JO:N 13 - ANU LUGOD N. T. (BSI)

Jisubv Bvk Agom Tadjvgla Gvmvnnc Tani:kvdv:dok Allcm Vrbinam

¹ Cdcmpc idodcm Gvbo:la gvla dopun dojardok po:pcbong, Jisubv Bvk mo:pvsokkc Abukoto:pc gvpakkunam ayirdc aninka:bong cmna cdvlo kintoji, mo:pvso sc:kobulu du:nc cdcmbulum ayangge:la, Bv bulum du:tcrdo:pc aipcmc:to.

² Odokkc dodo tv:dodcm Simonkc awo Iskaroitkc asindo cdvlo uidc Bvm mirupc topakpc cmna, asindo angka:ji,

³ Jisubv, Abudc Bvk alagdo appvngcm bitung cmna kinna:yam, odokkc Bv:jc Ru:ncpvnckotokkc gvnnc odokkc Ru:ncpvnckoto:pc gvdagku cmna,

⁴ dokodokkc darobkang, Bvk gcnam attarkvdv:dcm angupc lcngge:la odokkc Bv avyc dumcrkokki yc:rcgsuto.

⁵ Odokkc soliangkolo asscm pvlvgto, odokkc agom tadjvgla gvmvnnc tani:kvdv:dok alckvdv:dcm vrrobbomkang, odokkc cdcmbulum Bvk yc:rcgsunanc dumcrdokki notpu:robbomkang.

⁶ Bv Simon Pitorkolo:pc gva:to; odokkc Pitorbv Bvm luto, “Ru:tuma, no:yc ngok allcm vrdon?”

⁷ Jisubv bvm luto, “Ngo okkom idu:nc no su:pak kinmang, cmpige:la lcdupc no mcngkinycpc.”

⁸ Pitorbv Bvm luto “No cdvlosin ngok allcm vryoka.” Jisubv bvm lubito, “Ngo nom vrbima:mvlo, ngokkolo nokkc okkosin kamang.”

⁹ Simon Pitorbv bvm luto, “Ru:tuma, ngok allo:scmmang ngok alakvdv:scmsin odokkc ngok mittukscmsin!”

¹⁰ Jisubv bvm luto, “Sc:kobv vrsutagji bvkkc allo:dc:ma:mvlo vrsupcnamc kama:bong, cmpige:la bv appv:dc narc:dagbong; odokkc nolu narc:dag, ckvdaggom noluk appv:dc:mang.”

¹¹ Kapila:nc Bv kindagai sc:kobv mirupc tolvgycji, cdcmpilangv:ng Bv luto, “Nolu appv:dc narc:mang.”

¹² Cdvlo Bv buluk alckvdv:dcm vrtonc, odokkc Bvk gcnam attarkvdv:dcm gctokunc, odokkc Bvk dungkolo du:tokunc, Bv bulum tawuto, “Nolu kindang okkom ngo nolum itoji?

¹³ Nolu ngom Luyirnclang Ru:tumc cmna gogdag; odokkc nolu goggabdag, kapila:nc ngo cdcmv:pc innc.

¹⁴ Ngo cdcmpcmvlo, noluk Ru:tumclang Luyirncmvlo, noluk alckvdv:dcm vrbitomvlo, nolusin akonkc allcm akonc vrbipa:do.

¹⁵ Kapila:nc ngo nolum lcngkanko ibito, nolujen ngok nolum ikampc iycpc.

¹⁶ Aroru:pc, aroru:pc, ngo nolum lubidung, ager gerya:nckonc bvk ru:tumdcm bottcya:ncmang; cdcmanggom sc:kobvm mclvgtagnc mclvgncdcm bottaya:mang.

¹⁷ Nolu sc agomkvdv:scm kinmvlo, nolu cdcmbulum imvlo gernc.

¹⁸ “Ngo noluk appv:dok agomcm lumang; ngo kindag sc:kom balentagji; cdc lujvgluro adnam potindok lukampc iycpc cmna. ‘Sc:kobv ngok pitangcm dotonc bvk alc lcddom ngok lukamdcmma:pc ke:sa:to.’

¹⁹ Ngo nolum lubidung su:pak, cdcmpc cdc ima:dopc, jc cdvlo cdc iycnc nolu mc:jvgycpc ngo:jc Bv cmna.

