LU:KKC 4 - ANU LUGOD N. T. (BSI)

Jisumc Ka:bomc:bomoka:la Kangkvnam

¹ Odokkc Jisub, Angunnc Yalodc pa:la:yam Jordandokkc gvlattoku odokkc yi:pi: longckopc yumra:lo Yalodc gvbola du:to,

² Uidokki ka:bomc:bomoka:la kangkosula. Odokkc Bv odo longckvdv:do okkomsin dotomang; odokkc cdcbulu gcngapnammc, Bv kcnongkang.

³ Uidc Bvm luto, “No Ru:ncpvnckc Aowomvlo, sc vlvngkvdv:scm pita:pc ika:langka cmna lulvgkvka.”

⁴ Odo Jisubv Bvm lulatsutoku, “Scmpc adtak ‘Taniyc pitangongkokki turma:yc.’ ”

⁵ Odokkc uidc Bvm gvbokang, odokkc migyaplo mo:pvsok migom doko appv:dcm lcngkanto,

⁶ odokkc uidc Bvm luto, “Nom ngo sc appv:sok ilang-gvlangcm odokkc odokbuluk mc:bomsunamdcmci biyc, kapila:nc cdcm ngom bitung, odokkc ngo cdcm sc:kom bilv:dagnc biyc.

⁷ No ngom, kummvlo, cdc appv:dc nokkcpc ingapyc.”

⁸ Odokkc Jisubv bvm lubito, “scmpc adtak, ‘Nok Ru:ncpvncdcm no kumnang, odokkc Bvklcgangong no agercm gerrangka.’ ”

⁹ Odokkc Bvm Jerusalempc gvbokang, odokkc kumko okumdok mv:dum tu:bokto tedmoge:la Bvm luto, “No Ru:ncpvnckc Aowomvlo, avyc sokkc kcdledsukvka;

¹⁰ Kapila:nc scmpc adtak: ‘Bvk taycng among lutad lunckvdv:dcm nokkolo:pc mclvgyc, nom ka:sv:dopc.’

¹¹ “Odokkc ‘Buluk alakkvdv:dokki nom bosa: ycpc, ckvma:mvlo no vlv:lo nok allcm otvrsuyc.’ ”

¹² Odo Jisubv bvm lulatsutoku, “Scmpc lutag, ‘Nok Ru:tum Ru:ncpvncmc no luyo-luka:la kangkvyoka.’”

¹³ Odokkc uidc appvng ka:bo mc:bomokangcm anka:la kangaptonc, Bvkkodokkc bv gvpakkang lckoda ankang kangkvnanc ayirko pangkuma:sisscm.

Jisub Galildo Bvk Ager Gerrobnam

¹⁴ Odokkc Jisubv Yalodok ilanggvlangki Galilpc gvlattoku, odokkc Bvk ainc agomc mo:tak appv:do pvngapkang.

¹⁵ Odokkc Bv buluk kumko okum okum appv:do, appvngc aidag cmna lungapdopc luyirto.

Jisumc Najaretdo Lupaknam

¹⁶ Odokkc Bv Najaretpc gvtoku, okolo Bvm usa:basa:toji; odokkc Bvk gvitnamdcmpc, kumko okumpc gvkang, ager germa:pc yodla du:do longcdo.

¹⁷ Odokkc Bv popc cmna dagrobkang; odokkc scmpc adnamdcm pa:to,

¹⁸ “Ru:tumkc Yalodc ngokkolo dung, kapila:nc Bv ngom opannckvdv:dcm tadponc do:yv:dcm lutaddopc vrtung. Bv ngom makana:lo lvgla lc:namkvdv:dcm mclvgkunamcm odokkc miglunckdv:dcm ka:begkunamcm lutaddopc ngom mclvgtag, sc:kobulum nv:jcmna lc:tagnc bulum motudokupc,

¹⁹ Ru:nckc torvgsukunanc dv:tagdcm lutadbidopc.”

²⁰ Odokkc potindcm Bv tamsuptoku, odokkc cdcm igur gvgurnckvdv:dcm bitoku, odokkc tedtu:to; odokkc kumko okumdok du:nc appv:dc Bvggongkolo:pc ka:takkang.

²¹ Odokkc Bv bulum lurobbomkang, “Silo noluk tadde:pc astrong agomdc lukamdcmpci ikang.”

²² Odokkc Bvm appvngc aidag cmna lukang, odokkc Bvk nappa:dokkc lennc agomkvdv:dcm tadla tadngagamsukang; odokkc bulu luto, “Sc Josepkc awodc:ma:lang?”

²³ Odo Bv bulum lubito, “Mc:moru:ma:pc no ngom sc luyv:sula lunamscm luycrung, ‘C:i kinam ka:na, no avycm ka:pvtsutokuka; Kapernaumolo no okkom ika cmna ngolu tattonc, sc nok avkc among do:lu:so:sin itoka.’”

