1 Korintusu 10 - Ma Jou ai Demo-demo o Totobelohoka

Naga o hitiari moioli o Isiraele ma nyawaka de aino

¹ De ahi gogianongoru, naga ma ade-ade moi ngohi tato tonahihohininga done hawohanga, angamoi gea idadi o hitiari moi ngoneino. Abe ma dihira ngone o Yahudi ma nyawa nanga totofora manga ade-ade. Ma dihira gea de nanga totofora ona mata-mata yanii-niiki o lobi ma lou. De ahao nagali o gahi Una wareguoka de abe mia totofora ona mata-mata yomahihora ma honongaika de gea o tonaka ma duu-dudungoka yotagi-tagi.

² De gea ka idadi tohiromanga tato ona mata-mata yodadioka to Musa ai nyawa mangale ma titi ka ihikaika ona iwinii-niiki unangika. Ho ngaro abe ma oraha o lobi ma lou yahihira-hira eko ngaro abe ma gahi gea ngade-ngade yakokitamunoka, ma ona iwikokiniiki o Musaika, ho ona mata-mata yodadioka o Musa ai nyawa.

³ De ona mata-mata o heheranga ma inomo Ma Jouoka de aino yakokiolomoka.

⁴ De o heheranga ma akere, enangoo ona mata-mata yakokiokeroka. Abe ma akere gea yamake o lokuhakaruino, de gea ma akere yanii-niiki ona o tonaka ma kakaahaka. De ngohi ma hakaru gea tohiromanga o Kristusu.

⁵ De ngaro hokogea mia totofora mata-mataika yamakeoka ma owa kohangoe gea, masara Una ko wasanangiua ona abe yowoe-woeika ma titi ko iwa manga hingounu Unangika. De gea ma titi hiadono ona manga honenge Ma Jou watou-touniye o tonaka ma kakaahaka.

⁶ De gea mata-mata abe ma dihira idadi onangika, ma oraha naa de idadioka o hitiari moi ngoneino, done ngoneoo ma dorou duru hoohafini imaketero hoka onangoli.

⁷ De ufa ngone homahuba o pangaoika abe imaketero hoka onangoli. Abe Ma Jou ai Demo-demoka naga ihitulihukuoka hokonaa, ato, “O nyawa gea manga rame-rameoka yogogeruku de yolomo de yokere. De ona yolomo ipaha de ahao yomakokiokoiye de yomahigogule de ma dorou o pangao ma himangoka.” Hokogea itemo Ma Jou ai Demo-demoka.

⁸ De ufa ngone nanga badanga homakitigi abe ko itiaiua hoka onangoli yodiai. Abe ma dihira ma oraha ona yodiai hokogea de naga yasana monaoko de hange ka ma wange gea dika de yokokihonengoka.

⁹ De ngone ufa hataili nanga Baluhu idodutu ai dora ngoneino abe ma titi ka de hahowono Unangika de hidimoaka hato Una gea ko wonahohowonua. Abe gea imaketero hoka ona utu ma dihira gea iwitaili. Abe ona iwitaili Ma Jou de ahao Una wahibinaaha ona gea de o dodiha.

¹⁰ De ufa ngone hihidemo abe imaketero hoka ona gea utu ma dihira iwihidemo, de ona gea Ma Jou wahibinaaha de ai malaekata womatengo abe iwihiromanga o hone-honenge ma malaekata.

¹¹ De gea mata-mata abe ma dodihiraka idadi nanga totoforaika, gea idadi to ngone nanga dodotoko, de gea Ma Jou wohitulihuku la idadi o hitiari moi ngoneino abe howango ma oraha naa abe o dunia ma bobaha hatoli itigioka. Abe to ngone nanga totoforaino manga oraha ikokibootoka, masara ngone ka howango-wangohi ma oraha naa hamakeoka hoka nanga oara eko nanga hitiari onangoka de aino, abe ngone naa ka idadi homadotoko to ona manga ade-adeino. Angamoi ma dihira gea onangoo Ma Jou ai nyawa abe duru wahiowaka, masara ka yorubahi hiadono kiani Ma Jou wahohowono.

¹² Ho onagona dika yomahinganono ona ma hirete dika de ato manga gogao Ma Jouika ko yolage-lageua, ona gea koaho yomahidodiai done yoruba imaketero hoka onangoli ma dihira yahowonoka Ma Jouika.

