GALATIANG KVDVNG 1 - ANU LUGOD N. T. (BSI)

¹ Poulbv mclvgla ager germonamko–tani:lokkcmang cdcmanggom tani:kokkimang, cmpige:la Jisu Kristokokki odokkc Abudc Ru:tumkokki, sc:kobv Bvm sikolokkom turmotokuji–

² Odokkc sc:kobulu ngok lcdulo du:ji cdc bvrrang appv:dokki Galatiangdok mondoli: appv:do:pc:

³ Nolukkolo:pc ayangc odokkc Ru:ncpvnckolokkc Abudokkc mcnganc odokkc ngoluk Ru:tum Jisu Kristokolokkc,

⁴ sc:kobv ngoluk pa:pkvdv:dok lcngangc avdcm tolvgsutoji ngolum aima:nc du:nam dv:takkvdv: sokkcm mopvtpc cmna, ngoluk Ru:ncpvnc odokkc Abudok mcngkampc;

⁵ sckkcpc amin gvnamdc lenycji lo:dcm odokkc lo:dvscm! Amen.

Tadponc Lutad Akko:dc

⁶ Ngo mcngapla:ma:pc idung jc nolu cddvko lomna mcpakdung Bvm sc:ko nolum Kristokc aya:lo gogtoji odokkc angu tadponc lutadkolo:pc mc:yotdung–

⁷ angu tadponc lutadkojc dung cdcmang, cmpige:la akke dung sc:kobulu nolu moki:moatdu:nc odokkc Kristokc tadponc lutaddcm aima:pc imolv:dag.

⁸ Cmpige:la cdcmv:pci ngoludaggomci, cdcmanggom taycngamo:tok lutad lunckodaggomci, nolum tadponc lutadko lubiyc ngolu nolum okodcm lubotonc cdcm luyotla, bvm pelvgnampc imoka:langka.

⁹ Ngolu kapc po:pc lupongkaji, cdcmpc su:pak ngo lckoda ludung, sc:koiyc nolum jodi tadponc lutadko ludung okodcm ngolu torvgsutonc cdcm angupc, bv pelvgnampc ika:langka.

¹⁰ Ngo su:pak tani:lok mclvgbinamcm madu:nci, cdcmanggom Ru:ncpvnckolokkcm? Cdcmanggom ngo tani:ycm mc:lvgsumopc cmna ikvdu:nci? Ngo tani:ycm su:paksin aipc mc:lvgsumodu:mvlo, ngo Kristokc ager gerya:ncpc ipcma:namc.

Poulbv Kapc Mclvgla Ager Germoncpc Ika:n

¹¹ Kapila:nc ngo nolum kinmoya:pc, bvrokvdvnga, jc cdc tadponc lutaddcm okodcm ngokkokki lutadtonc cdc tani:lok tadponc lutadmang.

¹² Kapila:nc ngo cdcm tani:lokkcm pa:mangai, cdcmanggom cdcm ngo poyirmangai, cmpige:la cdc Jisu Kristokc lungor lunamkokki pv:do.

¹³ Kapila:nc nolu ngok po:pckc Jiwu dormodok du:nam dagnam kindag, kapc ngo Ru:ncpvnckc mondoli:ycm kvnggv:pc ipusire:ycm ikaji odokkc cdcm momvgpc cmna ankvla kangka, odokkc;

¹⁴ odokkc ngo Jiwu dormodo ngoluk tani:kvdv:dok abvng abvngya:nckvdv:dok bojcrungcmyam ibatgvbatto, ngok abukvdv:dok itcnggvtcng kvdv:dok lcgangc cdcmpcjc ngo anguru:pc gvdunganc.

¹⁵ Cmpige:la cdvlo Bv ngom oma:dapc angup badmotonc, odokkc Bvk ayangkokki ngom gogtonc,

¹⁶ Bvk Awodcm ngom lcngkannvngkang, cdcmpc ikang jc ngo jen Bvm Ru:ncmc kinma:nc tani:kvdv:dok ara:lo lutadbigo:ycpc cmna, ngo adin amvrkokki lumangai,

¹⁷ cdcmanggom ngo Jerusalempc ngomyam gvpo:nc mclvgla ager germonam kvdv:dcmyam gvpo:la gvmangai, cmpige:la Arabia:pc gc:rla gvpakto; odokkc lckoda ngo Damasku:pc gvlattoku.

¹⁸ Odokkc dv:tak tagum lcdudo ngo Jerusalempc gvka Kepa:mc gvla ka:pc cmna, odokkc bvk lcdulo dv:tak tagyvngkolang tagngoko du:to.

¹⁹ Cmpige:la ngo ake mclvgla ager germonamkvdv:dok akosin ka:begtomang Ru:tumkc bvro Jakobkc atcro:dok bahire.

²⁰ (Okokokki nolukkolo:pc addu:nc, Ru:ncpvnckc kcra:lo, ngo lume:ycm lumang!)

²¹ Odokkc ngo Siriangclang Silisiang dunggo:ycgo:do:pc gvto.

²² Odokkc ngo odosin ngom Kristokc mondoli:kvdv:dc Judiadok ka:de:pc kinmangada; bulu tadlangong dungai cdcm ludag,

²³ “Sc:kobv lekkem ngolum ipusire:ycm ikaji su:pak lcko bv momvgpc cmna anka:nam mc:jvgdcm lutadbigo:dung.”

²⁴ Odokkc bulu Ru:ncpvncmc amincm gvmoto ngokkokki.