1 Kokoano 9 - Ma Jou ai Demo-demo o Totobelohoka

O Pasala 9 ko atailakouahi Ma Jou womahimatoko ma moioli o Saloomoika

¹ De ipahaino de o Saloomo wohigoko ibooto Ma Jou o Yawe ai Tau, de to una ma hirete ai tau, de ma tau utuoli mata-mata abe ma dihiraino de wohideeoka wato wodiai.

² De gea mata-mata wodiai ibooto de ahao Ma Jou womahimatoko ma moioli unangika, abe imaketero hoka ma dihiraino womahimatoko o Saloomoika o Gibeono ma kotaka.

³ Ho Una witemo ma koanoika wato, “Ngohi naa togihenoka ani gogahoko ma demo abe ma dihiraino nomagahoko ahi duduhunu. Abe Ngohi tomadingakoka ahi Tau gea abe nohigoko ibooto la idadi to Ngohi ahi Tau de tomanoa genangoka ma oraha naa de ka hiado-adonika. De to Ngohi ahi Womaha ka ihikaika naga ma Tauoka gea.

⁴ De naa tonihibehehongo ngonaika tato ngona kiani ka ihikaika nohileleani Ngohino de ani hininga ma gahumu abe imaketero hoka ani baba o Dautu wohileleani. Abe to Ngohi ahi pareta de ahi huhuloko ma demo mata-mata kiani naga ani hingounu ma demoika gea la ka ihikaika natobaniiki enangika.

⁵ De nako hiadono nagou-goungu nohiniiki Ngohi ahao tonihigunoa la ngona de ani totoforauku niahikoano o Isiraele ma nyawaika ka hiado-adonika la gea imakiniiki de ahi behehongo ma demo ma dihiraino ani baba o Dautika. Abe ahi demo unangika tato ka ihikaika naga womatengo ai totoforaukuino abe yogogeruku o Isiraele manga koano ma kaderauku.”

⁶ “Masara nako hoka ngona eko womatengo ani totoforaukuino gea ahao nirehene de nihiporete Ngohi abe ahi pareta de ahi huhuloko ma demo nioluku nianiiki de hiadono o jou-jou ma homoali nimahijou enangika, gea ahao Ngohi naa kiani tinihohowono nginika.

⁷ Abe gea ngaro ma dihiraino de tinihidoaka ma tonaka naa nginika masara kiani tinihihupu ngini o Isiraele ma nyawa nia tonakoka de niaika. De hongoli Ngohi ahao tanoaika dika ahi Tau abe naa ma duruino tomadingakoka la tato genangoka tomatobanoa. De ma oraha gea ahao o homoa ma nyawa mata-mata ka inihohedu dika ngini o Isiraele ma nyawaika.

⁸ Angamoi igoungu ma oraha naa de naga o nyawa manga horomati ma amoko ahi Tauika gea, masara nako tanoaika ahao ahi Tau itoropaha de duru ihibinaahaka. De ma oraha gea o nyawa abe yotobatilakuru ahao yomakeleha ato, ‘Done ma titi o kia ho hiadono Ma Jou wohirusaka ai Tau naa de ma tonakoo mata-mataika?’

⁹ De ahao manga dodiawo marai yopaluhu ato, ‘Maraioka wohirusaka mangale ma titi o Isiraele ma nyawa iwiporete Unangika. Abe ngaro ma dihiraino de Una waduhunu de wahihupu o Mesiiri ma nyawa manga giamoka de yaino masara ipahaino de o jou-jou ma homoa yomahijou enangika hiadono yaleleani de yomahihuba-huba o jou utuoli gea. Ho duru ma titi gea ena ho hiadono Ma Jou o Yawe wahihohowono ai nyawaika hokonaa.’” Hokogea Ma Jou ai hingahu ma demo o Saloomoika ma oraha womahimatoko unangika.

O Saloomo ai hidoaka o Huramika

¹⁰ De ahao o Saloomo de ai nyawa ka ihikaika yokarajaanga la ihigoko Ma Jou o Yawe ai Tau de o Saloomo to unangoli ai tau ma rorahai. De manga karajaanga gea aolomo manga taongo monaokino ma dekana de ahao ma tau hinooto gea ihigoko ibooto.

