LU:KKC 7 - ANU LUGOD N. T. (BSI)

Jisubv Roman Migom Ager Gerncdok Ager Gerya:ncdcm Csa:mokunam

¹ Tani:kvdv:dc taddopc Bvk agom appv:dcm lungapge:la Bv Kapernaumpc gvangkang.

² Cdcmpidodcm mimagmonc lvngkolok mogcbonc akolokkc pagboko airu:pc bvkkcpc aya:namko dunganc, ramna bv sipcmna idungai.

³ Bv cdvlo Jisukc gvnamcm tadbegtoji, bv Bvkkolo:pc Jiwukvdv:dok abv:ncko mclvgto, bvk pagbodcm csa:moteikuka cmna lulvgla.

⁴ Odokkc cdvlo bulu Jisukc kcra:do:pc gva:tonc, bulu kumna:sola: lumo lumola Bvm luto, scmpc lula, “Bv nom cdcm bvk lcga:pc imola:ncko, Kapila:nc bv ngoluk opvnscm aipc mc:dag,

⁵ odokkc ngoluk lcga:pc bv kumko okumcm motung.”

⁶ Odokkc Jisubv buluk lcdulo gvmvnkang. Bv okumdo:pc pvngangarma:dado, mimag monc lvngkolok mogcboncdc Bvkkolo:pc ajonko mclvgto, scmpc bvm lula, “Ru:tuma, no avyc ngasotngayotyok, kapila:nc ngo ngok okum ara:so:pc nom gva:mola:mang;

⁷ cdcmpilangvng gno nokkolo:pc gvpcnc cmna mc:sumang. Ckvdaggom agomdcm lutei, odokkc ngok pagbodcm csa:moteikupcn.

⁸ Kapila:nc ngo amikc ilang gvla:ncdok kcvglo du:nc tani:ko, ngok kcvglo mimag monnc dung odokkc ngo akoncm ‘Gvkang,’ cmna lumvlo bv gvdag; odokkc akoda, ‘Gva:tok,’ cmmvlo bv gva:dag; odokkc pagbodcm, ‘Scm itok,’ cmycmvlo odo bv cdcm idag.”

⁹ Jisubv cdvlo cdcm tattoji, Bv tadngaksukang, odokkc nge:latsulangkula Bvk lcdulo yadmvnna yadkumsunc tani:kcrc:dcm luto, “Ngo nolum lubidung Israelkvdv:dok ara:do:sinci scmpc mc:jvgncm pangkvmang.”

¹⁰ Odokkc sc:kobulum mclvgtagaji okumdo:pc gvlatkunamc, bulu pagbodcm csa:dokupc ka:begsutoku.

Jisubv Tumbo Nc:nglok Awoko Darobmokunam

¹¹ Odok lcddardo Bv Nain cmnam nogorkolo:pc gvkang, odokkc Bvk ri:tomnam tani:kvdv:dc:la, bojcrungko tani:yc Bvk lcdulo gvmvnkang.

¹² Bv nogordok yabgo anindo:pc pvnga:nammc, ka:toka, sinc tani:ko jo:bomna gvdagai, bv ancdok awo atcrai, odokkc bv tumbokai; odokkc nogordokkc bottcru:nc tani:yc kcrcngko bvk lcdulo gvmvndagai.

¹³ Odokkc Ru:tumbv bvm ka:begnammc, bvm aya:pc mcngkang odokkc bvm luto, “Kabyok.”

¹⁴ Odokkc Bv gva:la jo:nanc ra:sagdcm gakkvto, odokkc jo:nckvdv:dc aso:pc kvgcmna dagla dungkang. Odokkc Bv luto, “C:i ya:meya, ngo nom ludung, darobtok.”

¹⁵ Odokkc sinc tani:dc darobla tedtungkang, odokkc agom lurobbomkang. Odokkc Bv bvk ancdcm bvm bilattoku.

¹⁶ Odo appvngc pcssamkang; odokkc bulu Ru:ncpvncmc aipai cmto, scmpc lula, “Bottcru:nc lungorluncko ngoluk ara:so lenkang!” Odokkc “Ru:ncpvncbv Bvk tani:kvdv:dcm kangkapc gvito!”

