1 KORINTIANG KVDVNG 14 - ANU LUGOD N. T. (BSI)

Yalodokkcm Pa:nam Aman Pa:tcmnam

¹ Noluk turnamsok kanggoddcm aipc mcnamdcm itoka, odokkc kvnggv:pc taycng among aman binam kvdv:dcm pa:pc cmna mc:toka, anguru:pc nolu jen lungordcm ludopc.

² Kapila:nc sc:kobv agom ludonc angu angomki tani:ycm lumang cmpige:la Ru:ncmc ludag; kapila:nc sc:kosin bvm tadkinmang, cmpige:la Yalodo tadngak sunamcm jc:la ludag.

³ Odok kekonpc, sc:kobv lungorcm ludoji tani:kvdv:dcm buluk mosa:nam lcgangc odokkc asin pvtadopc mcnggcnam lcgangc odokkc lckko:pc du:nam lcgangc.

⁴ Sc:kobv angu agomki agomcm ludagnc bv avdc avdcm lusv:sudag, cmpige:la sc:kobv lungorcm ludonc mondoli:dcm bojcla gvdopc lusv:dag.

⁵ Su:pak ngo nolu appvngcm angu agomki lutoka cmna mc:dag, cmpige:la cdcmyam luya:toka. Sc:kobv lungorcm ludonc sc:kobv angu agomki ludonc bvm bottaya:dag, sc:koiyc lukonsubiru:ma:mvlo, odomvlo jen mondoli:dc aiya:la gvdopc.

⁶ Su:pak bvrokvdvnga, ngo jodi nolukkolo:pc angu agom lula gvyc, kapc ngo nolum avmoycm ngo asudko lcngkanko cdcmanggom kinnamko cdcmanggom lungor lunamko cdcmanggom poyirko nolum pobima:mvlo?

⁷ Cddo:ma jodi turnam kama:nc munnamc, cdc tu:lungc cdcmanggom gunggangc, tadkindopc mudma:mvlo, kapc akonmumc okodcm muttoji kinycn?

⁸ Odokkc mimag tu:lu:dc tadkinna:ma:dopc bc:mvlo, sc:konu mimag mokapc lenycn?

⁹ Cdcmpc nolu av avkvdv:dc:sinci; nolu angu agomki tadkinla:ma:nam agomcm luyc, kapc okkom lutoji kinycn? Kapila:nc no esarlo:pc luyc.

¹⁰ Mcngctpcnam kamang mo:pvso bojcrungko angu angu agomc dung; odokkc akosin lunamdok arc kama:pc imang;

¹¹ cmpige:la ngo jodi agomdok arcdcm kinma:mvlo, ngo luncdokkcpc ami amo:lok tani:pc iyc odokkc luncdc ngokkcpc ami amo:lok tani:pc iyc.

¹² Cdcmpidag noluk avkcpc; nolu Yalodok lcngkansunamdcm kvnggv:pc mc:dag, mondoli:do mosa:lvgpc aipakpc mcma:ru:pc akoncmyam akonc gvgctoka.

¹³ Cdcmpidag, sc:kobv angu agomki ludonc lukonsubinam lulanggvla:namdok lcgangc kumpa:do.

¹⁴ Kapila:nc ngo jodi angu agomkokki kumyc, ngok yalodc kumdag cmpige:la ngok asindc apv-a:ycm pa:mang.

¹⁵ Okkom ngo ipcnammcn? Ngo yalodokki kumyc odokkc ngo asindokkisin kumyc; Ngo yalodokki ni:tom moyc odokkc ngo asindokkisin ni:tom moyc.

¹⁶ Ckvma:mvlo, no yalodokki akirba:d bimvlo, kapc akonc ru:yolokkc dungkodok du:ncdc lula:ycn “Amen” dcm noluk aipai binamkvdv:dcm no okodcm ludu:ji cdcm kinma:dodcm?

¹⁷ Kapila:nc no pv:namkopc aipai biycipc, cmpige:la akon tani:dc kinmvnma:da.

¹⁸ Ngo Ru:ncpvncmc aipai bido jc ngo nolug appv:dcmyam abayangko angu agomki agomcm ludo.

¹⁹ Cdcmpc idaggom imanggom mondoli:do ngo asinbokki gomug pirngoko ngo luya:yc, ammem luyirnam lcgangc, lv:yvng vyvngkopc angu agomki lunamdcmpcyam.

²⁰ Bvrrangkvdvnga, noluk asinc ko:ka:pc iyoka; aima:nc agerlo onam kowawpc ilang, cmpige:la mc:namsagnamlo sv:titsunncmpc itoka.

