1 Kokoano 16 - Ma Jou ai Demo-demo o Totobelohoka

O Baesa o Isiraele ma nyawa wahikoano itorou

¹ De naga Ma Jou o Yawe ai uru ma dodofanga womatengo ai romanga o Yehu abe ai baba o Hanani. De Ma Jou wihidoaka o Yehuika ai behehongo ma demo abe kiani wadofanga manga koano o Baesaika, wato,

² “Ngona o Baesa ma dihira ko kia-kiaua inidaene ma nyawa, Hoka ani gogere o tonaka ma kafoka de tonigorakiye, De tonihidadi ahi nyawa, o Isiraele ma nyawa, manga koano, Masara ngonaoo naniiki o datoro ma dorou hoka o Yerobeamoli, De ngonaoo naribuutu o Isiraele ma nyawaika la yahowono Ngohino, Hiadono ahi ngamo ifae ahi nyawa manga howonika.

³ Ho abeika abe Ngohi Ma Jou ahao todiai ngona o Baesaika, Ngona de to ngona ani tau tinihikokihibinaahaka, Ka hiadono nginioo nia hohowono imaketero dika hoka, O Yerobeama abe ai baba o Nebata abe to una ai tauoli yadaene.

⁴ Abe hokonaa idadi ma oraha o hibinaaha inikokidaene, Baesa, ona abe ani tauino ma nyawa nako o kota ma goronaka, De genangoka yohonenge de ahao yodadi o kaho ma inomo. De ona utu abe yohonenge o kota ma hoanoka, Abe nako ona naga hoka manga redioka ma oraha nia hibinaaha yadaene, De to ona manga honenge idadi o totaleo ma inomo.” De hokogea Ma Jou ai behehongo abe wadofanga o Baesaika.

⁵ De mata-mata utu abe ma titi o Baesa ai kuaha de gea wodiai ma oraha wohikoano o Isiraele ma tonakoka naga ma ade-ade. De ai ade-ade gea ihitulihukuoka o buku moioka ma romanga, “O Kokoano abe Ihikoano o Isiraele ma Tonakoka manga Ade-ade.”

⁶ De ma oraha o Baesa gea wohonenge de iwilungunu o Tirisa ma kotaka. De ahao to una ai ngofakoli wituruuru abe ai romanga o Ela ho naa unangoli wodadi manga koano o Isiraele ma tonakoka.

⁷ De naga Ma Jou o Yawe ai demo utuohi abe wihingahu to Una ai uru ma dodofangika, o Yehu. De Ma Jou ai hingahu gea enangoo ma dumutu o Baesaika de onangikaoo abe to una ai tauoka. De ai hingahu ma higila-gila gea enangoo ma titi o Baesa ai howono kohangoe abe duru itorou Ma Jou o Yawe ai himangoka. De gea hiadono Ma Jou ai ngamo duru ihauku unangika ma titi duru ai datoro itotorou. Abe to una ai tau manga wowango ma datoro duru imaketero dika de o Yerobeama de to una ai tau manga wowango ma datoro, ho hiadono ona mata-mata Ma Jou wahikokibinaahaka.

O Baesa ai duruuru ai ngofaka o Ela masara o Simiri ahao witoma ho o Simiroli wodadi o koano

⁸ De ma oraha gea o Baesa wohonenge adonokali adaene ma oraha o Asa, abe daku o Yehuda ma tonakoka, wahikoano ngade-ngade ai taongo monaoko de butaanga ma dekanino o Isiraele ma nyawa abe yogogere o Yehuda ma tonakoka gea. De o Ela wituruuru ai baba o Baesa ho naa o Ela unangoli wodadi o koano o Isiraele ma tonakoka de ai gogere o Tirisa ma kotaka. De genangoka wahikoano ai kokawaahaika o taongo hinooto ma dekana.