¹⁷ Odokkc Bvk cdc agerdok agomdc Judia: appv:do odokkc tolobolopc among appv:do pvngapkang.

Jo:n Baptismo Binckolok Lutad Lubin Kvdvng

¹⁸ Jo:nkc agom tadla gvmvnnckvdv:dc cdc appv:dcm bvm lungapbitoku.

¹⁹ Odokkc Jo:nbv, bvk agom tadla gvmvnnc anyiko gogangge:la, Ru:tumkolo:pc bulum mclvgto, scmpc lula, “Nouv:yc gvpcnc Bv:n, cdcma:m ngolu anguko toya:la ka:ycnci?”

²⁰ Odokkc tani:kvdv:dc Bvkkolo:pc gvpv:nammc, bulu luto, “Jo:n Baptismo bincbv nokkolo:pc mclvgtung, scmpc lula, ‘Nouv:yc cdc gvpcncdcn, cdcma:mvlo ngolu sc:koiycm toka:la ka:ycnci?’ ”

²¹ Odo ayirdo Bv bojcrungko kinamcnlang sibc:bclc:la sinncm odokkc aima:nc yallom mcnpagamla dungai, odokkc bojcru:lokkcm migluncm ka:begmotoku.

²² Odokkc Bv bulum lubito, “Gvlangkula Jo:nmc lubita:kuk nolu oko okkom ka:begtonc odokkc tadbegtonc: miglunc kvdvngc ka:begamtoku, lambc gvla:ma:nc kvdvngc lambcm gvlangamkangku, ngero:ro:namkvdvngcm narcngammotoku, odokkc ru:benckvdv:dc tadbegamkangku, sinckvdv:dcm turmotungku, opankvdv:dcm tadponc lutadcm bulum lubidung.

²³ Odokkc sc:kobvi ngokkolo invgsikorko pa:ma:nc bv gerncpu:nc.”

²⁴ Jo:nkc agom lutadnc kvdv:dc cdvlo gvkangkuji, Bv Jo:nkc agomcm yadkumsunc tani:kvdv:dcm lubirobbomkang: “Yumrangolo nolu okkom kangkapc gvlenkan? Csarc yula jinnc dorbumkonci? Cmpcmvlo okkom nolu kangkapc gvlenkan?

²⁵ Rcmagu:pc attar gcncbomnc tani:koyc? Ka:toka, sc:kobulu v:rpongkvrpc attarcm gcdagbomdagnc odokkc gclvngcnyo gcmanna du:nckvdv:dc migom okumlo du:dag.

²⁶ Cmpcmvlo nolu okkom kangkapc gvlenkan? Agom lungornckoi? C:i, ngo nolum lubidung, odokkc lungor lunckoncmyam bottaya:ncko.

²⁷ Bv cdcna sck agomcm adla lc:tu:ji: ‘Ka:tok, ngok agom lubincdcm nom mcpo:lvgyc, Sc:kobv nok lambcdcm nom gvpo:la mosv:biycpc.’

²⁸ “Nolum ngo lubidung, nc:ngkvdv:dok onamlok sc:kosin Jo:nmc bottaya:ncmang; ckvdaggom Ru:ncpvnckc Migomdoko amo:do adji:loksin adjincdc bvmyam bottaya:nc.”

²⁹ (Cdvlo bulu cdcm tattoji appvng tani:kvdv:dc odokkc migom murkong urkumnckvdv:dc Ru:ncpvncbv aropc kcbang ba:nc cmna lula, Jo:nkokki baptismo la:to;

³⁰ ckvdaggom Parisi:kvdv:dc:la lujvgluro lunc kvdv:dc Ru:nckc mcngkamdcm buluk ayv ayvkcpc lupakto; bvkkokki baptismo la:ma:pc.)

³¹ “Ngo o:kokki sc opvnscm luyv:suycn cmpcmvlo, odokkc bulu kapincpc idang?

³² Bulu attar koko mo:di:lok tedla du:nc ko:kangckkcmpc idag odokkc akoncm akonc gokka:mvnsula du:ncmpc, ‘Ngolu nolum tu:lung mudbito, odokkc nolu so:tomang; ngolu kabancm banto, odokkc nolu kaptomang.’

