2 TIMOTI 1 - ANU LUGOD N. T. (BSI)

¹ Poulbv, Ru:ncpvnckc mcngkamdcmpc Kristo Jisukc mclvgla ager gerncko turnamdo pesunamdo:pc okodc Kristo Jisukolo du:ji.

² Timoti:kolo:pc, ngok aipc mc:nam awodo:pc. Ayangc, mc:yinsunamc, odokkc mcnganc Ru:tumkolokkc cdc Abudokkc odokkc Kristo Jisu ngoluk Ru:tumkolokkc.

Aipai Binamc Odokkc Asin Bottadopc Lusv:nam

³ Ngo Ru:ncpvncmc aipai bido sc:kom ngo narc:pc mc:nam-sagnamki agercm gerbodoji, kapc ngok abukvdv:dc ika:ji, cdvlo ngo mcma:pc ngok kumkolo mc:pa:doji.

⁴ Kapc ngo noluk miksikvdv:dcm mc:pa:doji, ngo yummcm longgcm asinang ola dung nolum ka:lvla, jen ngo mc:po bi:ycpc.

⁵ Ngom noluk mc:juppc mc:jvgnamdcm mc:pa:motok, cdc nok ya:yo Loiskolo dunga:danna mc:jvgdcm dunganc odokkc nok anc Iunisekolo odokkc su:pak, ngo su:pak kindagrung, nokkolo dung.

⁶ Cdcmpidag ngo nom mc:pa:modungku cdcm Ru:ncpvnckc aman binamdcm lckoda dorsa:modokupc cdc nokkolo ngok alak pigapnamdokki du:namdcm.

⁷ Kapcnc Ru:ncpvncbv ngolum pcsonc yaloko bimangai cmpige:la ilang-gvla:nc yaloko odokkc aipc mc:namc odokkc avycm mentumsula du:namko.

⁸ Cdcmpidag anyi:yoka odokkc ngoluk Ru:tummc lukanbipc, cdcmanggom ngom bvk makana:lo tumnamno, cmpige:la tadponc lutaddok lcgangc Ru:ncpvnckc ilanggvlangki du:g gvla lubilangka,

⁹ sc:kobv ngolum moturtonc odokkc ngolum angunnc gognamki gogtonc, ngoluk aipc ager gernamkokkimang cmpige:la Bvk avkc mc:jongkokki mcngkampc odokkc dv:takkvdv:dok po:pcbong cdc oko aya:dcm ngolum Kristo Jisukolo bitoji,

¹⁰ odokkc su:pak ngoluk Moturnc Kristo Jisukc lennamdokkc lcngkantag, sc:kobv sinamcm la:paktonc odokkc turnamclang lo:dv longkvpc dornc mcrupc tadponc lutaddokki.

¹¹ Sc tadponc lutadsok lcgangc ngom lutadbigo:ncpc agercm togc:lvgtungai odokkc cdcmpidag ngo ipusire:ycm pa:do ngo kapc idoji.

¹² Cmpige:la ngo anyi:mang, kapcnc ngo kindag sc:kom ngo mc:jvgdoji, odokkc ngo kindagrung jc Bv cdc Longcdc pvnga:dodo:pc ka:ribomla du:la:dag okodcm ngom lugablvgtagji.

¹³ Aropc ainc agomkvdv:dok lukamdcmpc tattoka okodcm ngokkolokkcm tadtoji, mc:jvgdo:lang aipc mc:namdo okodc:bulu Kristo Jisukolo du:ji;

¹⁴ Angunnc Yalodokki oko arodcm nom togc:lvgtaganc aipc mc:toka okodc ngolukkolo du:ji.

¹⁵ No kinna dung jc Asia:do du:nc appv:dc ngokkolokkc gvpakka, odokkc buluk ara:lok Pigelu:bv odokkc Hermogenebv.

¹⁶ Ru:tumbv aya:pc mc:yinsunamcm Onesiporu:kc cra:dcm bika:langka, kapcnc bv ngom mcna: mcna:pc du:rasumoto idvrsisongcm la:pakto; bv ngok ikoli:ki kognamdcm anyi:mangai,

¹⁷ cmpige:la cdvlo bv Ro:mdo gv:pv:tonc bv ngom kvnggv:pc asinang ola mago:to odokkc ngom pa:to–

¹⁸ Ru:tumbv bvm mc:yinsunam pa:dopc bika:langka Ru:tumkolokkc odo Longcdo–odokkc nom aipc kinbu:la bv Ipesu:do appvng agercm gerla:yam.