¹³ Ho ngini koaho nimahinganono abe ma dadaili mata-mata niohimanga, de gea duru imakadaene dika abe hoka ngone o nyawa mata-mata hohimanga. Moioo de ko iwa ma dadaili abe ka ngini dika inidaene. De ngini ka idadi nimahinganono Ma Jouika, angamoi Una gea watobagou-goungu de Una wohibehehongoka wato winiduhunu. Abe wato nako o dadaili o kia dika niohimanga, gea ko wohigunoaua ma dadaili gea inihikala done ko niakunua nimatongohono. De ma ngekomo ma hoanika ahao winihidailako la ngini ka idadi nihupu nia dadailino la ufa genangoka de niruba.

Ufa nimahitigi o pangaoika!

¹⁴ Ho, ahi gogianongoru duru tinidora, ufa nimahitigi enangika abe yomahuba-huba o pangaoika, masara ho koaho nimatingaka duru ikurutika. Angamoi naa tonahitiari tato nako o kia dika homahitigi enangika de bote o hidoku moi dika genangino homahitongone, ma gea homahitunguuoka abe nanga gogao nagau enangika.

¹⁵ Ngini naga de nia sosawaroka, ho ngini ma hirete ka idadi ahi demo naa niatailako la nihioriki itaana eko ko itaanua.

¹⁶ Abeika hafikirohi o Yesusu ai awunu de ai badanga ma hiketero abe ngone hotobadiai nanga dodoomuoka. Abe naga ma mangko gea, de ma dolaka o angguru ma gohaka ma teongo. De ngone hohitarimakaseokahi Ma Jouiye de ahao hakokiokere. Ma oraha gea de ngone mata-mata homahikokingahu abe ngone homoi-homoi naga nanga borigogao ngone de o Kristusu ma titi ai awunu gea inakokiduhunu. De imaketero hokogea ma roti. Abe nanga doomuoka de ngone hohikokodoku ma roti, gea ma titi to ngone nanga gogao o Kristusu ai badangika, angamoi ai badanga gea womahidoaka la wato ngone wonaduhunu. Ho ma roti abe haolomo de ma angguru ma teongo abe haokere, gea inahitunguu abe naga nanga gogao o Kristusika.

¹⁷ De gea o roti ka o gahumu moi dika abe hohikokodoku, masara igoungu ngone howoe-woe haolomo ka moiino dika gea. Ho gea inahitaana abe ngone naga nanga borigogao nanga gogianongoruika ona mata-mataika. Ho naa inahitaanoli abe ngone howoe-woe hodadioka o badanga moi.

¹⁸ De abeika o Isiraele ma nyawa manga biaha, angamoi onangoo yomahitunguu manga gogao manga Jouika ma titi manga inomoka. Abe ma oraha o nyawa manga huhuba ihiboaino o huhuba ma ngiino la ato yomahihuba Ma Jouiye. Gea ihiboaino de ona o hidemo ma nyawa Ma Jouiye yale manga huhuba gea de yaregu la ahao ma regu utu yahidoakoli onangika abe yao-aoino manga huhuba. De ona yao-aoino gea ma hidoku yamake de yaolomo. De nako hiadono manga huhuba ma hidoku yaolomoka, gea yomahikangahu abe manga borigogao ona de manga huhuba Ma Jouiye gea. Ho genangoo ma inomo abe yaolo-olomo gea yomahitunguu abe ma titi manga gogao gea manga huhuba Ma Jouika abe imaketero hoka o nyawa utuoli yaolomo o aewani ma roehe ihihubaka o pangaoika la yomahitunguu manga gogao o pangaoika.

¹⁹ Ho naa tinileha nginika, ahi demo naa totemoka ma titi hokokia? Bote tinidotoko abe o nyawa manga pangao gea igoungu o jou, de nako yomahuba enangika, gea ona ahao yamake ma utumu genangino?

²⁰ Koua! Hokogenangua, angamoi manga pangao gea ko kia-kiaua. Masara abeika ahi demo naa tato tinidotoko nginika. Abe ona ko o Yahudi ma nyawaua, ona gea yomatobahuba ma ko Ma Jouikaua, masara gea yomahuba o toka-tokatika dika. De ngohi duru ko toigoua hokogea nimahigagao o toka-tokatika.

²¹ Abe nako ngini niokeroka o Kristusu ai mangkoino nanga doomuoka, de ahao niato niokeroli ma mangkoino abe yomahihubaka o tokatika, gea duru ko itiaiua nia datoro. De nako niamakeoka ma utumu o Kristusoka de aino, duru ko itiaiua o pangao ma tauika niwohamoli la niato ma utumu o toka-tokatinoli niamake enangino. Ho ngini ngaro ufa niaolomo eko niaokere o kia dika abe ihihubaka manga pangaoika.