^11-14 De manga karajaanga ma gogiriaka de o Tirusu manga koano o Hurama una gea ka ihikaika wahidailako o semara ma gota de o sendana ma gota mata-mata abe yoperelu. De nagali manga perelu o gurasi abe yapake la yobilere ma tau hinootoika gea, de enangoo o Hurama wahidailako onangika. Abe ma gurasi gea o kilo o sana iata ifoloioka ma dubuho. De mangale ma titi o Hurama ai hidoaka ma amoko gea o Saloomoika ho o Saloomo unangoli wato irahai naga ai hidoaka ma amoko abe ka idadi wihidoaka o Huramika. Ho o Saloomo wihidoaka unangika o kota monaoko abe ma kota mata-mata gea imanoa o Galilea ma tonakoka. Masara ipahaino abe ma oraha o Hurama wosobo wanoaikahi ai tonaka o Tirusu la wokapakiti watotailako ma kota gea abe o Saloomo wihidoaka unangika de ko wodosanangiua enangika. De gea ma titi ho hiadono una wileha o Saloomoika wato, “Dodiawo, done ma titi o kia ngona nohihidoaka ma kota naa ena ngohino?” De ahao o Hurama una wohiromanga ma tonaka gea wato o Kabulu ma tonaka, abe ma romanga gea ma titi ikuranga irahai. De ngaro hiadono ma oraha naa naga abe ma ade-ade naa ihitulihuku masara hokogea dika o nyawa yofetongo ato gea o Kabulu ma tonaka.

O Saloomo ai karajaanga utuoli

^15-19 De nagali o Saloomo ai karajaanga utuoli ma ngoe abe wahuloko o nyawaika la ona ihigoko o tau de o kota de to ena ma kiahonanga mata-mataika. De hokonaa ma karajaanga ma hiaturu ma ade-ade. Ma dihiraino gea de una wahuloko la o nyawa ihigoko Ma Jou o Yawe ai Tau de ma koano to una ma hirete ai tau de nagali ma kota ma hidoku yodiai la ma kota utuohi iwoata de ikurutu. De ihigoko o Yerusaleeme ma kota ma dadaduhu la ihigilolitino ma kota, de nagahi manga karajaanga abe o nyawa yodiaioli o kota utuoli ma ngoe. De gea ma roma-romanga o Hasoro de o Megido de o Gesere de o Bete Horono abe imanoa ma dolaka de o Balata de o Tamara abe imanoa o tonaka ma kakaahaka. De nagali yodiai o kota ma ngoe abe genangoka naga o inomo de o kiahonanga ma gogogono ma ngi-ngi. De naga o kota utuoli yodiai abe genangoka imanoa o Saloomo ai gogoroba parangi de ai kuda kohangoe. Ho gea o Saloomo wahiaturu la o kia dika ai hininga adaene de ka idadi wahuloko o nyawaika la gea yodiai de ihigoko abe imakiniiki de ai hininga gea. Ho naga ai karajaanga abe yodiai o Yerusaleemoka de utu o Libanono ma tonakoka, de ngaro o kiaka dika to una ai tonaka ma amokika masara ka idadi o nyawa yodiai la to una ai hidee ahao idadi. De abe ma titi o Gesere ma kota gea, ma dihiraino de o Gesere idadi o Kanani ma nyawa manga kota. Masara ipahaino de o Mesiiri manga koano de ai tentara yaparangi onangika de duru yahikala o Kanani ma nyawa gea. Abe yahohonenge ma nyawaika de yatufuku ma kota gea hiadono youkuoka. De ipahainoli abe ma oraha o Mesiiri ma koano ngoi ora moilaka ho modadi to Saloomo ngoi fekata de ma kota gea idadi o Mesiiri ma koano ai hidoaka ngoi oraika. Ho gea ma titi hiadono ahao o Saloomo wodiaioli ngoi fekata ami kota o Gesere gea.