³³ “Kapila:nc Jo:n Baptismo bincbv pitang doma:pc odokkc atvko tv:ma:pc gvto; odokkc nolu ludag, ‘Bvkkc uiyc dung.’

³⁴ Tani:kc Awodc donam tv:namcm ila gvto; odokkc nolu ludag, ‘Ka:toka, dorvdonyoncko odokkc apo: tvngke:ncko, migom murkong urkumsunc kvdv:doklang papi:kvdv:dok ajonkonc!’

³⁵ Ckvdaggom kinnamcm bvk ommang appv:dokki aropakpc ainc cmna ludag.”

Jisubv Simon Parisi:kc Okumdo

³⁶ Parisikvdv:dok akonc Bvm bvk lcdulo apinko domvndopc gogsuto, odokkc Bv Parisi:kvdv:dok okumdo:pc gvto, odokkc tcbuldo Bvk tedpckolo tedangkang.

³⁷ Odokkc ka:toka nogordok nc:ng akonc, sc:kobv papidaganc, Parisi:kvdv:dok okumdo Bv dung cmna kinna:yam,

³⁸ Kamponc vlvng ctungkolo yonsunam namponc tulangcm boma:to, odokkc Bvk lamkubo bv dagge:la, kabla: kabla, Bvk alcdcm bvk miksidokki jubommokang, odokkc cdcmbulum bvk tukkudok dumvddokki nodpu:bito, odokkc Bvk alcdcm dosukbito, odokkc namponc tula:dokki cdcm yonbito.

³⁹ Cdcmpidodcm sc:ko Parisi:dc gogkaji Bvm cdcm ka:la, bv avdc lusuto, “Sc tani:sc lungor luncka:mvlo, sc nc:sc kapinc nc:ngkoji kinya:pc sc:ko Bvm upkvdu:ji, kapila:nc bv pa:pkancko.”

⁴⁰ Odokkc Jisubv lulatsula lubito, “Simona, ngokkc nom o:kaiko lubipcnam dung.”

⁴¹ “Ammem murkong bipo:nc amikolokkc murkong langgcsunc anyiko dungai; akonc lvngko adoli: anggoko langgcsuto, odokkc akondc yi:ngo adoli:ko.

⁴² Cdvlo bulu dorra:tokuma:ji, bv anyipakdcm mc:yinsuto. Su:pak bv sc:kom abaya:pc aipc mc:ycn?”

⁴³ Simonbv luto, “Cdcm, ngok mcngkvpc, bv sc:kom abaya:pc mc:yinsutoji.” Odokkc Bv bvm lubito, “No arrom lugabto.”

⁴⁴ Odokkc nc:do:pc nge:la kangge:la Bv Simonmc luto, “No sc nc:scm ka:dang? Ngo nok okumso:pc gva:to cmpige:la bvk miksikokki ngok allcm bv jumoto odokkc cdcm bvk dumvtdokki tidpu:bito.

⁴⁵ No ngom dosuktomang, cmpige:la ngok gva:do ayirdokkc bv ngok allcm dosukngasutomang.

⁴⁶ No ngok tukkuscm tulangko pvrumtomang, cmpige:la bv ngok allcm namponc tulangcm yonnvgto.

⁴⁷ Cmpige:la ngo lubidung nom, bvk pa:pkvdv:dcm, bojcrungko dungai, mc:yinamsubito, kapila:nc bv airu:pc aipc mc:to; cmpige:la sc:kom adjio:ko mc:yinsutonc, adjio:ko aipc mc:dag.”

⁴⁸ Odokkc Bv bvm luto, “Nok pa:pkvdv:dcm mc:yinsubitobong.”

⁴⁹ Odo sc:kobulu tcbuldo dungaji Bvk lcdulo, buluk buluk ara:lo luka:mvnsurobkang, “Sc sc:kobvn, pa:bcmsin mc:yinsunckon?”

⁵⁰ Odokkc Bv nc:dcm luto, “Nok mc:jvgdc nom moturto; mc:po:pc gvkangkuk.”