⁹ De naga o Ela ai popareta ma nyawa womatengo ai romanga o Simiri de to una ai tagongo o koano ai goroba parangi kohangoe. Abe o Ela ai gogoroba waregu hinooto de o regu moi o Simiri ai kuaha ma goronaka. De o Simiri gea wato o Ela, ai koano gea, kiani unangoo wohonenge ho wihidee witoma. De o futu moiuku o Ela gea naga o Tirisa ma kotaka abe naga o Ela ai tau moioli genangoka de ai duduhunu o Arasa wohiaturu mata-mata o koano ai tauoka gea. Masara o Arasa to una ma hirete ai tau naga o kotaka gea de o futu nenanga o Ela womarekata o Arasa ai tauika de o daluku yokokiokere ka hiadono yakokidaluku genangoka o Arasa ai tau ma goronaka.

¹⁰ De ahao o Simiri wowohama manga ngiika gea abe yokere genangoka de witoma o Ela gea. De ma oraha witoma gea adaene ma oraha o Asa, abe daku o Yehuda ma tonakoka, wohikoano ngade-ngade ai taongo monaoko de tumidi ma dekanino abe o Isiraele ma nyawa abe yogogere o Yehuda ma tonakoka gea wahikoano. Ho naa o Ela ai taongo hinooto dika ma dekana wohikoano de o Simiri wituruuru hiadono naa unangoli o Isiraele ma nyawa wahikoano abe idateke daukuku o Isiraele ma tonakuku.

¹¹ De ahao o Simiri womahitunguu wodadioka manga koano abe wogogeruku o koano manga kaderaka. De ka de o Simiri wale o koano ma kuaha abe adaene ai kokawaaha mata-mataika, de una duru itaiti o nau-nauru wakokitoma iti o Ela ai baba o Baesa ai dutu yadaene. De o Ela ai dodiawo ngaro ona ko adaenua ai gogianongoru, masara onangoo ko moiua abe wahigunoa ka yowangohi ho onangoo mata-mataika wakokitomaka.

¹² Ho o Simiri gea ai dohata adaene o Baesa ai tau ma doomu mata-mataika hiadono wahikokibinaahaka! Ho naa idadioka duru imaketero abe hoka ma dihira o Yehu, Ma Jou o Yawe ai uru ma dodofanga wadofanga Ma Jou ai hohowono ma behehongo onangika abe manga dutu adaene o Baesa ai tauoka.

¹³ De mata-mata gea idadi onangika mangale ma titi o Baesa de ai ngofaka o Ela manga howono duru kohagiria de hiadono o Isiraele ma nyawaoo yahirehene la yomahuba-huba o popangaoika. Hokogea onangoo manga howono duru ma amoko Ma Jou o Yaweika abe o Isiraele ma nyawa manga Jouika yahowono hiadono ai dohata duru ifae manga howonika gea. De manga howono duru ihititi o popangaoka abe duru parahaja dika yomahinganono enangika.

¹⁴ De mata-mata utu abe ma titi o Ela ai kuaha de gea wodiai ma oraha o Isiraele ma tonakoka wohikoano naga ma ade-ade. De ai ade-ade gea ihitulihukuoka o buku moioka ma romanga, “O Kokoano abe Ihikoano o Isiraele ma Tonakoka manga Ade-ade.”

¹⁵ Ho naa o Simiroli womulaenge o Isiraele ma nyawa wahikoano de una wogogere o koano manga tauoka abe naga o Tirisa ma kota ma goronaka. Masara una wahikoano ka ai wange tumidi dika ma dekana. Ho unangoo ma oraha wohikoano de adaene ma oraha o Asa, abe daku o Yehuda ma tonakoka, wohikoano ngade-ngade ai taongo monaoko de tumidi ma dekanino. De ma titi o Simiri wohikoano ai wange tumidino dika ma dekana, hokonaa ma ade-ade. Ma oraha gea o Isiraele ma nyawa manga tentara ka yaparangiohi o Filistina ma nyawaika manga kota o Gibetono ma goronaka.