²⁰ Aroru:pc, aroru:pc, ngo nolum lubidung, sc:kobv ngo sc:kobvm torvgsudagnc ngommci torvgsudag; odokkc sc:kobv ngom torvgsudagnc Bvmmci torvgsudag sc:kobv ngom mclvgtagji.”

Jisumc Topaknamdcm Lungornam

²¹ Cdvlo Jisubv cdcmpc lutonc, Bvk yalodc mc:pinmcngoksukang, odokkc lukanko lubito, “Aroru:pc, aroru:pc, ngom miru alaglo tolvgyc.”

²² Agom tadjvgla gvmvnnc tani:kvdv:dc akoncm akonc kangka:mvnsuto, sc:kom Bv ludungaji cdcm kinma:la.

²³ Bvk agom tadjvgla gvmvnnc tani:akonc, sc:kom Jisubv aipc mc:dagaji, Jisukc angkcng ru:yido kcyirra dungai;

²⁴ cdcmpila Simon Pitorbv Bv tadyugo:la tadka:la ka:to odokkc luto, “Lutei ngolum sck agomcm Bv ludu:ji.”

²⁵ Cdcmpila cdcmpc gc:yamna dungge:la, Jisukc angkcng kcra:do dungge:la, bv Bvm tawuto, “Ru:tuma, cdc sc:kobv:n?”

²⁶ Jisubv lubito, “Cdc bv sckkolo:pc ngo sc pitang atakscm ngo cdvlo cdcm jvbutge:la biycji.” Cdcmpila cdvlo Bv cdc pitang atakdcm jvbuttoji, Bv cdcm Juda:mc bito, Simonkc awo Iskaroitmc.

²⁷ Odok atakdok lcdupc, Satan uidc bvkkolo angkang. Jisubv bvm luto, “Okkom no ipcmna idu:ji, lomdanna ita:ka.”

²⁸ Cdcmpinamc sc:kosin kapila Bv cdcm lutoji kinmangai.

²⁹ Akke mc:to jc, lcga:dc Judangkc murkong sogcndc du:la:yam, Jisubv bvm ludungai, “Donam tv:namdok lcgangc okkom rcpcnammcnc rcta:ka;” cdcmanggom jc bv o:kaiko opankvdv:dcm bipa:do.

³⁰ Cdcmpila, atakdcm langge:la, bv vgcmpc gvlenpakkang; odokkc odo yumcdaggai.

Anu Lulvg Lunamdc

³¹ Bv cdvlo gvlenka:nc, Jisubv luto, “Su:pak tani:kc Awodcm amingvmoyc, odokkc Bvkkolo Ru:ncpvncbv amin gvkang;

³² Ru:ncpvncbv Bvkkolo amin gvka:mvlo, Ru:ncpvncbv:sin Bvm Bvk avkolo amin gvmoyc, odokkc Bv vgcmpc amin gvmoyc.

³³ Ame:onc ko:kangkvdvnga, ckvdaggom adjio:koda ngo noluk lcdulo dung. Nolu ngom mayc; odokkc Jiwukvdv:dcm ngo lunamdcmpc su:paksin ngo nolum lubidung, ‘Okolopc ngo gvdagji nolu gvmvnna:mang.’

³⁴ Ngo anu lulvgko ngo nolum lubidung, jc nolu akoncm akonc aipc mc:mvnsulangka.

³⁵ Odokkina appvng tani:yc kinyc jc nolu ngok agom tadjvgla gvmvnnc tani:yc, nolukkc akoncm akonc aipc mc:mvnsunamc du:mvlo.”

Jisubv Pitorkc Lupak Sunamdcm Luno:nam

³⁶ Simon Pitorbv Bvm tawuto, “Ru:tuma, no okolopc gvdang?” Jisubv lubito, “Ngo okolopc gvdagnc nolu su:pak gvmvnna:mang; cmpige:la nolu lcdupc gvmvnyc.”

³⁷ Pitorbv Bvm luto, “Ru:tuma, kapila ngo supak nok lcdulo gvmvnna:ma:ycn? Ngo nok lcgangc turnamscm tolvgyc.”

³⁸ Jisubv lubito, “Ngok lcgangc no turnamcm tolvgycnci? Aroru:pc, aroru:pc, ngo nolum lubidung, no lcumkopc kinmang cmna luma:sisscm, porogc kogma:yc.