^20-21 De abe ma titi o nyawa yotobakarajaanga la ihigoko ma tau de ma kota gea, hokonaa o Saloomo ai karajaanga ma hiaturu. Ma dihiraino abe ma oraha o Yosua de ai tentara ma nyawa yaparangi o nyawa-nyawaika abe yomanoa o Kanani ma tonakoka de naga o dutu ma nyawa abe o Yosua ko wahikalaua onangika. De gea o Amori ma nyawa de o Hete ma nyawa de o Ferisi ma nyawa de o Hewi ma nyawa de o Yebusi ma nyawa. Ho ma nyawa gea mata-mata manga totoforauku ka nagahi o Isiraele ma tonakoka angamoi ma dihiraino gea de o Yosua ko wakunua wahibinaaha manga toforaika. Ho ipahaino de o Saloomo wahuloko onangika gea de wahikarajaanga wato ona kiani ihigoko ma tau de ma kota gea abe wohideeoka. De ngaro ma oraha una wahuloko onangika de ka hiadono ma oraha naa naga masara o homoa ma nyawa gea ka ihikaika yotobakarajaanga la yodiai to una ai karajaanga ma hidee.

²² De nako o Isiraele ma nyawa, to Saloomo ai gogianongoru gea, una ko waribuutua onangika la yokarajaanga imaketero hoka ma homoa ma nyawa gea. Masara o Saloomo wahiaturu de wahitagongo onangika hokonaa. Abe utu wahitagongo la yodadi o tentara ma nyawa de utuoli yodadi ai popareta ma nyawa. Ho naga abe wagoraka la yodadi o tentara manga hohidimono, de naga utu yotobaloliti ai gogoroba parangi, de utuoli yodadi o gogoroba parangi ma hohidimono.

²³ De nagahi ai nyawa yaratuhu motoa de yamoritoa abe wagoraka la ona yahitobahiaturu ona yotobakarajaanga mata-mataika abe ihitobagoko ma tau de ma kota gea.

²⁴ De ipahaino ma oraha o Saloomo wohigoko ibooto to una ai tau de ahao ngoi fekata abe muna to Mesiiri manga koano ngoi ora muna momaturuuru ami tau ma hungika gea. Abe ma dihiraino de muna momanoa ma kota ma hidokuoka abe ihiromanga o Dautu ai kota. De ipahainoli de o Saloomo wodiai la ma kota ma hidoku gea utuohi iwoata de ikurutu.

²⁵ De o taongo moi ma hange de o Saloomo waoino o huhuba ma ngoe o huhuba ma ngiino abe una wodiai de wodingaka Ma Jou o Yaweika. De ma huhuba ma ngioka gea de una womahihuba o huhuba iharo-harongo ma ngoe de nagali ai dame ma huhuba ma ngoe. De nagaoo ai huhuba o manyanyi abe una wotufu-tufuku Ma Jouiye ma oraha gea. Ho manga karajaanga ibooto abe ihigoko Ma Jou o Yawe ai Tau de naa ka idadi ai huhuba gea womahihuba Unangiye genangoka.

²⁶ De nagahi o Saloomo ai karajaanga moioli abe wodiai ma oraha gea. Abe una wahikarajaanga ai nyawa la o kapa ma ngoe yodiai o Esion Gebere ma kotaka. De ma kota gea imanoa o Edomo ma tonakoka o Bongo-bongo ma gahi ma ngigorino, de ma ngi gea hatoli imakitigino de o Eloto ma kapongo.

²⁷ De ma kapa gea yodiai ibooto de ahao ma koano o Hurama una wahidingoto ai nyawa manga ngoe genangika angamoi ona yososawaro yololiti de yahikaaturu o karajaanga mata-mata o kapaka. Ho to una ai nyawa yatobaduhunu o Saloomo ai nyawa la ka idadi yohidete manga kapa gea.

²⁸ De ahao ona yohidete o Ofiri ma tonakika la ka idadi yamake o gurasi genangoka. De igoungu o gurasi ma amoko yamake ma tonakoka gea ho yale de ihibarene ma kapaka de ahao yolio de iwiao o Saloomoika. De gea yomahiadono de iwihidoaka manga koanoika o gurasi abe ma dubuho o kilo o sana ngimoi de iata.