¹⁶ De o Isiraele manga tentara gea yoihene ma abari abe o Simiri manga koano o Ela witomaka de womagoraka wato o Ela wituruuru la unangoli wodadioka o Isiraele ma nyawa manga koano. Masara ka de ona o tentara yoihene ma abari gea de ko yosanangiua hiadono yoluku o Simiri gea wodadi manga koano. De duru o wange gea dika de o tentara gea de manga hininga moi iwiiriki dika manga tentara ma hidimono womatengo ai romanga o Omiri la ato una dika kiani wodadi manga koano ma hungi.

¹⁷ Hokogea manga hininga ho manga hidimono o Omiri womaputuhu manga parangi o Filistina ma nyawaika yanoaikahi! De ai tentara wahihira manga kota ma ayoika wato yangika o Tirisaika la o Simiri gea iwihiguti o koano ma kaderaino.

¹⁸ De o Omiri de ai tentara yaparangi o Tirisa ma kotaika ka hiadono o kota ma amokika yahiparetaka. De ka de o Simiri gea wamake abe ai kota iwioraka de naa ai kota naga o Omiri ai giamoka de una wowohama o koano ma tau duru ma goronaika abe naga genangoka ma ngi abe ka enangohi ma dadaduhu yodiai ma rupa o dadatoko. Ho o Simiri womagogono genangoka de ahao o koano ma tau gea wotufuku ho una de o koano ma tau ka moi womahidutufukoka. Ho igoungu, o Simiri wohikoano o wange tumidi dika de unangoli wohonengoka.

¹⁹ De hokogea wohonenge angamoi ai howono ma ngoe abe to unangoo ai wowango ma datoro itorou Ma Jou o Yawe ai himangoka. Abe o Simiri gea unangoo womahuba-huba o popangaoika imaketero hoka manga koano ma dihira, o Yerobeamoli wodiai de hiadono o Isiraele ma nyawa wahihira-hira o howonika dika.

²⁰ De mata-mata utu abe ma titi o Simiri ai kuaha, de ai hidee ma dorou ai koano o Elaika, ma ade-ade gea ihitulihukuoka o buku moioka ma romanga, “O Kokoano abe Ihikoano o Isiraele ma Tonakoka manga Ade-ade.”

²¹ Masara o Isiraele ma nyawa ko mata-mataikaua iwisanangi o Omirika hiadono ai kokawaaha yoregu hinooto. O regu moi yoigo yomahikoano o Omirika de ma regu moioli ko iwiigoua masara ona ato kiani o Ginata ai ngofaka o Tibini kiani una dika o Isiraele ma nyawa iwigoraka la iwihidadi manga koano ma hungioli.

²² De ahao o Isiraele ma nyawa manga doomu hinooto gea yomakalawana hiadono yomaketeparangi de ona o Omiri wahihira yolaku. Ho ahao o Ginata ai ngofaka o Tibini gea iwitoma de o Omiri gea unangoli wodadi manga koano.

²³ De o Omiri gea womulaenge o Isiraele ma nyawa wahikoano ma oraha o Asa, abe daku o Yehuda ma tonakoka, wohikoano ngade-ngade ai taongo moruange de moi ma dekanino. De o Omiri gea wahikoano o Isiraele ma nyawa ai taongo ngimoi de hinooto ma dekana. De ai taongo butaangaino wohikoano ai gogere o Tirisa ma kotaka.

²⁴ De ahao o Omiri gea o loku moi womaija womatengoino ai romanga o Semere de gea wofangu de o haaka ma se-senge abe adono o haaka o kilo moributaanga de tufange ma dubuho. De o lokuoka gea o Omiri wohigoko o kota moi abe wohiromanga o Samaria ma kota la ma romanga ngade-ngade imakadaene hoka o Semere ai romanga angamoi unangino o Omiri waija ma loku gea.

²⁵ Masara o Omiri unangoo wodiai abe duru itorou Ma Jou o Yawe ai himangoka ka hiadono, nako una de o kokoano ma dihiraino, ka unangohi ai howono Ma Jouika ilamoko.

