1 Kokoano 13 - Ma Jou ai Demo-demo o Totobelohoka

Ma Jou ai uru ma dodofanga wato o Yerobeama ai huhuba ma ngi iharo-harongo ahao Ma Jou wohibinaaha

¹ De duru ma oraha gea Ma Jou o Yawe ai hohowono ma hingahu wihidoaka ai uru ma dodofanga womatengoika, abe ai hohowono ma demo gea kiani wapake o Yerobeama ai huhuba ma ngi iharo-harongika. De kiani ma hingahu ma demo gea wohidemo duru o huhuba ma ngi ma himangoka abe naga o Yerobeama wodiai o Betele ma kotaka. De gea Ma Jou ai uru ma dodofanga naga o Yehuda ma tonakoka ho wosobo woiki o Betele ma kotaika. De ka de womahiadono o huhuba ma ngiika o Beteloka gea de o Yerobeama naga womahigokoino genangoka duru ai huhuba iharo-harongo ma ngi ma himangoka abe una womahidiaioka o huhuba abe bootino ahao wahihuba.

² De Ma Jou ai uru ma dodofanga abe woboaino de duru de ai ilingi ma amokiye Ma Jou o Yawe ai hohowono ma demo wohidemo, wato, “Nototoihene ngona, o huhuba ma ngi, naa totemo ngona o huhuba ma ngiika abe Ma Jou o Yawe ai hohowono ma demo ma dumutu inidaene! Una wato ahao o ngofaka o nauru womaboa ai romanga o Yosia de una gea o Dautu ai toforauku. De o Yosia gea una ahao wahihuba ani lokuoka ona abe yatobaleleani o popangaoika. Abe ona gea yodiai de ihigoko o popangao ma ngi o kiaka dika naga o tonaka itoporoniye. Ona gea abe yoleleani o popangao wahidadi ai huhuba abe womahihuba ani lokuoka. De to ona manga kobo-kobongo abe ma dihiraino yoleleani o popangaoika manga kobo-kobongo gea wakokitufuku to ngona ani lokuoka.” Hokogea Ma Jou o Yawe ai hohowono ma demo o haro-harongo ma huhuba ma ngiika.

³ De duru ma oraha gea Ma Jou wihidoaka ai uru ma dodofangika gea o dodunguu moi abe ka idadi wodiai ho ka wotemohi o Yerobeamika ai himangoka wopoaka, wato, “Yerobeama, hokonaa Ma Jou o Yawe wohidaere ani huhuba ma ngiika. Ena gea ahao ipelaka hinooto de o huhuba ma kafo abe naga ma lokuoka ipurarahuku ma kafo gea!”

⁴ De naa o Yerobeama woihene Ma Jou ai uru ma dodofanga ai boaka ma demo abe wohidumutu o huhuba iharo-harongo ma ngiika abe naga o Beteloka. De ka de o Yerobeama woihene ai demo gea de una wingamo o uru ma dodofangika. De ma oraha gea o Yerobeama una ma gogiriaka wokarajaanga de wodiai o huhuba ho ai giama watodokanino wagoraka ai huhubaino de witumutu Ma Jou ai uru ma dodofangika gea. Hokogea ai giama wagoraka de wopoaka ai duduhunika de ai huhuloko onangika wato, “Niwitaokoka o nyawa gea!” Masara ka de o Yerobeama wopoaka hokogea de ai giama abe witumutika ena gea idadioka ihelukoka angamoi itirihoka dika hiadono ko idadiokaua ai giama wapuka.

⁵ De o haro-harongo ma huhuba ma ngi gea ipelaka hinooto de o huhuba ma kafo abe naga ma lokuoka ipurarahuku. Hokogea idadi duru imaketero abe hoka Ma Jou o Yawe ai uru ma dodofanga ai hohowono ma demo wohidumutu enangika.

⁶ De ahao ma koano o Yerobeama womagahoko Ma Jou ai uru ma dodofangika gea, wato, “Duru tomagahoko ngona nohigahoko ani Jouika la ahi giama idadi hoka ma dihirali.” Hokogea womagahoko de Ma Jou ai uru ma dodofanga widemo Ma Jou o Yaweika de ka itodokanino de ai giama itogumoka ho idadiokali hoka ma dihirali.

⁷ De o koano gea wiahoko Ma Jou ai uru ma dodofangika, wato, “Abeika naino nohiniiki ahi tauika la holomo ahi tauoka de ahao utu naga ahi hidoaka ngonaika.” Hokogea o Yerobeama wiahoko Ma Jou ai uru ma dodofangika.