²¹ Lujvglurodo cdcm adtak, “Mcngapla:ma:nc angu agom lunc tani: kvdv:dokki odokkc ami amo:lok tani:kvdv:do nabberkokki sc tani:kvdv:scm agomcm luyc, odokkc anki odo bulu ngom tadma:yc, Ru:tumbv ludag.”

²² Cdcmpc idag, angu agom lunamkvdv:dc mc:jvgnclok lcga:pc kanggodmang cmpige:la mc:jvgma:nclokkc, cdcmpc lungor lunamdc mc:jvgma:nclokkcpc cmpige:la mc:jvgnclokkcpc.

²³ Jodi, cdcmpidag mondoli: appv:dc gvkumsuyc odokkc appv:dc ru:yolok du:nckvdv:dc cdcmanggom mc:jvgma:nc kvdv:dc gva:yc, bulu luma:yclang jc nolu simaddag cmna?

²⁴ Cmpige:la appvngc jodi lungor luyc, odokkc mc:jvgma:nckonc cdcmanggom ru:yolok tani:konc gva:yc, bv appv:dokki mcnga:yc, bv appv:dokki ka:dopc gogtak,

²⁵ bvk asinbok kinma:dopc lc:nam agom appv:dokki lulenamdo; odokkc cdcmpidag, bv: obumla owa:la bv Ru:ncpvncmc kumyc odokkc lulenyc jc Ru:ncpvncbv aropakpc ngoluk ara:so dung.

Mondoli:do Aipc Du:nam Dagnam

²⁶ Cmpcmvlo okkon, bvrrangkvdvnga? Cdvlo nolu gvkumsudonc, appvngkc mc:jvg ni:tomko du:do, luyir agom ako, lungor agomko, gomug lunamko, cdcmanggom lukur lule:la lunamko. Appvng agercm aiya:la gvnamlcgangc gerka:langka.

²⁷ Akonc jodi angupc lunam gomugki luyc, odo anyiongkoba: aipakpc du:ycm awumongko dungka:langka, odokkc akoncm lukurla lumotoka.

²⁸ Cmpige:la akosin lukonsula lubinc kamang, mondoli:lobuluk appv:dcm aso:pc du:motoka odokkc bvm avycm lusumotoka odokkc Ru:ncpvnckolo:pc.

²⁹ Anyikoba: awum lungor lunncm lumotoka, odokkc akedcm asino:bo mcngka:la ka:motoka okodcm lutoji.

³⁰ Lcngkannamko jodi kcra:dok du:nc ako lcngkantomvlo, dunga:po:ncdcm aso:pc du:motoka.

³¹ Kapila:nc nolu appvngc lungorcm akon lcdulok akonc lula:dag, odomvlojen appvngc tadyirsuycpc odokkc appvngc bottapc mc:suycpc;

³² odokkc lungor luncdok yalodc lungor lunanckvdv:dokkc.

³³ Kapila:nc Ru:ncpvncbv mc:mur mcyarnclok Ru:ncpvncmang.

³⁴ Ainc yalokanc tani:kvdv:dok mondoli:kvdv:doggvngkcmpc, nc:ngkvdv:dc mondoli:kvdv:do aso:pc du:pcnammc. Kapila:nc bulum ngom ludopc lulangcm bimang, cmpige:la idum gvdumsuncpc ipa:do, lujvg lurodo lukamdcmpc.

³⁵ Bulu atvko kinpc mc:namko du:ycmvlo, buluk milbongkvdv:dcm okumno tawumotoka. Kapila:nc mondoli:lo nc:ngc agom lunamdc anyi:pcnamc.

³⁶ Okkon? Nolukkolo Ru:ncpvnckc agomdc lenpo:do tadpangkayc cdcmanggom nolloi cdcm pa:nckvdv:dc?

³⁷ Akonc jodi bv lungor luncko cmna mc:suyc, cdcmanggom yalo agom lukampc gvncko, bv togcsupa:do jc nolukkolo:pc ngo okodcm do:jvg jvgtu:ji cdc Ru:tumkolokkc kvnggv:pc lulvgc.

³⁸ Sc:kaiyc jodi scm kangkinma:yc, bvm kangkinma:yc.

³⁹ Cdcmpidag ngokkc bvrrangkvdvnga, kvnggv:pc lungor lupc cmna mc:langka, odokkc angu gomugki agom lunam kvdv:dcm mc:yoka;

⁴⁰ Cmpige:la appvng agercm kvbkab-cmdopc odokkc narc:pc:sc:pc gerrangka.