²⁶ Abe o Omiri gea duru waniiki o Yerobeama ai wowango ma datoro la o Isiraele ma nyawa manga howono o popangaoika wahigila-gila dika. Ho unangoo duru wohidogo ma dorou o Isiraele ma tonakoka hiadono o Isiraele ma nyawa manga Jou, Ma Jou o Yawe ai ngamo duru ifaeoli onangika.

²⁷ De mata-mata utu abe ma titi o Omiri wodiai ma oraha wohikoano de hokokia to una ai kuaha o nyawaika, de ai wowango ma datoroka wodiai gea naga ma ade-ade mata-mata. De ai ade-ade gea ihitulihukuoka o buku moioka ma romanga, “O Kokoano abe Ihikoano o Isiraele ma Tonakoka manga Ade-ade.”

²⁸ De ma oraha o Omiri wohonengoka de ahao iwilungunu o Samaria ma kota ma goronaka. De ahao to una ai ngofaka o Ahaba wituruuru ho o Ahaboli wodadi o Isiraele ma nyawa manga koano.

O Ahaba wodadi o Isiraele ma nyawa manga koano

²⁹ De o Ahaba, abe ai baba o Omiri, una womulaenge o Isiraele ma nyawa wahikoano ma oraha o Asa, abe daku o Yehuda ma tonakoka, wohikoano genangoka ngade-ngade ai taongo moruange de tufange ma dekanino. De ahao o Ahaba gea o Isiraele ma nyawa wahikoano ai taongo monaoko de hinooto ai dekana de wogogere o koano ma tauoka o Samaria ma kotaka.

³⁰ Masara o Ahaboo duru wodiai itorouholi Ma Jou o Yawe ai himangoka, ho ngaro o kokoano abe yohira onangoo yodiai duru itorou masara o Ahaba ona mata-mata ka watilakuru de ai datoro ma dorou.

³¹ De ai wowango ma datoro imakiniiki hoka o Yerobeama ai datoro ma modorou. De una woilaka de momatengo ami romanga o ngo Isebele abe munangoo duru o nyawa ma dorou ho ka de muna womile de to una ai dorou ka womahidogo dika. Muna gea o Sidono ma nyawa abe ami baba o Etabaala de una wahikoano o Sidono ma nyawa. De o ngo Isebele momahuba o pangao o Baalika ho yoilaka ibooto de ko itedekanua de ami rokata o Ahaba unangoo womulaenge womahuba-huba o Baalika.

³² De abe ihira womahitaana wodiai abe walawana Ma Jou ai behehongika, una o Samaria ma kota ma goronaka wohigoko o Baala ma huhuba ma tau de to ena ma huhuba iharo-harongo ma ngi.

³³ De ahao o pangao o ngo Asitorete ma liate moi, enangoo o Ahaba gea wohigoko. Ho ngaro o Isiraele ma nyawa manga kokoano ma dihiraino yodiai itotorou hiadono to ona manga Jou, Ma Jou o Yawe, ai ngamo duru ihifae, masara ka o Ahaboli wodiai ifoloiholi abe Ma Jou o Yawe ai ngamo utuohi wohifae.

³⁴ De ma oraha o Ahaba wahikoano o Isiraele ma nyawa de womatengo ai romanga o Hiele womaputuhu wato o Yeriko ma kota wohigokoli ngaro ma dihira Ma Jou wahingahuokau o Isiraele ma nyawaika abe ko woigoua o kota gea yodiaioli ma hungi. De igoungu, ka de o Hiele o Yeriko ma kota ma tau homoi-homoiika ma lifunu wodiai ibooto de to una ai ngofaka o domoro ai romanga, o Abirama, una wohonenge. De ika-ika ma oraha o Hiele o kota o Yeriko ma dadaduhu ma ngorana ma dadatoko wohipasi ibooto de ai ngofaka ma baha ai romanga, o Segubu, unangoo wohonenge. Hokogea idadi duru imaketero abe hoka ma dihira Ma Jou o Yawe ai hingahu manga tofora o Yosuaika abe ma titi o Yeriko ma kota.