²² Angamoi nako hokogea haniiki, gea imaketero hoka ngone bote hato ka idadi homahiketehigogao ngone de o pangao de hato gea bote Una ko wonahohowonua. Eko ngone hato nako ngone de Ma Jou, ka ngoneohi hoputurungu. Duru hokogea ko itiaiua, angamoi ka Unangohi woputurungu de kiani wonahohowono nako nanga datoro hokogea hodiai.

Ufa o bebeleke nidiai la hiadono o nyawa yahowono

²³ De kangano tohitulihukuoka o nyawa manga demo ma dulu gea abe yotemo ato, “Nako ngohi, mata-mata ka idadi todiai angamoi o pareta ko taniikua.” De gea ngohi totemoli tato, ngaro “mata-mata ka idadi,” ma nako ngohino ko mata-mataikaua ihiduhunu. De ngaro “mata-mata ka idadi,” masara nako ngohino ko mata-mataikaua inahigaro ma totiaiika.

²⁴ De ufa ngini nimalingiri ti ngini ma hirete dika nia utumu de nia owa, masara koaho o nyawa utu manga utumu de manga owa nialingiri.

²⁵ Ho nako naga o aewani ma roehe o paharoka de aino iboa, gea ngaro ufa dika de nileha-leha masara ka idadi niaolomo dika. Abe nako ko nilehaua, gea ko nihiorikua nako ma roehe gea ihihubaka o pangaoika eko koua, de doka ani hiningaka ko inihipusingua.

²⁶ Angamoi o dunia naa de o dunia ma kiahonanga mata-mata, gea mata-mata to Ma Jou ai dulaada.

²⁷ De nako naga utuino abe ko yongaku-ngakua de ona gea iniahoko la niolomo onangoka, de nako ngini niahimoteke niolomo onangoka, gea o inomo o kia dika yakelengauku nia himangoka, gea ka idadi niolomo dika. Ma ufa hiadono nialeha onangika niato, “Sarakia, naa ena ihihubaka o pangaoika eko koua?” Ufa hokogea nialeha done nia hiningaka inihipusingi ma babaluhu.

²⁸ De masara nako ko nilehaua de ona o tau ma dutu inihingahu ato, “Ma roehe naa ena ihihubaka o pangaoika.” Nako hokogea inihingahu, gea ho koaho ngaro ufa dika de niaolomo ma roehe gea, done o nyawa gea abe inihingahuoka ahao manga hiningaka nihipusingi ma titi nia datoro gea.

²⁹ De igoungu nako ka ti ngini nia hiningaka ko inihipusingua ma titi ma inomo gea, masara bote o nyawa gea ona manga hininga ipusingoka. Abe nako ngohi naga o nyawa manga tauoka de naga o roehe yakelengauku ahi himangoka, de ahao ihihingahu ngohino ato ma roehe gea ihihubaka o pangaoika, masara tanu gea ma roehe ka idadi dika taolomo. Masara nako ngohi ma roehe gea ka taolomo, gea de ahao o nyawa utu ka idadi ihihohowono ngohino, ngaro ngohi ma hirete tohiorikoka abe Ma Jou wohihigunoa la ma roehe gea ka idadi taolomo.

³⁰ Abe biaha nako hoka ngohi taolomo, gea ko taolomuahi de kiani totarimakaseokahi Ma Jouiye. Masara done ma utumu o kiaka nako ma roehe gea tohitarimakaseoka masara ma bahaika de o nyawa ihitae ngohino ato tahowonoka? Ho koaho ngaro ufa dika de ma roehe gea taolomo.

³¹ Ho ngaro niolomo eko niokere eko ngaro o kia dika ngini nidiai, ma kiani mata-mata nidiai la ahao o higiriiri nihiboa Ma Jouiye.

³² De ufa nidiai o bebeleke la hiadono o Yahudi ma nyawa yahowono, eko la hiadono ona ko o Yahudi ma nyawaua de onangoo ma yahowono, eko la hiadono nia gogianongoruoo Ma Jou ai garejaka, ma, onangoo yahowono.

³³ De ngohi ma hirete hokogea ahi hininga, ho hiadono ngohi tomahitiari tato ufa o nyawa manga hiningaka tohipusingi done ahao yahowono Ma Jouika, masara kiani o nyawa mata-mataika tahisanangi ngaro o kia dika naga, abe iti imakiniiki de to Una ai mau. Angamoi nako ka to ngohi ma hirete ahi utumu gea ko tomalingirua, masara o nyawa yowoe-woe gea ona manga utumu talingiri, la hiadono ona ahao ka idadi Ma Jou waduhunu manga howo-howonino.