GALATIANG KVDVNG 6 - ANU LUGOD N. T. (BSI)

¹ Bvrokvdvnga, tani: akonc jodi atv imurko iyc, nolu sc:kobulu yalodokki du:nc ainc asin gcla inamkokki yalokokki bvm motupa:do. Nolu avycm avyc ka:sutoka, ckvma:mvlo nolusin ankang ka:nampc iyc.

² Akonc akonkc jo:namcm jo:langka, odokkc cdcmpc Kristokc lujvglurodcm gvpvtlangka.

³ Kapila:nc jodi akonc mc:yc bv atvko, cdvlo atvkosincimang, bv avdcm avyc yadsudo.

⁴ Cmpige:la appvngcm bvkkc bvkkc agercm ankvsula kangkvsumotok, odokkc odo bvk atcro:do bottapc lubonsunamdok pa:ycpc odokkc bvk du:jon kumrv-ko:rvdo:mang.

⁵ Kapcnc appvng tani:yc bvkkc bvkkc jo:namcm jo:supa:yc.

⁶ Sc:ko agomcm poyirdagji bvm appvng ainc attarkvdv:dcm bv sc:kom poyirdagji bisumotoka.

⁷ Yadkosuyoka; Ru:ncpvncmc moyomoka:nammang, kapila:nc tani:akonc okodcmci piddonc cdcmvng bv:sin gadycku.

⁸ Kapila:nc sc:kobv bvk avkc adin amvrdok lcgangc pidycnc adindokkcm aisi:ma:ncm gadycku; cmpige:la sc:kobv Yalodokkcpc pidycnc Yalodokkcm bv lo:dvpc turnamcm gadycku.

⁹ Odokkc kajc ngolu ainc agercm gerla du:tvla gerdvryoka, Kapila:nc gaddvlo ngolu gadycku, ngolu jodi asincm mclvgma:mvlo.

¹⁰ Cdcmpidag cdcmpcmvlo, ngolukkc aipc gerpo dung, kajc ngolu appvng tani:lo:pc aincm gerrai, odokkc ncrkvgpc cdc sc:kobulu mcjvgnamlok crangkvdv:do:pc gvlai.

Lutcr Lulomclang Kumrvgsunam

¹¹ Kangkvtok kapinc bortanc do:jvgkko ngo nolukkolo:pc addu:nc ngok avkc alagkokki.

¹² Cdc cdcbulu sc:kobulu adin-amvrki kangkancm lcngkansulv:dagnc cdc gadpuknamdcm gadmoru:dag, odokkc bulum jen Kristokc kurusdo mokema:ycpc odok lcgangc.

¹³ Kapila:nc cdcmv:pci cdc sc:kobulu gadpukkosudagnc bulu avkvdv:dc lujvglurodcm lukam-dcmpc tadlv:mang, cmpige:la bulu nolumjc gadpukmolv:dag bulujen noluk adin-amvrro amin gvycpc cmna.

¹⁴ Ckvdaggom Ru:tum Jisu Kristokc Kurusdokma:pc ngokkolokkc cdc amin gvnamdc mo:tcngka:langka, odokkci rcngamscm ngokkcpc Kurusdo lvgto, odokkc ngo rcngamsokkcpc.

¹⁵ Kapila:nc gadpuknamdcmsinmang atvlcgang kvnamdc, cdcmanggom gadpukma:namdc, cmpige:la anupc ru:namdc.

¹⁶ Mcnganclang mc:yinsula aya:namdc cdc appv:do dungka:langka sc:kobulu sc lujvgsokki lambc gvdoji, Ru:ncpvnckc Israeldo.

¹⁷ Cdcmpinamki sc:ko tani:ycsin ngom moki:moatyoka; kapila:nc ngok amvrso Jisukc mogodcm tubjedcm gcbomdag.

¹⁸ Ngolum Ru:tum Jisu Kristokc ayangc noluk yalokvdv:do du:mvnka:langka, bvrokvdvnga. Amen.