Zechariah 7 - Ohiatonhseratokénti

Ne Roiá꞉ner Rahrewáhtha Ne Iáh Tehioriwahtó꞉ken Nahiakahwenhtontiéthe

¹ Ne kahieríhaton sihioserahthá꞉tse né꞉tho Darius shihakoráhra, né꞉ne kaieríhaton shiwenhniserá꞉te ne tiotonháton niwenhnitahkéhatie (né꞉ne Kislev), ne Roiá꞉ner tahá꞉kon ne aterihwahnhothá꞉tshera.

² Nonhkweshón꞉a ne Bethel nón꞉we iehonwahnahteniéton ne Sharezer tánon ne Regemmelech tánon ne rahonnonhkweʼtashón꞉ʼa ne rahonnonhshathokentikówahne ne Roiá꞉ner Roshatstenhserowá꞉nen nahonterén꞉nahien ne Roiá꞉ner rahohiathateríhtshera

³ tánon nahonwahthirihwanón꞉tonhse ne rohthikhá꞉res ó꞉ni ne rothitokénhse kí꞉ken karihwanonhthóntshera: “Tehiothonwenhtióhon ken ne iahiakwathashón꞉theren tsi ionkwahtsionniónkwen tsi nikanonhsahríhshion ne ionterenhnahienthákwa, ne tsi ionkwenthontiétha tiotkonhón꞉we ne wískhaton niwenhnitahkéhatie tsi nihionkwahiéren ó꞉nen wé꞉so iosehráhke nitsiawéhnon?”

⁴ Ne kí꞉ken ne Roiá꞉ner rahoterihwahnhothátshera tsi niwahtienáhon.

⁵ Wahèn꞉ron, “Shehró꞉ri nonhkwehshón꞉ʼa ne tsi ionwenhtsá꞉te ó꞉ni ne rothikhá꞉res ne nó꞉nen rohnenhthontiéthon ó꞉ni rohnhatsiónnion ne wískhaton ó꞉ni ne tsathá꞉khaton niwenhnì꞉thare tsi náhe kí꞉ken tsáta nihioserá꞉ke kèn꞉ne, iáh Í꞉i tehiontʼsennhowahnákʼthon.

⁶ Ó꞉ni nó꞉nen tehonatskáhon ó꞉ni rothinekí꞉ren, kwáh rohnonhákok ronthahtehiáre.”

⁷ Ken nahó꞉ten ne Roiá꞉ner rá꞉wenh rohnonhà꞉ke ne thothihénton rothitokenséhakwe ne thóh sonthakahá꞉wi ne Jerusalem kwáh í꞉ken tsi iokwahtiehʼne ó꞉ni ionthonkwethakáhthekwe ó꞉ni iakotiohkowá꞉nenhne iáh kahná꞉thakon kók tehienahkeréhkwe ók kahnhatakʼthóntie ó꞉ni, ók ki ó꞉ni nenhtieʼnéhsons nokwá꞉ti ionwenhtsiakérons ó꞉ni ne tsi tiononhtharón꞉nions ne tsi iaʼtewatshéntos.

Iáh Tehiontewenhnaráhkwa, Ne Iorihonní꞉hon Tsi Iakonahkeráhkwen

⁸ Ne Roiá꞉ner ne kí꞉ken nateriwahnhothátshera tó꞉wih ne Zechariah:

⁹ “Wahón꞉niseh tsi náhe tetʼkhehiá꞉wi nakonkweʼtahshón꞉ʼa ne kaianerénhseras: ‘Kwáh shaterihwahién꞉ni tkariwahié꞉rik tsi ihshá꞉tst ne kaianerénhsera, ó꞉nenhk tsi enshé꞉neste ne kanoronhkwátshera ó꞉ni natanitenráhtshera tsi natesehwátere.

¹⁰ Tó꞉sa shetensté꞉ten ne ionahteréhons, ne tehiontonnhakárhias, ne thihononhontsá꞉te ne skátke sehwanáhkere, tó꞉ka ó꞉ni nónhka thé꞉nenh tahiakothonwenhtsó꞉nike. Tánon ó꞉ni tóhsa thé꞉nen sehwateʼnikonhrón꞉ni ne tahisehwatatʼkahré꞉wahte.’

¹¹ “Ók nakonkweʼtahshón꞉ʼa kwáh wahontenonhtsistatʼshá꞉te iáh tehonatʼthontháton nahonthahonshá꞉thate. Wahonteʼnikonrahnhó꞉ton

¹² tánon wahonterhiashaní꞉rahte tsi ní꞉ioht nonén꞉ia. Tiorì꞉wa tsi iáh tehonahtahonshatáhton ne karihonnienhní꞉tshera iewahkatheniénton rononhà꞉ke ne rotitokenséhakwe ne rohnónhnhekwe wahón꞉niseh tkèn꞉ne, kwáh í꞉ken tsi onhkenhákwen.

¹³ Tiorì꞉wa tsi iáh tehonatahonshatháton nó꞉nen enkathá꞉ti, iáh thatekherihwasherahkwén꞉ni nó꞉nenh enhonterén꞉naien.

¹⁴ Ne teskaieróntahre ne tehioweratá꞉se tahkherahthakwáhte tsi nón꞉we ionhshahathinahkérahte ne thitionhontsá꞉te. Kí꞉ken ne iowenhtsí꞉io kwáh ontkénsthe kwáh iáh ónhka tetienahkeréhkwe.”