao dokengika de ngini kiani niamake nia utumu Unangoka ma titi Ma Jou winihibehehongoka wato ahao winihidoaka nia utumu gea. Abe ma oraha o Yesusu Kristusu womahimatokoli de gea ahao ngini niamake nia utumu gea. Ho irahai ka ihikaika niongano-nganono abe nia utumu Ma Jou ai hininga ma owaino iboa, angamoi gea iniduhunu la niwango hokokia abe imakiniiki de to Una ai mau nginika.

¹⁴ De ngini kiani naga nia hingounu Ma Jouika angamoi ngini nidadioka to Una ai ngofa-ngofaka. Ho kiani niwihingounu Unangika de ufa nimahigunoa la nia hininga ma hafini ma dorou inihipareta nia wowangoka. Angamoi igoungu ngini ma dodihirainohi abe ma oraha ko kia-kiauahi nihioriki abe Ma Jou ai hininga, de ma oraha gea ka inihiparetahi nia hininga ma dorou.

¹⁵ Masara ma oraha naa de ngini kiani nia wowango ma datoro mata-mataika de nitebi-tebini genangino, la gea nimaaduru abe hoka to Unangoli ai hininga abe winiahokoka ngini Unangino.

¹⁶ De hokogea kiani niwango la nianiiki to Una ai demo abe ma dodihirainohi de ihitulihukuoka, abe Una wotemo wato, “Ngini kiani niwango nitebi-tebini angamoi Ngohioo naa totebi-tebini.” Hokogea to Ma Jou ai demo ma dodihiraino, ho ngone kiani homaribuutu la howango hotebi-tebini abe hoka itiai ai ngofa-ngofaka yowango.

¹⁷ De gea igoungu abe ngone hodadioka ai ngofa-ngofaka ho hiahoko Unangika hato nanga Baba. De abeika ngone naa honganonohi abe ma titi nanga Baba ai hininga abe Unangika gea ngini nimatobaniata. Abe ahao ma oraha nanga Baba watailako nanga boriwowango de gea duru ko wairikua o nyawa, masara nanga datoro homoi-homoi gea wohibalaha ngoneino duru itiai. Ho ngini koaho niwango hokokia o duniaka naa la nia wowango imakiniiki de nia horomati ma amoko Ma Jouika angamoi Una gea abe ahao winitailako ma titi ti ngini nia wowangoino. De abe ma titi ti ngini nia wowango, gea igoungu abe ngaro o duniaka naa nimanoahi, masara ngini tanu hoka o dionikino dika ma nyawa nenangoka.

¹⁸ Angamoi Ma Jou winibanguoka la ngini nidadioli to Una ai nyawa, ho winihihupuoka ti ngini nia hirahioka de aino. De nia hirahi gea ka o wowango ma homoa dika abe nia totoforaka de auku ihahuru hiadono nginiuku. Masara gea ibootohi ma wowango gea nianiikohi. De gea ngini nihioriki abe winibangu de ko wapakeua o haaka eko o gurasi dika abe ena gea ko itongohonua.

¹⁹ Masara hokogenangua Una winihibangu, masara Una winihibangu de o Kristusu ai awunu abe ka enangohi ikurutiye de ko imakadaenua de o gurasi eko o haaka. De o Kristusu Una gea duru ko iwa ai howono Unangoka, ho gea ka idadi tihiketero hoka o domba o dutu moi abe to ena ma heluku eko ma bokeke moioo de ko iwa.

²⁰ De nako o Kristusu Una gea ngaro o dunia naa ko idadiuahi masara Ma Jou wiirikokau la ahao ma oraha adonoka de ai wowango womahidoaka la ngini winibangu. Ho gea naa ma duru abe ma oraha naa ngone hohiromanga hato ma oraha ma bobaha de Una wihidingoto o duniauku naa la ka idadi o Kristusu womahidoaka ma titi ngini. Ho gea ngini koaho niwango itiai Ma Jou ai himangoka mangale ma titi to Una ma hirete ai Ngofaka winibanguoka.

²¹ De ngini naa mangale ma titi o Kristusu ai datorino hiadono niwingaku Ma Jouika. De Ma Jou Una gea wihimomiki o Kristusu ai honengino de wigorakiye la wihidoaka o Kristusika ai medebini ma dararono. De hokogea wigorakiye la ti ngini nia ngongaku de nia nganganono ka ihikaika itagi Ma Jouika dika.

²² De mangale ma titi naga nia hingounu ma gou-goungika abe o Abari ma Rorahaiika hiadono ti ngini nia wowango ihitebinoka genangino. Ho mangale nia wowango itebinoka ho ngini ka niakunu nimakodora ngini o gogianongoruoka abe de nia dora ma gahumu dika. Ho naa tinihuloko nginika tato ngini kiani duru nimakodora de nia hininga ma gahumu abe nia hininga ma debi-debinoka de aino.

²³ De ngini ka idadi nimakodora hokogea angamoi ngini nimaboakali ho nia wowango naga ma hungioli. De abe ma titi nia wowango ma hungi gea, abeika nimafikirohi ahi demo naa. Abe nia wowango naa ko iboaua nia dimono o duniaka de aino, abe o duniaka ma wowango ahao kiani naga to ena ma bobaha. Masara nako ti ngini nia wowango ma hungi naa, gea duru ko iwa to ena ma bobaha angamoi gea ena iboa Ma Jou ai Demo-demoka de aino. Ho mangale Ma Jou ai Demo-demo itobawango de itobatongohono, ho ti ngini nia wowango enangoo ko iwa ma bobaha angamoi ihititi ai Demo-demoino.

²⁴ De abe ma titi Ma Jou ai Demo-demo itobawango, gea duru imakiniiki de ai demo moi abe ma dodihiraino ihitulihukuoka, abe gea itemo ato, “Nako o nyawa mata-mataika gea yomaketero dika hoka o ruruubu ho ko yotedekanua de yohonengoka. De nako o nyawa manga hohailoa, gea imaketero hoka o ruruubu ma huri ho ko itedekanua de ena imaaioka ho gea ma hohailoa ko iwaka. Ho ma ruruubu ka itoolenge ho to ena ma huri ka ipurarahuku.

²⁵ Masara nako nanga Baluhu idodutu ai Demo-demo ena gea itongohono ka hiado-adonika.” Hokogea ai demo ma dodihiraino, de gea igoungu abe ai Demo-demo duru itongohono. De to Una ai Demo-demo gea ena o Abari ma Rorahai abe nengokadauino inihingahu-ngahuoka nginika. De genangino de ngini ka idadi nihioriki abe nia wowango ma hungi Unangoka, enangoo itongohono ka hiado-adonika angamoi gea ihititi to Una ai Demo-demoino. Ho mangale ma titi nia wowango ma hungi gea ho ngini kiani duru nimakodora de nia hininga ma gahumu.