1 Kokoano 5 - Ma Jou ai Demo-demo o Totobelohoka

O Pasala 5 ko atailakouahi Ma Jou ai Tau ma kiahonanga ihidiaiohi

¹ Ma dihiraino abe ma oraha o Dautu ka wowangohi de wodadi o koano de una de o Tirusu manga koano o Hurama ona yahinooto ka ihikaika yomaketedodiawo. Ho ipahaino ma oraha o Hurama gea woihene abe o Dautu ai ngofaka o Saloomo wituruuruoka de wodadi o Isiraele manga koano ma hungi de una wosanangi. De gea o Hurama wahidingoto ai nyawa yamuruono naga la yadofanga ai demo o Saloomoika abe to una ai hininga ma rahai de ai horomati ma demo wohidingoto o Isiraele manga koanoika.

² De o Saloomo woihene o Hurama ai demo gea manga uruino de ahao unangoli wato wohidingoto ai demo o Huramika. De hokonaa o Saloomo ai demo ai hurata ma goronaka.

³ “Ahi baluhu o Hurama, marai ngona ka nohiningahi abe ma dihiraino de ahi baba o Dautu naga ai hidee la wohigoko Ma Jou o Yawe ai Tau la genangoka o nyawa ka idadi iwihigiriiri Unangika. Masara gea ko idadiuali angamoi ka ihikaika naga mia musu abe yomaketeparangi ona de ahi baba ho ko iwaka ai oraha. De gea ahi baba wato koaho widodamaa hiadono Ma Jou wihidoaka o hilaku o poparangioka de ahao Ma Jou ai Tau ka idadi ihigoko.

⁴ Ho ipahaino abe ma oraha naa de ahi Jou o Yawe wohihidoakoka ma hilaku gea ho ma parangi mata-mata ibootoka de ko iwa ahi musu ma oraha naa. De ngomi nenangoka miwango misosanangi dika de ma dameoka.

⁵ Ho ngohi ahi hidee naga la tohigoko ahi Jou o Yawe ai Tau la gea duru imakiniiki de to Una ai behehongo ma demo abe ma dihiraino wihibehehongo ahi babaika. Abe Una wato, ‘Ahao ani ngofaka abe wonituruuru de wodadi o koano, una gea abe ahao wohigoko ahi Tau la genangino de o nyawa ka idadi manga horomati ihihidoaka Ngohino.’ Hokogea Ma Jou o Yawe ai demo ma dihiraino, ho naa ngohi toigo la ahi datoro imakiniiki de ai demo gea.

⁶ De ngohi tomagahoko la ngona nomihidailako ma tau gea ma gota, ho toigo nahuloko ani nyawaika la yoiki o Libanono ma tonakika de yotolanga o semara ma gota ma ngoe de ihidingoto gea ngohino. De ngohi ka idadi tahidingoto ahi nyawa nginika la yomakuduhunu yokarajaanga de to ngona ani nyawa. De hongoli ngohi ka idadi tofangu nia nyawa manga hewa ma tiwi abe hokokia dika ma amoko itiai ani hiningaka. Angamoi duru itararono abe to ngona ani nyawa o Sidonoka, ka onangohi gea duru yososawaro yotobatolanga o gota!”

⁷ De o Saloomo ai hurata ma demo gea wohidingoto o Huramika, de ipaha ma oraha una woihene o Saloomo ai demo de duru wosanangi ho wato, “Irahai ngone hihigiriiri Ma Jou o Yaweika mangale ma titi Una wihiowa o Dautu de ai ngofaka naa abe duru wososawaro la wodadi o Isiraele ma nyawa manga ngoe gea manga koano.”

⁸ Ho o Hurama unangoli wohidingoto ai demo o Saloomoika, de hokonaa itemo ai hurata ma demo wato, “To ngona ani gogahoko ma demo ngohi tamakeoka de tosanangi dika tinihidailako nia perelu ma titi o semara ma gota de o sendana ma gota mata-mataika.

