GALATIANG KVDVNG 3 - ANU LUGOD N. T. (BSI)

Lujvglurroyc: Mc:jvgcyc

¹ C:i monba: ba:nc Galatiangkvdvng! Nolum sc:ko luyuton, sc:k ka:de:pc Jisumc tani:ka:de:pc kurusdo pvtketo cmna lulen-lua:la lubiton?

² Ngom scmmong nolum taumotei: Nolu yalodcm lujvglurodok agerkokki:yc torvgsukan, cdcmanggom mc:jvgla tadla:yc? Nolu odokkvdvkoi monba:ba:ncn?

³ Yalodokki gerrobge:la, nolu adin-amvrdokki gerabdu:nci?

⁴ Cddvlo agercm ikvgvkvla pangkvsuge:la cmmumpci itogvton?–cdc aroru:pci cmmuma:n.

⁵ Nolum Yalodcm bincdc odokkc mcngapla:ma:nam ager gerncdc noluk ara:do cdcmpc lujvglurodokki gerdonci, cdcmanggom mc:jvgkokki tadla?

⁶ Cdcmpinamc Abrahambv “Ru:ncpvncmc mc:jvgto, odokkc cdcm bvkkcpc dormokanamc cmna kvla lc:to.”

⁷ Cdcmpidag nolu ka:tok cdc mc:jvgnc tani:kvdv:dc sc:kobulu Abrahamkc awokvdvngcji.

⁸ Odokkc Ru:nckc agom jvgla lc:namdc, cdc ka:no:sula Ru:ncbv Bvm kinma:nc tani:kvdv:dcm mc:jvgkokki aidag cmna luyc, po:pcbong Abrahammc tadponc lutaddcm lubino:to, scmpc lula, “Nokkolo tani: opvnkvdv:dc aipaiycm pa:yc.”

⁹ Cmpila cdcmpcmvlom cdc mc:jvgnclok tani:kvdv:dc Abrahamkokki aipai pa:nc sckkc mc:jvgc du:ngaji.

¹⁰ Kapcnc sc:kobulu lujvglurodok agerkvdv:do mc:jvgla kcgc:donc pelvgnammc; kapila:nc cdcm adtag, “lujvgluro potindok adnam appv:dcm adkamdcmpc imanggvma:nc appv:dcm pelvgnampc ika:langka, odokkc cdcmbulum ima:nc.”

¹¹ Su:pak cdc kinnamcbong jc oko tani:ycsin Ru:ncpvnckc kcra:do ainc cmna lujvglurodokki lumang; kapila:nc “Sc:kobv mc:jvgkokki dormo kadagji turyc.”

¹² Cmpige:la lujvglurodc mc:jvglo du:mang, kapila:nc “Sc:kobv cdcmbulum idagji odokbulukki turyc.”

¹³ Kristobv ngolum lujvg lurodok pelvgnamdokkcm rcpvtto, ngoluk lcga:pc pelvgnampc ige:la–Kapila:nc cdcm attak, “Vsv:lo sc:kom ragsa:donc bv pelvgnampc ika:langka.”

¹⁴ Jc Abrahamkc akirba:ddc Kristo Jisukolo Ru:ncmc kinma:nc tani:kvdv:do gvangka:langka, odomvlo ngolu Yalodok pesunamdcm mc:jvgkokki pa:la:ycpc.

Lujvglurodc:lang Pesunamdc

¹⁵ Tani: lukam gvkampc luyv:sunamko lubipc, bvrokvdvnga: sc:kosin tani: akolok mc:namcm motumla:mang, cdcmpcmanggom odo moset lvgla:mang, lcko cdcm tolvgycbo:mvlo.

¹⁶ Su:pak pesunamkvdv:dcm Abrahammc pebika odokkc bvkkolokkc lennckvdv:dcm cdc lumang, “Odokkc osetnamkvdv:do:pc,” bojcrungcm lukanna; cmpige:la akkongcm lukanna, “Odokkc akolokkc lennckvdv:dcm,” sc:kobv Kristobv:ji.

¹⁷ Sc:na ngo okodcm lupc mc:du:ji: lujvglurodc, okodc lvngko appi:kolang yingum dv:tak lcdudo:pak pvnga:doji, Ru:ncpvnckc po:pcbong aidag cmnam lugotko aimang cmna lutummang, pesunamdcm mcpakpc cmna.

¹⁸ Kapila:nc jodi du:sonsunamdc lujvglurodokki ido, cdc kapcsin pesunam kvdv:dokkima:bong; cmpige:la Ru:ncpvncbv cdcm Abrahammc pesu namkokki bito.

¹⁹ Kapila cmpcmvlo lujvglurodcm bikan? Cdcm imur inamkvdv:dok lcgangc jvgsetlvgto, osetnamkvdv:dc lenma:sisscm sc:kom pesunamdcm pebikaji; odokkc cdcm taycng lutad lunckvdv:dokki lulvg-gvlvgka pongkokdok ager gernckokki.

²⁰ Su:pak pongkokdok ager gerncdc akokoncm bojcyangko; cmpige:la Ru:ncpvncbv akkongko.

Lujvglurodok Mc:la Jvgnamdok Lcgang

²¹ Cmpcmvlo lujvglurodc Ru:ncpvnckc pesunamdok birudi:yci? Cdcmpcru:mangkc; Kapila:nc jodi lujvgluro abangkoncm okodc turmodokupc bitungamvlo, cmpcmvlo dormokanamdc aroru:pc lujvglurodokki pa:yc.

²² Cmpige:la Ru:nckc agom jvggabdc appvng atvcm pa:plokkcpc tubjedcm tublvgtobong, jc Jisu Kristokolo okodcm pesubitonc cdcm sc:kobulu mc:jvgdagnc cdcmbulum biycpc cmna.

²³ Su:pak mc:jvgdc pvnga:ma:dapc ngolu lujvglurodo mokapla dungai, mc:jvgdcm lcngkanma:dapc motumna lc:tungai.

²⁴ Odomvlojen lujvglurodc Kristobv gvma:dodo:pc ngolum kanggapya:nai, jc ngolum mc:jvgkokki ainc cmna lunampc iycpc cmna.

²⁵ Cmpige:la su:pak cdc mc:jngdc pvnga:dobong, ngolu kanggabla du:namma:bong.

²⁶ Kapila:nc Kristo Jisukolo nolu mc:jvgkokki Ru:ncpvnckc awokvdvngc.

²⁷ Kapila:nc nolu cddvkonc Kristokolo baptismo pa:tonc Kristomc gcnam attarpc gcto.

²⁸ Jiwucba: Girikko odo kamang, pagbokoba: motunamko kamang, milbongkoba: nc:vgko kamang; kapila:nc nolu appvngc Kristo Jisukolo akkongc.

²⁹ Odokkc nolu jodi Kristokcmvlo, cmpcmvlo nolu Abrahamkolokkc lennc ommangc, pesunamdcmpc attar pa:pcnckvdv:dc.