²⁴ Odokkc bv luto, “Aropakpc, ngo lubidung, oko lungor lunncmsin bvk avkc amo:do torvgsumang.

²⁵ “Ckvdaggom aropakpc, ngo nolum lubidung, Elija:kc du:dodcm bojcrungko tumbo nc:ngc Israeldo dungai, do:mvrtc dv:tag awumkolang po:lo pvkcngko cdvlo pcdongc otoma:nc, cdvlo among appv:do bottaru:nc dopa:tv:pa:ma:pc ika:nc;

²⁶ odokkc Elija:mc sckkolo:pcsin mclvgtomang cmpige:la Jarephatkollo:pc mclvgtonc, Sidon amo:dop, tumbo nc:ng akolowo:pc.

²⁷ Odokkc ngero ro:nam bojcrungko dungai Israeldo lungor lunnc Elija:kc du:dodcm; odokkc bulukkolok sc:komsin mopvtokumang, cmpige:la Siriangkolok Namano:mc mopvtoku.”

²⁸ Cdvlo bulu cdcm tattoji, kumko okumdok du:nc appv:dc aglvng sangapkang.

²⁹ Odokkc bulu darobla Bvm nogordokkcm solennvgto, odokkc oko adi:do buluk nogordcm motagaji odo adi:dok tu:bokto:pc sosa:bomkang, Bvm bulu kcvgbo:pc nv:ledlvgpc cmna.

³⁰ Cmpige:la buluk arangv:dok Bv gvlenna gvpakkang.

Aima:nc Yalopa:nam Tani:dc

³¹ Odokkc Bv Kapernaumpc gvto, Galildok nogordo:pc. Odokkc Bv bulum yodla du:do longcdo luyirla dungai;

³² Odokkc Bvk luyirnamdcm tadla tadngaksukang, kapila:nc Bvk gomug kvdv:dc ilang gvla:nam kadagai.

³³ Odokkc odo kumko okumdo aima:nc Yalokanc uiyc pa:nam tani:ko dungai; odokkc bv bottapakpc jc:la lukang,

³⁴ “Najaretolok Jisuno! Okkom no ngolum iycn, Aycv? No ngolum mokekapc gvdu:nci? Ngo kindag no sc:koji, Ru:ncpvnckc Angunncdc.”

³⁵ Cmpige:la Jisub Bvm morvdla luto scmpc lula, “Aso:pc du:tok, odokkc bvkkolokkc gvlentok!” Odokkc buluk ara:do uidc bvm crtapnammc, bv bvkkolokkc gvlento, bv atvkosin mojokmorokma:pc.

³⁶ Odokkc bulu appv:dc ka:la kangaksukang odokkc akonc akoncm luka:mvnsuto, “Kapinc agomcncm sc? Kapila:nc Bv ilang gvlangki odokkc migangki aima:nc Yalokvdv:dcm lutoncm, odokkc cdcbulu gvlenamkang.”

³⁷ Odokkc Bvk agomkvdv:dc appvng mo:taklo:pc dungo:ycgong appv:do pvngapkang.

Jisubv Tani:ycm Bojcrungko Csa:mokunam

³⁸ Odokkc Bvk darobla kumko okumdcm mcpagla gvla, Simonkc okumdo:pc gvangkang. Odo Simonkc ayodc kvnggv:pc ramla dungai, odokkc bulu Bvm bvk lcgangc kumna:sola: luto.

³⁹ Odokkc Bvk kcra:do dagkang odokkc ramnamdcm morvdto, odokkc cdc ramnamdc aikangku; odokkc oddung bv darobla bulum bv ila:sa:la bito.

⁴⁰ Cdcmpidodcm do:nyidc owa:pc ayirdo atv kinam ramnamko du:nc appv:dcm bvkkolo:pc gvangamboto; odokkc Bvk alakki appv:dcm riyitbila bulum csangammotoku.

⁴¹ Odokkc uiycsin bojcru:lokkc gvlenamkang, “No Ru:ncpvnckc Awodc! Cmna jc:la jc:la.” Cmpige:la Bv bulum morvdto, lcga:dc bulu kindagai jc Bv:yvng Kristobvai.

Jisubv Kumko Okumdo Lutad Lunam

⁴² Odokkc ro:dcm pvang pvnamc Bv gvpaktoku odokkc ronggamo:nc mo:di:kolo:pc gvkang. Odokkc tani:kvdv:dc Bvm mala gva:to, odokkc bulum Bv mcpakyoka cmna kumna luto;

⁴³ ckvdaggom Bv bulum luto, “Ngo akon nogorkvdv:do:sin Ru:ncpvnckc migom doko mo:pvdok tadponc lutaddcm lugo:ru:yc; kapila:nc ngom odok lcgangci mclvgtungai.”

⁴⁴ Odokkc Judia:dok kumko okumkvdv:do luyirbigo:to.