⁹ Abe ngohi ahao tahidingoto o Libanono ma tonakika ahi nyawa abe yososawaro yotobatolanga o gota, de gea ma gota minidolanga ipaha de ahao mihihupu dai o gahioko. De ahao genangoka mihigetefata de mitotaka la ipuda-puda o gahioka ka hiadono ma ngi o kiaka dika abe ngini nitemo. De ahao nia gota gea mihifarene ma ngigoriye de miahohe mata-mataika la ka idadi ngini niao nia karajaanga ma ngiika. De gea mia gogahoko moi dika ngonaika, abe mimagahoko la nohidingoto o inomo ngomino la idadi ngohi de ahi nyawa mata-mata ahi tauoka mia inomo.”

¹⁰ De hokogea manga hiaturu ma demo ho o Hurama wohidingoto o semara de o sendana ma gota ma ngoe abe imakiniiki de o Saloomo ai gogahoko.

¹¹ De o Saloomo unangoli o tao-taongiye wohidingoto o inomo kohaamoko o Huramika la ka idadi una de ai nyawa ai tauoka yaolomo. Abe o taongo amomoiino wohidingoto manga gandumu ma duduga o juta iata ma ngoe de manga minya o saitunu ma hofokino abe duru iree-reeika, gea o litere o sana o ratuhu iata de monaoko wahidingoto onangika.

¹² Ho ma koano yahinooto gea yomakao irahai de hiadono yomahiketehibehehongo ato ko idadiua yomaketeparangi. De ahao Ma Jou o Yawe wihiakunu o Saloomo de o sosawaro duru ma amoko abe imaketero hoka wihibehehongoka unangika.

¹³ De ma oraha gea o Saloomo wairiki o nauru yasana moruange abe o Isiraele ma tonaka ma amokino la yotobakarajaanga de ma gota gea.

¹⁴ De ona manga ngoe gea wahikitingaka la yodadi o doomu hange abe ma doomu homoi-homoi yasana ngimoi. Ho o mede-medeiye una wahidingoto o doomu moi dika o Libanono ma tonakika la yomakuduhunu ona de o Hurama ai tobakarajaanga ma nyawa. De gea yokarajaanga manga mede moiino dika de ahao yolio o Isiraele ma tonakino de yomahiaini manga mede hinootoino ma dekana. De hokogea ma doomu hange gea yomakawalimi yoiki de yokarajaanga o Libanono ma tonakoka. De naga womatengo ai romanga o Adonirama abe wodadi o doomu hange mata-mata manga hidimono wokokurutiye.

¹⁵ De nagali o nyawa yasana moritufange abe o Saloomo wahitagongo la o hakaru yopawa o loku-lokuoka de ma hakaru gea ahao yapake la ihigoko Ma Jou ai Tau. De naga o nyawa utu yasana moritumidi abe yatobatotaka ma hakaru gea de o kiahonanga utuoli o Yerusaleeme ma kotaino.

¹⁶ De nagahi o nyawa yasana hange de yaratuhu hange abe yodadi o tobakarajaanga ma nyawa gea manga hohidimono ho yahiatu-aturu ma karajaanga gea mata-mataika.

¹⁷ Ho ona yotobakarajaanga gea yaniiki irahai o Saloomo ai huhuloko ma demo, abe o hakaru ma hohailoa yopawa hiadono ihidiai ma popahagi de ma ago-agomo. De ma hakaru gea ahao idadi Ma Jou ai Tau ma lifunu abe duru ihira yakelengauku dau ma tonakuku.

¹⁸ De hokogea o Saloomo ai nyawa de o Hurama ai nyawa de nagali o nyawa utu abe o Gebala ma kota ma nyawa, ona mata-mata yomakutuono yokarajaanga la ihidiai ma hakaru de ma gota la ka idadi genangino ihigoko Ma Jou o Yawe ai Tau gea.