⁸ Masara una wipaluhu o koanoika wato, “Ngaro ani hidoaka naga ngohino ka hiadono ani kiahonanga naregu hinooto de ma regu moi nato nohihidoaka ngohino, ngaro hokogea ma, ngohi ko toniniikua ani tauika. De ngaro ani akere eko ani inomo ma enangoo ko tolomua de ko tokerua.

⁹ De hokogea toluku todiai angamoi Ma Jou o Yawe wohihibehehongoka wato, ‘De ngona ma oraha ahi hohowono ma hingahu ngona nadofangika de ko idadiua nolomo de ko idadiua nokere de ko idadiua ma oraha nolio de naniiki ma ngekomo abe ma dihira noboa genangino.’” Hokogea Ma Jou ai uru ma dodofanga wihiree-reeika ma koanoika.

¹⁰ De ahao una wosobo de waniiki o ngekomo moioli la wolio o Yehuda ma tonakika de ma ngekomo abe ihira wapake abe ma oraha woiki o Betele ma kotaika gea ko wapakeokaua.

O Pasala 13:11-32 ko atailakouahi Ma Jou ai uru ma dodofanga womatengo woeluku

¹¹ Ma oraha gea naga womanoa o Beteloka Ma Jou ai uru ma dodofanga womatengo abe iwiperekioka. De una gea ai ngofa-ngofaka ona naga ma kotaka ma wange gea ho iwimake Ma Jou ai uru ma dodofanga gea abe o Yehuda ma tonakino woboa. Ho ona yolioino manga baba ai tauino de yoade-ade unangika mata-mata abe kangano o Yehuda ma nyawa gea wodiaioka de ai demo mata-mata abe witemo manga koanoika.

¹² De yoade-ade ipaha de ahao manga baba waleha wato, “Ma Jou ai uru ma dodofanga gea kangano ma oraha wosobo de ma ngekomo o kiaka waniiki?” Ho ona ihidaere manga babaika ma ngekomo abe o Yehuda ma nyawa gea waniiki.

¹³ De ahao una wahuloko ai ngofa-ngofakika wato, “Ngini niloiki de nihipasanga ma gogogere ahi keledai ma poretuku la ka idadi tosobo.” De ona yaniiki manga baba ai demo gea ho una wofarene ma keledai ma poretuku.

¹⁴ Wofarene ipaha de ahao una wosobo wihidoduruika unangika. De ipahaino widaene abe una gea naga wogogeruku o gota ma amoko ma timiuku. Ho womahitigika unangika de wileha wato, “Ngona naa nagoungu Ma Jou ai uru ma dodofanga gea abe o Yehuda ma tonakoka de naino noboa?” De una wipaluhu wato, “Igoungu, ngohi naa.”

¹⁵ De ahao una wiahoko unangika wato, “Ngohi toigo la ngona nohiniiki ahi tauika la ka idadi homakutuono holomo.”

¹⁶ Masara una wipaluhu wato, “Tomahilooa masara ko idadiua toniniiki ani tauika de ko idadiua tolomo eko tokere ma tonakoka naa.

¹⁷ Angamoi Ma Jou o Yawe Una duru wohihitiari wato ko idadiua o inomo tolomo de o ngokere tokere ma oraha ngohi nenangoka. De nagali abe wohihuloko wato ma oraha tosobo tato tolio ahi tonakika de ahao ko idadiua taniikoli ma ngekomo gea abe toboaino masara kiani o ngekomo moioli taniiki la tolioika.”

¹⁸ De ahao una abe iwiperekioka witemoli wato, “Koua, ngona kiani nohiniiki ahi tauika, angamoi ngohioo Ma Jou ai uru ma dodofanga tomatengo abe hoka ngonali. De kangano Ma Jou o Yawe wihidingoto ai malaekata womatengo de ai pareta ma demo ngohino. De to Una ai demo wato, ‘Una gea ngona kiani niahoko la ngini nimakiniiki nilio ani tauika de genangoka kiani nimakutuono niolomo.’ Hokogea nanga Baluhu wohihuloko ngohino.” Masara abe iwiperekioka una gea ai demoino de wieluku.

¹⁹ De una abe o Yehuda ma tonakoka de waino woboa una woihene ai dodiawo ai demo gea de ahao ka winiiki dika ai tauoka. De ipahaino yomahiadono ai tauoka de yomakutuono yolomo de yokere genangoka.

²⁰ De abe ma oraha ona yahinooto yogogerukuohi ma mejaka de ka itodokanino Ma Jou o Yawe wotemo de wapake iwiperekioka gea ai uruino.

²¹ Ho witemo de ai ilingi ilamokiye ai dodiawoika gea wato, “Abeika ngona nototoihene Ma Jou o Yawe ai demoino naa. Angamoi ngona duru nilawana Unangika ma titi ko iwa ani hingounu ai pareta ma demoika.

²² Abe ngona naa nolioino nenangino de ahao ka nolomo de nokere nenangoka. De ngaro Una duru wonihitiari wato ko idadiua nenangoka nolomo de nokere masara ka uku dika nodiai. Ho mangale ma titi ngona nilawana hokogea Una wato ahao ma oraha ngona nohonenguku de ani honenge ko inilungunua ani totofora manga honenge ma ngioka.” Hokogea Ma Jou ai dodaere ma demo unangika.

²³ De ahao abe ma oraha ona yolomo ibootino de una abe iwiperekioka wale ai dodiawo ai gogogere de gea wohipasanga ma keledaiuku la ka idadi o Yehuda ma nyawa gea wosobo wolioika.

²⁴ Ho Ma Jou ai uru ma dodofanga gea wofarene ma keledai ma poretuku de wosobo. Masara ai dodagi ma gogiriaka de naga o fuhuku ma boki o singa iwibaata unangika de iwihohonenge. Iwihohonengoka de ai honenge naga imaiduiha dika ma ngekomoka, de ma keledai de ma singa gea imaokoino dika ai honenge ma datekoka.

²⁵ De ahao naga o nyawa yotagi-tagi yoboa ma ngekomino gea de ka itodokanino ona yamake ai honenge ma ngekomoka de ma singa enangoo yamake ai honenge ma datekoka. Ho ona yogila-gilali iwiperekioka gea ai kotaika de yoade-ade mata-mata abe yamakeoka.

²⁶ De ahao una iwiperekioka gea unangoo woihene manga ade-ade ma demo. De una wotemo wato, “Abe ma honenge gea ngini niamake, gea Ma Jou o Yawe ai uru ma dodofanga womatengo abe wilawana Unangika. Ho maraioka Ma Jou ka wihidoaka dika o singaika la ka idadi iwibaata de iwihohonenge. Angamoi gea imakiniiki de Ma Jou ai hitiari kangano unangika.”

²⁷ De ahao una iwiperekioka gea wahuloko ai ngofa-ngofakika wato, “Ngini niloiki nihipasanga o gogogere ahi keledaiuku.” De ona yaniiki manga baba ai demo ho iwihidiai ai keledai la ka idadi una wosobo.

²⁸ De una wosobo woiki hiadono wamake ai dodiawo gea ai honenge ma ngekomoka, de ka nagahi ma keledai de ma singa imaokoino gea ma datekoka. De barikua ma singa gea itobaolomo o roehe masara ko aolomua una gea ai honenge de ko abaatua ma keledaiika.

²⁹ Ho una iwiperekioka gea woiki de wagorakiye ai dodiawo ai honenge de wakelengauku ai keledai ma poretuku. De ahao wosobo watuda-tuda ai keledai de wogilio ai kotaika la ka idadi wigari de wilungunu ai dodiawo gea.

³⁰ De gea igoungu abe wipohuku to una ma hirete ai lungunoka de ona iwigari ma titi una ato, “Hiokoo, mia gianongoru naa wopahaka!”

³¹ De wilungunu ipahaino de ahao una iwiperekioka gea wotemo ai ngofa-ngofakika wato, “Ahao ma oraha ahi baha adonoka de ngini kiani nihilungunu duru Ma Jou ai uru ma dodofanga gea ai datekoka.

³² Angamoi duru tonganono de tohioriki abe to una gea ai demo ahao idadi imaketero hoka wotemoka. Abe una nengokadauino de wadofanga Ma Jou ai demo ma titi ma huhuba ma ngi gea o Beteloka wato ahao kiani Ma Jou ai hohowono adaene enanguku. De nagali Ma Jou ai hohowono ma demo ma titi ma huhuba ma ngi utuoli dau o Samaria ma kapo-kapongoka, de ai demo enangoo kiani idadi imaketero hoka wotemoka.”

³³ Hokogea idadi ma oraha Ma Jou ai uru ma dodofanga wihingahu wihiree-reeika o Yerobeamika ai himangoka abe ahao Ma Jou ai hohowono idadi onangika abe yomahuba-huba o popangaoika. De ngaro hokogea o Yerobeama woihenoka masara ai datoro ma dorou gea una ko waturuurua. De una ahao naga utuohi o nyawa yowoe abe, wadingakoka o karajaangika gea la ai kokawaaha yahidemo manga popangaoika. De onagona dika abe yoigo o karajaanga gea de onangoo ahao o Yerobeama wahidadi o pangao ma hidemo.

³⁴ De hokogea o Yerobeama ai howono hiadono ona to una ai tauoka de imahikauku ka hiadono yolape-lapeuku Ma Jou wahohowono de o hone-honenge hiadono ma bahaika ona mata-mata wahiofioka o dunia ma lokuino.